N’Ast pide repartir papeletes n’asturianu nes puertes de los colexos elleutorales

Presentó un escritu a la Xunta Elleutoral provincial plantegando esta posibilidá nel casu de que persista no que califiquen d’“inxustificable actitú antidemocrática”.

N’Ast, dempués de conocer la decisión de la Xunta Elleutoral provincial “nel sen de que nun va cumplir cola so democrática obligación de garantizar que los asturianos podamos utilizar la nuesa llingua nes prósimes eleiciones del 20 de payares”, al prohibir que les papeletes n’asturianu puean ufrise nos Colexos Ellectorales, úfrese a repartiles a les puertes de los colexos elleutorales.

Enantes de llegar a esti estremu, solicita, sicasí, “que la Xunta Elleutoral asuma la so responsabilidá a la hora de cumplir con preceptos democráticos universales y facilite papeletes en llingua asturiana pa estes próximes elleiciones”, lo que pa N’Ast sedría la única posible garantía de respetu pa colos drechos llingüísticos de los asturianos. Amás esixe a la Xunta Elleutoral que considere válidos los votos que s’emitan nesa llingua.

Fonte: Asturnews

Andecha Astur refuga'l "silenciu cómpliz del Principáu” nel asuntu del votu n'asturianu

Pablo R. Guardado
Andecha Astur cataloga d'inaceptable “el silenciu cómpliz del ‘Principado’” tres la decisión de la Xunta Elleutoral de torgar la presencia de papeletes n’asturianu nos colexos eleutorales. Considera que ye un bon momentu pa dar sofitu al idioma.

La organización nacionalista quixo agradecer públicamente mediante un comunicáu “les múltiples manifestaciones de solidaridá recibíes, tanto de particulares como d’otres organizaciones sociales, partíos políticos, sindicatos, asociaciones culturales..., agradeciendo especialmente’l sofitu de l’Academia de la Llingua Asturiana”. Por contra, amosó’l so refugu a la postura del Gobiernu al entender que la negativa de la Xunta Elleutoral a la distribución de papeletes n’asturianu nos colexos eleutoral yera una bona oportunidá pal Executivu pa “traducir en fechos la so proclamada sensibilidá democrática y el respetu y consideración a la llingua asturiana”.

Pese a esta situación discriminatoria que vive per enésima ocasión la llingua del país, Andecha Astur considera “qu’algamar otra vuelta la validez del votu n’asturianu supón un nuevu avance na normalización democrática n’Asturies, cola oficialidá comu oxetivu imprescindible pa garantizar los drechos llingüísticos del pueblu asturianu”. Nesi sen, recuerda que toles persones interesaes en votar a la formación nacionalista cola papeleta n’asturianu pueden recoyela nes sedes de la organización.

Fonte: Asturies.com

Andecha Astur denuncia que prohiben les papeletes n'asturianu nos colexos elleutorales

Según denuncia Andecha Astur, una resolución de la Xunta Elleutoral Provincial homologa les papeletes en llingua asturiana presentaes pola formación, «pero prohibe espresa y inxustificablemente que puedan ser ofrecíes nos Colexos Elleutorales el próximu 20 de payares». La formación va recurrir l'alcuerdu y emplaza al Gobiernu asturianu y a l’Academia de la Llingua Asturiana a intervenir en defensa de los drechos llingüísticos de los asturianos.

Los independentistes espliquen que los votos emitíos en llingua asturiana van ser consideraos válidos, pero nun van poder ufiertar les papeletes en llingua asturiana nos colexos, «lo que supón que non solo dicha Xunta Electoral nun asume la so obligación democrática d’ufrir a los asturianos la posibilidá d’emplegar la so llingua nacional pa votar, sinon que prohibe qu’otres organizaciones puean suplir esta deficiencia».

Andecha considera que con esti alcuerdu la Xunta Elleutoral aplica un «auténticu apartheid llingüísticu» porque permite utilizar les papeles n'asturianu si se traen de casa, «pero prohibe la so presencia pública nos sitios destinaos a la votación». La organización esplica que si nun prohiben tamién les propies papeletes ye poles sentencies del Tribunal Constitucional que nel añu 2000 dio la razón a Andecha Astur pa poder utilizar l’asturianu nes elleiciones.

Fonte: Les Noticies

N’Ast denuncia l’agresión a los drechos llingüísticos dende la Xunta Elleutoral

L’Asociación solidarízase con Andecha Astur y agradez la so coherencia na defensa de la normalización social del asturianu.
Énte l’anunciu de la paralización del procesu de validación de les papeletes de les candidatures del partíu políticu Andecha Astur al Congresu y al Senáu estatales por parte de la Xunta Elleutoral Provincial pol simple fechu de tar presentaes en llingua asturiana, l’Asociación Cultural N’Ast quier denunciar públicamente esti fechu y amosar la so solidaridá.
"La realidá ye que la organización Andecha Astur vien calteniendo en toles elleiciones una constante materialización efeutiva y real del so proyeutu programáticu de normalización social de la llingua nacional, lo que provocó en dellos momentos que fora escluyía de los procesos elleutorales. Esta situación paeció camudar cuando nel añu 2000 algamó que’l Tribunal Costitucional del Estáu español reconociera’l drechu a utilizar la llingua asturiana. Dende entós non solo vien presentando tola documentación en llingua asturiana dafechu, sinon que tamién consiguió validar les sos papeletes elleutorales n’asturianu" despliquen dende N'Ast, que califica la situación como "una nueva agresión antidemocrática a los drechos non solamente d’un partíu políticu (el poder presentase en llingua asturiana) sinón tamién del conxuntu de la ciudadanía asturiana (el poder votar n’asturianu)".
N’Ast quier denunciar qu’esta arbitrariedá caciquil ye namás posible gracies a l’ausencia "tanto d’un marcu xurídicu qu’oficialice la llingua asturiana como d’una movilización popular permanente col envís de camudar la estructura sociollingüística del País". Igualmente l'asociación cultural valora y agradez "l’esfuerzu y la coherencia" d’Andecha Astur, asitiando los sos oxetivos programáticos "percima de la dominante dinámica elleutoralista, yá que cuando s’igüe esti fechu, nel meyor de los casos va causar una grave distorsión nel desendolcu de la campaña elleutoral d’esta formación política".

Fonte: Infoasturies

L'ALLA pide l'usu del asturianu nes elleiciones xenerales

L’Academia de la Llingua Asturiana emitió esta tarde un comunicáu nel que da la so opinión sobre los problemes xurdíos col emplegu del asturianu per parte d’aquellos ciudadanos asturianos que quieran exercer el so drechu al votu emplegando esta llingua, denunciaos por Andecha Astur. L’ALLA amuesa nesti testu el so más “fondu rechazu” y tresllada “a la opinión pública asturiana y española” lo que califica d’“actitúes discriminatories que de contino vien sufriendo l’idioma de los asturianos en cada ocasión en qu’ésti quier ser usáu en situaciones d’especial relevancia política y alministrativa”.

Pa la institución asturiana “acordies col so mandáu estatutariu de mirar polos drechos llingüísticos de la asturianos”, encamienta “cola mayor enerxía” a la Xunta Elleutoral Provincial que faiga “los mandaos afayadizos pa qu’esa situación d’anormalidá pa col asturianu se corrixa urxentemente”.

Amás, l’Academia, fai alcordanza nesti comunicáu de que “situaciones como éstes sedríen impensables nuna situación d’oficialidá de la llingua de los asturianos”, polo que-y pide a la Xunta Xeneral del Principáu y a les fuercies polítiques que n’ella s’alluguen que, d’una vegada, s’apauten p’algamar un estatus definitivu d’oficialización del nuesu vieyu idioma”.

Fonte: Asturnews

La Xunta Elleutoral bloquia les papeletes n'asturianu

Les papeletes elleutorales d’Andecha Astur pendientes de la decisión de la Xunta Elleutoral Provincial por tar en llingua asturiana. En 2008 la formación soberanista validó ensin problema dengún les papeletes n'asturianu.

Les papeletes al Congresu y al Senáu presentaes por Andecha Astur pa la so validación foren paralizaes a la espera de la decisión de la Xunta Elleutoral provincial, que tien de decidir si’l fechu de tar presentaes en llingua asturiana pue xustificar la so anulación. Andecha Astur vien calteniendo en toles elleiciones una coherencia llingüística que la llevaren n’ocasiones a quedar fuera de les convocatories elleutorales pola utilización del asturianu, fasta qu’a la fin, nel añu 2.000, consiguió ganar énte’l Tribunal Costitucional español que reconoció’l drechu a utilizar la llingua asturiana. De magar entós non solo presentare tola documentación en llingua asturiana dafechu, sinón que consiguió validar les sos papeletes elleutorales tamién n’asturianu.

Por embargu, "l’anormalidá democrática que se carez n’Asturies, au la nuesa llingua nacional continúa ensin ser reconocía oficialmente, propicia situaciones como la d’anguañu, na que cabe la posibilidá de que se vulneren los nuesos llexítimos drechos a concurrir a estes elleiciones prohibiéndomos l’usu de la nuesa llingua y obligándomos a una nuea batalla llegal" denuncia Andecha qu'esplica que nel meyor de los casos la paralización "yá supunxo un importante prexuiciu pa la nuesa campaña elleutoral, darréu que la paralización del procesu de validación de les papeletes yá provocare serios problemes nel normal desendolcu de la nuesa campaña elleutoral, yá que complicará en gran midía que les nueses papeletes puean llegar a tiempu a los elleutores".

Andecha Astur reitera la necesidá de que se normalice la situación llingüística n’Asturies, "cola democrática reconocencia de la nuesa llingua comu únicu mediu posible pa garantizar los drechos y llibertaes del Pueblu Asturianu y finar d’una vegada con estes antidemocrátiques espresiones de represión llingüística".

Fonte: Infoasturies