Zaragoza acueye les "XXII Chornadas d'as Luengas d'Aragón"

Del 13 al 21 d'abril nel Centru Cultural Joaquín Roncal.

La edición d'esti añu d'estes veteranes xornaes, entamaes pola Asociación Nogará-Religada,  van cuntar cola participación d'una bayura de ponentes, que van tratar dende'l papel del aragonés na prensa, a cuestiones lliteraries, proyeutos de turismu llingüísticu, visites guiaes, o la necesidá de reabrir la llinia de ferrocarril Canfranc-Oloron. 

Amás d'ello, van cuntar con una amuesa en direutu de dellos programes radiofónicos qu'empleguen l'aragonés como llingua vehicular.

Fonte: Infoasturies

L'Academia de la Llingua fina esti xueves les sos Xornaes

   L'Academia de la Llingua Asturiana pieslla ESTI XUEVES 6, na Facultá de Filosofía y Lletres de la Universidá d’Uviéu, les XXXIII Xornaes Internacionales d’Estudiu. Les Xornaes tuvieron ayeri como protagonista la propuesta d'Inaciu Galán d'adautar los actuales estudios d'asturianu p'adultos al sistema européu homologáu.

L’Academia de la Llingua Asturiana celebra estos díes les XXXIII Xornaes Internacionales d’Estudiu na Facultá de Filosofía y Lletres de la Univerisdá d’Uviéu y dientro d'elles Inaciu Galán, profesor, periodista y presidente d'Iniciativa pol Asturianu propunxo ayeri una “Adautación del enseñu d’asturianu al Marcu común européu de referencia pa llingües”. Nesta comunicación compartió col públicu la so idea sobre los pasos a dar pa la homologación de los niveles de conocencia de la llingua asturiana dientro del marcu común européu.

   Dende l'añu 2001 la mayor parte de les llingües europees vienen adautando los sos niveles d'enseñu p'adultos a esti nuevu marcu, cada vegada más xeneralizáu y conocíu pola so graduación en niveles dende l'A1 hasta'l C2. Galán quier animar con esti trabayu a les instituciones asturianes a dar los pasos que permitan homologar col Marcu de Referencia Européu pa Llingües los actuales niveles de reconocencia establecíos pola Academia de la Llingua Asturiana y otres entidaes como la Universidá d'Uviéu.

   L'establecimientu del nuesu sitema permitiría una meyor identificación de los niveles de conocencia y de les competenencies de los usuarios, de cara al establecimientu de niveles de conocencia pa les places de funcionariáu, que dende l'aprobación de la Llei d'Usu del Asturianu de 1998, pueden tener al asturianu como unu de los baremos a tener en cuenta.

   Les xornaes finen esti xueves coles comunicaciones de Clara Elena Prieto Entrialgo; Pablo Suárez García; José Antonio Méndez Sanz, Adolfo García Martínez & José Ángel Gayol; Alberto Gómez Bautista; Manuel de Abol-Brasón; Xulio Llaneza Fernández; Xuan Xosé Lajo y Loreto Díaz Suárez que van desenvolvese ente les 14 y les 16 hores.

   Darréu d’estes comunicaciones dirá la ponencia de los profesores Margarita Fernández Mier (Universidá de Lleón) y David González Álvarez (Universidá Complutense) «Una arqueoloxía pal paisaxe rural asturianu». Les Xornaes pesllarán cola conferencia de la profesora Coloma Lleal Galcerán (Universidá de Barcelona) titualada «Ideología lingüística y lexicografía».                                                             Fonte: asturies.com

XII Xornaes de Lliteratura Infantil y Xuvenil de Samartín del Rei Aurelio

Les XII Xornaes de Lliteratura Infantil y Xuvenil de Samartín del Rei Aurelio entamen en payares con talleres y teatru. Les XII Xornaes de Lliteratura Infantil y Xuvenil de Samartín del Rei Aurelio dirixíes a escolinos de toles edaes entamen el próximu llunes 4 de payares cola principal novedá d’esti añu de los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu. La Conceyalía de Cultura, Educación, Igualdá y Deportes de Samartín del Rei Aurelio va celebrar esti mes de payares la décimosegunda edición de les sos Xornaes de Lliteratura Infantil y Xuvenil. La programación inclúi espectáculos teatrales, talleres infantiles y esposiciones dirixíes a los escolinos del conceyu colos que se pretende fomentar los vezos llectores y foi presentada esta selmana nel Ayuntamientu de SMRA. “Estes xornaes abarquen les artes escéniques y les lletres cola finalidá d’animar a la llectura a la infancia y la mocedá. Naguamos por educar dende l’entretenimientu con una programación de calidá, acercando a la población escolar les últimes producciones teatrales y lliteraries. Tamién queremos sorrayar les creaciones de los autores del conceyu” señaló la conceyala de Cultura, Educación, Igualdá y Deportes, Gema Suárez nesta presentación na que tuvieron tamién presentes representantes de les asociaciones collaboradores. La principal novedá d’esti añu son los talleres de llectura entamaos dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil del conceyu. Nellos van llevase a cabu xuegos y actividaes rellacionaes colos llibros “Marta y el peludín de Carrandi” de Chechu García y “Tapín de Picupáu” de Pablo Rodríguez Medina. La inscripción nestos talleres ye de baldre y van desendolcase tolos vienres del mes de payares a les 6 de la tarde na Casa de la Xuventú de Sotrondio y na Casona del Bravial de Blimea respeutivamente. En cuanto al teatru van representase nel Teatru Municipal obres destinaes a tolos ciclos de primaria, como “Un gallinero en la azotea”, “Cuatro hojas y la máquina fantabulosa”, “Por las nubes” o “El pelegrín valiente”, adautación esta última del cuentu d’Antón García fecha pola compañía Nun Tris Teatru. Tamién va haber teatru nes escueles infantiles cola obra de Carlos Alba “Sol, luna, arriba y abajo”. Les xornaes complétense coles esposiciones sobre’l llibru “Mieu” nel colexu d’El Bosquín de L’Entregu y la muestra “Hai una ringlera trazada”, sobre los escritores del conceyu, que se va poder visitar na Casa de la Xuventú de Sotrondio y na Casona del Bravial. Fonte: Asturnews

XI Xornaes de Lliteratura Infantil y Xuvenil en Samartín del Rei Aurelio

Entamen les Xornaes de Lliteratura Xuvenil en Samartín del Rei Aurelio


La Conceyalía de Cultura, Educación, Deporte organiza les XI Xornaes de Lliteratura Infantil y Xuvenil que se van a celebrar a lo llargo d’esti mes. El programa d'esta edición ye heteroxéneu en cuantes a que contién cine, teatru, esposiciones y lliteratura, pero toos estos xéneros xiren alredor del terror que fai de filu conductor d'estos alcuentros lliterarios. Güei a les 18:30 de la tarde ábrense cola inauguración de la esposición del llibru MIEU, escritu por Milio’l del Nido y con ilustraciones d’Alberto Sastre. Na inauguración van tar presentes Ángela Sánchez, de la Editorial Pintar-Pintar y Gema Suárez Torre, conceyala de Cultura de Samartín del Rei Aurelio.

L'envís d'estes xornaes pasar por impulsar vezos de llectura y creativos ente’l públicu infantil y xuvenil pente medies de el so aproximamientu al mundu de les lletres, les arte escénicas o'l cine dende una perspectiva recreativa y coles mesmes educativa.

Les xornaes son tamién una escelente oportunidá pa conocer novedaes en lliteratura infantil y xuvenil y facer un repás a los trabayos que nos últimos años tán produciendo nel xéneru del terror, en medios como la radio, el cine, el teatru o'l cómic.

El programa va rematar el 28 de payares, con conteníos en llingua asturiana y castellán.

El martes 13 tendrá llugar la proyección de la película “La nueche de los muertos viviente”, un clásicu del géneru de terror del añu 1968 y que se puede revisar agora n'asturianu gracies al doblaxe de Gonzali Producciones. La proyección fadráse na Casona del Bravial a les siete de la tarde. La entrada ye llibre y gratuita.

La viniente selmana, el miércoles 21 de payares tendrá llugar una charra a cargu del escritor Chechu García titulada “Terror n’asturianu” y na que se llevará a cabu un repás de tolo que se fizo y se ta faciendo col xéneru de terror en llingua asturiana, tanto nel ámbitu lliterariu como n'otros como'l cómic, la radio, la televisión o'l cine. Esta actividá celebraráse tamién na Casona del Bravial.

El día 28 la Casona del Bravial acueye un alcuentru con Milio’l del Nido, autor de los testos del llibru infantil Mieu, que cunta la hestoria de dos hermanos que se treslladen colos sos padres a una casona antigua al pie d'un faru nel que comiencen a asoceder fechos estraños. Na presentación l'autor tará acompañáu por Ángela Sánchez, de la Editorial Pintar-Pintar.

A toes estes actividaes que se celebrarán na Casona del Bravial hai qu'añedir tamién les representaciones teatrales que tendrán llugar nes escueles d’escolinos. El martes 6 de payares Carlos Alba representará la obra “Un cuentu, un arrullu, un cantar”, a les 10:30 na escuela infantil d'El Apurro y a les 11:30 na de Sotrondio.

Tamién habrá representaciones pa los centros escolares nel Teatru Municipal de Samartín. El martes 13 Con Alevosía Teatruo representará “Tristán y Pauletta”. Tomen el relevu Tras la Puerta Títeres, que representarán el xueves 15 “Malas Palabras”. P'acabar, el miércoles 21 de noviembre Callejón del Gato representará “Semillas de Cardamomo”. Toles representaciones serán a les 11:30 de la mañana.

Más información: Programa completu d’actividaes de les Xornaes

Fonte: Asturnews

Corvera entama unes xornaes sobre l'audiovisual n'asturianu

El Serviciu de Normalización Llingüística de Corvera entama unes xornaes sobre l'audiovisual n'asturianu, que van desarrollase ente'l 24 y el 26 d'ochobre en Les Vegues, Corvera. Toles proyecciones, que son de baldre, van facese na Sala d'Arte del Centru Sociocultural de Les Vegues, a les 19 hores.

L'actividá va empezar el 24 d'ochobre cola proyección de curtiometraxes de Pablo Quiroga -depués va facese un alcuentru col director-. Un día depués van proyectase los tres primeros episodios de la web serie Chatarrona, producida por Ámbitu Audiovisual. El 26 d'ochobre, les xornaes van acabar cola proyección de la película McLintock, western protagonizáu por John Wayne y Maureen O'Hara y dobláu al asturianu por Gonzali Producciones.

Fonte: Les Noticies

Xornaes Lliteraries nel Arcu Atlánticu

L’Arribada va presentar esti martes les actividaes de les Xornaes Lliteraries nel Arcu Atlánticu


por Pablo R. Guardado

El sábadu va principiar la primer edición del Festival Arcu Atlánticu, que va tener una estaya dedicada a la lliteratura. L’Asocación Cultural L’Arribada presenta’l martes toles actividaes previstes nes Xornaes Lliteraries nel Arcu Atlánticu.

Estes xornaes van desendolcase ente’l llunes 23 y el sábadu 28 nel Centru de Cultura Antiguu Institutu y van mirar hacia Portugal, país al que ta dedicáu la edición inaugural del Festival Arcu Atlánticu impulsáu pol edil xixonés d’Educación, Cultura, Mocedá y Festexos, Carlos Rubiera. Asina, autores del país lusu como José Pedro Katzenstein, Ana Vidal o Daniel Gouvieavan tar presentes en Xixón pa presentar les sos obres, eventos a los qu’hai que sumar otres munches actividaes venceyaes con Portugal.

La cultural del país tamién va tener un protagonismu especial nes Xornaes Lliteraries nel Arcu Atlánticu, con presentaciones de llibros, música, proyeiciones o la representación de la ópera infantil de Mozart ‘Los amorinos de Bastián y Bastiana’. Amás, va entamase una esposición entitulada ‘Nosotros los cantábricos’ que recueye trenta semeyes del mar Cantábricu roblaes pol fotógrafu y submarinista castrillonense Xuacu Álvarez. Tolos detalles de la programación d’esta estaya del Festival Arcu Atlánticu van dase a conocer mañana, a les 12.30 hores, nel salón de recepciones de la Casa Conceyu.

Vagamar, del 10 al 15 de setiembre

L’alcuentru setembrín qu’entama L’Arribada, Vagamar, va tener llugar esti añu del 10 al 15 de setiembre. La sétima edición d’esti eventu va dedicar trés xornaes a la ‘Lliteratura asturiana en femenino’ y otres dos a la ‘Novela negro n’asturianu’ y ‘Fantaterrorífico, ente la lliteratura y el cine’. Amás va haber espacios pal haiku, forma de poesía tradicional xaponesa, y pa la música, el cine y la presentación de les novedaes últimes na lliteratura asturiana.

Fonte: Asturies.com

El PP de Xixón organiza una xornada sobre lliteratura y cultura asturianes

El llunes que vien, 18 de xunu, la estaya de la muyer del PP de Xixón entama una Xornada de Lliteratura y Cultura Asturianes nel Centru Cultura Vieyu Institutu. L’entamu será a les once la mañana cola presentación de la xornada, por Pilar Fernández Pardo (presidenta del PP de Xixón) y Elena González (resposnsable de la Estaya de la Muyer). Darréu podrá sentise la conferencia “Introducción a la etnografía asturiana” pol investigador Alberto Álvarez Peña y proyectaráse’l documentos “Rincones secretos: Mitología de Asturias”, d’unos 22 minutos. A les 12:45 entamará l’últimu de los actos, una charra de l’Academia de la Llingua Asturiana titulada “Trés décades d'estudiu, promoción y defensa del patrimoniu llingüísticu”, que cuntará cola intervención d'Ana María Cano González, presidenta de la institución, y l’académicu Xosé Antón González Riaño. Pela tarde proyectaráse’l documental “A bruxa de Brañavara” de 40 minutos de duración. Darréu celebraráse una mesa redonda titulada “Introducción al doblaxe cinematográficu en llingua asturiana”, pol xestor cultural Humberto Gonzali y cuntando cola participación del actor Antón Caamaño y del realizador Illán Gonzali. Darréu proyectaráse “Esbilla de cinema n'asturianu”, uno venit minutos con una selección d'escenes correspondientes a cuatro xéneros cinematográficos distintos: infantil, cine negru, western y fantásticu. La xornada va rematar cola conferencia “Lliteratura asturiana en femenino. Muyeres escritores n'asturianu y en gallego-asturianu”, pola poetisa y narradora Aurora García Rivas. Fonte: Asturnews

L’asturianu nunes xornaes sobre internet y diversidá llingüística en Bilbo

L’asturianu presente nunes xornaes sobre internet y diversidá llingüística en Bilbo. L’Academia de la Llingua Asturiana unvía como representante a Héctor García Gil a les xornaes “Internet y la promoción de la diversidá llingüística”, que se celebren en Bilbo esti xueves 17. La so participación va titulase “Llingua asturiana y NTIC: revision y perspectives”, amás de formar parte de la mesa d’alderique final, moderada pol vascu Luistxo Fernández. Les xornaes organízales la Cátedra Unesco de Patrimoniu Llingüísticu Mundial de la Universidá del País Vascu y n’elles van tar presentes representantes de comunidaes indíxenes de Méxicu y Nueva Zelanda, Gales, Aragón y Frisia. Fonte: Asturnews

Xornada sobre la EuroCarta

Nun congresu sobre les llingües minoritaries europees n'Euskadi, los espertos coinciden en que onde se tien aplicao la Carta Europea de les Llingües Rexonales o Minoritaries eses llingües se tienen fortalecío. El retu, que más países la roblen y l’apliquen.

184 llingües que se falen en 23 estaos miembros del Conseyu d’Europa benefíciense na actualidá de la cobertoria que-yos ufre a efeutos de proteición y promoción la Carta Europea de les Llingües Rexonales y Minoritaries. La CELRM -tamién conocida como Eurocarta-, ye’l preséu concebíu fai más d’una década pol Conseyu d’Europa pa, en nome de la diversidá llingüística y cultural del continente, velar poles llingües que nun son les oficiales de cada estáu y polos drechos de los sos falantes.
Otres tantes llingües que se falen na otra metada de los 47 estaos que formen parte del Conseyu d’Europa, nun puen apelar a la Eurocarta, yá que munchos de los estaos miembros -ente ellos países con una considerable complexidá llingüística, como Francia, Bélxica o Italia- nun la tienen roblao.
Poles conclusiones que solliñaron los espertos axuntaos en Bilbo nuna xornada sobre la Carta organizada pol Conseyu d’Europa, los gobiernos vascu y central y la UPV, la diferencia nótase. Porque, pesia que la Carta nos sos aspeutos práuticos ye una mena de menú que nun ye preciso consumir enteru -los estaos que la roblen tienen que comprometese a cumplir un mínimu de 35 dimposiciones de les 65 que contempla nos más variaos campos de l’actividá pública y privada-, ellí onde se tien aplicao les llingües minoritaries foron reforciaes.
Al contrariu de lo qu’ocurre con munches de les llingües europees que carecen de reconocencia, varies decenes de les cuales tán en pelligru de desapaición según l’estudiu recientemente difundíu pola UNESCO.

La educación ye esencial
Pal vicepresidente noruegu del comité de 23 espertos independientes designaos por caún de los estaos que roblaren la Carta pa qu’evalúen de mena continuada’l so cumplimientu, los diez años d’aplicación de la Eurocarta amosaron la so valideza como «preséu útil qu’inclusu enantes de la so robla, sirvió pa que munchos estaos entamaren a tener en cuenta a les llingües minorizaes. Eso, ente otres coses, sirvió pa que los falantes d’eses llingües se decataren, de que les sos llingües y les sos cultures son daqué de lo que tar arguyosos».
En Noruega con siete llingües nas que basta que tres falantes d’una d’elles soliciten l’enseñu na so llingua pa que l’algame. Poro, el vicepresidente considera que la Carta contribuyó en munchos países «al entendimientu, a la tolerancia y al respetu, y camudó la situación de munches llingües, que pasaren del pesimismu al enfotu». Nesi camín, tien una importancia prioritaria la educación. «Pa creyar persones billingües la llingua minoritaria debe ser llingua d’instrucción». Y debe ser, amás, «visible na cai, nos medios de comunicación y nos servicios públicos, mui especialmente nos servicios sociales y de salú».
Caltién como principiu que «pa tener una sociedá billingüe ye necesario poner énfasis na educación na llingua minoritaria. Creyo que ye una noción básica que toos tenemos qu’aceutar, lo que significa que nuna área na que conviven una gran llingua y una llingua minoritaria, tamién los non falantes de la más pequeña tienen que deprendela pa que se caltenga».

I Xornaes sobre mocedá y llingües minorizaes

Los díes 8 y 9 de mayu cellébrense nel auditoriu d'Uviéu les primeres Xornaes sobre Mocedá y Llingües Minorizaes, entamaes pol Conseyu de la Mocedá del Principáu d'Asturies y Xunta Moza. Nelles van desendolcase una serie de debates y talleres nos que van participar espertos non solo d'Asturies, sinón tamién de Galicia, Cataluña, País Vascu, Baleares o Gales.
Xunto coles ponencies desendolcaes nel auditoriu, van impartise talleres nes instalaciones de caún de los conseyos (Principáu, Xixón, Uviéu), nel Palaciu Valdecárzana d’Avilés y nel polideportivu de La Pola Llaviana.

“L'Estáu español tien una realidá plurinacional, pluricultural, plurillingüística. Sicasí, ésti tovía tien qu'asumir, con toles consecuencies, la so diversidá nacional nos ámbitos políticu, socioeconómicu, cultural y llingüísticu. La reconocencia d'esta realidá tendría qu'implicar la protección efeutiva de toles llingües presentes nel so territoriu. Dempués de Bélxica y Lluxemburgu, ye l'Estáu de la Xunión Europea onde'l fenómenu del plurillingüismu ye más importante, llegando a constituyir una carauterística distintiva y non un fechu aneudóticu”, s’afita na información sobre les xornaes.