Más d’un centenar de persones va participar nesta edición de la UABRA

UABRA, Cangas del Narcea

 Unos 90 alumnos y más d’una ventena de profesores van participar na octava edición de la Universidá Asturiana de Branu (UABRA). Cangas del Narcea torna a acoyer los cursos de l’ALLA, que van desendolcase del 31 de xunetu al 11 d’agostu.

 En total la cifra de participantes supera los 115 nos siete cursos previstos esti añu, los trés clásicos y otros cuatro d’Afondamientu Cultural y Llingüísticu, quedando la inmensa mayoría d’ellos agospiaos na Escuela-Hogar de Cangas en réxime de pensión completa. Nel primer bloque tán l’Elemental de Llingua Asturiana, l’Avanzáu de Llingua Asturiana y el de Gallego-asturiano (Primera fase), que van desendolcase mientres les dos selmanes de la UABRA.

 Mentes, los Cursos d’Afondamientu Cultural y Llingüísticu tienen la duración d’una selmana cáun. Na primera de la UABRA van ponese el de ‘Capacitación pa la Traducción al Asturianu’, con Marta Mori al frente y la participación nel programa informativu de la direutora de la UABRA Cristina Valdés, Alberto Fernández Costales y Héctor García Gil, y el de ‘Nueves teunoloxíes na educación’, con David Melendi como maestru y Xulio Berros como convidáu.

 ‘Cantares, bailles ya instrumentos musicales asturianos’, dirixíu por José Ignacio Suárez García y con Héctor Braga, Covadonga González Muñiz, Xosé Antón Fernández Martínez ‘Ambás’, Ramsés Ilesies Fernández y Llorián García Flórez como profesores, y ‘Averamientu nel cine n’asturianu’, empobináu por Próspero Morán y cola actriz María Cotiello y el realizador Pablo A. Quiroga como participantes, son los programaos pa la segunda selmana. El Conceyu de Cangas del Narcea y la Universidá d’Uviéu collaboren cola Academia de la Llingua Asturiana (ALLA) na organización de la UABRA que, amás de la propia actividá académica, presenta una programación amplia con conferencies, conciertos y una esposición.                                                                                                 Fonte: asturies.com

Cangas celebra la so IX Sumana de las Ḷḷetras Asturianas

Cartelu de la IX Sumana de las Ḷḷetras Asturianas de Cangas del Narcea

 Dende esti llunes y hasta’l vienres, Cangas del Narcea entama la IX Sumana de las Ḷḷetras Asturianas. Dos esposiciones abren les actividaes, na so mayor parte enfocaes a los escolinos y escolines del conceyu, que va zarrar Pop Piquiñín con un conciertu.

 La Casa Cultura Palaciu d’Oumaña acueye este dos muestres, una sobre’l cuentu infantil ‘¿A qué sabe la lluna?’, de Miguel Rojo, y otra p’adultos, con viñetes de Neto, que lleva’l nome de ‘Na punta la llingua’. Éstes van poder visitase hasta’l 5 de xunu.

 Mañana va tener llugar nel Teatru Toreno, a partir de les 10.30 hores, la III Xunta d'Escolinas ya Escolinos de Cangas, xornada na que tolos centros educativos públicos del conceyu van disfrutar de la obra de teatru ‘Yérase que se yera’, de la Compañía d'Olga Cuervo. Amás, van entregase los premios del IX Concursu de Cuentos pa Nenas ya Nenos de Cangas ‘Otilio Álvarez Rodríguez’ y va entamase una visita a les esposiciones del Palaciu d’Oumaña.

 Tola familia va poder disfrutar del teatru n’asturianu’l miércoles gracies a la representación de ‘Un arreglu inesperáu’, de La Páxara Pinta, a partir de les 20 hores. Mentes, el xueves l’IES de Cangas va acoyer el II Alcuentru de la Mocedá cola Ḷḷingua dende les 9.15 hores, que va consisitir nuna charra sobre la esperiencia de voluntariáu de l'asociación Una Chispa en Ritsona y una amuesa de semeyes sobre la realidá de los refuxaos.

Cita a ciegues

 La Plaza La Oliva va acoyer el vienres, dende les 18 hores, el conciertu de Pop Piquiñín, que va poner el ramu a les actividaes de la Sumana. Otra manera, mientres estos cinco estos díes, nel Palaciu d’Oumaña va ser posible tener una cita a ciegues con un llibru en llingua asturiana.                                                                                                    Fonte: asturies.com

Cangas del Narcea celebra la so Sumana de las Ḷḷetras Asturianas

Una esposición d'Andrés R. Monteavaro nel Palaciu d'Oumaña abre les actividaes.

Cartelu: VIII Sumana de las Ḷḷetras Asturianas

  El Conceyu de Cangas del Narcea entama per octava edición esta Selmana col oxetivu d'homenaxar a la nuesa lliteratura, con una programación bien variada y atractiva.  El primer eventu va ser la inauguración de la esposición fotográfica d'Andrés Rodríguez Monteavaro "Paisaxes postindustriales: una mirada al patrimonio esqueicío', a les 20 hores d'esta tarde.

  Mañana va celebrase la II Xunta d'Escolinas ya Escolinos del Conceyu Cangas, cola representación de 'Nora, nena de sal', de la compañía Factoría del Norte; una visita comentada a la Escuela de Música Tradicional del Conceyu Cangas; y un conciertu de Rock and guaḥes nel Anfiteatru d'El Fuexu, a lo que va siguir una sesión de micro abiertu pa que l'alumnáu comparta tola so creatividá. Mentes, los adultos van poder disfrutar el miércoles de l'actuación de Rafa Lorenzo (20 hores, Teatru Toreno), na que'l cantautor presenta'l so discu 'Cantar las cuarenta'.

  El xueves, a les 20 hores nel auditoriu del Palaciu d'Oumaña, será la oportunidá de conocer más sobre la gaita asturiana de la mano de Juan Alfonso Fernández García, direutor del Muséu de la Gaita, que va poner la conferencia 'La formación del repertoriu tradicional de gaita asturiana'. Mentes, el vienres a la mesma hora nel Teatru Toreno, va ser el turnu del teatru cola representación de 'El secretru bien guardáu', adaptación de la obra homónima d'Alejandro Casona fecha pol grupu de teatru amateur Muyeres por Grau. Enantes, Benita Fernández Martínez, de Casa'i Xuacu de Vidal, va recibir un homenaxe "pola súa contribución a la tresmisión ya dignificación del nuesu patrimoniu ḷḷingüísticu ya cultural".

  P'acabar, el llunes 30 va tener llugar la I Xunta de la Mocedá cona Ḷḷlingua nel IES Cangas del Narcea, cola representación de 'Llázaro de Tormes', a cargu de Carlos Alba 'Cellero'.

Cita a ciegues con un llibru         Coincidiendo cola VIII Sumana de las Ḷḷetras Asturianas, el Serviciu de Normalización Ḷḷingüística de Cangas entama 'Cita a ciegas con un ḷḷibru' nel Palaciu d'Oumaña, cola fin d'averar la llectura a los ciudadanos. Dicha actividá consiste en garrar un paquete onde tea un llibru, que podría ser de cualquier temática, cola opción de lleelo nel llugar o llevalu pa casa.

  Otra actividá pa estos díes ye 'Pisando sobre los nuesos raizones ḷḷiterarios', "que pretende visibilizar la nuesa ḷḷiteratura mediante frases grafiadas nos pasos peoniles, previamente escoyidas polas escolinas ya escolinos de los nuesos centros educativos".
Fonte: asturies.com

La UABRA 2016 va desenvolvese del 1 al 12 d’agostu

 Como cada añu, l’Academia de la Llingua organiza los cursos de la Universidá Asturiana de Branu (UABRA) que se van celebrar en Cangas del 1 al 12 d’agostu. Esti añu hai convocaos, amás de los cursos elemental y avanzáu, el de gallego-asturianu, el cursu de capacitación pala traducción, unu d’Ecoloxía y Mediu Ambiente, otru de Xestión cultural y otru más sobre l’emplegu didáuticu d’Internet nes aules.

 Estos Cursos tienen reconocencia oficial per parte de la , darréu de l’’acreitación de l’’ALLA como «Entidá Organizadora d’Actividaes de Formación Permanente del Profesoráu». Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies. Los cursos desenvuélvense na Escuela Hogar de Cangas del Narcea en réxime d’internáu y la matrícula entama’l próximu 23 de mayu nel llar de l’Academia n’Uviéu y va tar abierta hasta’l 3 de xunu.

 Los cursos que van desenvolvese descríbense darréu:

CURSU ELEMENTAL DE LLINGUA ASTURIANA

 De 60 hores llectives y dirixíu a estudiantes que quieran averase a la conocencia práutica de la Llingua Asturiana. Superaes les pruebes afayadices, los participantes llograrán la certificación de Conocencia Básica de la Llingua Asturiana. Esta Certificación pue algamase tamién pente medies de les pruebes añales (de calter escritu y oral) que l’Academia entama nos meses de xineru y mayu y nes que toles persones interesaes puen amosar la so conocencia práutica del idioma asturianu.

CURSU AVANZÁU DE LLINGUA ASTURIANA

 De 60 hores llectives y dirixíu a estudiantes que superaren l’anterior Cursu Elemental o que, al traviés de les pruebes de xineru o mayu, algamaren el certificáu de Conocencia Básica de la Llingua Asturiana. El so oxetivu ye que tola xente, al marxe del so nivel d’estudios, titulación o profesión, pueda llograr una más fonda conocencia práutica de la llingua asturiana.

CURSO DE GALLEGO-ASTURIANO (SEGUNDA FASE)

 De 40 horas llectivas (35 presenciales+5 de trabayo personal). Este curso é a primeira das tres fases das que se compón el Programa de Capacitación en Gallego-Asturiano pra profesores qu’a Conseyeiría d’Educación del Principao d’Asturias encomendóu al Academia. Esta é a titulación oficial que s’esixe para impartir el asignatura de Gallego-Asturiano en Educación Primaria y Secundaria.

CURSOS D’’AFONDAMIENTU CULTURAL Y LLINGÜÍSTICU

  1. Cursu de Capacitación pa la Traducción al Asturianu (del 1 al 6 d’agostu).
De 30 hores llectives y 15 práutiques. Ta dirixíu a estudiantes que tengan una conocencia avanzada de la llingua asturiana. Esti cursu, que dirixe Cristina Valdés Rodríguez, tien como oxetivu presentar sintéticamente los presupuestos teórico-práuticos que rixen la traducción a una llingua minoritaria. Nel programa formativu tamién participen como profesores Cristina Valdés Rodríguez, Alberto Fernández Costales y Pablo Suárez García.

  2. Más presees d’aplicación escolar na rede (del 1 al 6 d’agostu).
De 30 hores llectives y d’accesu llibre, completaráse con 15 hores práutiques. El cursu ufierta nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a nuevos recursos qu’ufierta la rede y diseñar, darréu d’ello, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi Palacio y nel programa formativu participen como profesores Xulio Berros Reinoso y David Guardado Diez.

  3. Xestión cultural n’Asturies: creando cultura a traviés de los medios (del 8 al 12 d’agostu).
De 30 hores llectives y d’accesu llibre, completaráse con 15 hores práutiques. Esti cursu empobina hacia una meyor conocencia de los xuegos y tradiciones populares asturianes dende la perspeutiva de la so presencia escolar y con un nidiu enclín pa sofitar el deprendizax contestualizáu del asturianu. El so coordinador ye Roberto González-Quevedo González. Nel programa formativu participen como profesores Xandru Armesto Fernández, Lluis Miguel Álvarez González y Carlos Suari Rodrigue.

  4. Ecoloxía y Mediu Ambiente n’Asturies (del 8 al 12 d’agostu).
De 30 hores llectives y d’accesu llibre. L’oxetivu d’esti cursu ye averase a les carauterístiques básiques del Mediu Ambiente asturianu y la problemática del so caltenimientu. Amás de les hores llectives el cursu compleméntase con 15 hores de trabayu de campu, nun primer averamientu a los ecosistemes asturianos más emblemáticos del suroccidente del país. El so coordinador ye Carlos Lastra López y nel programa formativu participen como profesores José Alba Alonso, Enrique Fernández Menéndez, Ignacio Martínez Fernández y Vítor Xuan Melero Cimas. Fonte: asturnews.com

Entamen los cursos de la UABRA 2015 en Cangas del Narcea

Esti primer llunes d'agostu, a les 13 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamaben los Cursos y les Actividaes Abiertes de la Universidá Asturiana de Branu (UABRA), proyeutu lleváu a cabu dende va varios años gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea. Nel actu intervinieron, l'Alcalde del Conceyu de Cangas del Narcea, D. José Víctor Rodríguez; la Direutora de la Oficina de Política Llingüística, la Direutora de los Cursos, Dña. Cristina Valdés, y la Presidenta de l'Academia de la Llingua Asturiana, Dña. Ana Mª Cano. 15/05/2015 La UABRA abre plazu d'inscripción pa los cursos de branu que van desenvolvese en Cangas del 3 al 14 d'agostu Como cada añu,l'Academia de la LLingua Asturiana organiza en collaboración cola Universidá d'Uviéu los cursos de la Universidá Asturiana de Branu (UABRA) que se celebren en Cangas del 3 al 14 d'agostu. Esti añu hai convocaos, amás de los cursos elemental y avanzáu, el de gallego-asturianu, el cursu de capacitación pala traducción, unu d'averamientu al cine, otru de Xestión curltural y otru más sobre l'emplegu didáuticu d'Internet nes aules. Los cursos desenvuélvense como tolos años na Escuela Hogar de Cangas del Narcea y tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como «Entidá Organizadora d’Actividaes de Formación Permanente del Profesoráu». Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies. Esti mesmu llunes, dientro de les Actividaes Abiertes d’esta edición de la UABRA, tendrá llugar la inauguración de la esposición «Equí y n’otru tiempu», de Ramón Lluis Bande, na sala d’esposiciones de la Casa de Cultura de la villa canguesa. Y el próximu 5 d'agostu nel Teatru Conde Toreno a les 22,30 hores, actuará Alienda. Fonte: Asturnews

La matrícula pa la Universidá Asturiana de Branu va tar abierta hasta’l 5 de xunu

   L’Academia de la Llingua Asturiana (ALLA) abrió’l plazu de matriculación pa la Universidá Asturiana de Branu (UABRA), que va celebrase en Cangas del Narcea del 3 al 14 d’agostu baxo la direición de María Cristina Valdés. Les persones interesaes tienen hasta’l 5 de xunu pa formalizar la so inscripción.

   La decana de la Facultá de Filosofía y Lletres sustitúi nesta sesta edición de la UABRA a Xosé Antón González Riaño, agora vicepresidente de l’ALLA, mentes que se caltién nel cargu de secretariu Pablo Xuan Manzano. D’esta forma consolídase entovía más el venceyu de la Universidá d'Uviéu cola UABRA, institución que lleva collaborando dende’l primer añu na so organización, al igual que’l Conceyu de Cangas del Narcea. El formatu d’esta iniciativa de l’ALLA nun va sufrir cambios, cola celebración de los cursos clásicos, la ufierta de cuatro ‘Cursos d’Afondamientu Cultural y Llingüísticu’ y d’otros seis d’estensión universitaria p’alumnos de la institución. De manera paralela, tamién se celebrarán delles charres y actividaes en Cangas.

   Los cursos más veteranos son el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que tienen un costu de 300 euros, cantidá qu’inclúi los materiales y la pensión completa na Escuela-Hogar de Cangas, y consten de 60 hores llectives. A ellos hai que sumar el ‘Cursu de Gallego-asturiano (primerira fase)’, destináu a maestros d’Infantil, Primaria y Secundaria, qu’esti añu va durar los doce díes de la UABRA y tien el mesmu preciu de matrícula que los anteriores.

   La ufierta de los ‘Cursos d’Afondamientu Cultural y Llingüísticu’, destinaos a maestros o llicenciaos, y persones que tengan el ‘Cursu Avanzáu de Llingua Asturiana’, ta formada por cuatro opciones. La primer selmana (del 3 al 8 d’agostu) va impartise ‘Capacitación pa la traducción al asturianu’, a cargu de la direutora de la UABRA, y ‘Más presees d’aplicación escolar na rede’, coordinada por David Melendi. Mentes, pa la segunda selmana (del 10 al 14 d’agostu), Isabel Hevia va dar ‘Xestión cultural n’Asturies: creando cultura al traviés de los medios’ y Loreto Díaz Suárez, ‘Averamientu al cine n’asturianu’, nel que va participar l’actriz María Cotiello, ente otros profesores, nel programa formativu. La matrícula pa estos cursos, de 35 hores llectives, ye de 190 euros, con too incluyío.

Cursos d’Estensión Universitaria

   Tres la esperiencia del añu anterior, nesta edición de la UABRA entámense otra vegada ‘Cursos d’Estensión Universitaria’ en collaboración cola Universidá d’Uviéu col qu’estudiantes universitarios van poder algamar 4,5 o 6 creitos de llibre configuración. La ufierta nesta estaya ye la siguiente: ‘Cursu Elemental de Llingua Asturiana’ y ‘Cursu Avanzáu de Llingua Asturiana’, de 40 hores llectives; y ‘Cursu de capacitación pa la traducción al asturianu’, ‘Más presees d’aplicación escolar na rede’, ‘Xestión cultural n’Asturies: creando cultura al traviés de los medios’ y ‘Averamientu al cine n’asturianu’, de 30 hores llectives.

   El día caberu pa inscribise pa la UABRA ye’l vienres 5 de xunu, siendo l’horariu pa formalizar la matrícula na sede de l’ALLA (L’Águila 10, Uviéu)  –pa lo que ye necesario abonar l’importe y llevar una semeya– el siguiente: de llunes a xueves, de 9 a 15 hores y de 16 a 19 hores; y de 9 a 14 hores, los vienres. Por mor de la demanda alta que tienen estos cursos, la institución va siguir un orde rigurosu d’inscripción.                                                                                                   Fonte: asturies.com

La UABRA abre plazu d'inscripción pa los cursos de branu que van desenvolvese en Cangas del 3 al 14 d'agostu

Como cada añu, l'Academia de la LLingua Asturiana organiza en collaboración cola Universidá d'Uviéu los cursos de la Universidá Asturiana de Branu (UABRA) que se celebren en Cangas del 3 al 14 d'agostu. Esti añu hai convocaos, amás de los cursos elemental y avanzáu, el de gallego-asturianu, el cursu de capacitación pala traducción, unu d'averamientu al cine, otru de Xestión cultural y otru más sobre l'emplegu didáuticu d'Internet nes aules. Los cursos desenvuélvense na Escuela Hogar de Cangas del Narcea en réxime d'internáu y la matrícula entama'l próximu 25 de mayu nel llar de l'Academia n'Uviéu. Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como «Entidá Organizadora d’Actividaes de Formación Permanente del Profesoráu». Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies. Los cursos que van desenvolvese descríbense darréu: CURSU ELEMENTAL DE LLINGUA ASTURIANA De 60 hores llectives y dirixíu a estudiantes que quieran averase a la conocencia práutica de la Llingua Asturiana. Superaes les pruebes afayadices, los participantes llograrán la certificación de Conocencia Básica de la Llingua Asturiana. Esta Certificación pue algamase tamién pente medies de les pruebes añales (de calter escritu y oral) que l’Academia entama nos meses de xineru y mayu y nes que toles persones interesaes puen amosar la so conocencia práutica del idioma asturianu. CURSU AVANZÁU DE LLINGUA ASTURIANA De 60 hores llectives y dirixíu a estudiantes que superaren l’anterior Cursu Elemental o que, al traviés de les pruebes de xineru o mayu, algamaren el certificáu de Conocencia Básica de la Llingua Asturiana. El so oxetivu ye que tola xente, al marxe del so nivel d’estudios, titulación o profesión, pueda llograr una más fonda conocencia práutica de la llingua asturiana. CURSO DE GALLEGO-ASTURIANO (PRIMEIRA FASE) De 60 horas llectivas. Este curso é a primeira das tres fases das que se compón el Programa de Capacitación en Gallego-Asturiano pra profesores qu’a Conseyeiría d’Educación del Principao d’Asturias encomendóu al Academia de la Llingua Asturiana. Esta é a titulación oficial que s’esixe para impartir el asignatura de Gallego-Asturiano en Educación Primaria y Secundaria. CURSOS D’AFONDAMIENTU CULTURAL Y LLINGÜÍSTICU 1. Cursu de Capacitación pa la Traducción al Asturianu (del 3 al 8 d’agostu) De 30 hores llectives y 15 práutiques. Ta dirixíu a estudiantes que tengan una conocencia avanzada de la llingua asturiana. Esti cursu, que dirixe Cristina Valdés Rodríguez, tien como oxetivu presentar sintéticamente los presupuestos teórico-práuticos que rixen la traducción a una llingua minoritaria. Nel programa formativu tamién participen como profesores Ana Ma Cano González, Xosé Antón González Riaño y Marta Mori d’Arriba. 2. Más presees d’aplicación escolar na rede (del 3 al 8 d’agostu) De 30 hores llectives y d’accesu llibre, completaráse con 15 hores práutiques. El cursu ufierta nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a nuevos recursos qu’ufierta la rede y diseñar, darréu d’ello, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi Palacio. Nel programa formativu tamién participen como profesores David Guardado Díez y Xandru Armesto Fernández. 3. Xestión cultural n’Asturies: creando cultura a traviés de los medios (del 10 al 14 d’agostu) De 30 hores llectives y d'accesu llibre, completaráse con 15 hores práutiques. L’oxetivu d’esti cursu, empobináu por Isabel Hevia Artime, ye afondar na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies, dende un puntu de vista teóricu y práuticu. Nel programa formativu tamién participen como profesores Cristóbal Ruitiña Testa, María Xosé Rodríguez López ya Inaciu Galán y González. 4. Averamientu al cine n’asturianu (del 10 al 14 d’agostu) De 30 hores llectives, completaráse con 15 hores práutiques. D’accesu llibre y dirixíu por Loreto Díaz Suárez, esti ye un cursu que tien como oxetivu cimeru averase a la realidá de la producción audiovisual n’asturianu al traviés d’un percorríu poles películes y los curtiometraxes fechos na nuesa llingua, asina como conocer (y facer práuticamente) un proyeutu específicu de realización audiovisual. Nel programa formativu tamién participen como profesores l’actriz María Cotiello Pérez y el realizador Pablo A. Quiroga Prendes. Fonte: Asturnews

XIV Selmana Cultural en Cangas del 23 al 27 de Marzu

   Demientres los próximos díes 23 al 27 de marzu, Cangas del Narcea va celebrar la so XIV Selmana Cultural, con un perinteresante programa d'actividaes que va entamar el llunes día 23, cola inauguración de la esposición colectiva d'artistes cangueses que se presenta sol lema "Arte con denominación d'orixe" y un cartelu de Neto. La cita va tener llugar na Casa de Cultura "Palacio Omaña", a partir de les 19 hores y la esposición, va poder visitase mientres tola selmana nel horariu d'apertura de la Casa de Cultura.

   El martes 24 va acoyer la proyeición del documental "La Descarga: documental de Cangas", curtiumetraxe protagonizáu pola canguesa Foína del Pocu y Juan Ramón Lucas "Quédate equí". El miércoles 25 la protagonista va ser lamúsica de la mano del tenor d'orixe cangués Moisés Molín, quien va cuntar col acompañamientu al pianu d'Olga Semosine. El conciertu va tener llugar nel Teatru Toreno, a partir de les 20,30 hores.

   El xueves 26 volverá ser xornada musical, col conciertu la violinista canguesa Belinda Álvare nel Teatru Toreno, a partir de les 20:30 hores. Y pa finar, el vienres 27, la cantante Tania Pereira y la so banda van pesllar la XIV Selmana Cultural nel Teatru Toreno, a les 20,30 hores.
                                                                              Fonte: asturnews.com

Inaugúrense'l llunes los cursos de la Universidá Asturiana de Branu 2014

Un añu más, en Cangas del Narcea

   El próximu llunes 28 de xunetu, a les 13:00 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamen los Cursos y les Actividaes Abiertes de la Universidá Asturiana de Branu (uabra): proyeutu lleváu a cabu gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea.

  Nel actu intervendrán el Vicerrector d’Estensión Universitaria y Comunicación de la Universidá d’Uviéu, Vicente Domínguez García; l’Alcalde del Conceyu de Cangas del Narcea, José Luis Fontaniella Fernández y el Direutor de los Cursos, Xosé Antón González Riaño.

   Los Cursos y xeres complementaries desendolcaránse ente los díes 28 de xunetu y 8 d’agostu y nellos van participar más d’un centenar de persones.

   Esti mesmu llunes, dientro de les Actividaes Abiertes d’esta edición de la UABRA, tendrá llugar la inauguración de la esposición «Sable. Una revolada pelos arenales d’Asturies » na  sala d’esposiciones de la Casa de Cultura  de la villa canguesa.                                                 Fonte: InfoAsturies

Entamen los Cursos de la Universidá Asturiana de Branu (UABRA)

   Esti próximu llunes 28 de xunetu, a les 13 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamen los Cursos y les Actividaes Abiertes de la Universidá Asturiana de Branu (UABRA): proyeutu lleváu a cabu gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea.

UABRA, Cangas del Narcea

   Nel actu intervendrán el Vicerrector d’Estensión Universitaria y Comunicación de la Universidá d’Uviéu, Vicente Domínguez García; l’Alcalde del Conceyu de Cangas del Narcea, José Luis Fontaniella Fernández y el Direutor de los Cursos, Xosé Antón González Riaño.

   Los Cursos y xeres complementaries desendolcaránse ente los díes 28 de xunetu y 8 d’agostu y nellos van participar más d’un centenar de persones.

 Esti mesmu llunes, dientro de les Actividaes Abiertes d’esta edición de la UABRA, tendrá llugar la inauguración de la esposición «Sable. Una revolada pelos arenales d’Asturies » na sala d’esposiciones de la Casa de Cultura de la villa canguesa.

   Esti añu hai convocaos, amás de los cursos elemental y avanzáu, el cursu de capacitación pala traducción, unu d'ecoloxía y otru sobre l'emplegu didáuticu d'Internet. El cursu básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

  Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d'Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria.

   No que cinca a los Cursos d'Afondamientu Cultural y Llingüísticu, como cada añu va celebrase un cursu de Capacitación pa la Traducción al Asturianu, de 35 hores, del 28 de xunetu al 2 d'agostu, y embaxo la dirección de la decana de Filosofía y Lletres de la Universidá d'Uviéu, Cristina Valdés, y la collaboración de los profesores Xosé Lluis García Arias, Ana Mª Cano y Xosé Antón González Riaño. Nel cursu preséntense davezu los presupuestos teóricos que rixen la traducción a una llingua minoritaria, teniendo en cuenta, de mou especial, l'exerciciu de tornes de testos lliterarios y periodísticos y de testos llegales y científicos. Y a esto xúnese una sesión monográfica sobre estratexes de traducción ingles-asturianu.

   El cursu dedicáu a les nueves tecnoloxíes va ser esti añu nes mesmes feches que'l de traducción y va titulase “Internet como recursu educativu y cultural”. Nes sos 35 hores va sirvir pa ufiertar nueves y prestoses posibilidaes pa que'l profesoráu de Llingua Asturiana d'Educación Primaria y Secundaria pueda acceder a los recursos qu'ufre la rede y pueda diseñar, llueu, xeres y actividaes d'aula pal deprendizax oral y escritu de la Llingua Asturiana. El so coordinador ye David Melendi y tendrá profesores como Xulio Berros y Xabiel García Pañeda.

   El caberu de los cursos d'afondamientu lleva por títulu "Ecoloxía y Mediu Ambiente" y desenvolveráse embaxo la dirección de Carlos Lastra.                                                                                                    Fonte: Asturnews

Iniciativa pol Asturianu entama delles actividaes na Universidá Asturiana de Branu

La Universidá Asturiana de Branu (UABRA) llega un añu más a Cangas del Narcea de la mano de l'Academia de la Llingua Asturiana, la Universidá d’Uviéu y el Conceyu de Cangas. Dientro d’estos cursos, Iniciativa pol Asturianu organiza un añu más delles actividaes. A lo llargo d'estos díes la organización va poner un puestu informativu con venta de llibros y otros productos nes instalaciones de la Universidá. Amás, van celebrase delles folixes, una col segundu concursu de karaoke n'asturianu, y otra con Dj Lluis y el micro abiertu a la participación d'escritores. Estos díes va facese amás la grabación con públicu del programa Iniciativa pol Asturianu nes ondes, cola participación d'alumnos y profesores. PROGRAMA COMPLETU D’ACTIVIDAES Xueves 1 d’agostu A les 14:15 hores. Comedor de la Escuela Llar de Cangas. Grabación de programa d'Iniciativa pol Asturianu nes ondes, con Samuel Gradín. A partir de la 1 la mañana. Chigre Bambú, en Cangas. Folixa con Dj Lluis y la participación d'escritores lleendo poemes y otres obres lliteraries. Xueves, 8 d'agostu Búscase una estrella. Canta pol asturianu. Segunda edición de la esitosia folixa con concursu de karaoke na Discoteca Zaycor. Los alumnos de la UABRA competirán cantando temes n’asturianu al karaoke nos qu’imitirán a los sos artistes preferíos. Celebraráse de magar les 22:30 hores. Del 29 de xunetu al 9 d'agostu Puestu informativu y con llibros a baxu costu, amás d'otros productos. Cola so venta van recaldase fondos pa la organización. Fonte: Asturnews

La Conseyera nun participó na inauguración de la UABRA

Esti llunes inauguróse en Cangas del Narcea una edición nueva de la Universidá Asturiana de Branu (UABRA), entamada pola Academia de la Llingua Asturiana (ALLA), la Universidá d'Uviéu y el Conceyu de Cangas. Na inauguración participaron, como ye vezu, nel actu tuvo presente'l direutor del cursu, Xosé Antón González Riaño, la presidenta de l'ALLA, Ana Cano, l'alcalde de Cangas y un represenante de la Estensión Universitaria. Sicási esti añu nun tuvo presente la Conseyera d'Educación y Cultura, Ana González, que l'añu pasáu comprometiérase nesti mesmu marcu a tener avanzada una solución que permitiera al profesoráu d'asturianu tener reconocida la especialidá, lo que permitiría convocar oposiciones con normalidá y evitar la eterna interinidá que viven anguaño. Nel so llugar tuvo Ana Fueyo, Directora Xeneral de Política Llingüística, que nun dio nenguna esplicación sobre l'ausencia de la Conseyera, anque si mandó un saludu nel so nome. Tampoco dio esplicación dala sobre la situación d'esti asuntu prometíu pola Conseyera l'añu pasáu. Ana Cano faló de la importancia d'estos cursos, nos qu'esti añu collabora CaxAstur y ALSA como patrocinadores y recordó l'ésitu de poder llevar alantre tolos cursos pa los que s'abrió matrícula, per primer vegada. En total participen nos cursos, que se celebren na Escuela Llar de Cangas, 170 persones ente alumnos y profesores, con cursos d'asturianu pero tamién d'otres cuestiones, como internet, la xestión cultural, la hestoria... siempres col asturianu como llingua vehicular. Dempués de la presentación, na Casa Cultura de Cangas, presentóse nesi mesmu llugar una esposición entamada por mor de la UABRA y dedicada a la ropa traidicional. Xandru Armesto, del Grupu San Félix de Candás, qu'entama esta amuesa, fizo de presentador con un paséu d'alumnos y autoridaes peles distintes partes de la mesma. Fonte. Asturnews

Inaugúrense'l llunes los cursos de la UABRA en Cangas

Esti llunes inaugúrense los cursos de la UABRA en Cangas del Narcea 

Llar de la UABRA

    El próximu llunes 29 de xunetu, a les 13:00 hores, nel Salón d’Actos de la Casa de la Cultura «Palaciu d’Omaña» de Cangas del Narcea, entamen los Cursos y les Actividaes Abiertes de la Universidá Asturiana de Branu (uabra): proyeutu lleváu a cabu gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea.

   Nel actu intervendrán la Direutora Xeneral de Política Llingüística del Gobiernu del Principáu d’Asturies, Ana Mª Fueyo Llaneza, el Direutor de la Estaya d’Estensión Universitaria de la Universidá d’Uviéu, Leopoldo Sánchez Torre, la Presidenta de l’Academia, Ana Mª Cano González; l’Alcalde del Conceyu de Cangas del Narcea, José Luis Fontaniella Fernández y el Direutor de los Cursos, Xosé Antón González Riaño.

   Los Cursos y xeres complementaries desendolcaránse ente los díes 29 de xunetu y 9 d’agostu y nellos van participar al rodiu de 170 persones.

   Esti mesmu llunes, dientro de les Actividaes Abiertes d’esta edición de la UABRA, tendrá llugar la inauguración de la esposición «Asturies n’otra dómina. La ropa» na sala d’esposiciones de la Casa de Cultura de la villa canguesa.

   Fonrte:  Asturnews.

El doblaxe asturianu de 'Charade' estrénase en Cangas del Narcea na UABRA

El 7 d’agostu viniente, en dientro les actividaes de la UABRA (Universidá Asturiana de Branu) qu’entama l’Academia de la Llingua, va estrenase’l doblaxe de Gonzali producciones del clásicu cinematográficu CHARADA. La proyección fadráse nel Teatru Toreno de Cangas del Narcea, a partir de les 22:30 hores. Nueu doblaxe asturianu d'un llargumetraxe a cargu de Gonzali Producciones, esta vegada trátase de "Charade" (Stanly Donen, 1963). "Charada" como s'entitula n'asturianu va presentase na Universidá Asturiana de Branu qu'entama l'Academia de la Llingua Asturiana, en Cangas del Narcea'l 7 d'agostu. CHARADA (‘Charade’ nel so títulu orixinal) ye una película del añu 1963 y 113 minutos de duración, dirixida por Stanley Donen, que protagonicen Cary Grant y Audrey Hepburn. Tamién actúen nella los actores Walter Matthau, James Coburn, George Kennedy, Dominique Minot, Ned Glass y Jacques Marin. La banda sonora y música de créditos son de Henry Mancini y los títulos animaos de Maurice Binder. CHARADA allúgase ente los xéneros thriller y comedia romántica. La canción de la película tuvo nominada al Óscar. Cary Grant y Audrey Hepburn fueron candidatos a los Globos d’Oru como meyor actor y meyor actriz de comedia o musical, respectivamente. El guionista, Peter Stone, recibió en 1964 el Premiu Edgar de los Escritores de Misteriu d’América al meyor guión adaptáu. El doblaxe asturianu de CHARADA sumaráse a los yá fechos por esta productora; LOS VIAXES DE GULLIVER (2010), EL TERCER HOME (2011), McLINTOCK(2011), POPEYE Y LES 1001 NUECHES (2011) y LA NUECHE DE LOS MUERTOS VIVIENTES (2012) y POPEYE Y AS 1001 NOITES (2011). FICHA TÉCNICA DEL DOBLAXE PRODUCTOR EXECUTIVU: ILLÁN GONZALI ASESORAMIENTU LLINGÜÍSTICU: ACADEMIA DE LA LLINGUA ASTURIANA GUIONISTA DE DOBLAXE Y AXUSTADOR: HUMBERTO GONZALI GRABACIÓN: ESTUDIU FASE CUATRO ACTORES DE DOBLAXE: ANDRÉS PRESUMIDO (Cary Grant), ARANTXA FERNÁNDEZ (Audrey Hepburn), JORGE MORENO (Walter Matthau), ANTÓN CAAMAÑO (James Coburn), CARLOS NOVOA (George Kennedy), ANA VIÑUELA (Dominique Minot), BERTO PEÑA (Ned Glass), FERNANDO MARROT (Jacques Marin), CARLOS RODRÍGUEZ (Paul Bonifas); NORBERTO SÁNCHEZ, HUGO GARCÍA, VANESA RODRÍGUEZ TOUZA, FÉLIX CORCUERA, INMA RODRÍGUEZ, IZAR GAYO. DIREICIÓN: ANTÓN CAAMAÑO Fonte: Infoasturies

L'ALLA avanza'l Día de les Lletres Asturianes en Cangas del Narcea

El Conceyu de Cangas y l'Academia de la Llingua Asturiana (ALLA) entamen una edición especial del Día de les Lletres Asturianes en Cangas, el vienres 19 d'abril. El teatru Toreno va ser l'escenariu d'esta celebración presentanda pola presidenta de l'ALLA esti vienres pasáu. Ana Cano, recordó que'l Día de les Lletres Asturianes celébrase'l primer vienres del mes de mayu y que “nun puede sacase del Teatru Campoamor d'Uviéu”. Sicasí, anguaño a propuesta del Conceyu de Cangas el Día de les Lletres va tener una celebración previa. L'actu va empezar cola presentación de la reedición del llibru Vocabulariu de Cangas al cargu del so autor Jesús Feito Calzón. Amás, l'actriz asturiana María Cotiello va facer un recital de dellos poemes que se recueyen en Lletres Lliterariu, “un adelantu en primicia de la presentación que se va realizar el Día de les Lletres n'Uviéu”, aseguró la presidenta de l'Academia. Pa pesllar l'actu, Carlos Alba “Cellero” va representar la obra Llázaro de Tormes. L'alcalde cangués, José Luis Fontaniella, estimó'l xestu de l'Academia d'aceptar la collaboración del Conceyu pa llevar a cabu una edición especial del Día de les Lletres Asturianes en Cangas y destacó que puede suponer “l'entamu de distintes actuaciones y actividaes nel conceyu pa estes celebraciones”. Fonte: Asturnews

L'ALLA en Cangas del Narcea por mor de les Lletres Asturianes

L'Academia celebrará dellos actos en Cangas del Narcea por mor de les Lletres Asturianes

Ana Mª Cano González, Presidenta de l'ALLA

   El llunes 15 d’abril, a les 12:00 h., nel Salón d’Actos de la Casa de la Cultura «Palaciu d’Omaña» de Cangas del Narcea, tendrá llugar una rueda de prensa de presentación de los actos que con motivu de les Lletres Asturianes van celebrase en Cangas Narcea’l próximu vienres 19 d’abril, entamaos por esta Academia y el Conceyu de Cangas.

Palaciu d'Omaña, Cangas del Narcea

   Nel actu, onde se van desvelar los conteníos, intervendrán José Luis Fontaniella, Alcalde del Conceyu de Cangas del Narcea y Ana Mª Cano González, Presidenta de l’Academia de la Llingua Asturiana.

   Fonte:  Astunews.

SLN de Cangas: campaña pal caltenimientu del pallabreru agroganaderu

El SNL de Cangas entama una campaña destinada al caltenimientu del pallabreru agroganaderu

   La campaña nueva del Serviciu de Normalización Llingüística de Cangas del Narcea va tar enfocada al mundu agroganaderu. Va editar trés materiales pa repartir ente la población col oxetivu de caltener el pallabreru tradicional d’esti sector.

   “La mayor parte de les campañes qu’entamamos los Servicios de Normalización Llingüística tán focalizaes al usu del asturianu en campos nos que nun tien muncha presencia, como la sanidá o la educación. Poques veces miramos pa lo tradicional, onde yá s’usa l’idioma, y creo que ye importante trabayar tamién pa mantener y dar prestixu a lo que se siempre s’usó”, apunta Mónica Rodríguez Riesgo, responsable del SNL cangués. Asina, al tratase Cangas d’un conceyu rural, onde una gran parte de la población vive de l’agroganadería, viose la necesidá de trabayar nesi sen y principiar una campaña destinada a caltener el pallabreru d’estes formes de producción.

   El primer de los trés materiales que conformen esta iniciativa del SNL de Cangas ye’l Calendariu de Ferias ya Mercaos, folletu que recueye toles cites del 2013 y un testu breve sobres les feries principales. A ésti hai que sumar un impresu coles races del país, acompañáu con un vocabulariu, nes que s’esplica la so morfoloxía y carauterístiques principales, y un calendariu de sema –en formatu A1– de los productos de güerta principales del suroccidente asturianu. Estos dos materiales últimos tarán disponibles nes selmanes próximes y repartiránse xunto al primeru nes feries, n’Axencia de Desenvolvimientu del Conceyu y na Casa Cultura. Tamién van unviase a los pueblos y, de manera direuta, xunto con una carta del alcalde, a vecinos del conceyu que trabayen nel sector agroganaderu.

   Fonte: Asturies.com

Cangas del Narcea, 10ª edición del concursu de rellatos curtios n'asturianu

Cangas del Narcea tien abiertu'l plazu de la décima edición del so concursu de rellatos curtios n’asturianu

 

Tolos mayores de 16 años pueden participar nesti concursu y presentar una obra namás, n’asturianu estándar o na so variedá occidental. Va premiase aquella obra inédita qu’a xuiciu del xuráu seya d’un valir lliterariu mayor. La temática ye llibre y el rellatu ha tener una estensión de cinco fueyes como mínimu y venti a lo máximo, con una presentación en DIN A4 a espaciu doble y con cuatro copies.

Les obres nun se van volver a los autores, y el ganador va premiase con 400 euros pa cada categoría, la escrita colos rasgos de la variedá llocal y la escrita al mou estándar.

Los trabayos han presentase nel Serviciu de Normalización L.lingüística (La Plaza la Oliva, e/n, 33800, Cangas de Narcea), yá seya presencialmente o per corréu certificáu na mesma dirección, nun sobre ensin remite o embaxo nomatu, qu’axunte dientro la plica na que se dean a conocer los datos reales del autor, too ello enantes del 10 d’avientu.

El xuráu tará formáu por representantes de la Conceyalía de Cultura, un representante de la Rede de Normalización Llingüística nos Conceyos, maestros y escritores en llingua asturiana.

Fonte:  Asturnews.

Cangas del Narcea va celebrar la so propia Selmana de les Lletres

El Conceyu de Cangas del Narcea súmase a les celebraciones de la Selmana de les Lletres Asturianes unos díes dempués de los actos oficiales del Gobiernu d’Asturies. Baxo’l nome Sumana de las L.letras Asturianas, esti conceyu va organizar delles actividaes alredor de la lliteratura ente los díes 21 y 25 de mayu. El llunes 21 de mayu los actos entamen cola proyección de “Flandón”, de Naciu’l Riguilón, a les ocho y media de la tarde, nel auditoriu de la Casa Cultura.
El miércoles 23 dende les seis de la tarde, tamién na casa cultura, van celebrase les entregues de los premios del IV Concursu de cuentos n’asturianu pa nenos Otilio Álvarez Rodríguez y los del XI Concursu de marcapáxines Cuentos clásicos, xunto a la representación d’una obra de teatru infantil de Carlos Alba.
El Teatru Toreno va acoyer el xueves 24 un homenaxe a Irene’l Anxelu a partir de les ocho y media de la tarde, col conciertu del grupu cangués El Perendengue. Al otru día, na Casa Cultura, va presentase'l llibru de Naciu’l Riguilón Queixas, conxuros ya poemas gráficos d’un tiempu que foi, entregándose los premios del IX Concursu de cuentos p’adultos del Conceyu de Cangas.
Amás, tamién na Casa Cultura, ta espuesta hasta’l 31 de mayu la esposición de poemes gráficos de la obra de Naciu’l Riguilón “Queixas, conxuros ya poemas gráficos d’un tiempu que foi”.
Fonte: asturnews

Yá ye posible presentar tesis n'asturianu

Xabiel G. Pañeda: “Yá ye posible presentar tesis n’asturianu”
Xabiel García Pañeda ye direutor d’area de xestión d’I+D+i y dirixe ún de los cursos de la UABRA. Asturies.com faló con elli en Cangas del Narcea del reglamentu de doctoráu acabante aprobar y que según el profesor “va dexar que se presenten tesis n’asturianu y eso ye un gran fitu pa la llingua”.
El direutor del cursu “Coses Nueves n’Internet”, comenta que “esti procesu que se dio nes últimes selmanes acabó de forma satisfactoria porque s’atopó una fórmula qu’axunta les posibilidaes llegales y normatives y les necesidaes de la xente que quier emplegar l’asturianu pa facer les sos tesis doctorales”.
El rectoráu depués d’aconceyase y caltener conversaciones con profesoráu universitariu y con asociaciones con presencia na Universidá como’l CUPA, qu’alertó de mano sobre la situación, o la Xunta Moza, propunxo una redacción que según Pañeda “ye la meyor de les posibles porque pon a la llingua asturiana al altor d’otres llingües europees, anque desgraciadamente nun seya llingua oficial”.
Pa presentar una tesis n’asturianu, “como pa facelo en cualquier otra llingua”, comenta Pañeda, va facer falta tener un tribunal qu’acepte evaluala n’asturianu, “pero nun va haber nenguna restricción normativa pa facelo”.
Fonte: asturies.com