González Riaño propón a Virgili un espaciu informativu diariu n’asturianu en TPA

Xosé Antón González Riaño, presidente de l'ALLA

 El presidente de l’Academia de la Llingua Asturiana (ALLA), Xosé Antón González Riaño, y el direutor xeneral de RTPA, Antonio Virgili, aconceyaron esti llunes. El recién nomáu cabezaleru de la institución pidió qu’ún de los sos espacios informativos diarios de la televisión pública asturiana seya n’asturianu.

 Esti asuntu centró la reunión ente dambos, pa lo que González Riaño argumentó colos datos del avance de la III Encuesta Sociollingüística d’Asturies sobre la mesa. La propuesta ye “qu’ún de los sos espacios informativos diarios (mediu día o tarde-nueche) seya n’asturianu” col oxetivu de “que la radiotelevisión pública asturiana contribuya a la dignificación y normalización de la llingua y cultura d’Asturies”.

Antonio Virgili, direutor xeneral de RTPA

 Asina, espuso que’l “43 por cientu de los asturianos y asturianes sigue la programación n’asturianu qu’emite la RTPA”, que “a esti 43 por cientu paez-y interesante (86), de calidá (86) y mui comprensible llingüísticamente (91)” y que “cuasi un 60 por cientu de la población asturiana reclama esta clas de programes informativos”. La intención sería que les emisiones comenzaren en mayu, coincidiendo cola Selmana de les Lletres Asturianes, y que l’espaciu informativu n’asturianu incluya portada y presentación, llocución de noticies, creitos, la información deportiva y la del tiempu.

 “L’Academia de la Llingua Asturiana comprométese a diseñar un Plan de Formación Específicu y urxente pal personal de la RTPA y a llevalu alantre nes propies instalaciones de la RTPA. El citáu plan nun implicaría coste económicu pa la RTPA”, espliquen dende la institución académica.

 Nel conceyu, amás de González Riaño y Virgili, tuvieron tamién presentes Marta Mori d’Arriba, vicepresidenta de l’ALLA; Francisco G. Orejas, direutor de Producción de la RTPA; Bárbara Alonso direutora d’Informativos de la RTPA; y Lucía Herrera, direutora d’Antena de la RTPA. Dende l’ente públicu de comunicación comprometiéronse a estudiar la ufierta con procuru y celebrar una reunión nueva pa setiembre.                                  Fonte: asturies.com

Asturies respuende al llamamientu de Bimenes pa sofitar la oficialidá

• por Pablo R. Guardado
• Más d'una ventena d'organizaciones y partíos políticos participaron nel conceyu convocaú pol alcalde, Aitor García Corte, pa presentar el so proyeutu y pidir collaboración de la sociedá asturiana. "Quedé mui contentu", afirmó'l primer edil.

Na reunión celebrada'l vienres na Casa Conceyu hebo representación de los trés partíos con representación na Xunta Xeneral que lleven la oficialidá nel so programa, Podemos, Izquierda Xunida (IX) y Foro, amás d'Andecha Astur y Conceyu Abiertu por Noreña. Tamién d'organizaciones de toda triba, dende coleutivos de defensa del idioma a culturales, pasando por centros sociales.

Una bona amuesa de la sociedá asturiana, que va involucrase nel proyeutu entamáu pol alcalde de declarar otra vuelta la oficialidá nel conceyu. Yá lo fixera'l 5 de xunetu del 1997, siendo primer edil Xuacu García Gutiérrez, iniciativa que torgó'l Tribunal Superior de Xusticia d'Asturies tres la intervención de la Delegación del Gobiernu estatal n'Asturies.

Toma de contautu

"Ésta yera una primer toma de contautu. Espusimos-yos idees y esplicámos-yos que necesitábemos collaboración y la predisposición foi muy bona. Quedé mui contentó", esplicó García Corte a Asturies.com. Agora'l siguiente pasu va ser celebrar un conceyu nuevu, dientro d'aproximadamente un mes, y mientres caltener el contautu al traviés de les nueves teunoloxíes pa siguir con un procesu que tendrá'l so gran momentu'l 2 de xunetu, cuando se declare la oficialidá en Plenu en Bimenes.

Fonte: Asturies.com

La XPDLA aconceya col direutor xeneral de Política Llingüística

UVIÉU - La Xunta pola Defensa de la Llingua Asturiana (XPDLA) aconceyaba, pela primer vegada, col nuevu direutor xeneral de Política Llingüística, Alfredo Álvarez Menéndez, esti miércoles 14 de setiembre. La plataforma de defensa de los drechos llingüísticos treslladó-y al responsable de Política Llingüística del Gobiernu de Foru Asturies delles reivindicaciones y, amás, tratáronse cuestiones sobre l’usu del asturianu nes Alministraciones públiques, la situación de los servicios de normalización nes entidaes municipales, la educación, los medios de comunicación y la toponimia. Según Carlos Pulgar, portavoz del coleutivu, Álvarez Menéndez «mostró una actitú positiva y reflexiva» en cuantes a les midíes necesaries pa la normalización.

La XDLA quixo sorrayar asuntos como la tresversalidá del usu del asturianu nel llabor cotidianu de los departamentos de l’Alministración pública, o la estabilidá y puesta en marcha efeutiva de la rede de normalización llingüística de los conceyos, «afitando y optimizando llabores y recursos, amás d'abrir, consolidar y ampliar los servicios, y facer siguimientu continuu y solucionar los problemes de los servicios qu’anguaño tán pesllaos por delles razones nos conceyos de Mieres, Corvera, Siero y Piloña». Asina mesmo, la organización treslladó a Alfredo Álvarez Menéndez el so esmolecimientu pola falta d’aplicación efeutiva de los topónimos que yá son oficiales por decretu nes Alministraciones tanto autonómica como estatal y nel Ente Públicu de Radiotelevisión, pal que tamién se reivindicó l’usu vehicular del asturianu nesta plataforma normalizadora fundamental pal futuru del idioma. Al respeutive de la enseñanza, asuntu yá tratáu más fondamente nel conceyu cola Conseyera d’Educación y Universidaes, mostróse la preocupación fonda de la organización pola situación «tristemente repetida tolos entamos de cursu na que la falta de dilixencia na axudicación y cobertura de places afecta gravemente al alumnáu, torgándo-y el so derechu básicu al estudiu».

Según la plataforma de defensa de los drechos llingüísticos, Álvarez Menéndez mostró una actitú «positiva y reflexiva» al respeutive de les midíes necesaries pa la normalización y comprometióse al «desarrollu positivu y non restrictivu de la Llei d’Usu y Promoción de la llingua asturiana». El Conseyeru de Cultura y Deportes, Emilio Marcos Vallaure, va esponer nuna comparecencia na Xunta Xeneral del Principáu d’Asturies nos próximos díes les llinies de trabayu en materia de política llingüística.

De toles maneres, la XDLA alvirtió de que va tar sollerte a la definición y cumplimientu del plan de trabayu del Gobiernu asturianu en materia llingüística. Sicasí, la organización de defensa de los drechos de los asturiano-falantes considera'l desenvolvimientu de les midíes anunciaes dientro del marcu actual como «un reblagu previu a la tutela efeutiva de los drechos llingüísticos de la ciudadanía que namás va poder garantizase cola oficialidá de la llingua asturiana».

Fonte: Les Noticies

Donostia aconceya a la rede europea pa la Promoción de la Diversidá Llingüística

La capital guipuzcoana acoyerá la selmana que vien, los díes 18 y 19 de febreru, un conceyu de la rede pa la Promoción de la Diversidá Llingüística (NPLD), na que representantes europeos pondrán en común esperiencies y proyeutos sobre llingües como l'euskera, catalán, gallegu, irlandés, galés, escocés, estoniu, bretón, occitanu, frisiu, suecu, finlandés, noruegu, llituanu y córnicu.

El viceconseyeru de Política Llingüística del Gobiernu vascu, Ramón Etxezarreta, presentó xunto cola conceyala d'euskera en Donostia, Ainhoa Beola, y la conceyala de la candidatura Donostia 2016, Marisol Garmendia, los detalles del alcuentru, qu'aconceyará a espertos del ámbitu político-alministrativu y científicu en llingües de "dimensión reducida en cuanto a la so estensión", que "reivindiquen el so papel ante les grandes llingües de la Europa multillingüe".

D'esta manera, les sesiones que se realicen en Donostia/San Sebastián, que tarán zarraes al públicu xeneral y a los medios, tratarán cuestiones como'l balance presupuestariu del 2009 y los proyeutos desendolcaos a lo llargo del añu pasáu, asina como les propuestes pal 2010 y los presupuestos y les llinies de financiación europea pa esti añu.
Nesti sen, Beola matizó que los representantes "compartirán esperiencies y bones práutiques" desendolcaes en diferentes rexones europees sobre llingües cooficiales o minoritaries. El Gobiernu vascu, pela so parte, presentará los trabayos rellativos al programa HABE nel ámbitu d'enseñu del euskera n'adultos, asina como un estudiu realizáu sobre les redes sociales.

Etxezarreta esplicó que la cita europea tendrá llugar en Donostia "aprovechando la Candidatura a Capital Europea de la Cultura", de la ciudá pal 2016, na qu'ún de los exes principales céntrase na pluralidá llingüística.

"Toles llingües son ferramientes pa trabayar y vivir, y entendemos meyor los unos colos otros", apuntó Garmendia, que consideró, amás, que Donostia tornará, tanto la selmana que vien como nel 2016, "nun espaciu de proyeición internacional pa dar a conocer la Europa plural".

La NPLD aconceya a estaos, gobiernu autónomu, ONG y organizaciones que trabayen nel ámbitu de la planificación llingüística col oxetivu d'animar a los responsables politicos a promover la diversidá llingüística como valir tresversal. Pa ello, la rede alterna alcuentros dende últimos del 2007 pa intercambiar esperiencies y desendolcar nueves idegues nesti campu.

Fonte; Europa Press