Cristina Fernández Cubes algama’l Premiu Nacional de Narrativa

"L'habitación de Nona" de Cristina Fernández Cubes

  Cristina Fernández Cubes (Arenys de Mar, Barcelona, 1945) foi galardonada esti xueves pol Ministeriu d’Educación, Cultura y Deporte col Premiu Nacional de Narrativa 2016 pola so obra “L’habitación de Nona”, na que l’autora “entemez con maestría lo cotidiano y lo fantástico”.

  El xuráu del premiu, dotáu con 20.000 euros, considera que la obra de Fernández Cubes, que foi col mesmu títulu Premio de la Crítica, entiesta “la excelencia del relatu curtiu”. “L’autora -añede’l fallu del xuráu- entemez con maestría lo cotidiano y lo fantástico, algamando la esencia y la vitalidá propies de lo , meyor d’esti xéneru lliterariu”.
Fonte: asturnews.com

Pablo Auladell algama’l Premiu Nacional del Cómic 2016

Na semeya, Pablo Auladell

  L'alicantín Pablo Auladell (1972) foi galardonáu esti día col Premiu Nacional del Cómic 2016 pola so obra “El paraísu perdíu”, na que’l xuráu apreció un “gran valor artísticu y fuerza visual” na so recreación del clásicu del poeta inglés del XVII John Milton.

  “Nun esperaba recibir esti premiu poles característiques del cómic, amás nel Salón del Cómic de Barcelona nun tuvo nengún premiu. Pero allegra recibímelo pol prestu d’un trabayu nel qu’invertí bastante y por tener una reconocencia”, esplicó l’alicantín en conociendo la noticia.

  El xuráu del galardón, que concede’l Ministeriu d’Educación, Cultura y Deporte y ta dotáu con 20.000 euros, envaloró tamién el tratamientu del color, l’usu orixinal de la iconografía y la narrativa que consigue coles mesmes ser arquetípica y dafechu actual” na obra de Auladell.

  Nesti sentíu, l’autor de la obra considera que se trata de l’adaptación d’un clásicu” y confiesa que si hubo dalguna estorbisa” a la de deliberar esti galardón ésti sería por si dalgún miembru del xuráu consideró que se trataba namá d’una obra na que nun hubiera “nengún llabor de guión”.

  Auladell ye docente del Master Ars in Fabula y de la AIF Summer School en Macerata (Italia);ilustró más de treinta álbumes, noveles y cómics y la so obra foi espuesta en galeríes y feries de Madrid, Barcelona, Roma, Bolonia y Xinebra.

  Los sos primeros “fanzines” son de 1996, realizaos col colectivu “La Tabierna del Ñú Azul”, y el primer álbum de cómic que publicó en solitariu foi “El camín del titiriteru”, pol que foi candidatu al premiu al Autor Revelación nel Salón de Barcelona de 2002.

  El galardonáu yá recibiera’l premiu del Ministeriu de Cultura a les Meyores Ilustraciones de Llibros Infantiles y Xuveniles en 2005 por “Peiter, Peter y Peer y otros cuentos de Andersen”, y el d’Autor Revelación nel Salón del Cómic de Barcelona de 2006 por La Torre Blanca” (2005). Ente les sos últimes publicaciones destaquen “La feria abandonada” (2013), “La lleenda del Santu Bebedor” (2014) y “La puerta de los páxaros” (2015).               Fonte: asturnews.com

Abrese’l plazu pala Axenda Didáctica Escolar

  Acordies coles normes de participación na Axenda Didáctica Escolar, nel mes d’ochobre (del 1 al 31, dambos inclusive) va tar abiertu’l plazu pa que les empreses del ámbitu cultural presenten proyectos pa les distintes etapes educatives.

  Van poder presentar proyectos toes aquelles empreses privaes d’ámbitu asturianu acordies con:

• Resolución de 28 de xineru de 2013, de la Conseyería d’Educación, Cultura y Deporte, pola que s’establecen les normes de participación na Axenda Didáctica Escolar.

Consultar resolución (pdf)

• Resolución de 24 de setiembre del 2014, de la Conseyería d’Educación, Cultura y Deporte, pola que se modifica la Resolución de 28 de xineru del 2013, pola que s’establecen les normes de participación na Axenda Didáctica Escolar.

Consultar resolución (pdf)

Modelu resume actividá / Ficha explicativa (doc)

Fonte: asturnews.com

Nueva xirigoncia del Principáu

Les bases que van regular les subvenciones a Conceyos pa la merca de llibros n’asturianu son una auténtica xirigoncia.

El pasáu 11 de payares el Boletín Oficial del "Principado" asoleyaba una resolución de la Conseyería d’Educación, Cultura y Deporte pola que s’aprobaben les “bases reguladores de la concesión de subvenciones pal incrementu bibliográficu y l’adquisición d’obres publicaes n’asturianu por parte d’entidaes locales que sían titulares de bilblioteques integraes na Rede de Biblioteques del Principáu d’Asturies”. Con estes bases tienen l’enfotu de regular les convocatories añales que, supuestamente d’equí p’alantre, se dirán asoleyando pa que los Conceyos merquen llibros n’asturianu.

Los oxetivos d’estes ayudes son los de de facilitar “la constitución d’un fondu bibliográficu en llingua asturiana” y “l’accesu de la población asturiana a la llectura de les obres escrites n’asturianu d’una manera gratuita pa la ciudadanía”. Sicasí, dende N’Ast nun somos a pescanciar el conceutu de ciudadanía que manexa la Conseyería Cultura, porque una de les condiciones que se ponen pa tener drechu a subvención ye que “l’adquisición de les obres habrá de facese n’establecimientos de comerciu minorista de llibros (llibreríes) que los sos puestos de venta al públicu tean allugaos nel conceyu solicitante de l’ayuda”.

Ello ye, que munchos Conceyos nos que nun hai llibrería –Bimenes, Cabranes, Samartín d’Ozcos, Pezós, Sariegu, Yernes y Tameza…– nun tendríen opción nenguna a recibir la subvención nin, siempres según los dimpuesto pola Conseyería Cultura, los sos vecinos y vecines a esfrutar, de baldre, de la llectura d’obres n’asturianu nes sos respeutives biblioteques o centros de llectura. Poro, dende N’Ast queremos calificar de tomadura de pelo les presentes bases reguladores y empobinar a la señora conseyera a camudales pa que tola ciudadanía pueda beneficiase d’estes ayudes.

Fonte: N'Ast

Cultura mengua les subvenciones al asturianu nun 24,5 por cientu

 

Ana González,  Conseyera

    De 308.000 a 232.513,4 euros. Les ayudes a la promoción y normalización del asturianu y gallego-asturiano del 2014 baxen en 75.486,6 euros, lo que supón una mengua del 24,5 por cientu con respeuto a les subvenciones del 2013.

   La Conseyería d’Educación, Cultura y Deporte caltién les trés llinies d’ayuda, esto ye, a la producción editorial, discográfica y medios de comunicación, dexando otru añu fuera les d’actividaes d’asociaciones y otres entidaes ensin ánimu d’arriquecimientu, les d’empreses privaes y les de promoción d’actividaes cinematográfiques y de videu. El recorte nes ayudes va venir en toles estayes, siendo la más acusada la del sector musical: pasa de 40.000 a 24.000 euros, lo que significa una mengua del 40 por cientu.

   No que respeuta a les ayudes a la producción editorial, la quita ye del 18,49 por cientu (de 100.000 euros a 81.513,4), dalgo menor que la de los medios de comunicación, que pasen de recibir 168.000 euros a 127.000, un 24,41 por cientu menos. Como datu, nesta ocasión nun s'especifica una puntuación por cumplir colos Decretos d'oficialización de la toponimia asturiana nes informaciones, dalgo que sí asocedía l'añu anterior.

   Con estes cifres afítase’l descensu continuáu de les ayudes destinaes a la promoción y normalización del asturianu y gallego-asturiano, yá que na convocatoria del añu pasáu yá se rexistraba una mengua del 3,88 con respeuto al 2012, cuando se destinaron 320.428,63 euros a un total de seis llinies de subvención.                                                                                         Fonte: Asturies.com

Adxuntu	Tamañu
Subvenciones producción editorial 2014.pdf	1.02 MB
Subvenciones producción discográfica 2014.pdf	1.01 MB
Subvenciones medios de comunicación 2014.pdf	1.05 MB

Conseyera d'Educación: "la oficialidá nun ye un pidimientu unánime de la sociedá asturiana"

La conseyera González afirma que "la oficialidá nun ye un pidimientu unánime de la sociedá asturiana”


   Ana González señaló que va defender na Conferencia d’Educación énte’l ministru la situación del asturianu frente a la ‘Llei Wert’. Sicasí, nun ve la oficialidá como una opción al nun la considerar como una demanda unánime de la sociedá.

   La conseyera d’Educación, Cultura y Deporte entiende la reclamación de l’Academia de la Llingua Asturiana (ALLA) de que la llingua asturiana sía cooficial nel país xunto al castellanu, pero nun cree que la oficialidá del idioma sía “un pidimientu unánime de la sociedá asturiana”. Pese a esta posición, la tradicional de la FSA-PSOE énte l’asturianu, confirmó que va defender en Madrid l’estatus especial de la llingua asturiana, non oficial anque con reconocimientu xurídicu y implantación curricular, pa que tenga sitiu nel sistema educativu tres la entrada en vigor Llei Orgánica pa la Meyora de la Calidá Educativa, anguaño un borrador.

   Ana María Cano, presidenta de l’ALLA, alertó’l llunes de la situación na que s’atopa l’asturianu énte l’anteproyeutu de la nomada ‘Llei Wert’ y reclamó a les fuercies politiques, sobre manera al PP d’Asturies y al Gobiernu del país, una solución. La propuesta de la institución académica ye la incorporación a la norma d’una enmienda de mínimos pa que la materia de Llingua Asturiana tenga güecu nel sistema educativu. Cano ve necesario la declaración de la oficialidá del idioma pa finar con estes situaciones que se repiten davezu pola tradición del Estáu de tener en cuenta namái a les llingues cooficiales, y non a otres realidaes llingüístiques, a la hora de llexislar.

Fonte:  Asturnews.

Xuliu Arbesú, XVIII Premiu d'Ensayu Máximu Fuertes Acevedo n'asturianu

Xuliu Arbesú Rodríguez (L'Entregu, 1957):  "Los deseos del dineru".

   Un trabayu de Xuliu Arbesú sobre la relación "irracional" de la sociedá col dineru gana'l premiu d'Ensayu n'asturianu

   Xulio Arbesú Rodríguez resultó ganador de la decimoctava edición del Premiu d'ensayu en llingua asturiana Máximu Fuertes Acevedo, cola so obra 'Los deseos del dineru', qu'estripa la relación "irracional" al so xuiciu qu'esta sociedá tien col dineru, hasta'l puntu de tornalu nun fin, en cuenta d'un mediu col que vivir.

   Asina lo señaló l'autor en declaraciones a Europa Press, acabante enterase de la decisión de la concesión del premiu, concedíu tolos años pola Conseyería d'Educación, Cultura y Deporte. Nel xuráu, baxo la presidencia de la directora xeneral de Política Llingüística, Ana María Fueyo, tuvieron los escritores Lluis Portal Hevia (ganador de la edición anterior), Roberto González-Quevedo y el Catedráticu d'Hestoria Medieval de la Universidá d'Uviéu, Javier Fernández Conde. Ta dotáu con 4.000 euros.

   L'acta destaca "l'usu áxil de la llingua, l'actualidá del tema y la forma d'harmonizar narración y xéneru ensayísticu" del testu d'Arbesú, presentáu col seudónimu Rockefellerín.

   Arbesú matiza que nun ye una obra sobre la crisis, anque ye ésti un tema la que dedica bona parte del ensayu, sinón sobre la "relación irracional" que tenemos col dineru. Asina, desmonta tópicos, talos como que "lo más caro ye meyor", o que'l dineru "si nun otorga la felcidá, polo menos ayuda a llograla". Dedica un capítulu, sicasí, a señalar que nececesario tener dineru na sociedá actual, pero "el problema ye cuando pasa de ser un mediu a ser un fin", comenta l'autor.

   Xulio Arbesú ye un veteranu escritor en llingua asturiana. Destaca la so obra narrativa y ensayística. Ente les sos obres publicaes tán 'Misión Pelayo', novela xuvenil galardonada col Premiu de Llectures pa Rapazos de l'Academia de la Llingua Asturiana; 'Un raposu en Tresmonte', novela ganadora del Premiu Llorenzo Novo Mier de l'ALLA.

   'Potestas', novela histórica cola que ganó nel 2002 el Premiu Xosefa Xovellanos de novela convocáu pola Conseyería de Cultura; la edición de cuentos titulada 'Cuentos pa neños'; 'El pisu d'enriba', novela cola que volvió ganar el Premiu Xosefa Xovellanos nel 2006; y 'El destín treshumanu', ensayu col que ganó esti mesmu premiu 'Máximu Fuertes Acevedo' d'ensayu na so edición del 2009. Amás tien publicáu en castellán l'ensayu 'La informatización del transporte'.

   Fonte:  Europa Press