Asturies nun va convocar oposiciones de maxisteriu anguaño dada la inseguridá xurídica qu'hai y l'efectu llamada"

Queden refugaes al nun comunicar l'Estáu la tasa de reposición

Na semeya d'arquivu, el conseyeru asturianu d'Educación pide a Méndez de Vigo que se cree la especialidá de "Llingua asturiana"

  Anguaño nun va haber convocatoria d'oposiciones docentes pa Primaria n'Asturies, según confirmó güei el conseyeru d'Educación, Genaro Alonso, dada la inseguridá xurídica qu'hai y "l'efectu llamada" que podría llevar a que se presentaren a esti procesu selectivu más de 20.000 opositores.

  El titular d'Educación punxera'l día de güei como fecha llende pa dar a conocer la decisión del Executivu asturianu al respective de estes oposiciones que, según el conseyeru, espera convocar cuanto antes pa rebaxar la tasa d'interinidá, "el próximu añu o'l siguiente".

  Según el conseyeru, el próximu añu podríen convocase tantu les oposiciones a Primaria como a Secundaria, pero ye una decisión qu'entá nun ta tomada.

  El plenu de la Xunta Xeneral tamién aprobara a principios de mes una moción na que s'encamentaba al Executivu asturianu a convocar les oposiciones antes del 15 de marzu col máximu de vacantes posibles y que se coordines col restu de comunidaes que realicen les pruebes pa evitar l'efectu llamada'.

  El pasáu mes el Gobiernu central almitió que sería "muncho más senciellu" poder convocar oposiciones d'empléu públicu, en concretu docente, si hubiera presupuestos xenerales del Estáu de 2017, anque pidió "tranquilidá" porque se va a atopar "una solución".

Una decisión que llega tarde

  Pela soparte, los sindicatos ven lóxicu que'l Principáu arrenuncie a les oposiciones pero llamenten la decisión y creen que llega tarde.

 Comisiones Obreres, UXT, Suatea y ANPE aseguren que ye una mala noticia pa los aspirantes que lleven meses estudiando y pa la interinidá, que ye de cerca del 30%. 

  Consideren que ye una manera d'evitar l'efectu llamada, una y bones el restu de comunidaes yá s'han descolgado. 

  Coles mesmes, esixen que nun se pierdan les places y que les alministraciones coordinar pa executales.                                                              Fonte: rtpa.es

“Llangréu” pide poer apaecer nel DNI

  La Policía Nacional sigue xustificando con disculpes informátiques la posibilidá d’emplegar los topónimos oficiales n’asturianu, como fizo hai tiempu con Gijón/Xixón, y la conceyalía d’Urbanismu del Ayuntamientu de LLangréu vieno acabante reclamar que se puea usar el topónimu oficial n’asturianu nel DNI.

  Los llangreanos son davezu usuarios del asturianu y l’altu grau d’escolarización amuesalo nidiamente. Por mor d’ello hai tiempu que son muchos los que reclamen que na so documentación, incluyíu’l Documentu Nacional d’Identidá (DNI), figure’l nome del so pueblu n’asturianu.

  El conceyu de Llangréu tien aprobada la so toponimia n’asturianu, pero la disculpa de la llimitación del programa informáticu de la Pôlicía pa non poer usase nos DNI sigue sintiéndose perdayuri. Por mor d’ello, va unos díes la conceyalía d’Urbanismu que xestiona’l conceyal d’IX Jonatan López unvió una carta oficial a la dirección de la Policía Nacional d’Asturies, departamentu encargáu d’expedir el DNI, solicitando que col Conceyu de Llangréu se respete so toponimia y que los vecinos qu’asina lo soliciten puedan poner tantu’l nome del so pueblu como’l del so conceyu n’asturianu.

  El conceyal recuerda que n’otros conceyos del Principáu sí puede escoyese como nel casu de Gijón/Xixón. «Llangréu esiste», recuerda l’equipu de gobiernu. López considera que ye «una clara discriminación pa los vecinos de Llangréu nun poder faer usu d’esti nome cuando se trata d’una de los sos dos denominaciones oficiales». Y precisa qu’asina se recueye tantu nel Boletín Oficial del Principáu d’Asturies como nel Boletín Oficial del Estáu.                                                                                    Fonte: asturnews.com

El MEC entama a negar la especialidá “a la asturiana”

El Conseyeru d'Educación del Principáu d'Asturies, Genaro Alonso Megido

  El Ministeriu Educación tresllado-y esta selmana pasada al Conseyeru del ramu asturianu, que nun ve posibilidaes d’algamar la especialidá educativa de llingua asturiana col decretu autonómicu que propón el Principáu por mor de que nun esiste precedente n’España y de les posibles dificultaes pa la so posterior reconocencia estatal.

  El conseyeru d’Educación y Cultura del Gobiernu del Principáu d’Asturies, Genaro Alonso, participó la selmana pasada na primer xunta de la comisión de trabayu col Ministeriu d’Educación, Cultura y Deporte pa empecipiar la ellaboración del decretu autonómicu que dexaría poner en marcha la especialidá docente de llingua asturiana y la rempuesta del Ministeriu nun pudo ser más negativa.

  “El ministeriu señala que se trata de crear la especialidá docente d’una llingua non cooficial, con protección xurídica ya implantación curricular, lo que supon una novedá, cuidando que nun esiste precedente n’España”, espliquen dende’l Principáu. Alonso presentó na cita les sos propuestes pa la ellaboración d’esta normativa, dempués de que l’Executivu central asegurara que la creación de la especialidá ta fora del so ámbitu competencial.

  Pela so parte, los representantes del ministeriu almitieron la posibilidá de que sía’l Principáu’l qu’impulse la iniciativa, anque alvirtieron de posibles dificultaes pa la so posterior reconocencia estatal por aciu el cambéu de los reales decretos polos que s’establecen les especialidaes de los cuerpos docentes d’Educación Infantil, Primaria y Secundaria.

  Mientres l’alcuentru, al qu’asistieron el secretariu d’Estáu d’Educación, Formación Profesional y Universidaes, Marcial Marín, y el director xeneral d’Evaluación y Cooperación Territorial, José Luis Blanco, alcordóse siguir colos trabayos de la comisión, treslladando la próxima xunta afitóse pal día 20 d’abril.                 Fonte: asturnews.com

Andecha Astur desixe al Principáu qu'intervenga y garantice'l respetu pol himnu d'Asturies na campaña la Llotería

L'Asturies Patria Querida quier ser emplegáu nuna campaña pola Llotería Nacional Andecha Astur desixe urxentemente al Principáu la comprobación de la noticia, recoyía en LNE de güei, na que s’afirma qu’el nuesu himnu d'Asturies va ser parte de la sintonía que Lloteríes y Apuestes del Estáu utiliza esti añu pa promocionar la vienta pel branu de la Llotería de Navidá. Andecha quier que nel casu de confirmala, actúe de forma imediata, firme y contundente, paralizando asemeyada falta de respetu escontra l’himnu que representa a Asturies y a los asturianos, y desixendo les debíes responsabilidaes, polítiques y llegales al responsable d’asemeyada ofiensa. Andecha Astur, que enxamás nun consideró’l “Asturies Patria Quería” un himnu lo suficientemente dignu pa representar a la nuesa nación, y que considera al “Principado” una istitución desllixitimada dafechu, "tantu por ser impuesta dende Madrid, como poles sos actuaciones comu sucursal española, entiende que ye obligación de quien agora mesmo representa a Asturies actuar pa defender l’himnu qu’anguañu mos representa, y a torgar qu’una vegada más acabe siendo pocu menos que l’himnu los borrachos". Per otru llau, Andecha Astur "costata una vegada más la falta de respetu que merez Asturies nel contestu estatal, tando ciertos de que sedríe imposible imaxinar asemeyáu usu publicitariu non yá del himnu d’España, sinón mesmamente del de Cataluña, País Vascu, Andalucía, Galicia…. ". Les desixencies d'Andecha xurden énte la información apaecía nos medios de comunicación afirmando que l'Asturies Patria Querida va ser utilizáu na publicidá de la Lloteria de Navidá. Fonte: Asturnews

El proyeutu de Real Decretu d'especialidaes de los cuerpos docentes d'ESO nun pon torgues a la especialidá d'asturianu

Dende va unos díes yá puede vese na páxina web del Ministeriu d'Educación el proyeutu del Real Decretu qu'establez les especialidaes de los cuerpos docentes d'ESO y onde nun se ponen torgues a la especialidá d'asturianu. Ye'l nuevu dempués de que l'anterior fuera anuláu pol departamentu de José Ignacio Wert ante'l fuerte refugu amenáu porque proponía que el profesores impartieren asignatures distintes a les de la so especialidá. El nuevu proyeutu va tar a información pública hasta'l 13 de xineru, víspora de la Conferencia Sectorial d'Educación y esti día SUATEA alvertía de que'l documentu "nun foi consultáu coles comunidaes nin unviáu. Tampoco pasó pol Conseyu Escolar del Estáu nin se compartió colos sindicatos". UXT que ta analizando'l proyectu tamién faló de falta d'información a los medios de comunicación. SUATEA nomó esta forma d'actuar de «escandalosa» y señaló que l'anterior yera tal disparate, que cualquier cambéu ye meyor". La nueva materia de Cultura Científica va ser asignada a los docentes de Bioloxía, Xeoloxía, Física y Química, "polo que sigue la lóxica de les especialidaes de Ciencies". Coles mesmes, "profesores d'idiomes nun van dar Llingua y Lliteratura, sinón la so especialidá, y caltienense les asignatures de Llatín y Griegu, suprimíes na primer propuesta del Real Decretu. SUATEA deduz, tamién, que nun se ponen torgues a la especialidá d'asturianu, polo que se dexa'l camín abiertu a que'l Principáu tome por fin una decisión al respeutive. Fonte: Asturnews

El Principáu asoleya'l primer llibru billingüe de la so hestoria

   El llibru del IV Día de les CienciesAsturianes ye'l primeru billingüe asturianu/gallegu-asturianu que publica'l Principáu d'Asturies.

   Yá ta disponible'l llibru del IV Día de les Ciencies Asturianes, nuna edición non venal editada pola Conseyería d'Educación, Cultura y Deporte onde se recueyen les unidaes didáctiques ellaboraes pa que los centros escolares prepararen l'alcuentru col doctor Carlos López-Otín que se celebró nel Teatru de la Llaboral de Xixón el 8 de payares del añu pasáu.

  Trátase del primer llibru billingüe asturianu/gallego-asturianu que publica'l Principáu d'Asturies. La obra incluye una introducción de la directora xeneral de Política Llingüística, Ana María Fueyo Llaneza, un resume de la intervención del doctor Carlos López-Otín, titulada "L'aventura molecular de la vida", y les unidaes didáctiques "Les aventures moleculares de la vida. Un paséu pelos oríxenes de la vida pa entender munches más coses" (Primaria) y "De l'A a la Z. En llaboratoriu del Dr. López-Otín" (ESO y Bachilleratu).

   El llibru, con una tirada amplia, va unviase a tolos centros escolares de Primaria y Secundaria onde s'imparte l'asignatura d'Asturianu o de Gallego-Asturianu, pero tamién se pue descargar na sección de Publicaciones de la web del Serviciu de Política Llingüística.    Fonte:  Asturnews

Más información: Llibru del IV Día de les Ciencies

Iniciativa pol Asturianu pide a los gobiernos d'Asturies y España cumplir colos mandatos del Parllamentu Européu

Tres la cabera resolución del Parllamentu Européu sobre les llingües europees en peligru d'estinción y la diversidá llingüística na Xunión Europea, Iniciativa pol Asturianu quier amosar el so prestu por esta resolución y faer una llamada por un cumplimientu del documentu dafechu. Dende l'asociación señalen que "pesie de que l'Estáu español ye miembru de la Xunión Europea, y, pesie de que robló y ratificó la Carta Europea de les Llingües Rexonales o Minoritaries (ECRML), inda hai munches evidencies de la falta de compromisu del Gobiernu español pa col cumplimientu de toles resoluciones y aiciones llegales que s'esixeron al mesmu col enfotu de protexer y promover les llingües rexonales o minoritaries, especialmente no que cinca a aquelles qu'escarecen d'un estatus oficial, l'asturianu y l'aragonés". Amás dende Iniciativa destaquen "la indiferencia amosada poles Comunidaes Autónomes d'Aragón y el Principáu d'Asturies, faciendo casu dalo de toles llamaes del Conseyu d'Europa, el Parllamentu Européu y toles autoridaes rexonales, nacionales ya internacionales encamentando a una rápida rempuesta pa la preservación del so patrimoniu llingüísticu y el cumplimientu de les sos responsabilidaes llegales pa col asturianu y l'aragonés". Poro, recuerden "tantu al Gobiernu español como a toles Comunidaes Autónomes y los gobiernos llocales arreyaos que son los únicos responsables de la inconcebible ya imperdonable situación na qu'estos idiomes s’atopen anguaño, y píde-yos que pongan toles sos escuses y prexuicios a un llau d'una vegada por toes y se xunan a les sos comunidaes na llucha por revitalizar un llegáu de valir incalculable de tolos europeos". Asina, finen manifestando que "tal como establez esta nueva resolución del Parllamentu Européu, la meyor manera de revitalizar una llingua básase nuna fonda planificación y coordinación n'actividaes crítiques como la educación, los medios de comunicación, les nueves tecnoloxíes, l’alministración y toles formes de vida pública. Nesti sen, dende Iniciativa pol Asturianu queremos destacar el papel cimeru que toos estos elementos xueguen en caltener viva una llingua y reafitamos nel nuesu compromisu pa cola preservación y promoción de la llingua asturiana y la nuesa absoluta disposición a collaborar con cualesquier institución dimpuesta a asumir un papel más activu nesti duru pero fundamental llabor". Fonte: Infoasturies

Asturies va pidir al Ministeriu de Fomentu que replantegue la so postura al respective de la toponimia asturiana

L'Estatutu d'Autonomía del Principáu d'Asturies garantiza una protección especial pal asturianu que se desenvuelve na Llei d'Usu de 1998

La Conseyería d’Educación, Cultura y Deporte del Gobiernu del Principáu d’Asturies va poner en contactu col Ministeriu de Fomentu pa pidi-y que replantegue la so postura al respective de la toponimia oficial “teniendo en cuenta les particularidaes llingüístiques de la comunidá autónoma”, acordies cola nota unviada a los medios esti miércoles y dempués de la denuncia fecha por Iniciativa pol Asturianu pola respuesta dada por Fomentu sobre la cuestión. EL senador Jesús Iglesias ficiere una entruga per escrito a la que Fomentu respondió xustificando que nun usen la toponimia asturiana oficializada “por nun ser oficial l’asturianu”.

El Principáu quier que'l Gobiernu d'España tenga en cuenta que l'Estatutu d'Autonomía establez un réxime de protección pa la llingua asturiana, y que la Llei d'Usu y Promoción, publicada nel Boletín Oficial del Principáu d'Asturies el 28 de marzu de 1998, indica que “los topónimos de la comunidá autónoma del Principáu d'Asturies van tener la denominación oficial na so forma tradicional. Cuando un topónimu tenga usu xeneralizáu na so forma tradicional y en castellán, la denominación va poder ser billingüe”.

La conseyería decidió treslladar esti pidimientu al ministeriu tres l'anunciu del Gobiernu de nun usar la toponimia tradicional “nos indicadores de carreteres y autopistes nacionales al so pasu pola comunidá por nun ser l'asturianu una llingua oficial”, sigue la nota gubernamental.

D'esta miente, la Conseyería d'Educación, Cultura y Deporte entiende que la presencia de los topónimos tradicionales que yá fueren oficializaos nos indicadores de les autopistes y les carreteres asturianes “namás obedez al cumplimientu estrictu de la llei”. Coles mesmes, el Gobiernu destaca que la midida respuende a la necesidá de señalizar cada llugar col so correspondiente topónimu oficial.

Fonte: Asturnews

Ana Cano reivindica la oficialidá énte les autoridaes asturianes y europees

DAMIÁN BARREIRO . UVIÉU
Ana Cano, presidenta de l’Academia de la Llingua Asturiana (ALLA), afirmó que la cooficialidá ye l’únicu camín que marca la llegalidá llingüística y autonómica del Estáu español. Cano pronunció estes palabres delantre d'Alejandro Calvo, viceconseyeru de Cultura; Ana Fueyo, directora xeneral de Política Llingüística: y Cristina Valdés, decana de la Facultá de Filosofía y Lletres; amás del director del Secretariáu de la Carta Europea pa les llingües rexonales y minoritaries del Conseyu d'Europa, Alexey Kozhemyakov, y el coordinador del Liet International, Onno Falkena.

La reivindicación d’Ana Cano producióse nel Salón d'Actos de la Biblioteca de la Facultá de Filosofía y Lletres de la Universidá d’Uviéu, onde participó nel ciclu de conferencies sobre Les llingües minoritaries n'Europa. La música y la cultura como elementu recuperador, qu'inaugura'l programa d'actos del Liet International 2012. La presidenta de l’ALLA intervieno con una ponencia sobre’l procesu de normativización y normalización del nuestru idioma.

Según afirmó Cano, pa qu’una llingua minoritaria y minorizada, «palabra que sorrayo», pueda sobrevivir, fai falta qu’esti idioma tea preparáu tecnicamente pa poder sirvir como ferramienta de comunicación en tolos ámbitos, «llabor onde l’ALLA fixo’l so trabayu»; amás de que la sociedá tien que tar preparada p’asumilu, «y nel casu asturianu los estudios sociollingüísticos asina lo demuestren». Por eso, recordó que más del 80% de los ciudadanos entienden activa o pasivamente l’asturianu.

Como puntu últimu, dixo que tien qu’haber un marcu llegal que dea seguranza a esa normalización pa que’l que quiera pueda vivir nel so idioma, «camín que n’Asturies namás pue pasar pola cooficialidá». Asina, añadió que si nun hai oficialidá va ser mui difícil que la nuestra llingua tenga futuru,«mesmamente con esi marcu llegal nun sé si va poder sobrevivir, pero d’otra manera ye complicao abondo».

Fonte: Les Noticies

El presidente recibe a l'ALLA

La presidenta de l'Academia de la Llingua Asturiana, Ana María Cano González, y el responsable del programa de formación de la mesma, Xosé Antón González Riaño, aconceyaron esti xueves col presidente del Principáu, Javier Fernández, y el viceconseyeru de Cultura, Alejandro Calvo. La xunta sirvió pa facer un repasu de los asuntos xenerales al rodiu de la política llingüística, la visualización del asturianu y la situación de l'Academia. Fonte: Asturnews

Javier Fernández refuga la cooficialidá de la llingua asturiana

Javier Fernández comprometióse a protexer l’asturianu, anque refugó la cooficialidá del idioma. El canditatu únicu a presidir el país fixo esta declaración d’intenciones na segunda sesión del Plenu d’Investidura en respuesta a Jesús Iglesias. El voceru d'IX na Xunta Xeneral pidió a Fernández un compromisu pa cola llingua asturiana, demandandó-y una mayor "voluntá política". Iglesias dixo conformase con que dende les files socialistes señalaren que, ante la cooficialidá, nun se van oponer nin van ser una torga, igual que fixeron ante la pretensión d'UPyD de llograr una circunscripción única. "L'asturianu tien que dexar de ser tema de conflictu", apuntó. Por contra, Fernández mantuvo la posición histórica del so partíu de negase a reconocer los derechos llingüísticos de los asturianos al oponese a la cooficialidá. Queda por ver la posición que mantién agora IX, en plenu debate sobre si pasen a formar parte del Gobiernu de Fernández o non. Mañana la so militancia va votar en referéndum la decisión a tomar. Lo que sí ye seguru ye l’apoyu al líder de la FSA na investidura. Fonte: Asturies.com

Andecha Astur refuga'l "silenciu cómpliz del Principáu” nel asuntu del votu n'asturianu

Pablo R. Guardado
Andecha Astur cataloga d'inaceptable “el silenciu cómpliz del ‘Principado’” tres la decisión de la Xunta Elleutoral de torgar la presencia de papeletes n’asturianu nos colexos eleutorales. Considera que ye un bon momentu pa dar sofitu al idioma.

La organización nacionalista quixo agradecer públicamente mediante un comunicáu “les múltiples manifestaciones de solidaridá recibíes, tanto de particulares como d’otres organizaciones sociales, partíos políticos, sindicatos, asociaciones culturales..., agradeciendo especialmente’l sofitu de l’Academia de la Llingua Asturiana”. Por contra, amosó’l so refugu a la postura del Gobiernu al entender que la negativa de la Xunta Elleutoral a la distribución de papeletes n’asturianu nos colexos eleutoral yera una bona oportunidá pal Executivu pa “traducir en fechos la so proclamada sensibilidá democrática y el respetu y consideración a la llingua asturiana”.

Pese a esta situación discriminatoria que vive per enésima ocasión la llingua del país, Andecha Astur considera “qu’algamar otra vuelta la validez del votu n’asturianu supón un nuevu avance na normalización democrática n’Asturies, cola oficialidá comu oxetivu imprescindible pa garantizar los drechos llingüísticos del pueblu asturianu”. Nesi sen, recuerda que toles persones interesaes en votar a la formación nacionalista cola papeleta n’asturianu pueden recoyela nes sedes de la organización.

Fonte: Asturies.com

La XPDLA aconceya col direutor xeneral de Política Llingüística

UVIÉU - La Xunta pola Defensa de la Llingua Asturiana (XPDLA) aconceyaba, pela primer vegada, col nuevu direutor xeneral de Política Llingüística, Alfredo Álvarez Menéndez, esti miércoles 14 de setiembre. La plataforma de defensa de los drechos llingüísticos treslladó-y al responsable de Política Llingüística del Gobiernu de Foru Asturies delles reivindicaciones y, amás, tratáronse cuestiones sobre l’usu del asturianu nes Alministraciones públiques, la situación de los servicios de normalización nes entidaes municipales, la educación, los medios de comunicación y la toponimia. Según Carlos Pulgar, portavoz del coleutivu, Álvarez Menéndez «mostró una actitú positiva y reflexiva» en cuantes a les midíes necesaries pa la normalización.

La XDLA quixo sorrayar asuntos como la tresversalidá del usu del asturianu nel llabor cotidianu de los departamentos de l’Alministración pública, o la estabilidá y puesta en marcha efeutiva de la rede de normalización llingüística de los conceyos, «afitando y optimizando llabores y recursos, amás d'abrir, consolidar y ampliar los servicios, y facer siguimientu continuu y solucionar los problemes de los servicios qu’anguaño tán pesllaos por delles razones nos conceyos de Mieres, Corvera, Siero y Piloña». Asina mesmo, la organización treslladó a Alfredo Álvarez Menéndez el so esmolecimientu pola falta d’aplicación efeutiva de los topónimos que yá son oficiales por decretu nes Alministraciones tanto autonómica como estatal y nel Ente Públicu de Radiotelevisión, pal que tamién se reivindicó l’usu vehicular del asturianu nesta plataforma normalizadora fundamental pal futuru del idioma. Al respeutive de la enseñanza, asuntu yá tratáu más fondamente nel conceyu cola Conseyera d’Educación y Universidaes, mostróse la preocupación fonda de la organización pola situación «tristemente repetida tolos entamos de cursu na que la falta de dilixencia na axudicación y cobertura de places afecta gravemente al alumnáu, torgándo-y el so derechu básicu al estudiu».

Según la plataforma de defensa de los drechos llingüísticos, Álvarez Menéndez mostró una actitú «positiva y reflexiva» al respeutive de les midíes necesaries pa la normalización y comprometióse al «desarrollu positivu y non restrictivu de la Llei d’Usu y Promoción de la llingua asturiana». El Conseyeru de Cultura y Deportes, Emilio Marcos Vallaure, va esponer nuna comparecencia na Xunta Xeneral del Principáu d’Asturies nos próximos díes les llinies de trabayu en materia de política llingüística.

De toles maneres, la XDLA alvirtió de que va tar sollerte a la definición y cumplimientu del plan de trabayu del Gobiernu asturianu en materia llingüística. Sicasí, la organización de defensa de los drechos de los asturiano-falantes considera'l desenvolvimientu de les midíes anunciaes dientro del marcu actual como «un reblagu previu a la tutela efeutiva de los drechos llingüísticos de la ciudadanía que namás va poder garantizase cola oficialidá de la llingua asturiana».

Fonte: Les Noticies

Cascos promete desendolcar dafechu la Llei del Asturianu

Cascos promete desendolcar dafechu la Llei del Asturianu

La llingua asturiana malpenes tuvo presencia nel discursu institucional del candidatu a presidente d'Asturies esti martes na Xunta. Francisco Álvarez Cascos namái que dixo lliteralmente que "como parte muy importante de la cultura asturiana desarrollaremos la Ley de Uso y Promoción del Bable/Asturiano de 1998 y apoyaremos a la creación literaria de nuestros escritores".

El fechu de que nun se concretaren midíes notres fasteres de la propuesta de gobiernu fai albidrar qu'entá nun hai una idega nidia de como facer esi desendolcu y que nun se quieren dar más referencies mentantu nun se dibuxe finalmente la composición del Gobiernu y l'encaxe d'esta fastera nel organigrama de la futura Conseyería de Cultura.

Fonte: Asturnews