Un 42,82 por cientu de los escolinos de Xixón estudien Llingua Asturiana en Primaria

• 
  

por Pablo R. Guardado

4.851 escolinos y escolines d'educación primara tienen l'asignatura de Llingua Asturiana nos colexos de Xixón.

Nel cursu vixente un 42,82 por cientu de los escolinos y escolines de Xixón tán estudiando Llingua Asturiana en Primaria, por un 57,18 por cientu qu’escueye la materia alternativa, esto ye, Cultura Asturiana. La matriculación nesta etapa educativa na escuela pública ye del 50,94 por cientu, mentes que na concertada baxa al 19,09 por cientu.

Ye nos centros de financiación mesta onde s’atopa’l númberu más baxu d’alumnos y alumnes dando clase d’asturianu en Primaria, na mayor parte de los casos pol fechu de que les direiciones de les escueles afalen a los padres a escoyer Cultura Asturiana. Esta materia dase en castellanu y, en dalgunos sitios, aprovéchase pa introducir actividaes de les escueles que nun tienen güecu n’otres asignatures.

El descensu na matriculación en Secundaria, onde l’asturianu ye optativa y compite con otres llingües como’l francés o l’alemán, ye xabaz, pasando a ser del 7,69 por cientu del total del alumnáu. Na siguiente etapa cai al 2,57 por cientu, nel Bachilleratu diurnu, y al 6,92 por cientu, nel nuecherniegu.

Fonte: YeXixón.com

El xueves fina'l plazu pa matriculase pa la prueba de conocencia de l'ALLA

L'esame va celebrase'l sábadu a les 9.30 hores na sede de la institución n'Uviéu.

Sede de la institución, n'Uviéu

   L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del segundu de los dos esámenes que celebra tolos años –el primeru ye en xineru–, que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

  La prueba cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma. 

  Les persones interesaes en facer la prueba de conocencia tienen de plazu hasta mañana pa formalizar la matrícula na sede de la institución (L’Águila 10, Uviéu) nel horariu siguiente: de 9 a 15 hores y de 16 a 19 hores, de llunes a xueves; y de 9 a 14 hores, el vienres. L’esame va celebrase’l sábadu, a les 9.30 hores, na propia sede de l'ALLA.
Fonte: asturies.com

La Conseyería entama una campaña de matriculación na asignatura d'asturianu

La Conseyería d'Educación, Cultura y Deporte pon en marcha, el llunes 10 de xunu, una campaña informativa pa impulsar la matriculación en Llingua asturiana y Gallego-asturianu, col llema #yoapúntome, porque lo llevamos dientro / #euapúntome, porque lo levamos dentro. La difusión d'esta campaña fadráse gracies a dellos materiales que pueden descargase na so páxina web. Del 11 al 21 de xunu ta abiertu'l plazu pa matriculase, anque munchos centros ponen dificultaes na matriculación, como denunció estos díes SUATEA. La enseñanza de la llingua asturiana entamó a impartise oficialmente en 1984, nuna serie de centros educativos públicos, aumentando'l númberu d'ellos nos años sucesivos. Estes enseñances impártense anguaño en 331 centros educativos. La matriculación nesti añu 2013 pue facese ente'l 10 y el 21 de xunu (pa Educación Primaria) y ente'l 2 y el 15 de xunetu (ESO y Bachilleratu). La Llingua asturiana y el Galllego-asturiau son materies de currículum que se pueden estudiar en tolos centros públicos d'Enseñanza Primaria y Secundaria. Col envís de llograr qu'esti fechu lu conozan la mayor cantidá posible de padres y d'alumnos/es, "ye polo la Conseyería pon en marcha una Campaña Informativa de Matriculación en Llingua asturiana/Galego-asturiano. Con ella, el Gobiernu d'Asturies quier amosar el so apoyu a la enseñanza del asturianu, promover la conocencia d'un fechu cultural arriquecedor que forma parte de la nuesa identidá y que contribúi a la formación integral del alumnáu, respetando siempre la llibre opción y la voluntariedá del so deprendimientu", espliquen dende Política Llingüística. Más información: Materiales de la campaña Fonte: Asturnews

Una campaña busca implicar al profesoráu d'asturianu na promoción de la materia nos centros

La campaña d'Iniciativa pol Asturianu busca implicar a profesores d'asturianu y a tola comunidá educativa, controlando'l cumplimientu de los centros y de la Conseyería d'Educación

La organización Iniciativa pol Asturianu, al traviés de la so Vocalía d'Enseñu, ta acabante poner en marcha una campaña pa facer medrar la matriculación na asignatura d'asturianu nes escueles ya institutos d'Asturies, "onde la demanda ye mui alta per parte de les families y alumnos, pero onde tovía apaecen importantes torgues pa matriculase na asignatura, con incumplimiento de la llexislación en dalgunes ocasiones", espliquende de la organización. La campaña busca implicar al profesoráu d'asturianu con un folletu con un diseñu en blancu y negru que pueden imprentar ellos mesmos a baxu costu y según el volume d'alumnos del centru nel que trabayen.

El folletu, que pue imprimise como cartelu tamién, inclúi información básica pa los alumnos y families, informando de los sos drechos en cuantes a l'asignatura d'asturianu, que ye obligatorio ufiertar en tolos niveles y en tolos centros públicos, concertaos o privaos d'Asturies, como afita la llexislación vixente y una sentencia recién del Tribunal Superior de Xusticia d'Asturies.

Iniciativa pol Asturianu unvió una carta a tolos centros públicos, concertaos y privaos d'Asturies, recordando les sos obligaciones con respectu a l'asignatura d'asturianu, asina como dándo-yos el so sofitu y asesoramientu si la Conseyería d'Educación punxere dalguna torga a la matriculación n'asturianu o nun punxere a disposición del centru un profesoráu suficiente pa l'asignatura.

Amás, anímase al alumnáu, families y futuros profesores de l'asignatura a espardar esta campaña en papel y nes redes sociales, pa facer medrar la matriculación de llingua asturiana nos centros de toa Asturies. Esta ye una campaña pa tol territoriu na qu'Iniciativa pol Asturianu quier implicar a toles persones posibles na so zona concreta, con unes acciones mui simples, como son la impresión y repartu d'unos folletos y cartelos nel so centru, asina como informar de los posibles problemes que puedan surdir.

Más información: Descarga'l material de la campaña pa imprimilu y participar

Fonte: Asturnews

L'ALLA abre esti llunes el plazu de matrícula pa los cursos de la UABRA

L’ALLA abre esti llunes el plazu de matrícula pa los cursos de la UABRAMayu 18, 2012 por Pablo R. Guardado Cangas del Narcea va acoyer, del 30 de xunetu al 10 d’agostu, una edición nueva de la Universidá Asturiana de Branu (UABRA). El plazu de matrícula pa los cursos qu’entama l’ALLA abre’l llunes y termina’l vienres 1 de xunu. Al igual que n’años anteriores, les persones interesaes n’acudir a la UABRA van poder escoyer ente trés cursos: l’elemental de llingua asturiana, l’avanzáu y el de gallego-asturiano (segunda fase). A ellos hai que sumar los d’afondamientu cultural y llingüísticu, d’una selmana de duración (35 hores llectives). Asina, na primer selmana, la UABRA plantega’l cursu de ‘Capacitación pa la Traducción al Asturianu’, empobináu por Cristina Valdés Rodríguez; ‘Cursu de Comunicación Periodística’, coordináu por Xosé Antón González Riaño; y ‘Internet y Escuela. Nueves aplicaciones socio-educatives’, a cargu de David Menéndez Palacio. Yá na segunda selmana, del 6 al 10 d’agostu, van impartise ‘Ecoloxía y Mediu Ambiente n’Asturies’, dirixíu por Carlos Lastra López; ‘Cantares, bailles ya instrumentos musicales asturianos’, empobináu por José Antonio Gómez; y el ‘Cursu d’aniciu a la investigación dialeutal y de tradición oral’, a cargu de Xosé Lluis García Arias. Les persones interesaes en participar en dalgunos d’estos cursos d’afondamientu cultural y llingüísticu, o en cualquier de los trés cursos principales, pueden atopar información sobre los mesmos, asina como sobre los costes de matriculación, nel apartáu de la UABRA na web de la institución académica. Prueba de conocencia de mayu Hasta’l xueves próximu, 24 de mayu, va permanecer abierta la matrícula pa la segunda prueba semestral de conocencia de Llingua Asturiana. Ésta va celebrase’l sábadu 26 de mayu, a partir de les 9.30 hores, na Facultá de Formación del Profesoráu y Educación (antigua Facultá de Ciencias de la Educación), nel campus de Llamaquique. Como ye vezu, la prueba va tar dividida en dos partes: una estaya llingüística y otra de llingua y sociedá. La primer d’elles principia con una prueba de teoría gramatical, pa llueu dar pasu a una práutica escrita y otra oral, mentes que la segunda evalúa’l conocimientu del allugamientu del asturianu dientro de la sociedá asturiana y del procesu de normalización llingüística. La xente interesao en facer l’esame puede solicitar información sobre la prueba de conocencia nel teléfonu 985 211 837. La hora pa formalizar la matrícula na sede de l’Academia de la Llingua Asturiana (ALLA) ye de 9 a 15 hores y de 16 a 19 hores, de llunes a xueves; y de 9 a 14 hores, los vienresFonte: Asturies.com