30/11/12

Ana Cano reivindica la oficialidá énte les autoridaes asturianes y europees


DAMIÁN BARREIRO . UVIÉU
Ana Cano, presidenta de l’Academia de la Llingua Asturiana (ALLA), afirmó que la cooficialidá ye l’únicu camín que marca la llegalidá llingüística y autonómica del Estáu español. Cano pronunció estes palabres delantre d'Alejandro Calvo, viceconseyeru de Cultura; Ana Fueyo, directora xeneral de Política Llingüística: y Cristina Valdés, decana de la Facultá de Filosofía y Lletres; amás del director del Secretariáu de la Carta Europea pa les llingües rexonales y minoritaries del Conseyu d'Europa, Alexey Kozhemyakov, y el coordinador del Liet International, Onno Falkena.

La reivindicación d’Ana Cano producióse nel Salón d'Actos de la Biblioteca de la Facultá de Filosofía y Lletres de la Universidá d’Uviéu, onde participó nel ciclu de conferencies sobre Les llingües minoritaries n'Europa. La música y la cultura como elementu recuperador, qu'inaugura'l programa d'actos del Liet International 2012. La presidenta de l’ALLA intervieno con una ponencia sobre’l procesu de normativización y normalización del nuestru idioma.

Según afirmó Cano, pa qu’una llingua minoritaria y minorizada, «palabra que sorrayo», pueda sobrevivir, fai falta qu’esti idioma tea preparáu tecnicamente pa poder sirvir como ferramienta de comunicación en tolos ámbitos, «llabor onde l’ALLA fixo’l so trabayu»; amás de que la sociedá tien que tar preparada p’asumilu, «y nel casu asturianu los estudios sociollingüísticos asina lo demuestren». Por eso, recordó que más del 80% de los ciudadanos entienden activa o pasivamente l’asturianu.

Como puntu últimu, dixo que tien qu’haber un marcu llegal que dea seguranza a esa normalización pa que’l que quiera pueda vivir nel so idioma, «camín que n’Asturies namás pue pasar pola cooficialidá». Asina, añadió que si nun hai oficialidá va ser mui difícil que la nuestra llingua tenga futuru,«mesmamente con esi marcu llegal nun sé si va poder sobrevivir, pero d’otra manera ye complicao abondo».

Fonte: Les Noticies

6 comentarios:

  1. Interesante pallabres les pronunciaes por Ana Cano, ante delles personalidades de munches de les cualos depende tamién en bona parte la reconocencia oficial del asturiano, y ciertes al cien por cien, sí señora. Y enforma s'estima'l gran llabor de l'ALLA.
    Y polo que quier tralucise d'elles, el momentu de la oficialidá, o de la cooficialidá como diz la presidenta, entá nun llegó y paez que va tardar.
    La esperanza nunca debe perdese, nun sería prudente perdela, non señora.

    ResponderEliminar
  2. Més clar no ho ha pogut dir: l'oficialitat no és garantia però la no oficialitat és sentència.

    ResponderEliminar
  3. Ana Cano tuvo bien acertada.

    ResponderEliminar
  4. Ana Cano ye l'alma de l'Academia y tien enforma méritu no académicu ya intelectual dando llustre y base a la llingua que ye fundamental, pero ensín compromisu cola xente asturiano normal de la cai porque vive nel so mundu académicu bien guapu ayena a tou lo demás.

    ResponderEliminar
  5. Tou ye perfectu y maraviyosu pero la llingua asturiana ta sumiendo. Muncha investigación y enforma estudio pola llingua, por y pa una llingua... ¿sumida, o peor muerta?

    ResponderEliminar

Los comentarios tán pendientes de moderación. Espublizaránse lo primero dable.