García Arias siguirá dos años más como eméritu honoríficu

Xosé Lluis García Arias vieno acabante ser nomáu esta selmana eméritu honoríficu de la Universidá d'Uviéu colo que podrá allargar la so docencia nes aules universitaries dos años más, pa gayola del alumnáu que va poder siguir disfrutando de la calidá científica y docente d'esti especialista.  Caderalgu de Filoloxía Española foi presidente de l'Academia de la Llingua Asturiana ente 1981 y 2001 y ye autor de numberoses obres sobre gramática y toponimia asturiana y contribuyó decisivamente a la ellaboración del Diccionariu Xeneral de la Llingua. El Conseyu de Gobiernu de la Universidá d'Uviéu votó esti martes, na so sesión del mes de xunu, el nomamientu del inxenieru Alfonso Fernández Canteli como profesor eméritu y el del filólogu Xosé Lluis García Arias como eméritu honoríficu. Dambos los dos van poder d'esta forma siguir col so llabor docente ya investigadora na institución asturiana dos años más dempués de la so xubilación. Y reciben asina la reconocencia de los sos compañeros. Fonte: Asturnews

García Arias entamó la campaña sobre la toponimia de Samartín del Rei Aurelio

La charra tuvo llugar nel marcu de la presentación de la campaña “Los nomes de llugar nun tienen preciu”

Xosé Lluis García Arias arrancó la campaña sobre la toponimia de Samartín del Rei Aurelio na Casona del Bravial con una charra que sirvió de presentación de la campaña mesma que lleva por títulu “Los nomes de llugar nun tienen preciu”. Xosé Lluis García Arias, especializáu en cuestiones del ámbitu llingüísticu y toponímicu, como asina lo amuesen gran parte de les sos publicaciones, fizo referencia a l’orixe de munchos topónimos del conceyu como Sotrondio, Blimea, Llantero o La Güeria, y asina un llargu etcétera de nomes polos que s’interesó’l numberosu públicu asistente. L’Ayuntamientu de Samartín del Rei Aurelio, a de la so Oficina de Normalización Llingüística, presentó esti xueves una nueva campaña destinada a reforzar l’usu de la toponimia oficial del conceyu, aprobada por decretu nel añu 2008. Pa ello llevó a cabu la edición de 2000 chapes metáliques nes qu’apaecen recoyíos un total de 52 topónimos del conceyu. Sanamiés, La Güeria, L’Acebal, La Envernal o La Potoxa, ente otros munchos, son dalgunos de los nomes de llugar qu’apaecen reflexaos nestes chapes. Tamién s’editaron pegatines col nome del conceyu y cartelos de la campaña col eslogan “Los nomes de llugar nun tienen preciu” que se van repartir per distintos edificios públicos como biblioteques, polideportivos o telecentros. L’actu contó cola presencia de l’alcalde de Samartín del Rei Aurelio, Enrique Fernández Rodríguez. Xosé Lluis García Arias, especializáu en cuestiones del ámbitu llingüísticu y toponímicu, como asina lo amuesen gran parte de les sos publicaciones, fizo referencia a l’orixe de munchos topónimos del conceyu como Sotrondio, Blimea, Llantero o La Güeria, y asina un llargu etcétera de nomes polos que s’interesó’l numberosu públicu asistente. A la fin de la charra repartiéronse ente la xente chapes y pegatines colos topónimos del conceyu. Nel actu pudo vese tamién un videu sobre la campaña nel que distintes persones lligaes a la cultura como Alfonso Zapico, Chus Pedro o Aurora Suárez, y tamién el propiu alcalde del conceyu animen al usu de la toponimia oficial. Esta campaña fízose en collaboración cola Rede de Normalización Llingüística nos Conceyos y cuenta col sofitu de la Conseyería d’Educación, Cultura y Deporte del Principáu d’Asturies. Fonte: Asturnews