La RTPA nun da cobertoria a la XXXIV Selmana de les Lletres Asturianes

 XDLA llamenta la  falta de cobertoria a la Selmana de les Lletres Asturianes pola RTPA

Nin cobertoria, nin oficialidá,  nin casu nengunu

La XDLA llamenta la falta de cobertoria de la RTPA a la XXXIV Selmana de les Lletres Asturianes

   Un siguimientu insuficiente dafechu. La Xunta pola Defensa de la Llingua Asturiana (XDLA) ye crítica cola cobertoria fecha pola RTPA al XXXIV Selmana de les Lletres Asturianes, sobre manera del Día de les Lletres Asturianes.

   El coleutivu cívicu, que considera l’ente públicu de comunicación daqué básicu pa da-y visibilidá al idioma, destacaba nel ‘Informe sobre l’usu del asturianu en RTPA 2013’, presentáu’l mes pasáu, que na edición del 2012 de la Selmana de les Lletres “nun se retresmitió la Xunta Estraordinaria de l’Academia de la Llingua Asturiana per TPA” y que la presencia mediática nos informativos de les actividaes programaes nestes xornaes “foi cuasi nula”. “Desgraciadamente, la XDLA tien que denunciar que la situación d’anguaño foi la mesma”, afirmen.

   Tres estudiar bien les emisiones de les ediciones distintes de ‘TPA Noticias’, la organización que trabaya na defensa del idioma rellata que los sos responsables nun consideraron “noticiables la salida a la cai de dellos llibros nel nuestru idioma que les editoriales del país publicaron coincidiendo cola fecha, mentes que dalgunos actos entamaos pol mesmu Gobiernu d’Asturies nin siquier foron noticia na emisora pública, dalgo que contradiz los postulaos colos que naz cualquier mediu de comunicación públicu y que pon en dulda la supuesta visibilidá que quier da-y l’Alministración al nuestru idioma, que nun lu promociona nos sos propios medios de comunicación”. La situación ye entá más grave si se centra nel vienres 3 de mayu, Día de les Lletres Asturianes, cuando l’informativu de TPA nin siquiera citó la celebración d’esta xornada y del Día del Llibru n’Asturianu. Por contra, sí dio cobertoria a un concursu de corte de xamón enmarcáu na ‘Feria de Abril’ de Piloña, según apunta la XDLA. “L’anécdota muestra l’apegu a la cultura y al idioma que tienen los directores d’informativos y programadores de RTPA”, apunten.

   L'exemplu de Galicia y la TVG:  La XDLA tampoco nun entiende que nun se fixera nengún especial sobre la vida y obra de Nené Losada Rico, autora a la que se dedicó la XXXIV Selmana de les Lletres, más teniendo en cuenta que yera la primer vegada que l’ente públicu de comunicación tenía n’archivu entrevistes feches, tanto pa la radio como pa la televisión, al escritor protagonista de la celebración. Al respeuto, el coleutivu cívicu pon l’exemplu de Galicia y a la so canal pública, la TVG, que va programar un documental sobre la vida y obra del autor homenaxáu, Roberto Vidal Bolaño, con motivu del Día das Letras Galegas, que se celebra’l 17 d’esti mes. “Amás, la web de la CRTVG abrió una sección onde los usuarios puen acceder al material audiovisual del que dispón l’archivu de CRTVG sobre l’autor homenaxáu, y la Radio Galega lleva selmanes emitiendo una programación especial pa conmemorar el 150 aniversariu de la publicación de ‘Cantares Gallegos’, de Rosalía de Castro. Too esto contrasta cola RTPA, que nun dedicó nin una pieza en ‘TPA Noticias’ a informar sobre quién yera Nené Losada”, critica la organización.

   D’igual forma, l’actu de la Real Academia Galega va retresmitise en direuto, dalgo que nun asocede n’Asturies col de l’Academia de la Llingua Asturiana; tampoco col actu institucional de la Xunta Xeneral nel que los parllamentarios lleen testos na llingua del país. L’únicu xestu reseñable, n’opinión de la XDLA, ye la emisión el sábadu pela nueche, en diferío, del actu poéticu-musical ‘Biltar’, que tuvo llugar nel Centru Niemeyer el martes.

   Fonte:  Asturies.com

La TPA cubre la Feria d'Abril y nun informa sobre la Selmana de les Lletres Asturianes

Hai selmanes, la Xunta pola Defensa de la Llingua Asturiana (XDLA) presentaba l’Informe sobre l’usu del asturianu en RTPA 2013, onde se facía repás a la presencia del idioma y la cultura del país nos medios públicos y s’ufríen propuestes de meyora. Ente los temes trataos, la XDLA recordaba la presencia mediática tan escasa de la Selmana de les Lletres Asturianes na programación de la canal y la radio públiques. Asina, la organización señalaba que nel 2012 nun se retresmitió la Xunta Estraordinaria de l’Academia de la Llingua Asturiana per TPA y que la presencia mediática de la Selmana de les Lletres Asturianes nos informativos foi cuasi nula. Una vegada más, l'asociación denuncia que la situación d’anguaño foi la mesma, con exemplos como la cobertura dada a un concursu de corte de xamón na Feria d'Abril, mientres la canal escaecía'l Día del Llibru y del Discu n'asturianu. Asina, l’informativu de la televisión pública nun consideró noticiables la salida a la cai de dellos llibros nel nuestru idioma que les editoriales del país publicaron coincidiendo cola fecha, mentes que dalgunos actos entamaos pol mesmu Gobiernu d’Asturies nin siquier foron noticia na emisora pública, dalgo que pa la Xunta "contradiz los postulaos colos que naz cualquier mediu de comunicación públicu y que pon en dulda la supuesta visibilidá que quier da-y l’Alministración al nuestru idioma, que nun lu promociona nos sos propios medios de comunicación". Ye de reseñar que nel TPA Noticias del mediudía del 3 de mayu nun hubo nenguna noticia que recordara a l’audiencia que yera’l Día de les Lletres Asturianes o que’l mesmu Gobiernu entamaba’l Día del Llibru y el Discu n’Asturianu. Sicasí, sí foi noticia un concursu de corte de xamón na Feria d’Abril de Piloña. L’anécdota muestra l’apegu a la cultura y al idioma que tienen los directores d’informativos y programadores de RTPA. Otra manera, nel Informe sobre l’usu del asturianu, la XDLA recomendó a los responsables de RTPA que contemplaren la emisión per TPA d’actos como la celebración d'una gala dedicada a la música y la poesía n'asturianu, que se celebró nel auditoriu del Centru Niemeyer, o del I Certame de Teatru Escolar en Llingua Asturiana/Gallego-asturianu. Hai que felicitar a la cadena pola emisión de la gala del Niemeyer, el sábadu pela nueche. Sicasí, quedaron fuera otros actos que sí s’emitieron otros años, como l’actu institucional de la Xunta Xeneral o la Xunta Estraordinaria de l’Academia de la Llingua Asturiana. Amás, la RPA tampoco nun fixo nenguna emisión especial, anque tien una programación baxo mínimos, y tampoco nun decidió realizar nengún actu simbólicu, como podía ser programar namás música n’asturianu. Per otru llau, hai selmanes, la XDLA recordaba que l’Ente Públicu pela primer vez contaba nel so archivu con entrevistes, tanto en radio como en televisión, a l’autora homenaxada na edición d’anguaño -la escritora valdesana Nené Losada Rico-, polo que podría utilizales pa realizar un programa especial sobre la so vida y obra. Asina, poníase d’exemplu a Galicia y la TVG, qu’esti 17 de mayu, Día das Letras Galegas, va retresmitir en directo l’actu de la Real Academia Galega y va programar un documental sobre la vida y obra del autor homenaxáu, Roberto Vidal Bolaño. Amás, la web de la CRTVG abrió una sección onde los usuarios puen acceder al material audiovisual del que dispón l’archivu de CRTVG sobre l’autor homenaxáu. Amás, la Radio Galega lleva selmanes emitiendo una programación especial pa conmemorar el 150 aniversariu de la publicación de Cantares Gallegos, de Rosalía de Castro. Too esto contrasta cola RTPA, que nun dedicó nin una pieza en TPA Noticias a informar sobre quién yera Nené Losada. Fonte: Asturnews

La XXXIV Selmana de les Lletres Asturianes, dedicada a Nené Losada Rico

 Pablo R. Guardado

Un actu en Grau va abrir esti llunes la XXXIV Selmana de les Lletres Asturianes, que van tar dedicaes a la figura de Nené Losada Rico. El vienres va celebrase n’Uviéu’l Día de les Lletres Asturianes, col actu académicu y la manifestación.

La obra y la figura de l’autora de Valdés, una de les poetes más reconocíes de la nuesa lliteratura, va ponese en valor con una serie d’actividaes a lo llargo de tola selmana. Nené Losada Rico (Ḷḷuarca, 1921-2009) comenzó a escribir poemes y rellatos tanto en castellanu como n'asturianu occidental, siguiendo pronto la estela del Padre Galo al enfocar les sos creaciones a un tonu popular. Llueu, éstes evolucionaron, tanto na temática como na forma, a espresiones llíriques nueves y a un intimismu mayor. Ente les sos espublizaciones destaquen ‘Cantares valdesanos’ (Llibros del Pexe, 1992), ‘Entre apigarzos’ (Trabe, 1997) y ‘El nome de las cousas’ (Trabe, 2001), amás de les antoloxíes ‘Fueyas que reverdecen’ (Atenéu Obreru de Xixón, colleición ‘Tiempu de cristal’, 2005), ‘Obra poética en castellano’ (coedición de la Fundación Fernández Lema y Trabe qu’incluyía tamién un CD) y el volume ‘Obra completa n’asturianu’ (Trabe, 2011).

Antón García, Taresa Lorences y Esther García, acompañaos na música por Rafa Lorenzo, van participar na moscona Capiella de los Dolores, a partir de les 19.30 hores, na actividá ‘El nome de las cousas. La voz de Nené Losada’, eventu qu’abre la Selmana de les Lletres y nel que collabora la Fundación Aula de les Metáfores. Mentes, mañana al meudía va recuperase, tres un añu de parón por mor de les eleiciones anticipaes del 2012, l’actu institucional na Xunta Xeneral, onde los políticos asturianos lleen poemes nel idioma del país. Una hora enantes, escolinos y escolines van facer una visita guiada en llingua asturiana pel edificiu.

Pela tarde del martes, va tener llugar nel Centru Niemeyer una de les novedaes de la edición trixésimocuarta de la Selmana de les Lletres: la celebración del actu poéticu-musical ‘Biltar’. Nél van tomar parte los artistes Alfredo González, Anabel Santiago, Héctor Braga, Mapi Quintana, Pandereteres de Fitoria y la banda Xera xunto colos poetes Aurora García Rivas, Pablo Antón Marín Estrada, Pablo Texón, Sofía Castañón y Xosé Ánxelu Gutiérrez Morán. L’actu va principiar a les 20.30 hores y va retresmitíse pela TPA, anque non en direuto.

Feria del Discu y del Llibru n’Asturianu

El miércoles, al ser el Día del Trabayador y Trabayadora, nun va haber actividá. Ésta va retomase’l xueves, a les 13 hores, cola inauguración de la Feria del Discu y del Llibru n’Asturianu, figura que se retoma y que va asitiase na Pescadería Municipal Antigua d’Avilés. A esa mesma hora, va tener llugar la presentación de la edición conmemorativa ‘El ríu y la memoria’, una antoloxía poética de Nené Losada Rico de la que ye responsable Taresa Lorences. La feria va permanece abierta al públicu hasta’l domingu n’horariu de 11 a 14 hores y de 17 a 21 hores hasta’l sábadu, mentes que na xornada cabera va tener les puertes abiertes de 11 a 19 hores.

A les 19.30 hores, nel salón d’actos del Campus d’Humanidaes de la Universidá d’Uviéu, van presentase les espublizaciones de les obres ganadores de los Premios Lliterarios 2012. Los autores que se llevaron estos gallardones foron Quique Faes, por ‘La vida increíble’ (XXXIII Premiu Xosefa Xovellanos de novela); José Ángel Gayol, por ‘El llibru de les coses misteriores’ (XVIII Premiu Xuan María Acebal de poesía): Xulio Arbesú, por ‘Los deseos del dineru’ (XVIII Premiu Máximo Fuertes Acevedo d'ensayu); Milio Rodríguez Cueto, por ‘Carne de melandru’ (V Premiu María Xosefa Canellada de lliteratura infantil y xuvenil); y Javier Marinas, por Homes (IV Premiu Alfonso Iglesias de cómic).

XXXIV Día de les Lletres Asturianes

La xornada central de la Selmana torna a ser el vienres, cola celebración del XXXIV Día de les Lletres Asturianes. L’actividá va principiar al meudía cola tradicional actividá escolar, que nesta ocasión va celebrase nel Colexu Públicu San Miguel de Trevías, población onde Nené Losada Rico paso la so infancia. Tres una intervención de les autoridaes, van entregase los gallardones del XVIII Certame Artísticu Lliterariu, del X Certame de Cartelismu y del II Certame de Creación Audiovisual.

Pela tarde, la Xunta pola Defensa de la Llingua Asturiana celebra, como ye vezu, una manifestación coincidiendo con esta xornada pa reclamar una demanda yá vieya: la oficialidá de la llingua asturiana. La marcha va partir a les 19.30 hores de la Estación del Norte (RENFE) y va terminar un poco enantes de les 20.30 hores nel Teatru Campoamor, recintu qu’esti añu torna a acoyer la Xunta Estraordinaria de l’Academia de la Llingua Asturiana. Esti actu, que va tar presentáu por Próspero Morán y Sonia Avellaneda y va contar coles actuaciones del gaiteru Álvaro Cueto y Toli Morilla, va servir d’acoyida a un académicu nuevu, David Melendi Palacio, doctor n’Inxeniería Informática y profesor del área d’Inxeniería Telemática de la Universidá d’Uviéu, “onde vien desendolcando’l so llabor investigador, siendo ún de los principales promotores na anovación de la llingua asturiana nes nueves teunoloxíes”. Amás, va poder sentise’l siempre esperáu discursu institucional de la presidenta Ana María Cano.

Coincidiendo col Día de les Lletres Asturianes, tamién tien llugar el Día del Llibru n’Asturianu, nel que llibreríes y comercios de tol país ufren un 10 por cientu de descuentu na compra de llibros y discos n’asturianu, amás d’un exemplar de ‘El ríu y la memoria’ de baldre. Nesta ocasión, el llistáu d’establecimientos participantes ye’l siguiente: Aldebarán, Antares, Casa del Libro, Cervantes, El Corte Inglés, Diocesana, Garluc, Maribel, Ojanguren, Polledo, Puntos, Reconquista, San Pablo, Santa Teresa, II Milenio y Servitec (Uviéu); Bardos, Central, Cornión, El Corte Inglés, English Books Shop, Hernández, Paradiso, Roy y Tienda Mundo Sonoro (Xixón); Azucel, Casona, Clarín, El Corte Inglés, Víctor Núñez, La Vieja Atalaya y Tienda Elepé Productions (Avilés); Disco 55, La Pilarica y La Torre (Mieres); Treito (Cangas del Narcea); Imagen (Cangues d’Onís); Mario (Cancienes); Sol (L’Entregu); Rima (L’Infiestu); Clarín (Llanes); A. Pantiga (Ciañu); Arvín (Llaviana); Helas (Ḷḷuarca); Gestión (Les Arriondes); Muséu de la Sidra (Nava); Naredo y San Vicente(La Pola Siero); y FNAC (Paredes).

Música y teatru

La banda de folk-metal Taranus, ganadora del VII Premiu al Meyor Cantar por 'Ensin ti', va ufrir un conciertu’l sábadu nel Auditoriu Teodoro Cuesta de Mieres na actividá final de la Selmana. Sicasí, el miércoles 8, dientro de los actos programaos pola Conseyería d’Educación, Cultura y Deporte, va tener llugar la gala d’entrega de premios del I Certame de Teatru Escolar en Llingua Asturiana/Gallego-asturiano, cola representación de les obres premiaes y la participación del Grupu d’Animación Musical Escolar (GAME). Va ser nel xixonés Teatru de la Llaboral a partir de les 18.30 hores.

Fonte: Asturies.com

Grau entama un actu poéticu-musical con motivu de la Selmana de les Lletres Asturianes

Con motivu de la celebración de la XXXIV Selmana de les Lletres Asturianes, la Conseyería d’Educación, Cultura y Deporte y el Aula de Les Metáfores organicen en Grau el llunes 29 d’abril un actu poéticu-musical a les 19:30 hores na Capiella los Dolores de Grau y con entrada llibre.

La XXXIV Selmana de les Lletres Asturianes nesta ocasión va tar dedicada a la escritora Nené Losada Rico (Ḷḷuarca, 1921-2009). La obra y la figura de l’autora de Valdés, una de les poetes más reconocíes de la nuesa lliteratura, va ponese en valir con una serie d’actividaes a lo llargo de tola selmana en delles llocalidáes asturianes.

Fonte: Asturnews

L'Entregu: esposición sobre escritores n'asturianu del conceyu

L'Entregu va acoyer una esposición sobre escritores n'asturianu del conceyu

   L’Institutu d’Enseñanza Secundaria Virxe de Cuadonga de L’Entregu va acoyer dende’l 29 d’abril al 3 de mayu una esposición sobre los escritores de Samartín del Rei Aurelio. Na muestra incluyénse 10 paneles onde se fai un repasu de la biografía, obra y testos de distintos autores del conceyu como Xulio Arbesú, Pablo Rodríguez Medina, Chechu García o Manuel Asur, ente otros.

   Amás, a lo llargo de la selmana l'alumnáu del centru va trabayar cuestiones rellacionaes colos conteníos d’esta esposición, y van ser ellos mesmos los que busquen y ellaboren información complementaria a la qu’ufierten los paneles. Asina, cartelos ellaboraos por ellos mesmos sobre estos autores van sirvir de complementu a la propia esposición.

   Esta muestra forma parte del programa d’actividaes entamáu dende la Conceyalía de Cultura de Samartín del Rei Aurelio y la Oficina de Normalización Llingüística en collaboración con distintos centros educativos pa celebrar la XXXIV Selmana de les Lletres Asturianes.

   Fonte:  Asturnews.

La XXXIV Selmana de les Lletres Asturianes na alcordanza de Nené Losada Rico

La Selmana de les Lletres Asturianes va dedicase esti añu a la figura de Nené Losada

Nené Losada Rico en 2007

     El 29 d'abril entamarán los actos de la que ye yá la XXXIV Selmana de les Lletres Asturianes y la Conseyería de Cultura ta acabante anunciar que la escritora Nené Losada va ser la lliterata a la que se faiga homenaxe nesta ocasión. Un llibru sobre la so vida y obra va regalase nes llibreríes, como cada añu, el Día del Llibru Asturianu, que sedrá nesta ocasión el 3 de mayu. Amás, ente los planes, un gran actu poéticu y musical nel Centru Niemeyer, el martes 30 d'abril, y la puesta n'escena de les obres del Ier Certame de Teatru escolar n'asturianu, l'8 de mayu, en La Llaboral.

   Nené Losada, la que fuera decana de les Lletres Asturianes. La escritora valdesana Nené Losada Rico, dexónos n'abril de 2009, a la edá d'87 años. Nes cuasi nueve décades de vida que tuvo, la escritora, considerada nel momentu de la so muerte decana de les lletres asturianes, dedicó bien de tiempu a escribir n'asturianu, siendo una firma defensora de la oficialidá del idioma.

   Ñació en L.luarca'l 10 de payares de 1921. Trés años depués, al morrer la madre, llévenla a Sanfliz de Trevías, pa cola güela. Ellí diba vivir hasta que, con diecinueve años, casa y torna pa L.luarca, onde sigue viviendo. De formación autodidacta, amuésase como una temprana escritora de relatos y poemes en castellán. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios, dende entós espublizó tamién la so obra en castellán nun volume completu.

   L'autora recibió numberosos homenaxes y premios. Col so nome convócase cada añu un premiu de poesía. Nel añu 2000 recibió l'Urogallo de Bronce, entregáu pol Centru Asturianu de Madrid, al que nel 2005 se-y sumó la medaya de plata del Principáu d'Asturies. En 2007 recibió'l Premiu Timón que concede l'Arribada, pola mor de la so trayectoria lliteraria, y en 2008 foi nomada Fía Predilecta del Conceyu de Valdés, amás de poder ver colgáu un retratu de so na Casa Conceyu.

   Cola muerte de Nené Losada Rico la lliteratura asturiana perdió una de les sos voces hestóriques, una de les últimes figures de la nomada Xeneración de la Posguerra, que nos últimos años dexó tamién nel camín a escritores como Mánfer de la Llera o Eva González. Agora Asturies va facer l'homenaxe que merez.

 Fonte:  Asturnews.