González reclama a Méndez de Vigo la especialidá d'asturianu

La conseyera d'Educación Ana González

   La conseyera d’Educación, Cultura y Deporte pide al ministru sustitutu de José Ignacio Wert qu’incluya esti asuntu nel orde del día de la próxima Conferencia de Educación.

   Nuna carta unviada güei a Íñigo Méndez de Vigo, Ana González solicita’l reconocimientu de la especialidá docente de Llingua Asturiana y Gallego-asturiano, recordando-y que se punxera en contautu col ministeriu en delles ocasiones por esta razón y que la creación de dicha especialidá ye competencia del Gobiernu estatal.

   “Trátase d’una decisión crucial porque contamos con un cuerpu docente qu’imparte esta asignatura y que necesita una proteición que-y pue dar namái’l reconocimientu de la mencionada especialidá. Como tal competencia correspuende de manera esclusiva al ministeriu, ensin qu’esista normativa nenguna que la faiga recayer de mou nengún na comunidá autónoma, elevamos reiteraes consultes qu’o bien nun obtuvieron respuesta o bien foron contestaes de manera incompleta o escasamente satisfactoria”, señala González na carta.

   La conseyera prometiera pa esta llexislatura la creación de la especialidá docente, dalgo que nun va cumplir daes les feches nos que nos movemos. La so xestión d’esti asuntu provocó importantes critiques, ente elles les d’Ana María Cano, presidenta de l’Academia de la Llingua Asturiana, que llamentó’l pocu enfotu de González nesti asuntu por nun acudir a Madrid pa negociar “al máximu nivel” la especialidá.                                 Fonte: asturies.com

El ministeriu nun da razón llegal nenguna pa negar la especialidá docente d'asturianu

La conseyera Ana González señaló que'l ministeriu nun dio razón llegal nenguna pa negar la especialidá docente. Apunta a motivos de calter ideolóxicu na decisión de Madrid.

Según una información d'Europa Press, la socialista afirmó ayeri mientres una visita al Muséu de Belles Artes que l'argumentu dau pol Ministeriu d'Educación, Cultural y Deporte foi la falta de la oficialidá, pero ensin nomar nenguna normativa concreta qu'impida crear la especialidá de Llingua Asturiana y Gallego-asturiano. 

Asina, González va pidir desplicaciones al secretariu del ministeriu nesi sen y, nel casu de que realmente nun esista normativa a nivel estatal que niegue la posibilidá de reconocer la especialidá, que-y diga la manera de desendolcala a nivel nacional.

Fonte: Asturies.com

SUATEA, FETE-UGT y CCOO presenten una iniciativa conxunta en defensa de la especialidá d'asturianu

La iniciativa conxunta presentóse nel Conseyu Escolar del Estáu.

El Ministeriu d’Educación punxo enriba la mesa un proyectu de Real Decreto onde se regulen les especialidaes del profesoráu de la enseñanza Secundaria. Ye un documento de calter técnicu nel que s’afaya normativa anterior a la LOMCE a les nueves materias que se meten nos nuevos currículos.

Al paecer d'estes organizaciones "pa la comunidá educativa asturiana ye un momentu de gran trascendencia en tanto que xugámonos la creación de la especialidá d’asturianu y gallego-asturiano. Ésta ye una reivindicación histórica que supón dignificar l’enseñu d’estes asignatures y igualar les condiciones llaborales del profesoráu que les imparte a les del restu de docentes".

Asina, apunten que "énte una primer negativa per parte del Gobiernu na acabante de celebrase Conferencia Sectorial de Educación, munches de les organizaciones que tenemos presencia na Permanente del Conseyu Escolar del Estáu decidimos presentar conxuntamente delles enmiendes pa la próxima sesión que va ser el 3 de febreru onde va debatise la propuesta del Ministeriu".

Poro, dende CCOO d’Enseñanza, FETE-UGT y SUATEA consideren "qu’ésta ye una oportunidá única pa pañar apoyos qu’algamen que’l Gobiernu atienda esta demanda. Consideramos que la nuestra responsabilidá ye poner tolos medios que podamos pa sacar alantre esi oxetivu. Ye por ello que tamién solicitamos, con carácter urxente, una reunión cola Señora Conseyera Ana González. Ye imprescindible que paralelamente a les xestiones que fagamos miembros de la comunidá educativa, el gobiernu asturiano y especialmente la Conseyería d’Educación actúen cola contundencia y dilixencia necesaries que rique esta cuestión".

Fonte: Infoasturies

L'ALLA homenaxea a Miguel Ramos Corrada

   L'Academia de la LLingua Asturiana vieno acabante de facer anuncia d'un actu d’homenax que se fadrá na alcordanza del profesor D. MIGUEL RAMOS CORRADA, vicepresidente de l’ALLA, y que va tener llugar mañana miércoles 17 d’avientu, a les 7 de la tarde, na sala de conferencies del Antiguu Institutu Xovellanos, na cai Xovellanos 21, de Xixón. L'actu va cuntar ente otros cola Conseyera d'Educación, Cultura y Deporte del Gobiernu del Principáu, Ana Gozález Rodríguez, y el Rector de la Universidá d'Uviéu, Vicente Gotor.

   L'Actu d'alcordanza de Miguel Ramos Corrada entamáu pola Academia de la LLingua va ser una presentación del llibru "Estudios lliterarios y otros trabayos", obra que recueye'l so llabor como másimu especialista de la lliteratura asturiana. Xunta la Conseyera d'Educación, Cultura y Deporte del Gobiernu del Principáu, Ana Gozález Rodríguez, y el Rector de la Universidá d'Uviéu, Vicente Gotor, van participar nel actu'l Conceyal d'Educación, Cultura, Mocedá y fiestes del Conceyu de XIxón, Carlos Rubiera, el direutor de la UNED n'Asturies, Mario Menéndez Ferández, y la presidenta de l'Academia de la Llingua Asturiana, Ana María Cano González.
Fonte: Asturnews.

El PP diz qu'Educación pretende "adoctrinar a los neños" por baxar el númberu d'hores de relixón y educación en valores

Susana López Ares,  nel Parllamentu

  

    La diputada del PP na Xunta Xeneral, Susana López Ares, acusó a la conseyería d'Educación, al respecto de la reducción d'hores de les asignatures de Relixón y Educación en Valores, de pretender "adoctrinar a los neños". "Nun puen amenogarse les hores d'estes dos asignatures espeyu coles mesmes que s'establez como obligatoria, dientro de Ciencies sociales, la Educación pala Ciudadanía", reprochó.

   Con esta midida, calcó López Ares, el Principáu pretende "adoctrinar a los neños préste-yos o non", baxando d'esta manera la capacidá de decisión de los padres sobre la educación de los sos fíos.

   Nesti punto, según la parllamentaria del PP, la conseyera d'Educación, Ana González, tendría que negociar por respetu a les families en llugar "d'amenazar col amenorgamientu d'hores de les asignatures".                                       Fonte: Europapress

"Billingüe ye tamién falar español y asturianu", diz González

 

Ana González,  Conseyera d'Educación

   La conseyera d’Educación, Cultura y Deporte, Ana González, argumentó que la falta de perres y de profesoráu nun permiten ufiertar una segunda llingua estranxera. Defendió la materia de Llingua Asturiana, anque refugó la oficialidá como solución.

   La cuestión de l’asignatura en Primaria llegó a la Xunta Xeneral por iniciativa del PP, que lidera l’ataque que ta viviendo l’idioma nel sistema educativu cola intención de facer competir a la Llingua Asturiana y Gallego-asturiano con una segunda llingua estranxera. González afirmó que les persones qu’opten por esta vía y piensen que billingüismu ye dominar el castellanu y l'inglés padecen “catetismu inteleutual”; “tamién lo ye falar español y asturianu”, añadió, esplicando darréu que "un cuartu de la población" del país y “un 53 por cientu” de los escolinos son billingües. D’igual forma, destacó la demanda histórica de la comunidá educativa del enseñu del idioma.

   PP y UPyD foron les formaciones más crítiques coles pallabres de la conseyera, posición que tamién caltuvo Foro, qu’apuesta por un plurillingüismu ensin dexar de llau la llingua propia. Mentes, IX calificó a González de “poco valiente” por nun avanzar na defensa del idioma y reclamó la oficialidá. Fuera del Parllamentu, un grupu de ciudadanos convocaos pola Xunta pola Defensa de la Llingua Asturiana (XDLA) reclamaron l’enseñu de l’asignatura en tolos niveles educativos.                                                                                          Fonte: Asturies.com

El casu del neñu d'Uviéu ensin profesor d'asturianu atopa solución

Alejandro S. García Illán, l'alumnu del Colexu Marista Auseva ensin profesor d'asturianu, ya pue asistir a clase de la so llingua. Tres el llamamientu fechu pola familia ya Iniciativa pol Asturianu a la Conseyería d'Educación, finalmente atopóse una solución. La Conseyería d’Educación negóse a ufrir un profesor pal cursu d’Illán, a pesar de les reclamaciones del propiu centru educativu, pero finalmente Illán podrá tar na clas d’un cursu menos, col compromisu de cursar el temariu específicu que-y correspuende. El profesor de llingua asturiana del colexu ufrió toles facilidaes, dempués de que'l neñu perdiere un mes de clases d'asturianu. Iniciativa pol Asturianu, nun comunicáu, felicita a la familia, al profesor y al Colexu Auseva d’Uviéu pol so compromisu col asturianu. Al mesmu tiempu denuncia que'l casu "nun ye otro qu'una amuesa más del tratu llamentable que da Educación a la llingua asturiana nes escueles ya institutos d'Asturies", y solicita a la Conseyera d’Educación "que cumpla cola so promesa de solucionar la reconocencia de la especialidá d'asturianu pa los docentes" pa que l’asignatura d’asturianu pueda cuntar con una situación digna. A xuiciu de la organización, "el drechu a estudiar asturianu ye irrenunciable y ha respetase dende les instituciones. Lo contrario ye una marxinación de ciudadanos por mor de la so llingua, lo que contradiz al espíritu de la Llei d'Usu del Asturianu de 1998, asina como la llexislación internacional en Drechos Humanos y la Carta Europea de les Llingües Minoritaries, ratificada por España”. L’ausencia de profesoráu d’esta asignatura ye una situación que tamién se da n’otros trece centros del país, según denunció'l 20 de setiembre’l Sindicatu Unitariu y Autónomu de Trabayadores de la Enseñanza d’Asturies (SUATEA). Fonte: Asturies.com

La Xunta pola Defensa de la Llingua Asturiana esixe solución palos 14 centros ensin asturianu

Depués de que la selmana pasada se conociere que son 14 centros educativos los que tovía nun tienen cubierta la enseñanza d'asturianu o de gallego-asturianu, esta selmana la Xunta Pola Defensa de la Llingua quier poner nome y cara a les families que tán sufriendo esta situación: Na escuela Maestru Casanova de Cangas del Narcea son 200 neños y neñes los que tán quedando ensin clas d'asturianu, lo que ta provocando la indignación, bien comprensible ente les families que, con tol material y llibros compraos, tienen que ver cómo la Conseyería d'Educación nun fixo nada pa prever esta situación. Por eso, dende la Xunta pola Defensa de la Llingua Asturiana "esiximos a la Conseyería d'Educación la solución d'estos problemes de manera inmediata y tamién, lo que diba ser muncho más eficaz, el cumplimientu de la so promesa de crear la Especialidá d'Asturianu nesta llexislatura, lo que diba ayudar a remediar la provisionalidá y precariedá de l'asignatura y del profesoráu". Fonte: Asturnews

La Conseyera nun participó na inauguración de la UABRA

Esti llunes inauguróse en Cangas del Narcea una edición nueva de la Universidá Asturiana de Branu (UABRA), entamada pola Academia de la Llingua Asturiana (ALLA), la Universidá d'Uviéu y el Conceyu de Cangas. Na inauguración participaron, como ye vezu, nel actu tuvo presente'l direutor del cursu, Xosé Antón González Riaño, la presidenta de l'ALLA, Ana Cano, l'alcalde de Cangas y un represenante de la Estensión Universitaria. Sicási esti añu nun tuvo presente la Conseyera d'Educación y Cultura, Ana González, que l'añu pasáu comprometiérase nesti mesmu marcu a tener avanzada una solución que permitiera al profesoráu d'asturianu tener reconocida la especialidá, lo que permitiría convocar oposiciones con normalidá y evitar la eterna interinidá que viven anguaño. Nel so llugar tuvo Ana Fueyo, Directora Xeneral de Política Llingüística, que nun dio nenguna esplicación sobre l'ausencia de la Conseyera, anque si mandó un saludu nel so nome. Tampoco dio esplicación dala sobre la situación d'esti asuntu prometíu pola Conseyera l'añu pasáu. Ana Cano faló de la importancia d'estos cursos, nos qu'esti añu collabora CaxAstur y ALSA como patrocinadores y recordó l'ésitu de poder llevar alantre tolos cursos pa los que s'abrió matrícula, per primer vegada. En total participen nos cursos, que se celebren na Escuela Llar de Cangas, 170 persones ente alumnos y profesores, con cursos d'asturianu pero tamién d'otres cuestiones, como internet, la xestión cultural, la hestoria... siempres col asturianu como llingua vehicular. Dempués de la presentación, na Casa Cultura de Cangas, presentóse nesi mesmu llugar una esposición entamada por mor de la UABRA y dedicada a la ropa traidicional. Xandru Armesto, del Grupu San Félix de Candás, qu'entama esta amuesa, fizo de presentador con un paséu d'alumnos y autoridaes peles distintes partes de la mesma. Fonte. Asturnews

La Conseyería entama una campaña de matriculación na asignatura d'asturianu

La Conseyería d'Educación, Cultura y Deporte pon en marcha, el llunes 10 de xunu, una campaña informativa pa impulsar la matriculación en Llingua asturiana y Gallego-asturianu, col llema #yoapúntome, porque lo llevamos dientro / #euapúntome, porque lo levamos dentro. La difusión d'esta campaña fadráse gracies a dellos materiales que pueden descargase na so páxina web. Del 11 al 21 de xunu ta abiertu'l plazu pa matriculase, anque munchos centros ponen dificultaes na matriculación, como denunció estos díes SUATEA. La enseñanza de la llingua asturiana entamó a impartise oficialmente en 1984, nuna serie de centros educativos públicos, aumentando'l númberu d'ellos nos años sucesivos. Estes enseñances impártense anguaño en 331 centros educativos. La matriculación nesti añu 2013 pue facese ente'l 10 y el 21 de xunu (pa Educación Primaria) y ente'l 2 y el 15 de xunetu (ESO y Bachilleratu). La Llingua asturiana y el Galllego-asturiau son materies de currículum que se pueden estudiar en tolos centros públicos d'Enseñanza Primaria y Secundaria. Col envís de llograr qu'esti fechu lu conozan la mayor cantidá posible de padres y d'alumnos/es, "ye polo la Conseyería pon en marcha una Campaña Informativa de Matriculación en Llingua asturiana/Galego-asturiano. Con ella, el Gobiernu d'Asturies quier amosar el so apoyu a la enseñanza del asturianu, promover la conocencia d'un fechu cultural arriquecedor que forma parte de la nuesa identidá y que contribúi a la formación integral del alumnáu, respetando siempre la llibre opción y la voluntariedá del so deprendimientu", espliquen dende Política Llingüística. Más información: Materiales de la campaña Fonte: Asturnews

Los docentes d'asturianu ven "namás bones pallabres" dende la Conseyería d'Educación

Conseyera d'Educación, Cultura y Deporte Esti xueves 14 de marzu celebróse un conceyu que l'Asamblea de Docentes de Llingua Asturiana y Gallego-Asturiano "pidiere cuantayá" a la conseyera d’Educación Ana González. Al conceyu asistieron cinco persones en nome de l’asamblea y per parte de la Conseyería, amás de la propia conseyera, l’asesor en materia de Llingua Asturiana. L'asambel diz que "foron too bones palabres". Comenten que la conseyera entamó reconociendo que, "depués del tercer anteproyectu de la llamada Llei Wert, la pelota ta en teyáu del Gobiernu del Principáu d'Asturies". La voluntá de la so conseyería, afirmó, ye dexar l’asturianu “polo menos como taba hasta agora”, y cumpliendo la Llei d’Usu. Dende l’Asamblea, amás de sorrayar que la situación actual "ye frutu de l’ausencia d’oficialidá del asturianu", cosa qu'afirmen, la Conseyera "almitió pero diciendo tamién que d’eso nada". Los docentes ficiéron-y llegar les reivindicaciones que yá plantegaren nel so momentu na asamblea. A llargo'l conceyu "tomó nota de tolo que-y diximos, y comprometer, comprometióse a poco, anque concretóse más nel tema d’Educación Infantil, no que toca a la so xeneralización", espliquen. Amás reiteró’l compromisu nesta llexislatura en sacar alantre la especialidá. Sobre’l problema de les ratios que se apliquen nos institutos "quedó en dexalo reflexao na circular d’iniciu de cursu, clarificando que nun se puen aplicar nel casu del asturianu". De coses como l’asturianu como llingua vehicular, la criación de departamentos didácticos nos IES, la non segregación del alumnáu, la presencia na PAU, etc. los docentes espliquen que "tomó nota pero nun concretó nada, anque de la segregación del alumnáu sí desplicó que nun conocía esi datu y que-y paecía interesante, yá que ta mui sensibilizada con esi tema". Faló tamién de cómo la LOMCE diba suponer un “revolcón curricular” y qu’había que ver en qué midida diba afectar al currículu asturianu, que, según ella, "ye bien curiosu". De toes maneres, comentó tamién que diba ser el propiu desendolque de la futura llei a nivel autonómicu el que podría valir pa fixar el profesoráu, tanto d’asturianu como de les demás materies. En definitiva, pa l'Asamblea fueron too "bones pallabres qu’habrá que ver en qué se concreten". Tamién-yos dixo a los docentes que "nun esperaren “una revolución” nesi tema". L'Asamble tien claro que "la so capacidá de presión y movilización la que sirva pa obligar a l’alministración a mover ficha nesti tema, como en tantos otros". Más información: Documentu entregáu a la Conseyera Fonte: Asturnews

Conseyera d'Educación: "la oficialidá nun ye un pidimientu unánime de la sociedá asturiana"

La conseyera González afirma que "la oficialidá nun ye un pidimientu unánime de la sociedá asturiana”


   Ana González señaló que va defender na Conferencia d’Educación énte’l ministru la situación del asturianu frente a la ‘Llei Wert’. Sicasí, nun ve la oficialidá como una opción al nun la considerar como una demanda unánime de la sociedá.

   La conseyera d’Educación, Cultura y Deporte entiende la reclamación de l’Academia de la Llingua Asturiana (ALLA) de que la llingua asturiana sía cooficial nel país xunto al castellanu, pero nun cree que la oficialidá del idioma sía “un pidimientu unánime de la sociedá asturiana”. Pese a esta posición, la tradicional de la FSA-PSOE énte l’asturianu, confirmó que va defender en Madrid l’estatus especial de la llingua asturiana, non oficial anque con reconocimientu xurídicu y implantación curricular, pa que tenga sitiu nel sistema educativu tres la entrada en vigor Llei Orgánica pa la Meyora de la Calidá Educativa, anguaño un borrador.

   Ana María Cano, presidenta de l’ALLA, alertó’l llunes de la situación na que s’atopa l’asturianu énte l’anteproyeutu de la nomada ‘Llei Wert’ y reclamó a les fuercies politiques, sobre manera al PP d’Asturies y al Gobiernu del país, una solución. La propuesta de la institución académica ye la incorporación a la norma d’una enmienda de mínimos pa que la materia de Llingua Asturiana tenga güecu nel sistema educativu. Cano ve necesario la declaración de la oficialidá del idioma pa finar con estes situaciones que se repiten davezu pola tradición del Estáu de tener en cuenta namái a les llingues cooficiales, y non a otres realidaes llingüístiques, a la hora de llexislar.

Fonte:  Asturnews.