SUATEA esixe al Principáu qu’atienda toles reivindicaciones del profesoráu

  Dende SUATEA entamen a ver con esmolición les actuaciones de la Conseyería d’Educación “que van suponer decenes de despidos o d’amenorgamientos de xornada pa los educadores que trabayen nes distintes escueles d’O·3″, sigún aseguren nun comunicáu nel que piden a la Conseyería atención pal profesoráu asturianu.

  Y ye que, pal sindicatu, “ye la Conseyería la qu’afita les plantiyes y ye al Conseyeru a quien correspuende qu’el so mandatu nun empiece con un retayu na atención a los nuesos neños y neñes. La pareya educativa a tiempu completu que defendemos dende SUATEA y el restu d’organizaciones comprometíes col calter públicu d’esti tramu educativu ye imprescindible pa garantizar una correcta atención a les neñes y neños qu’alleguen a estes Escueles”.

  La propuesta del Cheque Bebé tamién se critica fondamente dende SUATEA, porque allóñase de lo que defenden y porque “los fondos públicos tienen de destinase a garantizar la gratuidá d’esti tramu educativu y la so integración nel sistema públicu asturianu. Tien de garantizase esti serviciu en condiciones dignes, acabando cola desigualdá qu’esiste dependiendo del conceyu onde s’atope la escuela. Tien d’acabase cola precariedá tamién nesti sector dotando a cada aula de bebés del personal necesariu y a toles escueles d’una dirección unipersonal. Ye un compromisu del nuevu gobiernu y por mor d’ello una obligación pal nuevu Conseyeru”.

  Pero la Conseyería tien munches otres xeres pindies que nel sindicatu aprovechen pa que nun s’escaezan:  “Recordemos que’l próximu día 21 ta prevista la publicación de les llistes de profesoráu interín que va tener que solicitar plaza’l día 25 nos distintos centros educativos y qu’esiste un centenar de docentes que nun apaecíen nes llistes provisionales publicaes a principios d’agostu”. Ye por mor d’ello qu’esixen a la Conseyería la inclusión de toos estos docentes nes llistes, “víctimes del postreru incidente d’un procesu selectivu llaráu d’erros y de reclamaciones”.

  Per otra parte, dende SUATEA puntualicen que n’Asturies más de la cuarta parte del profesoráu de la enseñanza pública ye interín; “siendo dellos años la tasa de reposición inferior al 30 %, llegando dellos años hasta un ridículu 10%. Por ello esisten especialidaes de profesoráu onde lleva ensin haber oposiciones más de 15 años, lo que fai qu’haya docentes con esos años d’interinidá a los sos llombos. Otres como les de llingua asturiana nun tuvieron nunca esa opción. Agora’l gobiernu central, con un anunciu claramente electoralista, fala d’una tasa de reposición del 100%”.Fonte: asturnews

Andecha acusa al Principáu de "despreciu" haza los asturianos

   Nun duru comunicáu Andecha Astur diz que'l fechu de "qu'el serviciu d'emerxencia del “Principado” –SEPA- atienda les llamaes en suniki y wolof, ente otros 51 idiomes, pero que se niegue a ufiertar esi serviciu n'asturianu pon n'evidencia'l so despreciu haza la nuesa llingua". El recién anunciu de que'l Serviciu d'Emerxencia del “Principado” atiende les llamaes rializaes fasta nun total de 51 idomas, dellos tan pocu avezaos na nuesa tierra como'l suniki o'l wolof, mientres que se ñega a prestar dichu serviciu n'asturianu espeya nidiamente cuala ye la política del “Principado” haza los asturianos polo xeneral y haza la nuesa llingua en concretu, "negándomos drechos ellementales que sí reconoz pa los falantes d’otres llingües".

   Dende Andecha Astur consideren "bien positivo que s'ufierte'l serviciu d'emerxencies en cuantes más llingües seya posible, pero considera inxustificable que se mos ñegue esi mesmu derechu a los asturianos na nuesa mesma tierra. Inxustificable y enforma significativu pos reflexa l'odiu del “Principado” escontra tolo asturiano, y la política indisimulada de xenocidiu cultural al que se mos somete cola clara intención d’esanciar la nuesa llingua, cultura ya identidá".

   Una vuelta más Andecha Astur "desixe la proclamación de la oficialidá de la llingua asturiana como únicu mecanismu posible pa salvaguardar los drechos llingüísticos del Pueblu Asturianu".                       Fonte: Asturnews

El PP diz qu'Educación pretende "adoctrinar a los neños" por baxar el númberu d'hores de relixón y educación en valores

Susana López Ares,  nel Parllamentu

  

    La diputada del PP na Xunta Xeneral, Susana López Ares, acusó a la conseyería d'Educación, al respecto de la reducción d'hores de les asignatures de Relixón y Educación en Valores, de pretender "adoctrinar a los neños". "Nun puen amenogarse les hores d'estes dos asignatures espeyu coles mesmes que s'establez como obligatoria, dientro de Ciencies sociales, la Educación pala Ciudadanía", reprochó.

   Con esta midida, calcó López Ares, el Principáu pretende "adoctrinar a los neños préste-yos o non", baxando d'esta manera la capacidá de decisión de los padres sobre la educación de los sos fíos.

   Nesti punto, según la parllamentaria del PP, la conseyera d'Educación, Ana González, tendría que negociar por respetu a les families en llugar "d'amenazar col amenorgamientu d'hores de les asignatures".                                       Fonte: Europapress

La formación de la nueva Princesa d'Asturies va incluyir toles llingües del Estáu menos la del Principáu

Infanta Leonor,  Princesa d'Asturies

  La Princesa d'Asturies, la infanta Leonor, va falar toles llingües del Estáu menos la del Principáu, nun exemplu más de la incogruencia a la que la cultura asturiana se ve arrequexada pola murnia visión de la clas política de nueso. Leonor va incluyir na so formación el catalán, el gallegu y les demás llingües oficiales del Estáu, pero nun adeprenderá la llingua del país de so madre, la Reina Letizia.

 Na formación de la Princesa d'Asturies va caltenese una llínea similar a la del so proxenitor. La infanta Leonor ta siguiendo un plan de formación paralelu al que s'aplicó al so padre: un colexu priváu, el mesmu, el colexu Rosales, y depués ye previsible qu'allegue a una universidá, en principiu española (el so padre foi alumnu de la Universidá Autónoma).

 Ye seguro que va realizar estudios fuera del país, un máster al estilu del que curso'l príncipe Felipe en Georgetown demientres dos años. En cuantu al aspeutu militar, ye poco probable que faiga tres cursos nes academies, pero sí-y darán dalgún tipu de formación militar, daqué que yá adelantró'l ministru de Defensa, Pedro Morenés.                               Fonte: Asturnews