La discriminación llingüística sigue perende

Dende la Cooperativa El Nocéu denuncien esti día  la situación de discriminación llingüística que sufren énte la Tesorería Xeneral de la Seguridá Social, dependiente del Ministeriu de Trabayu y Seguridá Social, al nun ser almitíos los so estatutos por tar redactaos n’asturianu, siendo obligaos a presentalos en castellanu.

Discriminando otra vuelta a cuantos ponen en práutica la Llei vixente nel Principáu d’Asturies, l’Alministración del Estáu ufierta otra vuelta la evidencia de que namái cola oficialidá se respeten derechos fundamentales de los asturianos,sigún denuncia esta Cooperativa.

Nuna nota de prensa asoleyada esti vienres, la cooperativa desplica qu’al intentar dase d’alta como trabayadores de la cooperativa, “atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica. Nuna segunda instancia, na qu’una trabayadora d’esti organismu debía recurrir a los estatutos pa resolver una cuestión llaboral, ésta nun quixo nin garralos pol fechu de tar escritos n’asturianu”.

Ye por esto que demanden que se revierta esta situación de discriminación continua: “Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua. Asina ye que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu“. Fonte: asturnews.com

La política llingüística del Gobiernu va centrase en “potenciar al máximu'l desarrollu del marcu llegal vixente”

por Pablo R. Guardado

El conseyeru Genaro Alonso intervino esti miércoles énte la Comisión d’Educación y Cultura de la Xunta Xeneral. Anunció una mayor presencia del asturianu na programación de la RTPA y más presupuestu pa l’ALLA.

La planificación llingüística ocupó parte de la esposición d’Alonso del programa de gobiernu nel so área. Asina, el conseyeru señaló que “pretendemos a lo llargo d’esta llexislatura qu’agora iniciamos da-y un puxu decidíu al desarrollu de la política llingüística y, con esti fin, fiximos los cambios estructurales yá anunciaos: la Direición Xeneral de Planificación Llingüística y Normalización baxo la dependencia direuta del titular de la Conseyería d’Educación y Cultura. Nun ye una cuestión nominalista, sinón un cambiu estructural que supón l’asunción de compromisos nuevos y retos”.

“El oxetivu principal”, continuó, “podemos resumilo en potenciar al máximu el desarrollu del marcu llegal vixente, la Llei 1/98 del 23 de marzu d’Usu y Promoción del Bable/Asturianu, y dende esti marcu xurídicu fomentar, promover, dignificar y difundir l’asturianu y el so usu, y del gallego-asturiano nel so ámbitu propiu”. Alonso tamién fixo referencia a una mayor presencia del idioma na RTPA, con programes que dean una visión normalizada del mesmu, asina como una partida mayor pa l’Academia de la Llingua Asturiana (ALLA).

No que respeuta al terrén educativu, aseguró que la Llingua Asturiana y el Gallego-asturiano va ufiertase en tolos centros que reciban fondos públicos. D’igual forma señaló la so impartición tamién na Educación Infantil, una demanda vieya del asturianismu.

Plan especial del Prerrománicu

Na so intervención, Alonso tamién trató sobre la so intención de convocar oposiciones pa reducir la interinidá, places que van depender de los Presupuestos Xenerales, y destacó’l so enfotu na meyora de la Formación Profesional y de la situación de les escueles rurales. No que respeuta a la estaya cultural, destacó que “la proteición del patrimoniu históricu artísticu constitúi una piedra angular de la política cultural, yá que ye una ferramienta indispensable pa conocer quiénes somos, d’ónde procedemos y tamién aquello que podemos llegar a ser”, polo que pretende potenciar el conocimientu de dicho patrimoniu por parte de la ciudadanía.

Ente otros aspeutos, anunció la creación d’un Plan especial del Prerrománicu, el fomentu de les rutes asturianes del Camín de Santiago y la instauración del Conseyu Asturianu de la Cultura y de les Artes, que va tar conformáu por persones de trayeutora reconocida nesi terrén.

Fonte: Asturies.com

El PAS califica de "estafa" l'alcuerdu ente la FSA y IX sobre l'asturianu

El Partíu Asturianista (PAS) criticó  l'alcuerdu de la FSA-PSOE y IX no que respeuta al asturianu tres conocer qu'ésti va quedar nun aumentu de les competencies a la direición xeneral encargada de la política llingüística. "Lo que se tresmitió a los medios ye, simplemente, que va intentase cumplir la Llei d’Usu y Promoción del asturianu impulsada pol PAS nel 1998 (Llei 1/98, de 23 de marzu) y apoyada nel so día pol PP", apunta especificando los artículos nel que tán incluyíos: “competencies del asturianu en rellación cola Alministración (Llei d’Usu, artículos 3, 4, 5, 6 y 7), col asturianu nel enseñu (artículos 9,10,11) y col asturianu nos medios de comunicación (artículos 12 y 13)".

"Esto ye lo que se nos vien a dicir; que ¡17 años después! va tratase de cumplir parcialmente cola Llei d’Usu y Promoción del Asturianu", continúen los asturianistes, que califiquen de "estafa" l'alcuerdu entre la FSA-PSOE y IX sobre l'asturianu.

Fonte: Asturies.com

La XDLA presenta un requerimientu énte la Conseyería de Presidencia pa que se cumpla la llegalidá vixente en materia toponímica

La XDLA presenta un requerimientu énte la Conseyería de Presidencia pa que se cumpla la llegalidá vixente en materia toponímica, al tiempo que denuncia como exemplu más d’un centenar d’incumplimientos nel BOPA y na web del Principáu.      Esti vienres 31 de xineru la Xunta pola Defensa de la Llingua Asturiana (XDLA) presentó nel Rexistru Xeneral Central del Principáu d'Asturies un requirimientu  formal instando a la Conseyería de Presidencia el cumplimientu de la llegalidá en materia toponímica.     Nel escritu de la XDLA, recuérdase que la Llei d'Usu y Promoción del Asturianu, aprobada'l 28 de marzu de 1998, recueye nel so artículu 15, Capítulu V, que "los topónimos de la Comunidá Autónoma del Principáu d'Asturies han de tener el nome oficial na so forma tradicional". Un decretu posterior, del 4 d'abril del 2002, regula la Xunta Asesora de Toponimia del Principáu d'Asturies, y otru del 18 de xunetu d'esi añu, establez el procedimientu  de recuperación y fixación de la toponimia asturiana.    L’artículu 5.2 d’esti decretu diz qu’a partir del momentu de la entrada en vigor del Decretu pol que se determinen los topónimos correspondientes, les denominaciones o topónimos que nél se recueyan tendrán la consideración de denominaciones oficiales. Cumpliendo estes normes aprobáronse yá ente’l 2007 y el 2012 50 decretos cola denominación oficial de los topónimos d’otros tantos conceyos.    La XDLA denuncia nel requerimientu qu’en cuasi tola documentación xenerao dende les conseyeríes del Principáu d’Asturies nun s’utiliza’l nome oficial na so forma tradicional, inclumpliéndose polo tanto la llexislación y vulnerándose’l principiu de llegalidá consagráu nos artículos 9 y 103 de la Constitución Española de 1978, ún de los principios fundamentales d’un Estáu de Derechu.    Amás, nel casu de la toponimia, l’actuación de l’Alministración nun requier tomar más midíes que la del so propiu cumplimientu. Argumentos como’l de la gradualidá de l’aplicación de la norma, les más de les veces cola sida de la escasez de recursos, podríen entendese, siempre con unos plazos razonables, pa la renovación de lletreros de carretera y mapes, pero nunca pal so usu normal nos escritos que l’Alministración produz a diario. Hai que recordar qu’hai topónimos que son oficiales dende hai siete años y el Gobiernu asturianu, el mesmu que los oficializó, nun los usa.    La XDLA esixe de l’Alministración del Principáu d’Asturies l’adopción de les midies necesaries pa correxir esta situación porque nos alcontramos «ante un claru incumplimientu d’una Llei dictada pola mesma Alministración, que la incumple de manera sistemática y reiterada». Pídese, polo tanto, qu’en tola documentación que se xenere se cumpla estrictamente la llegalidá toponímica.    Nel requerimientu, la XDLA pon como muestra sesenta resoluciones o anuncios publicaos nel BOPA no que va d’añu qu’incumplen la llegalidá toponímica y unos exemplos de secciones de la web del Principáu onde s’usen topónimos que tiene una forma yá oficializada dende va años y que siguen ensin respetase. En casu de que nun se dea respuesta al requerimientu, la XDLA valora la posibilidá d’impugnar de manera individualizada cualquier tipu de procedimientu alministrativu procedente de cualquiera de los organismos del Principáu d’Asturies qu’incumplan les formes toponímiques oficiales aprobaes pol mesmu Principáu.    Fonte:   Asturnews.

IX d'Asturies alvierte que la Llei d'Usu y Promoción del Asturianu ta a valir y reconoz el drechu de tolos ciudadanos a emplegalu

La coalición defendió y defende la oficialidá y allaba la práutica del Conceyu de Mieres de fomentar l'usu normalizáu de la nuesa llingua IX d'Asturies, énte'l discutiniu amenáu nel Conceyu de Mieres pola actuación d'un funcionariu municipal que multó un vehículu que cuntaba con una autorización escrita n'asturianu, quier recordar que n'Asturies la Llei 1/1998, de 23 de marzu ta dafechu a valir y que esta llei nel so artículu 4 reconoz “el drechu de tolos ciudadanos a emplegar l'asturianu y a espresase nél de pallabra y por escritu”. Esti testu llegal, aprobáu col sofitu d'IX, tamién incide nel so artículu 8 en que los conceyos van poder adoptar los medios necesarios p'asegurar la efeutividá de los drechos llingüísticos qu'esta llei otorga a los asturianos residentes n'Asturies. Poro, l'actuación d'esti funcionariu incumple la Llei d'Usu y Proteición d'Usu y Promoción del bable asturianu, cuestión qu'escarez de discutiniu posible. IX d'Asturies defendió y defende la oficialidá del asturianu como únicu camín escontra la normalización llingüística y allaba la práutica del Conceyu de Mieres de fomentar l'usu normalizáu de la nuesa llingua. IX d'Asturies llamenta que l'asturianu, como llingua propia y patrimoniu de la nuesa comunidá autónoma, háyase vistu envueltu nuna guerra d'intereses ayenos y espera que'l casu d'esti funcionariu sía un fechu aislláu pa que ciudadanos y políticos puean poner soluciones a los importantes problemes a los que s'enfrenten día ente día y nun esviar la so atención. Fonte: Asturnews

Los docentes d'asturianu ven "namás bones pallabres" dende la Conseyería d'Educación

Conseyera d'Educación, Cultura y Deporte Esti xueves 14 de marzu celebróse un conceyu que l'Asamblea de Docentes de Llingua Asturiana y Gallego-Asturiano "pidiere cuantayá" a la conseyera d’Educación Ana González. Al conceyu asistieron cinco persones en nome de l’asamblea y per parte de la Conseyería, amás de la propia conseyera, l’asesor en materia de Llingua Asturiana. L'asambel diz que "foron too bones palabres". Comenten que la conseyera entamó reconociendo que, "depués del tercer anteproyectu de la llamada Llei Wert, la pelota ta en teyáu del Gobiernu del Principáu d'Asturies". La voluntá de la so conseyería, afirmó, ye dexar l’asturianu “polo menos como taba hasta agora”, y cumpliendo la Llei d’Usu. Dende l’Asamblea, amás de sorrayar que la situación actual "ye frutu de l’ausencia d’oficialidá del asturianu", cosa qu'afirmen, la Conseyera "almitió pero diciendo tamién que d’eso nada". Los docentes ficiéron-y llegar les reivindicaciones que yá plantegaren nel so momentu na asamblea. A llargo'l conceyu "tomó nota de tolo que-y diximos, y comprometer, comprometióse a poco, anque concretóse más nel tema d’Educación Infantil, no que toca a la so xeneralización", espliquen. Amás reiteró’l compromisu nesta llexislatura en sacar alantre la especialidá. Sobre’l problema de les ratios que se apliquen nos institutos "quedó en dexalo reflexao na circular d’iniciu de cursu, clarificando que nun se puen aplicar nel casu del asturianu". De coses como l’asturianu como llingua vehicular, la criación de departamentos didácticos nos IES, la non segregación del alumnáu, la presencia na PAU, etc. los docentes espliquen que "tomó nota pero nun concretó nada, anque de la segregación del alumnáu sí desplicó que nun conocía esi datu y que-y paecía interesante, yá que ta mui sensibilizada con esi tema". Faló tamién de cómo la LOMCE diba suponer un “revolcón curricular” y qu’había que ver en qué midida diba afectar al currículu asturianu, que, según ella, "ye bien curiosu". De toes maneres, comentó tamién que diba ser el propiu desendolque de la futura llei a nivel autonómicu el que podría valir pa fixar el profesoráu, tanto d’asturianu como de les demás materies. En definitiva, pa l'Asamblea fueron too "bones pallabres qu’habrá que ver en qué se concreten". Tamién-yos dixo a los docentes que "nun esperaren “una revolución” nesi tema". L'Asamble tien claro que "la so capacidá de presión y movilización la que sirva pa obligar a l’alministración a mover ficha nesti tema, como en tantos otros". Más información: Documentu entregáu a la Conseyera Fonte: Asturnews

SUATEA esixe a Javier Fernández

SUATEA esixe a Javier Fernández “terminar cola inxusticia que viven los docentes d’asturianu” El sindicatu del enseñu SUATEA emitió estos díes un comunicáu nel que trataba les cuestiones más urxentes de cara a la nueva alministración del Gobiernu d’Asturies, encabezada pol socialista Javier Fernández. Ente les cuestiones más destacaes la solución a los yá tradicionales problemes que vive l’enseñu del asturianu y gallego-asturianu nes escueles. Pal sindicatu “yá ye tiempu de facer casu a una reivindicación hestórica y terminar con una inxusticia que lleven careciendo dende va años los y les docentes qu'imparten clases de llingua asturiana y gallego-asturianu, a los que se-yos niega la posibilidá de tener una plaza fixa y a los que se conderga a la precariedá llaboral”.

SUATEA afirma qu’estos cambios un son más “qu'una cuestión de voluntá política” y recuerden qu’asina lo dexa claro “l'últimu informe, fechu pol gobiernu anterior”, nel que se conclúi que nun esisten torgues xurídiques insalvables pa la creación de la especialidá de llingua asturiana. El sindicatu recuerda qu’“el camín yá ta abondo percorríu, esisten los currículos de primaria y secundaria, esisten les titulaciones nes enseñances reglaes de la Universidá d'Uviéu, esiste profesoráu interín y funcionariu pa faese cargu de la enseñanza de la llingua asturiana cola calidá educativa que garantiza la esistencia de la especialidá”. Ye por ello que nun entienden dende SUATEA que dándose toles circunstancies entá “nun esista un ámbitu profesional nel que puedan trabayar, n'igualdá de condiciones, lo mesmo que n'otres especialidaes, la xente qu'escueye esta opción”. Per otru llau emplacen al nuevu gobiernu a que cumpla y faiga cumplir la Llei d’Usu y Promoción del Asturianu, que na so artículu 10 diz que se va garantizar la enseñanza del asturianu y del gallego-asturianu en tolos niveles y graos del sistema educativu asturianu. Pa ello píden-y “la ellaboración d'unes instrucciones, clares, d'inscripción y matriculación de la llingua asturiana pa tolos centros y niveles educativos, respetando la Llei d’Usu y aplicando, en tolos niveles, la sentencia qu'esanicia la ratio mínima na ESO pal cursu que vien”, cumpliendo la sentencia qu’eliminó apocayá’l cupu de matricules na asignatura pa que s’imparta. Fonte: Asturnews