El primer concursu d'imitadores d'artistes asturianos va celebrase estes navidaes en Llangréu

por Pablo R. Guardado

La inscripción pal ‘Sácame pola pinta’, el primer concursu d’imitadores d’artistes asturianos, va zarrase esti vienres. Destináu pa neños y neñes menores de 18 años, va celebrase’l 4 de xineru nel Teatru Nuevu de La Felguera y tien como premiu la grabación d’un discu promocional nun estudiu profesional.

El Grupo A Mansalva entama esta prestosa iniciativa que ta teniendo muncha repercusión, como bien indica’l fechu de que la organización zarrara la inscripción pa cinco de les dieciséis opciones que se proponen al recibise más de diez pidimientos de participación pa caúna. Asina, yá nun ye posible apuntase pa imitar a Tino Casal (‘Eloise’), Los Berrones (‘Chacho’), Melendi (‘La mi mozuca’), La Pastorina (‘Yá suena la gaita’) o Silvia Quesada (‘De llonxe gano’).

El restu d’artistes a los que tovía ta abierta la preseleición son Alfredo González (‘La nada y tu’), Víctor Manuel (‘La romería), La Bandina (‘Na caleya’), Los Stukas (‘Atrapado’), Nuberu (‘Chalaneru’), Dixebra (‘Nacionaliega’), Rodrigo Cuevas (‘Ritmu de Verdiciu’), Danny Daniel (‘El vals de las mariposas’), los Hermanos Valle Roso (‘Mocina dame un besín’), Dark la eMe (‘Un asturiano en Madrid’) y Mariluz Cristóbal (‘Soi vaqueira’). Pa pasar a la final ye necesario unviar enantes del meudía del vienres un videu d’un llargor máximu d’un minutu imitando al artista nel cantar escoyíu pola organización al traviés del WhatsApp del númberu de teléfonu 667.252.611 xunto col nome, los apellíos y señes del concursante amás d'una foto del DNI por dambes cares, teléfonu y corréu electrónicu del tutor llegal.

Ente tolos aspirantes, qu’han de tener menos de 18 años a fecha del 5 de xineru, la organización va escoyer a los finalistes que van participar na gala final del 4 de xineru (18 hores, Teatru Nuevu de La Felguera) dientro les actividaes del Salón de la Infancia 2016 qu’entama’l Conceyu de Llangréu. El ganador o ganadora de ‘Sácame pola pinta’ va llevar como premiu la grabación d'un discu promocional de cuatro cantares nun estudiu de grabación profesional.

El xuráu del concursu va tar formáu por dalgunos de los artistes imitaos, siendo’l públicu, al traviés de la so votación na rede social Facebook, un miembru más del mesmu. Hai que recordar que namáu se contempla la participación de solistes o dúos y que, nel casu de la imitación de grupos, ésta va centrase namái nel cantante.

Fonte: Asturies.com

Llangréu prepárase p'abrir los llibros a finales d'abril

Llangréu prepárase p'abrir los llibros a finales d'abril

Casa de Cultura "Escueles Dorado"

  
   Les Biblioteques de Llangréu (La Felguera, Sama y Ciañu) y l'Área de Cultura del so Conceyu preparen una nueva edición del so programa “Llangréu, un llibru abiertu”, que cada añu vienen faciéndose pola mor del Día del Llibru. Pa esta ocasión acutóse un llugar especial pal cómic, con una conferencia del dibuxante y hestorietista Ruma Barbero, que va acompañar otra cita tradicional nestes feches nel conceyu llangreanu, como ye'l so XI Concursu de Marcapáxines.

   El programa, concentráu nos díes 22, 23 y 24 d'abril, inclúi tamién cuentacuentos, presentaciones de llibros, cine infantil y club de llectura. Na mañana del día 23 va celebrase una llectura pública na Plaza Merediz de La Felguera na que la tema principal de los testos escoyíos va ser “Lliteratura y cine”, un actu que va cuntar con un acompañamientu musical al cargu de los alumnos del Conservatoriu del Valle'l Nalón.

Programa completu:
                                                Llunes, 22 d'abril
   - 10.30 h. Cuentacuentos. Narración: Bibliotecaries de La Felguera. Collaboren: Escueles Infantiles “Pinin” y “Parque Nuevu”. Casa de Cultura “Alberto Vega”.
   - 11.00 a 14.00 h. Trueque de llibros. Casa de Cultura “Escueles Dorado”.
   - 11.30 h. Cuentacuentos. Narración: Bibliotecaries de Riañu. Collabora: Escuela Infantil “Garabatos”. Casa de Cultura “Federico García Lorca ”.
   - 12.00 h. Charra: “El procesu creativu del cómic en llingua asturiana”, al cargu de Ruma Barbero. Casa de los Alberti.

                                                Martes, 23 d'abril
   - 12.00 h. Lliteratura y cine. Llectura pública na plaza Merediz de La Felguera (frente a la Casa de Cultura “Alberto Vega”).
Llectura pública de testos rellacionaos cola lliteratura y el cine. Ganador y premios del 11u concursu de Marcapáxines (celebráu nes biblioteques públiques de Llangréu). Música al cargu d'alumnos del Conservatoriu del Valle'l Nalón. Plantíu d'un árbol. Llangreanos nel Mundu.
   - 16.00-19.00 h. Trueque de llibros. Casa de Cultura “Federico García Lorca”.
   - 17.30 h. Cine. Kerity, la Casa de los Cuentos. Cine Felgueroso.
   - 19.30 h. Presentación del llibru: Narciso Ibáñez Menta, el hombre de las mil caras, al cargu de la so autora Graciela Beatriz Restelli. Casa de Cultura “Escueles Dorado”.

                                              Miércoles, 24 d'abril
   - 10.30 h. Cuentacuentos. Narración: Bibliotecaries de Sama. Collaboren: Escueles Infantiles “Rapacinos” y “Travesures”. Casa de Cultura “Escueles Dorado”.
   - 11.00 h. Talleres sobre'l llibru. Muséu dela Siderurxa d'Asturies. Collabora Conservatoriu Valle'l Nalón.
   - 16.00–19.00 h. Trueque de llibros Casa de Cultura “Alberto Vega”.

   - 20.00 h. Club de Llectura Carreteres secundaries, d'Ignacio Martínez de Pisón. Casa de Cultura  “Federico García Lorca”.

   Mientres tola selmana va poner en marcha una Campaña d’animación a la llectura en llingua asturiana.

   Fonte:  Asturtnews.

Romería de Primavera en Ciañu

Llangréu celebra la tercer Romería de Primavera en Ciañu L’Ayuntamientu de Llangréu, en collaboración cola Asociación de Vecinos S. Antonio de Ciañu, la Escuela de Música Tradicional del AMPA del Conservatoriu Valle del Nalón y les agrupaciones corales José León Delestal y Santa Apolonia organicen esta tercer fiesta de primavera que va tener llugar en Ciañu mañana sábadu 2 de xunu y el domingu 3 de xunu. La Romería presenta una montonera actos que, dende la nueche’l sábadu, van llevar folixa y cultura tradicional per tol distritu llangreanu de Ciañu. El sábadu a les 21:00 hores va tener llugar l’empiezu’l tercer certame Cantando pelos chigres cola entrega llibros de canciones y la puesta en marcha de les rondes de cantares pelos chigres de Ciañu con pareyes de gaita y tambor, coros y artistes locales. Yá’l domingu, a les 11:00h. va haber Diana floriada con gaita y tambor, desfile de Xigantes y Cabezudos y disparu de morteros. Dempués, a les 13:30 va tener llugar la segunda parte del certame Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 17:00h, el parque de Ciañu va ser escenariu de la III ROMERÍA DE PRIMAVERA con actividaes pa tolos públicos: xuegos y deportes tradicionales, hinchables pa neños y neñes y actuaciones de bandines y pareyes de gaita y tambor. A les 18:00 hores, nel quioscu’l parque va tener llugar un gran conciertu a cargu de los alumnos y alumnes de la Escuela de Música Tradicional "Llangréu" y los sos profesores amás de Carlos Ronderos, Justino González, Xuan Nel Expósito y les agrupaciones corales José León Delestal y Santa Apolonia de Pañeda. Too esto con escenariu llibre y pipa de sidra. Fonte: Asturnews.

Ciañu va acoyer la celebración de La Fiesta La Bretaña

El llugar llangreanu de Ciañu va acoyer la edición de la Fiesta La Bretaña, primer ocasión na qu’esti eventu lúdico-cultural va celebrase nel estáu español

Esti próximu sábadu 26 de mayu, Ciañu va acoyer la celebración de la Fiesta la Bretaña, una ocasión única de conocer de primer mano una cultura de gran valir y mui venceyada a l’asturiana. El Festival de La Bretaña va desenvolvese alrededor de la música y baille bretón con clases práctiques y una gran espicha-conciertu como remate final a la fiesta. Toles actividades son de baldre y p’asistir a les clases nun fai falta más qu’apuntase llamando al teléfonu 984282925 o al traviés del corréu electrónicu casadelosalberti@ayto-langreo.es
Les clases maxistrales d’acurdión y de baille tradicional bretón van ponese na Casa de los Alberti a les 16:30 y 18:30 hores y la espicha-conciertu va facese na cancha cubierta del IES La Quintana de Ciañu dende les 21:00 hores y va contar cola participación de los grupos Wipidoup, Kermabon-Kermabon, Fañch Loric y La Banda… LATIRA!

Fonte: asturnews

La Xunta Elleutoral de Llaviana refuga les candidatures de Conceyu Abiertu n'asturianu pese a la sentencia del Tribunal Constitucional

Nuevu casu de represión llingüísitica nunes elleiciones anque esta vegada el proceder de la Xunta ye anticonstitucional gracies a la sentencia 48/2000 de 24 de febrero de Tribuna Constitucional.

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Magar que nun ye definitivu, Conceyu Abiertu quixo facer públicu y denunciar el determín tomáu pola XEZ de Llaviana porque supón "l’enésimu ataque escontra la llingua asturiana y aquellos ciudadanos que la empleguen". Ye más, Conceyu Abiertu "llamenta" que los responsables de la XEZ de Llaviana "tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu".

Conceyu Abiertu retrucará al determín de la Xunta Ellectoral de Zona de Llaviana sofitándose nesta sentencia y confía en que’l prósimu llunes, 25 d’abril, se proclamen les sos candidatures nos conceyos de Samartín del Rei Aurelio y Llangréu.
Fonte:blogue frayando cadenes

Campaña pa promocionar l'usu del asturianu na hostelería de Llangréu

El Serviciu de Normalización de Llangréu tien en marcha una campaña pa promocionar l’usu de la llingua na hostelería del conceyu. Los términos de la sidra, los pexes y el mariscu, son dalgunos de los aspeutos nos que se centra.

La intención cola que ñaz esta campaña ye “normalizar l'usu del asturianu faciéndolu visible nos restoranes, sidreríes, chigres y centros sociales del nuesu conceyu”. Al mesmu tiempu, tamién se busca “fomentar el consumu nel seutor hosteleru de Llangréu respaldando esta actividá al traviés del usu de la llingua asturiana como reclamu publicitariu que casa mui bien cola idega de cercanía y tratu personalizáu. Búscase afalar l’apreciu polo propio promoviendo l’usu de los términos tradicionales y el vocabulariu propiu dientro del campu semánticu de la sidra”, señalen dende’l Serviciu de Normalización Llingüística llangreanu. “Entendemos que l'asturianu ye una amuesa de la personalidá de los nuesos servicios amás d'una ventaya competitiva, un valir añedíu pal conxuntu’l nuesu seutor hosteleru”, añeden.

Los hosteleros y hosteleres de Llangréu que quieran participar de la campaña van beneficiase de materiales pertenecientes a la campaña ‘La sidra, d’Asturies’, como pegadielles pa los ‘nunmechisques’; cartelos con espresiones sobre la sidra, que tien como base otra campaña de la Xunta pola Defensa de la Llingua Asturiana que llevaba’l nome ‘La sidra como tien que ser’; y un llibrín de 18 fueyes con dellos datos sobre la sidra y la cultura sidrera. Amás, el Serviciu de Normalización de Llangréu va repartir una guía de pexes y mariscos que recueye los nomes d’estos animales en seis llingües, y toallines de llimón con publicidá sobre centros visitables del conceyu, como’l Muséu de la Siderurxa o’l Cine Felgueroso. Al mesmu tiempu, convídase a tolos hosteleros a solicitar el sofitu del Serviciu pa cuntar con una torna personalizada de platos y menús en llingua asturiana.

La Conseyería de Cultura y Turismu, la Xunta Pola Defensa de la Llingua Asturiana y la Rede de Normalización Llingüística nos Conceyos collaboren nesta campaña, yá entamada en L.lena, que va estendese tamién a Siero, Mieres, Mancomunidá del Cabu Peñes y Mancomunidá de la Sidra.

Fonte: Asturies.com

Llangréu entama dos cursos d'asturianu

Trátase d’un cursu d’aniciu a la llingua asturiana y otru d’afondamientu, de 30 hores caún, destinaos a tol mundu y de baldre. Éstos van entamar el llunes 28 de febreru y la inscripción pue facese fasta esi mesmu día.

El Conceyu de Llangréu pon en marcha estos cursos en collaboración cola Conseyería de Cultura y Turismu col oxetivu d’averar la conocencia de la llingua del país a tolos llangreanos. La Casa la Cultura de Sama ye’l centru onde van impartise les clases los llunes, martes y xueves n’horariu de 19 a 21 hores. Toles persones que completen el cursu van recibir un certificáu acreitativu. El plazu de matrícula pa los cursos yá ta abiertu y va pesllase cuando entame la primer clas.

La xente interesao nellos pue matriculase per delles víes, indicando siempre los datos personales: nome, NIF, señes y númberu de teléfonu. Asina, pue usase el corréu convencional unviando una carta al Centru de Referencia de la Cultura y la Llingua Asturiana ‘Casa de los Alberti’ (cai San Fernando, 33900, Ciañu); el teléfonu 984.282.925; el Fax 985.698.629; o’l corréu lletrónicu llingua@ayto-langreo.es.

Fonte: Asturies.com

Campaña de normalización "El Mio Primer Vocabulariu" en Llangréu

La Casa’l Conceyu de Llangréu acoyó la presentación de la campaña de normalización social del asturianu "El Mio Primer Vocabulariu, vocabulariu básicu de la Llingua Asturiana n’imáxenes". L’actu presidiólu l’Alcaldesa de Llangréu y cuntó cola presencia de la Conceyala de Política Llingüística, amás del diseñador de la campaña y el responsable del Serviciu de Normalización Llingüística llangreanu.
"El Mio Primer Vocabulariu, vocabulariu básicu n’imáxenes de la Llingua Asturiana" ye una campaña que busca "afalar l'usu del asturianu ente los neños y neñes más mozos del conceyu y concienciar al profesoráu y a les families de la importancia d'usar l'asturianu nos primeros años de vida".
Esta nueva iniciativa del Conceyu de Llangréu va empobinada "a les escueles de 0 a 3 años y a los primeros cursos d’educación infantil, y consiste nun vocabulariu básicu n’imáxenes pa que los más pequeños y pequeñes vayan conociendo y familiarizándose con términos y pallabres venceyaes a la so rodiada más cercana: el so cuerpu, la ciudá, la escuela, el parque, el bañu, los colores y les formes xeométriques, y la so casa".
Esta campaña desendólcase al traviés de siete modelos diferentes de cartelos a tou collor con dibuxos del prestixosu diseñador Alfonso Zapico, estos cartelos presenten un vocabulariu básicu n’imáxenes d’unos 200 términos d’usu frecuente y cercanu a lo más mozo de la casa. Los cartelos compleméntense con fiches en blancu y negru pa pintar que permiten trabayar de forma entretenida esti proyeutu.
La campaña El Mio Primer Vocabulariu, vocabulariu básicu n’imáxenes de la Llingua Asturiana “ponla en marcha l’Ayuntamientu de Llangréu en collaboración cola Rede de Normalización Llingüística nos Conceyos y cuntó cola aidanza económica de la Conseyería de Cultura y Turismu del Principáu d’Asturies”.