El ministeriu nun da razón llegal nenguna pa negar la especialidá docente d'asturianu

La conseyera Ana González señaló que'l ministeriu nun dio razón llegal nenguna pa negar la especialidá docente. Apunta a motivos de calter ideolóxicu na decisión de Madrid.

Según una información d'Europa Press, la socialista afirmó ayeri mientres una visita al Muséu de Belles Artes que l'argumentu dau pol Ministeriu d'Educación, Cultural y Deporte foi la falta de la oficialidá, pero ensin nomar nenguna normativa concreta qu'impida crear la especialidá de Llingua Asturiana y Gallego-asturiano. 

Asina, González va pidir desplicaciones al secretariu del ministeriu nesi sen y, nel casu de que realmente nun esista normativa a nivel estatal que niegue la posibilidá de reconocer la especialidá, que-y diga la manera de desendolcala a nivel nacional.

Fonte: Asturies.com

Izquierda Xunida fala de “despreciu a los asturianos” y fai referencia a la oficialidá como solución definitiva al asuntu de la especialidá

por Pablo R. Guardado

Emilia Vázquez, diputada d’Izquierda Xunida (IX) na Xunta Xeneral, declaró que’l refugu del Ministeriu d’Educación, Cultura y Deporte a la especialidá ye un “despreciu a los asturianos”. Solicitó implicación al Gobiernu y apuntó necesaria la oficialidá del idioma pa solucionar el problema.

“Ye un despreciu al sentir de los asturianos”, apuntó Vázquez, que cargó contra’l Partido Popular (PP) por nun respetar el pidimientu de la Xunta Xeneral de la declaración de la especialidá d’asturianu, moción propuesta por IX que contó col votu favoratible de tolos grupos a esceición del popular na sesión del 21 de payares. Al so xuiciu, el Gobiernu nun se pue dar por satisfechu cola negativa del ministeriu y demanda la implicación de la conseyera Ana González o del presidente Javier Fernández pa reconducir la situación. “Eso ayudaría a que’l ministru viese que ye una cuestión importante pal Gobiernu d’Asturies”, esplica la diputada.

Por último, apuntó a la oficialidá como solución a estes negatives continues que sufre la llingua asturiana en cuestiones educatives. “Cualquier otra consideración más moderada amosó’l so fracasu”, sentenció Vázquez. La intención d’IX ye llamar l’atención del Gobiernu pa que declare la oficialidá si de verdá ta pol llabor de defender los derechos llingüísticos de los asturianos y va presentar iniciatives na Xunta Xeneral nesi sen.

Fonte: Asturies.com

Iniciativa pol Asturianu califica de “tomadura de pelo” la decisión de Wert de negar la especialidá d’asturianu pal profesoráu que’l PP lleva nel so programa

Pa Iniciativa, "el Ministeriu d'Educación vuelve a tratar a la llingua asturiana con despreciu como tantes ocasiones nos caberos trenta años"

El Ministru d'Educación, Ignacio Wert

La Direutora Xeneral de FP, Desendolque Curricular y Anovación Educativa, Victorina Fernández, esplicaba ayeri a los medios que'l Ministeriu d'Educación diz agora non a crear la especialidá docente de Llingua Asturiana pal profesoráu. Pa Iniciativa pol Asturianu esta decisión del ministeriu dirixíu por José Ignacio Wert ye una inxusticia pal profesoráu d'asturianu, una torga pa la calidá de l'asignatura y sobre manera, una "tomadura de pelo" pues nel programa del Partíu Popular de 2012, el de les últimes eleiciones autonómiques, la formación lleva la promesa de reconocer la especialidá docente pal profesoráu d'asturianu.

La situación d'anguaño ye d'una plantilla de profesoráu de Llingua Asturiana inestable, precarizada y que nun gana esperiencia, pues los profesores fuxen en cuantes-yos ye posible hacia otres especialidaes onde sí pueden algamar una plaza, al tar la reconocida la especialidá pol Ministeriu d'Educación. Esto supón una importante perda na calidá de l'asignatura y una inestabilidá na mesma, pese al importante sofitu de les families asturianes, matriculando a los sos neños de forma mayoritaria en Llingua Asturiana.

Ye por ello que solicitamos al Partíu Popular d'Asturies que faiga cumplir el so programa electoral al Ministeriu d'Educación de forma inmediata, en cumplimientu de lo prometío. Esta petición tuvo'l votu favoratible de la FSA-PSOE, Foru Asturies, Izquierda Xunida y UPyD na Xunta Xeneral, y cuenta col votu a favor del Conseyu Escolar estatal, asina como cola unanimidá de tolos sindicatos y en xeneral, de la sociedá asturiana.

A la Conseyera d'Educación, Ana González, solicitámos-y que dea una respuesta contundente al Gobiernu d'España y reclame la solución d'esta situación que s'allarga yá más de trenta años, dende que l'asturianu llegó a los primeros centros educativos públicos. La máxima responsabilidá de que la situación siga siendo de precariedá ye de l'alministración autonómica y tien de demostrar la so voluntá clara d'algamar esti oxetivu xustu siendo clara y enfrentándose al gobiernu central en tolos ámbitos posibles.

El Ministeriu d'Educación vuelve a tratar a la llingua asturiana con despreciu como tantes ocasiones nos caberos trenta años, negándo-y cualesquier pasu alantre, por más que'l consensu seya total n'Asturies, mesmo nel ámbitu educativu que políticu y social.

La reconocencia de la especialidá d'asturianu al profesoráu tien de ponese en marcha lo primero posible pa garantizar que'l profesoráu d'asturianu tenga les mesmes obligaciones y drechos que'l restu y non tener a l'asignatura nuna continua interinidá y falta de dignidá.   Fonte: Infoasturies.net

El proyeutu de Real Decretu d'especialidaes de los cuerpos docentes d'ESO nun pon torgues a la especialidá d'asturianu

Dende va unos díes yá puede vese na páxina web del Ministeriu d'Educación el proyeutu del Real Decretu qu'establez les especialidaes de los cuerpos docentes d'ESO y onde nun se ponen torgues a la especialidá d'asturianu. Ye'l nuevu dempués de que l'anterior fuera anuláu pol departamentu de José Ignacio Wert ante'l fuerte refugu amenáu porque proponía que el profesores impartieren asignatures distintes a les de la so especialidá. El nuevu proyeutu va tar a información pública hasta'l 13 de xineru, víspora de la Conferencia Sectorial d'Educación y esti día SUATEA alvertía de que'l documentu "nun foi consultáu coles comunidaes nin unviáu. Tampoco pasó pol Conseyu Escolar del Estáu nin se compartió colos sindicatos". UXT que ta analizando'l proyectu tamién faló de falta d'información a los medios de comunicación. SUATEA nomó esta forma d'actuar de «escandalosa» y señaló que l'anterior yera tal disparate, que cualquier cambéu ye meyor". La nueva materia de Cultura Científica va ser asignada a los docentes de Bioloxía, Xeoloxía, Física y Química, "polo que sigue la lóxica de les especialidaes de Ciencies". Coles mesmes, "profesores d'idiomes nun van dar Llingua y Lliteratura, sinón la so especialidá, y caltienense les asignatures de Llatín y Griegu, suprimíes na primer propuesta del Real Decretu. SUATEA deduz, tamién, que nun se ponen torgues a la especialidá d'asturianu, polo que se dexa'l camín abiertu a que'l Principáu tome por fin una decisión al respeutive. Fonte: Asturnews

Uviéu permitirá matriculase de Doctoráu a los llicenciaos

 

Universidá d'Uviéu

   La Universidá d'Uviéu va dar accesu directu a los estudios de doctoráu a aquellos titulaos con planes d'estudiu que cunten con, siquier, 300 creitos ECTS. Esta midida, aprobada ayeri pola Comisión de Doctoráu, va dexar que los titulaos cimeros que remataron les sos carreres antes de la implantación del plan Bolonia puedan cursar un programa de doctoráu ensin tener que completar antes estudios de máster, un requisitu que la puesta en marcha del Espaciu Européu d'Educación Superior estableció como pasu imprescindible previu al doctoráu.

   El pasáu mes de marzu, el Ministeriu d'Educación dexó en manos de les universidaes la interpretación de les condiciones d'accesu a los estudios de doctoráu pa los titulaos de los vieyos planes de segundu ciclu o ciclu llargu.

   Cola decisión, la d'Uviéu va asitiase nel ranking más baxu de desixencia curricular palos futuros doctores lo que podría ser una decisión estratéxica permala a llargu plazu, anque seya económicamente rentable a curtiu plazu.

   El Centru Internacional de Posgráu de la Universidá d'Uviéu va ufiertar pal próximu cursu 24 programes de doctoráu, diez d'ellos con una Mención escontra la Excelencia, en toles cañes de conocencia. Más de 800 alumnos tán cursando yá estos estudios. La midida va ser aplicable a partir del próximu cursu, nel que'l Centru Internacional de Posgráu de la Universidá d'Uviéu va ufiertar un total de 24 programes de doctoráu, diez d'ellos con una Mención escontra la Excelencia, en toles cañes de conocencia.

   Anguaño, más de 800 alumnos tán cursando estos estudios que se distribúin en cinco grandes árees: arte y humanidaes, ciencies, ciencies de la salú, ciencies sociales y xurídiques ya inxeniería y arquitectura.

   La decisión de la Universidá remata una vieya reivindicación de los estudiantes de los planes vieyos, que llevaben tiempu reclamando la nueva adaptación. La situación esistente hasta agora obligaba a los titulaos a siguir el camín marcáu dientro de l'adaptación de los estudios cimeros al Espaciu Européu de la Educación Cimera: el grau, de cuatro años; el máster d'unu o dos cursos más, xunto col doctoráu, lo qu'obligaría a un percorríu académicu de non menos d'ocho años.  Fonte:  Asturnews

El Ministeriu d'Educación confirma la responsabilidá del Gobiernu asturianu pa cola materia de Llingua Asturiana

Pablo R. Guardado

Iniciativa recibió una carta del gabinete del ministru Wert que confirma que la responsabilidá de la presencia de la materia de Llingua Asturiana na Educación depende del Gobiernu asturianu. Ana González descartó avances nel so status.

Nel mes de febreru, Inaciu Galán, presidente d’Iniciativa pol Asturianu, desplazóse a Madrid col oxetu d’aconceyar con diputaos asturianos nel Congresu, viaxe qu’aprovechó pa entregar cartes nos ministerios d’Educación y Fomentu dirixíos a José Ignacio Wert y Ana Pastor, de manera respeutiva. Nel casu concretu de Cultura, la organización que trabaya pa la normalización del idioma treslladaba al ministru la dulda sobre “la situación na quedaría la llingua asturiana d’aprobase la nueva reforma educativa, solicitando una solución que permita que l’asignatura tea, polo menos, nes mesmes condiciones nes que ta agora, que yá son bastantes males –como yá espresó la vocalía d’Enseñu de la organización en numberoses ocasiones–, asina como la reconocencia de la especialidá d'asturianu pal profesoráu”.

Selmanes depués, conocíase’l conteníu del tercer anteproyeutu de la Llei Orgánica pa la Meyora de la Calidá Educativa (LOMCE), que recoyía la situación del asturianu al tener en cuenta les llingües non oficiales con reconocimientu xurídicu y presencia na educación. Nesi momentu, el Sindicatu Unitariu y Autónomu de Trabayadores de la Enseñanza d’Asturies (SUATEA) adelantaba que la responsabilidá d’establecer el status de l’asignatura de Llingua Asturiana y Gallego-asturiana yera del Gobiernu asturianu, dalgo que’l Ministeriu d’Educación, Cultural y Deporte confirma agora nesta carta de respuesta a Iniciativa pol Asturianu.

Nun comunicáu, esti coleutivu torna a recordar al Executivu “la necesidá de siguir avanzando na presencia del asturianu nes escueles ya institutos. La solución ideal vendría cola oficialidá del asturianu y cola correspondiente normativa, pero, mientres, ye necesario avanzar y que s’introduza l’asturianu como llingua vehicular nes escueles,  pelo menos en dalgunes asignatures, asina como facer de la materia d’asturianu, una asignatura xeneral, normal, que compartan tolos alumnos asturianos, y non una materia que vive n’absoluta precariedá, como hasta agora”. Queden por conocer les intenciones reales del Gobiernu pa cola asignatura, pero la intención de la conseyera d’Educación, Cultura y Deporte, Ana González, ye dexala “polo menos como taba hasta agora”, según confirmó nun conceyu con representantes Asamblea de Maestros de Llingua Asturiana y Gallego-asturiana, lo que nun da pie a pensar en pasos alantre na situación de la materia nel sistema educativu.

Presencia del idioma na web ministerial
La carta del gabinete del ministru Wert tamién faise ecu de la demanda d’Iniciativa del Asturianu d’incorporar a la web del ministeriu la llingua asturiana xunto col inglés y el restu de llingües oficiales. Nesi sen, afirmen que treslladaron la solicitú a la Subsecretaría. “Pa Iniciativa pol Asturianu ye importante esti tipu de presencia del idioma, que supón da-y cierta normalidá na alministración, yá qu’agora la llingua asturiana ta marxinada con respectu al restu de llingües del estáu”, señala’l coleutivu.

Fonte: Asturies.com

El CUPA pide al Rector que reclame la reconocencia de la especialidá del profesoráu d'asturianu al Ministeriu d'Educación

Dende'l CUPA sofiten al coleutivu de docentes de llingua asturiana nes sos vindicaciones.

Dende'l Conceyu Universitariu pol Asturianu amosen "el nuesu apoyu más firme al coleutivu de docentes d’asturianu ante la delicada situación que tán atravesando n’estos momentos a causa del proyeutu de reforma de la llei educativa (LOMCE) plantegada pol gobiernu estatal a traviés del ministru Wert, que podría suponer un ataque a la llingua asturiana, yá que dexa en manes de la voluntá política la situación del idioma nes escueles".

Asina, camienta'l CUPA que "ye necesario también que la Universidá d’Uviéu muestre'l so apoyu decidíu a esti coleutivu y defenda’l futuru profesional de los docentes que forma, si tenemos en cuenta el perxuiciu llaboral que supondría la desapaición del asturianu de la enseñanza, fechu qu'afeutaría a unos 230 docentes que, amás, atópense nuna situación de precariedá o interinidá. Tamién queremos instar al actual gobiernu autonómicu a que se esmolezca en facer suyes les demandes d’esti coleutivu y de tolos asturianos en xeneral, ya qu’entendemos que munchos mecanismos pa tratar de da-y igua a esti conflictu, defender la aplicación de la Llei d’Usu y Promoción del asturianu, y avanzar hacia'l so reconocimientu como llingua oficial pueden dase dende Asturies".

Nesi sen, afiten tamién que, "en primer llugar, l'asturianu ha ser una asignatura pa tolos alumnos, una asignatura normal, non una optativa, nin voluntaria, non enfrentada a otres materies. Y en segundu llugar, que ye necesariu que se den pasos pa que l'asturianu se convierta nel idioma vehicular d'otres asignatures, buscando un modelu afayadizu p'Asturies que permita que l'asturianu seya llingua d'usu habitual nes aules, amás de poder ufiertase como oxetu d’estudiu particular ya individualizáu na universidá mediante les preceptives ferramientes académiques. Pa ello ye bien importante la reconocencia de la especialidá del profesoráu d'asturianu, agora que los estudios tán homologaos dafechu nel marcu européu".

Pa finar, quieren dar a conocer qu'"el CUPA pidió al Rector un posicionamientu claru de la Universidá  d'Uviéu, recordándo-y al traviés d'una carta los sos compromisos adquiríos dientro del Alcuerdu Programáticu pa la Política Llingüística (2012-2016) firmáu pol Rector Vicente Gotor na última campaña, nel que se comprometía a facer llegar al Gobiernu d'España la reclamación de la reconocencia de la especialidá. El CUPA ta acabante solicita-y que cumpla con esti puntu agora que ye más necesario que nunca defender la situación de los profesores d'asturianu formaos na Universidá d'Uviéu".

Fonte: Infoasturies

Iniciativa pol Asturianu entrega cartes con quexes y propuestes nel Ministeriu de Fomentu y nel d’Educación

El Ministeriu de Fomentu niégase a usar la toponimia oficial d'Asturies Esti llunes 11, Iniciativa pol Asturianu va entregar nes sedes del Ministeriu de Fomentu y Ministeriu d’Educación, en Madrid, cartes dirixíes a los respectivos ministros, cola fin d’amosar el refugu de la organización a la situación na quedaría la llingua asturiana d’aprobase la nueva reforma educativa, per un llau, y solicitando l'usu de la toponimia oficial nes carreteres y demás instalaciones estatales nel casu de Fomentu. Pal enseñu, dende la organización asturiana soliciten "una solución que permita que l’asignatura tea pelo menos nes mesmes condiciones nes que ta agora, que yá son bastantes males", como yá espresó la Vocalía d’Enseñu de la organización en numberoses ocasiones, asina como la reconocencia de la especialidá d'asturianu pal profesoráu. La carta dirixida al Ministru de Fomentu reclama que’l Gobiernu d’España "cumpla col usu de la toponimia oficial nel territoriu asturianu, y anima a esti departamentu a usar l’asturianu con normalidá nes infraestructures, instalaciones estatales de tresportes, dependientes del mesmu y presentes n’Asturies: carreteres, ferrocarriles, aeropuertos, puertos, etc". En dambos casos solicitaráse tamién a los ministerios qu'usen l'asturianu na so páxina web, "como faen col restu de llingües del estáu ya inclusive col inglés, que nun ye llingua oficial", espliquen dende la organización. Fonte: Asturnews

Lliuren 145.000 signatures al Ministeri d'Educació contra la llei Wert

La campanya, impulsada per un estudiant català, reclama al ministre que retiri l'esborrany de la Lomce

Els firmants recorden que el text del titular d'Educació “fa mal” a la llengua i al model d'escola catalana

- MADRID - ACN

El registre del Ministeri d'Educació ha rebut aquest dimecres les 145.000 signatures contra l'esborrany de la nova Llei de qualitat de l'educació (LOMCE) que un estudiant català ha aconseguit reunir mitjançant Internet en només dues setmanes. L'impulsor de la iniciativa, Oriol Franch, ha explicat a les portes del Ministeri que l'objectiu de la campanya és que el ministre d'Educació, José Ignacio Wert, “reconsideri l'esborrany” perquè el projecte “fa mal” a la llengua catalana després de 30 anys de funcionament d'un sistema d'immersió “d'èxit” que està “avalat per la Unió Europea”.

Franch ha recollit les signatures mitjançant la plataforma Exchange.org. la seva campanya demanava suport a un text que expressa la “total disconformitat” dels signants amb l'esborrany de la Lomce i recorda al ministre que el seu projecte “posa en perill la llengua catalana” que és “un bé cultural del país”.

El text proposa al ministre que abans de procedir a aquesta llei “visqués de prop la realitat a Catalunya”, que és “una nació on la convivència d'idiomes no suposa cap conflicte per molt que els mitjans de comunicació i polítics s'entestin a vegades a demostrar el contrari”.

Franch i tres persones més han desplegat una pancarta a la porta del Ministeri coincidint amb l'inici de la Sectorial d'Educació que reuneix a Madrid representants de totes les comunitats autònomes i el Ministre wert. L'objectiu de la reunió d'aquest dimecres és donar el vist i plau a l'esborrany.

Fonte: Avui

La reforma educativa de Wert pue acentuar la precariedá del asturianu

DAMIÁN BARREIRO

Faustino Zapico, miembru de la comisión permanente de Suatea, esplica que l'anteproyectu de la LOMCE supón un recorte de competencies al pasar les autonomíes que nun tienen llingua oficial, como Asturies, de determinar el 35% del curriculu al 25%. «Dientro d'esi porcentaxe ye onde entra llingua asturiana. Agora, al reducise l'ámbitu competencial asturianu hai otres asignatures dagnificaes, polo que va haber tortazos pa poder entrar nesi cupu», esplica Zapico, qu'añade que la reforma de Wert va tener consecuencies males pal asturianu y la precariedá va acentuase tovía más, «pero que sían males o horribles va depender de la voluntá del Gobiernu asturianu y al ver a quien tenemos de presidente podemos temenos lo peor».

Y ye que na Llei de Meyora de la Calidá Educativa (LOMCE), qu'impulsa'l ministru d'Educación y Cultura, José Ignacio Wert, el Gobiernu central aumenta la so capacidá de decisión sobre los conteníos comunes de les asignatures. D'esta forma, esa capacidá medra’l 65 per cientu nes comunidaes con llingua cooficial y al 75 per cientu nel restu d'autonomíes. Asina, toles autonomíes pierden diez puntos y les que nun tienen una llingua oficial –como Asturies- queden col control del 25% del conteníu.

El miembru de Suatea esplica que l'ámbitu competencial de cada comunidá pue determinar qu'en vez de dos hores de tecnoloxía sían tres o establecer qu'hai qu'ufrir determinaes optatives, mentes qu'en delles comunidaes punxeron l'enfotu en que los alumnos conozan el territoriu onde viven. Asina, Zapico esplica que falar de 17 sistemes educativos distintos ye falsu dafechu: «El modelu ye igual en toles autonomíes con diferencies mínimes». Otra manera, diz qu'agora l'asturianu yá tien que competir con otres optatives y hai centros que faen una política empobinada a que los guah.es nun escueyan asturianu pa favorecer otres asignatures o, mesmamente, por una cuestión ideolóxica, «una situación que va multiplicase cola aprobación de la Llei de Wert».

Zapico esplica que la solución sería declarar la oficialidá y, nel casu de querer avanzar ensin esi marcu llegal, afitar de dalguna manera que la lligua quedara como ta, al reducir la optatividá y facer qu'otres asignatures queden barríes, «pero col Gobiernu que tenemos esto nun va pasar y la llingua asturiana va ser la que tenga que pagar los platos rotos». Asina, afirma que dende'l so sindicatu tán recibiendo notificaciones de que nun se cumple la Llei d'Usu y que nun se ta respetando la ratio, «colo qu'en poco tiempu vamos principiar con acciones llegales, sobre too respecto a la circular d'iniciu de cursu que determinaba un cupu mínimu d'ocho guah.es pa formar un grupu nes optatives, lo qu'incumple una sentencia que diz qu'en llingua asturiana esto nun se pue facer».

Fonte: Les Noticies

L'ALLA considera pergrave refugar incluyir l'asturianu nel Decretu d'Especialidaes de Mayestros

Posición de l’ALLA ente’l procesu de tramitación del Decretu d’Especialidaes de Mayestros del Ministeriu d’Educación.

Como sabe la opinión pública asturiana y les fuerces polítiques parllamentaries de la Xunta Xeneral del Principáu d’Asturies, l’Academia de la Llingua Asturiana vien calteniendo cuantayá la necesidá de que’l profesoráu de Llingua Asturiana exerciente en centros públicos d’Educación Primaria y Secundaria cunte cola Especialidá Docente de Llingua Asturiana.

Nel comunicáu asoleyáu, l'Academia diz que "tal especialidá ye la única garantía de qu’esti profesoráu pueda acceder, n’igualdá de condiciones que’l restu, a una estabilidá profesional pente medies de los pertinentes concursos d’oposición y treslláu. Ello significaría, al empar, un importante reblagu nel asitiamientu alministrativu del área de Llingua Asturiana dende’l puntu de vista organizativu y, mesmamente, dende la perspeutiva de la rentabilidá y axuste económicu nun momentu de crisis fonda como l’actual. Nun hai qu’escaecer, amás, que’l nivel de formación universitaria esixíu a esti profesoráu ye, agora y darréu de la puesta en práutica na Universidá de les directrices del Espaciu Européu d’Educación Superior (EEES), plenamente homologable al del restu de los coleutivos docentes".

L'Academia desplica pormenorizadamente na so nota de prensa'l fechu de que'l Ministeriu d’Educación ta a puntu d’espublizar un nuevu Decretu d’Especialidaes pa Mayestros nel que s’afita que “tendrán la consideranza d’especialidaes del cuerpu de Maestros les propies de la llingua co-oficial naquelles comunidaes autónomes qu’asina lo tuvieron reglao” y que "magar esti enunciáu nun torga les posibidaes llegales de la llingua asturiana (nada se diz a la escontra de les llingües non oficiales), el sindicatu de profesores STES (representáu en Madrid por Vicent Esteve) plantegó apocayá al ME na mesa sectorial d’Educación una enmienda al articuláu pa que les llingües non oficiales, pero con especial proteición y presencia curricular oficial, pudieren ser, tamién, reconocíes como “especialidá docente”. A lo que paez, la respuesta del Miguel Soler García (Direutor Xeneral de Formación Profesional del Ministeriu d’Educación) foi qu’ello nun yera necesario porque, puestos en contautu col Principáu d’Asturies, les autoridaes autonómiques asturianes refugaben esa especialidá".

L'Academia de la Llingua Asturiana quería güei dexar perafitao que "de ser ello cierto, sedría un fechu gravísimu, non solo porque’l Gobiernu del Principáu d’Asturies taría faciendo una dexación ensin precedentes de les posibilidaes llegales de la enseñanza del asturianu, sinón tamién dende’l puntu de vista de les implicaciones que cinquen a la credibilidá del executivu asturianu, darréu que son xustamente los responsables educativos d’Asturies los qu’apregonen que tal especialidá nun pue facese porque “Madrid nun dexa”.

L’Academia, nesti sen y como muérganu tutelar de los derechos llingüísticos de los asturianos, da anuncia de que solicitará un aconceyamientu urxente cola Conseyería d’Educación del Gobiernu del Principáu y treslladará la so posición a toles fuerces polítiques parllamentaries, entamando pola FSA-PSOE, encamentando a toes elles qu’estes cuestiones seyan teníes en cuenta a la hora d’ellaborar los respeutivos programes eleutorales col envís de qu’esta llamentable situación alcuentre definitiva solución con marcu llegal y alministrativu estable y non discriminatoriu.

Fonte: Asturnews