L’espediente d’oficialización toponímica de Candamu entra na fase d’esposición pública

por Pablo R. Guardado

El Plenu del Conceyu de Candamu aprobó por unanimidá esti xueves la propuesta definitiva d’oficialización toponímica, polo que’l procesu entra nel so tramu final al pasar a esposición pública. Los nomes tradicionales Cueru, Fenoeda, Llameiru o San Tisu pasarán a ser oficiales, derogando asina les denominaciones castellanes.

Los vecinos de Candamu tienen agora un mes pa recurrir nel casu de que nun tuvieren d’alcuerdu con dalguna de les denominaciones que treslladó la Xunta de Toponimia al Conceyu tres dar el preste a les enmiendes feches dende l’Ayuntamientu al primer documentu propuestu. Si, como s’espera, nun se produz recursu nengún, l’espediente pasaría a la Conseyería d’Educación y Cultura, que lu treslladaría al Conseyu de Gobiernu pa la so aprobación definitiva y la posterior espublización nel BOPA que derogaría los topónimos castellanos pa dar oficialidá definitiva a los tradicionales.

Tanto’l PSOE, partíu de gobiernu, como’l PP y Izquierda Xunida (IX) sofitaron por unanimidá tol procesu de recuperación toponímica, dalgo qu’empondera’l conceyal de Cultura, Turismu, Emplegu y Desarrollu Llocal, José Luis Suárez Arias. “Toi arguyosu d’esti consensu, porque la llingua ye patrimoniu de toos, un bien a protexer y impulsar, y ye dalgo qu’agradecí a tolos grupos nel Plenu d’ayeri”, espresa l’independiente, que punxo como una de les condiciones pa garrar el cargu propuestu polos socialistes l’entamu del procesu d'oficialización de los nomes de llugar tradicionales.

“Tamién toi mui agradecíu cola alcaldesa, Natalia González Menéndez, pol so compromisu pa cola toponimia y la llingua asturiana”, añade Suárez Arias, satisfechu “por recuperar los nomes verdaderos de los pueblos, los qu’empleguen los vecinos”. Asina recupérase Cueru (hasta la fecha Cuero), Ricabu (Ricabo), Augüera (Agüera), El Caleyu (El Caleyo), San Tisu (San Tirso) o Faéu (Faedo), por citar unos cuantos.

Puesta en marcha d’un Serviciu de Normalización

Entrugáu por futures aiciones pa la normalización del asturianu en Candamu, como podría ser la puesta en marcha d’un Serviciu de Normalización Llingüística o’l desendolcu d’un Plan de Normalización Llingüística, l’edil responsable de Cultura señaló la posibilidá d’abrir un Serviciu de Normalización Llingüística conxuntu con Grau, una proposición que nació de la Conseyería d’Eduación y Cultura y que dambos conceyos tienen anguaño n’estudiu.

Fonte: Asturies.com

Somos propón la creación d'un Serviciu de Normalización Llingüística n'Uviéu

El conceyal Fernando Villacampa pide que tenga calter tresversal, qu'asegure los derechos llingüísticos y que desendolque un Plan de Normalización - La capital ye la única de les 3 grandes ciudaes asturianes qu'inda nun tien un serviciu dedicáu al asturianu

Nun comunicáu de prensa Villacampa, un conocíu militante nel movimientu de recuperación llingüística, recuerda que "la normalización del idioma ye ún de los puntos d’alcuerdu de los grupos de gobiernu SOMOS Uviéu, PSOE y IU" y pide algamar un consensu sobre la forma que tienen de tener les midíes de normalización.

Dende SOMOS Uviéu proponse un Serviciu de Normalización Llingüística "atendíu por persones capacitaes llingüística y técnicamente nunes condiciones de trabayu iguales al restu de servicios" y pal qu'esperen sacar unes places estables de trabayu.

La formación venceyada a Podemos propón qu'esti serviciu tea asitiáu na Conceyalía d’Información y Participaciónpor ser la so propia naturaleza tresversal y por tar representada pola vicealcaldesa d’Uviéu, y que seya una ferramienta de planificación, xestión y asesoramientu "non sólo pa que se fale de lo asturiano n’asturianu sinon tamién de dinamización de campañes en toles árees de gobiernu".

El Serviciu, como lu entiende Somos, tien de ser la estructura que desendolque un Plan de Normalización Llingüística acordies al Conceyu d’Uviéu.

Villacampa calca na so argumentación nel calter tresversal de serviciu, que tendría d'amestar "un plus a la marca municipal al traviés del respetu a los derechos llingüísticos de los asturianos y asturianes y del apueste pol patrimoniu llingüísticu y cultural nun sentíu ampliu".

Uviéu, una anomalía

Uviéu ye la única de les trés grandes ciudaes asturianes qu'inda nun tien un Serviciu de Normalización Llingüística. En Xixón existe la Oficina de Normalización Llingüística y n'Avilés funciona la Estaya de la Llingua. La capital d'Asturies ye ún de los pocos conceyos del país que tampoco tien aprobáu el so espediente toponímicu. Fonte:.Asturies.com

La Biblioteca de Mieres entama talleres de llectura

El Serviciu de Normalización Llingüística, en collaboración cola Biblioteca “Vital Aza” de Mieres del Camín y la Biblioteca P.M. Atenéu de Turón, va entamar un nuevu cursu  del ciclu “Alcuentros con  autores” (Club de Llectura n’asturianu).

Esti ciclu d’alcuentros literarios consistirá na entrega mensual d’un llibru d’un autor o autora n’asturianu  y l’alcuentru  lliterariu colos mesmos al fin de mes. Ábrese’l plazu d’inscripción a lo llargo del mes de setiembre, confirmándose l’aniciu nel mes d’ochobre.

Los alcuentros van desarrollase na  Biblioteca P. M. Atenéu de Turón y na Biblioteca  “Vital Aza” de Mieres del Camín, ufiertándose esti añu la novedá de la creación del Club de llectura n’asturianu na Biblioteca “Vital Aza” de Mieres del Camín, contando cola esperiencia y bona acoyida del ciclu “Alcuentru con autores” que, dende va años, vien desarrollándose nel Atenéu de Turón y diversificando  l’actividá pa que se puea disfrutar d’ella en diferentes llugares del conceyu.

La inscripción va ser hasta’l 30 de setiembre nel Serviciu de Normalización Llingüística de la Casa de Cultura “Teodoro Cuesta”, de llunes a vienres: de10 a14 hores. O bien per corréu escribiendo a llingua@ayto-mieres.es o al ateneudeturon@gmail.com.

Fonte: Asturnews

Llanera va tener un serviciu de normalización llingüística

Xunta con Padilla p'algamar ayudes.

María Isabel Fernández Álvarez (Somos Llanera), conceyala de Participación Ciudadana, Sanidá y Consumu de Llanera, aconceyó ayeri con Fernando Padilla, direutor xeneral de Planificación Llingüística y Normalización, y con Lourdes Álvarez, de la Conseyería d'Educación, cola intención de llegar a un alcuerdu pa subvencionar parte del gastu del personal pa echar a andar el Serviciu de Normalización Llingüística. Nesti conceyu del centru del país gobierna'l PSOE xunto con Somos Llanera y Izquierda Xunida.

Fonte: Asturies.com

Dempués de les quexes d'Iniciativa pol Asturianu, reabre'l Serviciu de Normalización Llingüística de Mieres

Iniciativa pol Asturianu presentó va dos meses una quexa nel rexistru del Conceyu de Mieres dempués de recibir l'avisu de dellos vecinos del conceyu y saber que'l Serviciu de Normalización Llingüística taba peslláu. Dempués d'esta quexa y col entamu del mes de xunu, volvió a ponese en funcionamientu esti serviciu de gran importancia pa la normalización y promoción del idioma. 

Estos servicios, que viven momentos de continua intestabilidá habríen tener un mayor sofitu, tanto del Gobiernu d'Asturies, dándo-yos una financiación estable, como de los Conceyos, qu'en munchos casos nun dediquen nengún presupuestu a la so actividá y caltenimientu.

Fonte: Iniciativa pol Asturianu

Iniciativa pol Asturianu reclama al Conceyu de Mieres que se responsabilice y vuelva a poner en marcha’l Serviciu de Normalización Llingüística

Iniciativa pol Asturianu reclama al Conceyu de Mieres que se responsabilice y vuelva a poner en marcha’l Serviciu de Normalización Llingüística.

Iniciativa pol Asturianu recibió les quexes de ciudadanos de Mieres pol parón que vive’l Serviciu de Normalización Llingüística dende va cuasi dos meses y encamienta al Conceyu de Mieres la puesta en marcha d’esti serviciu que dexó de funcionar el pasáu mes d’avientu. L’aprobación de los presupuestos autonómicos asegura l’asignación d’una partida presupuestaria pa los Servicios de Normalización pa esti añu 2015 qu’inclúi a Mieres.

N’otros Conceyos yá decidieron la continuidá de los Servicios nel mes de xineru, con bon criteriu, col aquel de nun parar l’actividá normalizadora tan necesaria nesti ámbitu. Si bien les condiciones llaborales de los téunicos y téuniques d’estos servicios ye bastante llaceriosa, como yá denunciaron hai poco nun comunicáu col qu’Iniciativa pol Asturianu amosó la so solidaridá.

La suspensión del serviciu nel Ayuntamientu de Mieres vien dándose a lo llargo de los últimos años, fechu que nun ayuda pa nada nel llogru de los oxetivos de fomentar l’usu del asturianu polos que se crearon los Servicios de Normalización nos conceyos.

D’otra miente tampoco ayuda muncho a los técnicos encargaos d’estos sevicios nel normal desarrollu del so trabayu que requier un mayor espaciu temporal pa la ellaboración de campañes y otres actividaes a llargu plazu.

Piden polo tanto al alcalde de Mieres, Anibal Vázquez, "que reclame a la Conseyería d’Educación y Cultura una mayor aportación económica y una seguridá nes feches de pagu, pero nun ye menos importante qu’estos servicios, que son propios de l’alministración llocal, tengan tamién un presupuestu nes partíes del Conceyu, como parte del compromisu asumíu poles autoridaes de Mieres nesti ámbitu. Nun basta con esperar a que los recursos vengan d’otres alministraciones, el Conceyu ha invertir nesti serviciu que xenera un importante serviciu a ciudadanos, empreses y otres entidaes".

Por ello, dende Iniciativa pol Asturianu esixen al Ayuntamientu de Mieres "que nun torgue la presencia del asturianu y ponga en marcha’l Serviciu de Normalización Llingüística a nun tardar, colos sos propios medios, amás de colos medios que puedan aportar otres alministraciones. Recordamos a Anibal Vázquez que la so formación, Izquierda Xunida, lleva nel programa la oficialidá del asturianu, y que la falta de midíes de normalización llingüística nun empata bien con estes promeses eleutorales".

Fonte: Infoasturies

Charra: “El pallabreru de la minería asturiana y el so orixe”

A les 19:30 d'esti vienres na Casona d'El Bravial (Blimea).

Lucía Cortina García va ufiertar una charra titulada “El pallabreru de la minería asturiana y el so orixe”, cola que va averar a la xente al significáu y l’orixe de dalgunos de los términos emplegaos con más frecuencia n’actividá minera asturiana, esplicando en qué midida los términos que son patrimoniales s’esportaron a otres zones mineres de fuera d'Asturies.

L'actividá entamada pol Serviciu de Normalización Llingüística de Samartín del Rei Aurelio, con motivu del Día Internacional de la Llingua Materna, desendolcáu'l pasáu 21 de febreru nuna xornada de reivindicación de la llingua propia.

Fonte: Infoasturies

Recital poéticu de Rubén d'Areñes en Nava

Esti sábadu a les 19:00

   Dientro de los sos talleres de llectura n’asturianu que se vienen celebrando dende va trés años, el Serviciu de Normalización Llingüística de la Comarca de la Sidra, en collaboración col Conceyu de Nava, entama pa esti próximu sábadu 13 d'avientu a les 19:00, na sala Marta Portal de la Casa la Cultura del conceyu, un recital del poeta Rubén Suárez Sánchez (Areñes-Siero, 1983).

   Más conocíu col nomatu de Rubén d’Areñes, ún de los autores más destacaos dientro de les nueves xeneraciones de la lliteratura n’asturianu. Estrenáu nel mundu lliterariu con Los venticinco pasos (2008), col qu’algamó’l premiu Nené Losada Rico, ye autor tamién de Les páxines blanques (Premiu Fernán Coronas 2008), Pequeñu álbum de familia (2010) y La solombra del flacu (2011). En Nava fadrá un repasu per tola so trayectoria y los asistentes podrán comentar col autor impresiones sobre la so obra y el fechu poéticu en xeneral.                                                        Fonte: Infoasturies

Alcuentros con autores

 Atenéu de Turón

Cartelu de la presentación del llibru "Si''l temblor niega'l fríu"

      Presentación de la novela “Si’l temblor niega’l fríu” de Xurde Álvarez. Miércoles 29 d’ochobre a les 19:30 h.

   Dientro del ciclu “Alcuentros con autores” va celebrase la presentación de la novela “Si’l temblor niega’l fríu” de Xurde Álvarez que compartirá la so obra col Club de Llectura n’asturianu del Atenéu de Turón.

    L’alcuentru ta abiertu al públicu en xeneral.

    Presenta: Ánxel Álvarez Llano. Serviciu de Normalización Llingüística del Aytu. de Mieres.                                             Fonte: llingua.ayto-mieres.es

Mieres convoca una edición nueva del Concursu de Rellatos Curtios p'alumnos de Secundaria

Cartelu del III Concursu de Rellatos Curtios "Conceyu de Mieres"

   Yá ta abiertu’l plazu pa presentar trabayos pal III Concursu de Rellatos Curtios ‘Conceyu de Mieres’ pa estudiantes de Secundaria. El plazu fina’l 30 de payares y los ganadores van recibir un llote de llibros n’asturianu.

   Nesti concursu qu’entama’l Serviciu de Normalización Llingüística de Mieres pueden participar estudiantes matriculaos en centros educativos de Secundaria d’Asturies con edaes ente les 12 y 18 años. Pa ello, han de presentar una obra inédita, orixinal y de temática llibre que nun supere les trés fueyes per una cara en formatu DIN-A4 y tipográfía ‘Times New Roman’, cuerpo 12 y a doble espaciu. El testu ha de tar dientro d’un sobre zarráu con un alcuñu que s’indicará n’otru sobre más pequeñu onde han de dir los datos del alumnu o alumna. Nel casu de que s’opte por unvialu en formatu electrónicu, les señes del autor han de dir nun documentu axuntu.

   El día caberu pa entregar los testos fina’l 30 de payares. El mou de presentalos a concursu pue ser en mano, na Casa Cultura Teodoro Cuesta, o per vía postar a la direición de la mesma: cai Manuel Llaneza, númberu 8; 33600 Mieres del Camín. Tamién ye posible utilizar el corréu electrónicu llingua@ayto-mieres.es. Un xuráu encargaráse de seleicionar al ganador y a los dos finalistes, que van recibir un llote de llibros en llingua asturiana. La entrega de premios celebraráse nel salón d’actos de la casa cultura nun actu con fecha por determinar y los trés trabayaos vencedores van espublizase nel llibru de les fiestes de San Xuan. Pa más información, pue contautase col Serviciu de Normalización Llingüística de Mieres al traviés del so corréu o nel teléfonu 984.18.02.37, cola estensión 601.                                                                                            Fonte: asturies.com

Castrillón tién yá serviciu de normalización llingüística

El Conceyu de Castrillón vieno acabante de poner en funcionamientu nesti añu 2014 el Serviciu de Normalización Llingüística, un serviciu públicu a disposición de tola ciudadanía que tien por oxetu promover y facilitar l’usu del asturianu na institución municipal y ente la vecindá castrillonense. Trátase, polo tanto, d’un serviciu pa tolos ciudadanos y toles ciudadanes, creáu pa sofitar el fomentu y la difusión de la llingua asturiana en tolos ámbitos de la vida municipal, col enfotu d’enanchar la so presencia na vida social y cultural del conceyu. Esti Serviciu, estrenáu’l pasáu 4 de payares de 2013 y que llevaba peslláu dende xineru d’esti añu, ponse de nuevo en marcha’l pasáu 22 de setiembre de 2014 col envís d’executar el Proyectu de Normalización Llingüística del Ayuntamientu de Castrillón 2014, aprobáu por Resolución d’Alcadía’l 23 de julio del 2014, y que consiste, grosso modo, na traducción al asturianu de les publicaciones, folletos, guíes, documentos, impresos, etc. que xenere’l Conceyu hasta’l 31 d’avientu del 2014, arriendes de la traducción de la páxina web del Centru Cultural Valey. Amás de les funciones enconmendaes por Alcadía, esti Serviciu tien tamién ente les sos funciones la d’asesoramientu, información y ayuda a particulares, empreses, asociaciones y entidaes de toa triba del Conceyu de Castrillón, en cuantes a la llingua asturiana se refier. Tamién ye función d’esti Serviciu’l fomentu del usu de la toponimia oficial del Conceyu, aprobada por Decretu en xunu del 2008. La sede del Serviciu de Normalización Llingüística de Castrillón, dependiente de la Conceyalía d’Educación y Cultura, ta instalada na segunda planta del Centru Cultural Valey de Piedrasblancas y tien un horariu de 8 a 15:30h, de llunes a vienres. Les persones interesaes puen ponese en contactu presencialmente ente les 10 y les 15:30h, al traviés del corréu lletrónicu: llingua@ayto-castrillon.es, o per teléfonu: 985530329. Fonte: Asturnews

Veranu Lliterariu en Corvera

En Corvera, los llunes los neños y neñes axúntense con escritores

   Dientro de la programación del Veranu Lliterariu de Corvera, esti llunes día 14, va celebrase un alcuentru del escritor Xuan Carlos Crespos Lanchas colos sos pequeños llectores, de 11.30 a 12.30 hores na Biblioteca de Les Vegues, cola asistencia llibre y gratuita como davezu.

   El Veranu Lliterariu de Corvera ye un programa d'actividaes qu'entama la Casa de la Llingua-Serviciu de Normalización Llingüística de Corvera. Fonte: Asturnews

L.lena entama un cursu d'asturianu pa persones adultes

El cursu tien una duraciónde 30 hores

   El Conciyu L.lena entama, al traviés del Serviciu de Normalización Llingüística, un cursu d’asturianu pa persones adultes que tien como nomatu y enganche publicitariu la lleenda "¡Que nun te coma la llingua’l guetu!". El cursu que tien una duración de 30 hores y va facer un percorríu por cuestiones xenerales como la sociollingüística asturiana, historia de la llingua asturiana, variantes dialectales, centrándose na variedá del conciyu, y nomes ortográfiques.

   El cursu va ponese los llunes y miércoles na Casa de Cultura de La Pola, n’horariu de 17 a 19 hores. L’entamu ta previstu pal 24 de marzo. Les clases va poneles la responsable del Serviciu de Normalización Llingüística.

   La xente interesao pue apuntase hasta’l 20 de marzo nel Serviciu de Normalización Llingüística c/Marqués de San Feliz 2, en normasturarrobaaytolena.es o nel teléfonu 985497608.   Fonte:  Asturnews

   Más información: Direición mail pa atopar información ya inscribise

L.lena convoca un concursu de cuentos pa primaria

  

El Serviciu de Normalización Llingüística de L.lena, entama un concursu de cuentos pa enseñanza primaria de les escueles de L.lena. El consursu que tienpor títulu “Trapiando” tien como temática la nieve y los deportes de nieve. Asina, enmárcase dientro de les actividaes que festexen el 60 aniversariu de la estación d’esquí Valgrande-Payares.

   El concursu al que solo se podrán presentar cuentos en llingua asturiana, tanto na variante propia de L.lena como na variedá normativa, va dirixíu tol alumnáu de la etapa de primaria de toles escueles de L.lena. Distínguese tres categoríes coincidiendo colos tres ciclos de: de 6-8 años, de 8-10 y de 10-12. Establécense 2 premios por categoría, que van consistir en lotes de llibros y música.

Ayuntamientu de Pola L.lena

   El plazu d’entrega de los cuentos ye hasta’l 31 de marzo. El fallu daráse a conocer nun actu del que se dará anuncia debidamente. El tribunal del xuráu cuenta colos maestros de llingua asturiana de les escueles del Conceyu, con un mienbru de l’Academia de la Llingua Asturiana, otru de la Rede de Normalización Llingüística nos Conceyos y una persona en representación de la Estación d’Esquí Valgrande-Payares.

Fonte.  Asturnews

Los trabayadores de les oficines de Normalización esixen que los conceyos asturianos asuman los servicios como propios

Hai yá dalgunos años que l'Asociación de Trabayadores de la Normalización Llingüística vien denunciando la situación de dexadez y desamparu que sufren una parte importante de les persones responsables de los SNLs asturianos, sometíes a unes condiciones llaborales cuanto menos precaries.    Cada añu, n'acabando l'exerciciu correspondiente, la mayoría de les persones responsables de los SNLs son cesaes n'espera de bones nueves nos presupuestos que garanticen la so continuidá mediante llinies de subvención pal mantenimientu de los servicios, rompiéndose con estes actuaciones la so actividá y cualquier esperanza d'estabilidá llaboral.    Pero ye que nesti 2014 la situación lloñe de mexorar vien empeorando, según amuesa l'Asociación de Trabayadores d'estos servicios nuna nota de prensa: "cesóse al personal responsable de los SNLs de Mieres, Llaviana y Castrillón, esti últimu de recién creáu y yá peslláu. Esti casu concretu ye especialmente sangrante, dao que se creó un SNL al que nun se-y dio continuidá nenguna y que pierde cualquier posibilidá de facelo nun futuru cola prórroga presupuestaria, que limita la percepción de prestaciones a los SNLs de traxectoria anterior al exerciciu últimu."    Un añu más, l'Asociación diz que nun-yos queda otra que "protestar escontra la situación de recortes y precariedá que sufrimos, reclamando un compromisu mínimu por parte de les alministraciones que garantice un serviciu de calidá a la ciudadanía en materia de normalización llingüística y un marcu d'actuación dignu pa les persones que representemos a los diferentes servicios de normalización llingüística d'Asturies".    Darréu d'ello, esixen "que los conceyos asturianos asuman estos servicios como propios garantizando la estabilidá de les persones responsables y un diálogu permanente cola Dirección Xeneral de Política Llingüística d'Asturies". Y de la mesma manera, reclamen a la Dirección Xeneral de Política Llingüística d'Asturies "mayor implicación, una coordinación de calidá permanente y un apoyu y una coherencia pa coles funciones, qu'entendemos, comparten colos SNLs: asegurar una visibilización digna y n'igualdá de condiciones col español pal asturianu y l'eonaviegu na alministración pública, normalizar l'usu del asturianu y del eonaviegu fuera del ámbitu priváu y garantizar el cumplimientu de los distintos decretos de toponimia a nivel autonómicu y estatal".    Fonte:  Asturnews.

Preséntase'l "Calandariu de la güerta d'Asturias" en Cangas

Los vecinos de la zona urbana podrán pasar a recoyelu a partir del día 23 pola Casa la Cultura Palaciu d'Oumaña   El Serviciu de Normalización L.lingüística de Cangas presentóu estos días el sou calandariu de la güerta d'Asturias, material que forma parte d'una campaña más amplia destinada al sector ganadeiru ya agrícola de la zona ya que se feixo ente medias col Serviciu de Normalización L.lingüística de L.lena ya'l de Llaviana.   El calandariu vei chegar por corréu postal a cadaguna de las casas de la zona rural canguesa, acompañáu d'una carta firmada pol Alcalde ya la Conceyala de Cultura del Conceyu felicitando las fiestas ya recalcando'l sou apoyu a los sectores arriba mencionaos.   Los vecinos de la zona urbana podrán pasar a recoyelu a partir del día 23 pola Casa la Cultura Palaciu d'Oumaña. Amás, a partir de xineiru repartiráse'l material en centros docentes. Palaciu d'Oumaña, Cangas del Narcea   Con esta campaña los SNLs pretenden homenaxear ya afianzar el sou compromisu cono entornu rural, memoria encesa de la tradición ya garante d'un futuru sostenible.    Fonte:  Asturnews

Cursu Básicu de Llingua Asturiana en Corvera

Abiertu'l plazu d'inscripción pal Cursu Básicu de Llingua Asturiana en Corvera hasta'l 23 d'ochobre, primer día del cursu que ye gratuitu y va impartise los miércoles de seis a ocho la tarde. Dende esta selmana y hasta’l 23 d’ochobre, ábrese’l plazu pa inscribise nel “Cursu Básicu de Llingua Asturiana (II)” que, igual que na edición anterior, quier ser "un mecanismu de deprendimientu de les normes básiques d’escritura del idioma, pero tamién una manera d’acercase a bien d’aspectos de la cultura asturiana". El cursu, de carácter gratuitu, va ser impartíu pol técnicu responsable del Serviciu de Normalización Llingüística de Corvera. L’horariu del mesmu va ser tolos miércoles de 18 a 20 hores, siendo la primer sesión el próximu miércoles 23 d’ochobre nel Centru Sociocultural de Las Vegas/Les Vegues. Los conteníos d’esti cursu son los que s’indiquen de siguío: -Normes ortográfiques; -La llingua asturiana: léxicu, sintaxis y morfoloxía; -Frases feches, refranes y cosadielles; -La creación cultural n’asturianu; -Acercamientu a la toponimia de Corvera. Inscripciones nel Centru Sociocultural de Las Vegas/Les Vegues. Fonte: Infoasturies

Cangas celebra la so V Sumana de la L.letras Asturianas

Cangas del Narcea celebra la edición llocal de la Selmana de les Lletres Asturianes

   La Selmana de les Lletres Asturianes sigue dos selmanes dempués en Cangas del Narcea cola celebración de la Sumana de las L.letras Asturianas, na que dende'l 13 al 17 de mayu Cangas va homenaxar a les Lletres Asturianes na quinta edición d'esti eventu, entamáu pola Conceyalía de Cultura y el Serviciu de Normalización Llingüística municipal. Nesta ocasión los eventos van entamar cola apertura de les esposiciones “Chispina”, pal públicu infantil, y “L’asturianu na hestoria” na Casa de Cultura. Nesti primer día, a les 20:30, va proyectase tamién una película doblada al asturianu “El tercer home”, nel Auditoriu de la Casa de Cultura.

   La música tradicional va ser la protagonista del martes 14 de mayu. Nel teatru Toreno, a les 20:30, va presentase la tesis de Llorián García “Gaiteres y panderetos. Xéneru y tresxéneru na música tradicional asturiana” y de siguío podrá esfrutase del conciertu de Cantaruxare.

   El cine vuelve a la Sumana de la L.letras Asturianas el miércoles 15 cola presentación de la obra cinematográfica de Pablo Quiroga, actu que se va desenvolver nel Auditoriu de la Casa de Cultura, a les 20:30 hores.

   El xueves 16, los soníos tradicionales van envolubrar de nuevu'l teatru Toreno de la mano de los alumnos de quintu de la escuela de música Tradicional de Cangas, que van ufiertar un conciertu a les 20:30.

   La Sumana de la L.letras Asturianas va pesllase col homenaxe a José María’i Cabral de Truenes pola so contribución a la tresmisión y pervivencia de la llingua asturiana. L'actu, que se va desenrrollar nel teatru Toreno, a les 20:30, va cuntar amás cola actuación teatral “La escuela”, representada pol alumnáu d'asturianu del colexu públicu Alejandro Casona, y nél fadráse entrega de los premios del X Concursu de cuentu curtios n'asturianu p'adultos y del V Concursu de cuentos n'asturianu infantil “Otilio Álvarez Rodríguez”.

   Fonte:  Asturnews.

"El llibru pa lo más piquiñino de casa"

El SNL d’El Cabu Peñes principia cola distribución de  ‘El llibru pa lo más piquiñino de casa’

   Esta selmana principió la distribución en Carreño y Gozón de ‘El llibru pa lo más piquiñino de casa’. El SNL de la Mancomunidá d’El Cabu Peñes busca impulsar con esta campaña la tresmisión xeneracional del idioma.

   ‘El llibru pa lo más piquiñino de casa’ trátase d’una especie de cuadernu onde los padres van apuntando los datos y costumes del críu, asina como la so evolución dende’l momentu de la so nacencia hasta los 3 años: etapes de crecimientu, calendariu de vacunación, fiches personales, espacios p’anotar delles coses, espacios pa fotografíes... Dende esta selmana, les persones de los dos conceyos que tengan fíos recibirán un exemplar nel Rexistru, anque tamién van repartise nes escueles de 0 a 3 años y nes oficines del Serviciu de Normalización Llingüística d’El Cabu Peñes hasta agotar esistencies.

   Arancha Prado, responsable del SNL, destaca qu’esti llibru tien como oxetivu cimeru “destacar la importancia del usu de la llingua materna nes families, como tresmisores xeneracionales del so usu comunicativu y habitual pa colo más piquiñino de casa”. La presentación d’esta guapa y orixinal campaña celebróse’l xueves pasáu na Casa La Escribana coincidiendo col Día Internacional de la Llingua Materna, onde Prado lleó unes pallabres de la direutora xeneral de la UNESCO, Irina Bokova, nes que defende’l plurillingüísmu y la importancia que tienen los llibros pa caltener la vitalidá de los idiomes.

   Fonte:  Asturies.com