Iniciativa pol Asturianu entrega diplomes a los alumnos de los VI Cursos d’Asturianu en Xixón nun actu con actuaciones musicales

L’Actu va incluyir actuaciones musicales y la entrega de diplomes Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los VI Cursos d’Asturianu en Xixón esti miércoles 25 de marzu a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llaneza 68, baxu), cola participación de los más de 50 alumnos qu’ente presencial y a distancia participaron nos curso. Nel actu van dar llectura a dellos testos, xunto a miembros d’Iniciativa pol Asturianu, el CUPA y l’Academia de la Llingua Asturiana. L’actu va sirvir tamién pa entregar los premios del concursu lliterariu entamáu estos díes por Iniciativa pol Asturianu en collaboración editoriales asturianes pa promocionar les lletres asturianes coincidiendo col Día Internacional de la Poesía. Fonte: Asturnews

Ábrese la matrícula pa los VI Cursos d'Asturianu en Xixón (presenciales y a distancia)

Iniciativa pol Asturianu, en collaboración col Conceyu Universitariu pol Asturianu (CUPA) abre’l plazu p’apuntase a la sesta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón. 

Los cursos que se van facer una edición más na sede del Conseyu de la Mocedá de Xixón (Avda. Manuel Llaneza, 68), van entamar a partir del 26 de xineru, cuntando con 36 hores llectives cada nivel.

El cursu va celebrase los llunes y miércoles, de 17 a 19 hores nel casu del nivel inicial, y de 19 a 21 hores pal nivel II, acabando'l 25 de marzu de 2015.

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel II ta empobináu a persones con una conocencia más fonda del idioma, que yá ficieren dalgún cursu enantes.

El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les persones que nun puedan asistir por tar fuera d'Asturies o por razones d'otru tipu van poder siguir el cursu a distancia.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 25 de xineru de 2015.

Dende Iniciativa pol Asturianu animamos una ediciónn a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies. 

Novedaes nos cursos a distancia

Nesta sesta edición de los cursos abrimos una plataforma d'enseñu na rede, empobinada a los alumnos y alumnes que siguen los cursos en llinia. Un preséu que va permitir ameyorar abondo los procesos de deprendizaxe, adaptándolos meyor a les nueves teunoloxíes.

Fonte: Iniciativa pol Asturianu

El CUPA ya Iniciativa pol Asturianu entamen cursos en Xixón

Iniciativa pol Asturianu, en collaboración col Conceyu Universitariu pol Asturianu (CUPA) vieno acabante d'abrir plazu p’apuntase a la que ye yá la cuarta edición de los Cursos d’Asturianu en Xixón, una esperiencia formativa qu’entama dende va tiempu esta asociación en collaboración cola Academia de la Llingua Asturiana y el Conseyu de la Mocedá de Xixón. Los cursos van desembolvese na sede del Conseyu de la Mocedá de Xixón (Avda. Manuel Llaneza, 68), entamando a partir del 12 de mayu y cuntando con 36 hores llectives cada nivel. Los cursos van celebrase los martes y xueves, de 19 a 21 hores nel casu del nivel d'aniciu, y de 17 a 19 hores pal nivel mediu, acabando pa finales de xunu. Nel nivel id'aniciu les clases van empobinaes a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu. El nivel mediiu ta empobináu a persones con una conocencia más fonda del idioma, que yá ficieren dalgún cursu enantes. El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les inscripciones pueden facese nel corréu lletrónicu conceyuasturianuarrobagmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 11 de mayu. Dende Iniciativa pol Asturianu animen a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies. Fonte: Asturnews

El Defensor del Universitariu recibe al Conceyu Universitariu y a Iniciativa pol Asturianu pol casu de discriminación llingüística en Formación del Profesoráu

Representantes del Conceyu Universitariu pol Asturianu y d’Iniciativa pol Asturianu aconceyaron esta selmana pasada con Ramón Durán, Defensor del Universitariu de la Universidá d’Uviéu, pola mor del casu de discriminación llingüística sufríu na Facultá de Formación del Profesoráu a finales de 2013. Nel conceyu algamóse’l compromisu de tomar acciones pa evitar que vuelvan a repitise casos como’l denunciáu va dellos meses. Nel conceyu, celebráu esti xueves 6 de febreru, el Defensor comprometióse a estudiar una recomendación a la Universidá pa que, cola llexislación na mano, nun vuelvan a dase casos como’l denunciáu por un alumnu de la Universidá nel mes de payares, cuando una funcionaria quixo prohibir que presentara más documentos n’asturianu nes oficines d’alministración de la so facultá. Esti documentu, pal que dambes organizaciones dieron les sos recomendaciones, y que podría presentar el Defensor del Universitariu basaríase na sentencia que’l Tribunal Superior de Xusticia d’Asturies emitió contra’l Reglamentu d’Usu del Asturianu de la institución, por insuficiente con respeuto a la Llei d’Usu del Asturianu de 1998. Amás, encamentará tamién a la formación del personal de la universidá asturiana nes competencies básiques d’asturianu pa evitar estos casos. Dende Iniciativa pol Asturiau y el CUPA agradecióse al Defensor la rápida respuesta nel casu del alumnu reprimíu, que recibió en pocos díes una disculpa del Defensor y la ufierta de busca de soluciones llegales pal futuru. Fonte: Conceyu Universitariu pol Asturianu

El Decanu de Profesoráu y el Defensor Universitariu piden disculpes al alumnu al qu’una funcionaria pretendió prohibir l’usu del asturianu

En dos cartes unviaes al alumnu de la Facultá de Profesoráu y Educación de la Universidá d’Uviéu que vivió un casu de discriminación llingüística per parte d’una funcionaria, llamentaron los fechos y nel casu del Decanu, esplicó la posición favorable pa col usu del asturianu de la so Facultá. Pela so parte, el Defensor Universitariu quixo esplicar el fechu nes limitaciones que pon el Reglamentu d’Usu del Asturianu nel Rexistru de la Universidá. Recordóse-y al Defensor qu’esti Reglamentu foi parcialmente modificáu pol Tribunal Superior de Xusticia d’Asturies na sentencia 4912/2010, na que s’aclariaba que la Universidá d’Uviéu nun pue llinder l’usu del asturianu a determinaos contestos, pues la Llei d’Usu del Asturianu de 1998 otorga a los asturianos el drechu d’usu del idioma énte l’alministración, ensin discriminación nenguna. Solicitóse al Defensor y al Decanu que pidan al Rector, de forma oficial, que’l Reglamentu en cuestión se modifique acordies colo dispuestu pola TSXA en 2010. L’alumnu en cuestión quixo aprovechar la ocasión p’agradecer a les munches persones y colectivos que se solidarizaron cola so situación. Dende Iniciativa pol Asturianu y el Conceyu Universitariu pol Asturianu solicitóse yá, tanto al Decanu de Profesoráu como al Defensor del Universitariu, una xunta pa buscar avanzar en midíes, qu’en dambes entidaes, puedan ayudar a meyorar les actitúes hacia l’asturianu del profesoráu, personal de servicios y alministración y alumnáu. Ente les midíes propuestes, campañes de sensiblización y conocencia de los drechos llingüísticos de los alumnos, l’usu del asturianu na rotulación y cursos d’asturianu pal personal, que sirva pa da-yos una formación al menos básica. Fonte: Conceyu Universitariu pol Asturianu

Denuncien torgues de la secretaría de Maxisteriu pa tramitar documentos n'asturianu

La funcionaria aseguró que les trabayadores de la Facultá “no tienen por qué saber bable”. El Conceyu Universitariu pol Asturianu (CUPA) denunció ayeri nun comunicáu les torgues de la secretaría de la Facultá de Formación del Profesoráu y Educación pa tramitar documentos n'asturianu. Según el rellatu de l'asociación, una de les trabayadores d’esta unidá amenació de forma maleducada y a voces a un estudiante por presentar un documentu n'asturianu, esixéndo-y que nun lo ficiera nunca más porque les trabayadores de la Facultá “no tienen por qué saber bable”. L’alumnu recordó-y a l’alministrativa, que nun s’identificó, que los Estatutos de la Universidá d'Uviéu [ES], reconocen nel so artículu 6.2 que naide podrá ser discrimináu por usar l’asturianu y que la Llei d'Usu del Asturianu diz nel so artículu cuartu que tolos ciudadanos tienen drechu a emplegar el bable/asturiano y a espresase nél, de palabra y por escrito y que va tenese por válidu a tolos efeutos l'usu del bable/asturiano nes comunicaciones orales o escrites de los ciudadanos col Principáu d'Asturies. L’alministrativa nun quixo atender a los razonamientos del alumnu y negóse a poner per escrito les razones pa denegar l’usu del asturianu, dexando claro que “nun permitiríen nengún documentu más n’asturianu na Facultá” y colgó-y el teléfonu al alumnu y diciéndo-y que nun entendía lo que dicía. Sensibilización El CUPA considera qu'esti casu nun ye más que l’amuesa de munchos otros qu’asocede cada día nesta institución y que marxinen a los estudiantes que deciden usar l’asturianu nel so día a día, pesie a lo que dicen los Estatutos de la Universidá publicaos tamién n’asturianu. Reclamen un cambéu na Universidá d’Uviéu, que suponga una mayor sensiblización y formación del personal de la mesma, pa que nun se repitan casos como esti. L’alumnu yá presentó una quexa énte’l Decanu y tamién énte’l Defensor del Universitariu y el Defensor del Pueblu. Fonte: Quéyeho!

La Universidá d’Uviéu punxo en marcha la versión asturiana de la so web

Pablo R. Guardado El rector Vicente Gotor anunciara’l xueves que sedría una realidá’l martes, pero la puesta en marcha de la versión n’asturianu de la web de la Universidá d’Uviéu adelantóse al plazu previstu. L’ALLA collaboró na torna del portal universitariu. D’esta forma, la web de la Universidá d’Uviéu yá se pue consultar nel idioma del país mediu añu depués de xubir a la rede la versión nueva d’ésta. El Conceyu Universitariu pol Asturianu (CUPA) denunciara a finales de marzu, tres la inauguración de la páxina, que’l portal universitariu namái taba disponible en castellanu y n’inglés, a lo que’l rector respondió que’esta situación se daba por un retrasu na torna al asturianu. El propiu Gotor anunciaba’l xueves pasáu, mientres el pieslle oficial de la Universidá Asturiana de Branu (UABRA), que la web en llingua asturiana sería una realidá’l martes, anque güei yá tán actives la mayor parte de les estayes de la versión asturiana. Nel actu celebráu nel paraninfu de la Universidá d’Uviéu, Ana María Cano, presidenta de l’Academia de la Llingua Asturiana (ALLA), institución que collaboró na torna, pidió al rector una visibilización mayor del idioma en tolos ámbitos universitarios. Una de les demandes vieyes de los coleutivos de defensa de la llingua ye la utilización del logotipu billingüe por parte de la Universidá, compromisu que s’alcuentra nel Alcuerdu Programáticu de Política Llingüística na Universidá d'Uviéu, y que se sigue ensin cumplir, como se pue comprobar na versión asturiana de la web. Fonte: Asturies.com

Rector: l'ausencia del asturianu na web de la Universidá "ye por un retrasu na torna"

El Rector esplica al CUPA que l'asusencia del asturianu na web de la Universidá "ye por un retrasu na torna"

   Dempués de la denuncia fecha pol CUPA ayeri, la organización universitaria esplica nuna nota que "tres conversaciones de representantes del Conceyu Universitariu pol Asturianu (CUPA) col Rector, Vicente Gotor Santamaría, y el Vicerrector d’Informática, Víctor Guillermo García, el problema cola páxina web paez solucionáu", yá que'l Recto dixo que namás se debía a "un retrasu na torna de los testos al asturianu". El CUPA espresó’l so maltar al ver que la páxina web nueva de la Universidá d’Uviéu nun incluyía yá versión n’asturianu, y anque ve como una bona noticia saber qu’esto ye namás frutu d’un retrasu de la traducción, según les esplicaciones del propiu equipu rectoral, entienden que "nun ye escusa pa una institución de tal tamañu y recursos, pues la versión n’inglés, por exemplu, ta yá dende’l primer día".

   Sicasí, entienden que ye una bona noticia saber que la nueva web tamién va incluyir versión n’asturianu, “daqué perimportante pa la visibilidá del idioma na Universidá y na sociedá asturiana”. Un pasu alantre que se consiguió por fin nel añu 2010 y qu’aguarden qu’en pocos díes pueda tener continuidá na páxina actual.

   El CUPA pidió yá aconceyar col equipu rectoral pa siguir avanzando n’otres midíes de muncha importancia pal futuru de la llingua asturiana na institución, como la rotulación billingüe de los edificios universitarios o la creación d’un logotipu col nome de la Universidá nes dos llingües, castellán y asturianu.

   Fonte:  Asturnews.

El CUPA denuncia que la páxina web nueva de la Universidá nun tien versión n'asturianu

Páxina anterior con versión n'asturianu El Conceyu Universitariu pol Asturianu (CUPA) amosó al traviés d'una nota de prensa'l so descontentu pola apaición d'una nueva páxina web de la Universidá d'Uviéu (www.uniovi.es) con versión namás en castellán ya inglés, "cuando dende l'añu 2010 la páxina de la universidá asturiana tenía una versión na llingua propia d'Asturies, que foi mui bien recibida pola comunidá universitaria", según afirmen dende'l CUPA. Represenantes del CUPA yá solicitaron esplicaciones y esperen respuesta del Rector Vicente Gotor y del Vicerrector d'Informática, Víctor Guillermo García. "Aguardamos que se trate d'una situación temporal y que la páxina cunte con versión n'asturianu en pocu tiempu", espliquen dende la organización, que tamién denuncia que "lo contrario sedría dar un pasu atrás mui importante y contrariu a los alcuerdos algamaos pol Rector nes pasaes elecciones, onde se comprometió a afondar na normalización y usu del asturianu dientro de la institución". El CUPA aprovechó pa recordar qu'entá "queden munchos compromisos por cumplir, ente los que tán el dotar a la Universidá d'Uviéu d'un logotipu billingüe (castellán/asturianu) y redactar un reglamentu que disponga la rotulación n'asturianu de toles instalaciones, ente otres cuestiones de vital importancia pal idioma na Universidá" y que según espliquen "el Rector Vicente Gotor robló col CUPA nel Alcuerdu Programáticu de Política Llingüística na Universidá d'Uviéu, pal periodu actual".

 Fonte: Asturnews

 Vicente Gotor confirmó al CUPA que l'ausencia del asturianu débese a un retrasu na torna de los conteníos.

 Fonte: Asturies.com

El CUPA pide al Rector que reclame la reconocencia de la especialidá del profesoráu d'asturianu al Ministeriu d'Educación

Dende'l CUPA sofiten al coleutivu de docentes de llingua asturiana nes sos vindicaciones.

Dende'l Conceyu Universitariu pol Asturianu amosen "el nuesu apoyu más firme al coleutivu de docentes d’asturianu ante la delicada situación que tán atravesando n’estos momentos a causa del proyeutu de reforma de la llei educativa (LOMCE) plantegada pol gobiernu estatal a traviés del ministru Wert, que podría suponer un ataque a la llingua asturiana, yá que dexa en manes de la voluntá política la situación del idioma nes escueles".

Asina, camienta'l CUPA que "ye necesario también que la Universidá d’Uviéu muestre'l so apoyu decidíu a esti coleutivu y defenda’l futuru profesional de los docentes que forma, si tenemos en cuenta el perxuiciu llaboral que supondría la desapaición del asturianu de la enseñanza, fechu qu'afeutaría a unos 230 docentes que, amás, atópense nuna situación de precariedá o interinidá. Tamién queremos instar al actual gobiernu autonómicu a que se esmolezca en facer suyes les demandes d’esti coleutivu y de tolos asturianos en xeneral, ya qu’entendemos que munchos mecanismos pa tratar de da-y igua a esti conflictu, defender la aplicación de la Llei d’Usu y Promoción del asturianu, y avanzar hacia'l so reconocimientu como llingua oficial pueden dase dende Asturies".

Nesi sen, afiten tamién que, "en primer llugar, l'asturianu ha ser una asignatura pa tolos alumnos, una asignatura normal, non una optativa, nin voluntaria, non enfrentada a otres materies. Y en segundu llugar, que ye necesariu que se den pasos pa que l'asturianu se convierta nel idioma vehicular d'otres asignatures, buscando un modelu afayadizu p'Asturies que permita que l'asturianu seya llingua d'usu habitual nes aules, amás de poder ufiertase como oxetu d’estudiu particular ya individualizáu na universidá mediante les preceptives ferramientes académiques. Pa ello ye bien importante la reconocencia de la especialidá del profesoráu d'asturianu, agora que los estudios tán homologaos dafechu nel marcu européu".

Pa finar, quieren dar a conocer qu'"el CUPA pidió al Rector un posicionamientu claru de la Universidá  d'Uviéu, recordándo-y al traviés d'una carta los sos compromisos adquiríos dientro del Alcuerdu Programáticu pa la Política Llingüística (2012-2016) firmáu pol Rector Vicente Gotor na última campaña, nel que se comprometía a facer llegar al Gobiernu d'España la reclamación de la reconocencia de la especialidá. El CUPA ta acabante solicita-y que cumpla con esti puntu agora que ye más necesario que nunca defender la situación de los profesores d'asturianu formaos na Universidá d'Uviéu".

Fonte: Infoasturies

La Universitat Oberta de Catalunya permite redactar y presentar un Trabayu Fin de Máster n’asturianu

UVIÉU,  El Conceyu Universitariu pol Asturianu (CUPA) tuvo anuncia de que la Universitat Oberta de Catalunya (UOC) permitió la realización d’un Trabayu Fin de Máster n’asturianu. Un fechu que nun llamaría l’atención si nun fuera porque na propia universidá asturiana surden torgues de tou tipu cuando se quier presentar cualesquier tipu de trabayu nesta llingua, que recibe nesti casu mayor reconocencia fuera que dientro d’Asturies.

El CUPA felicita a la UOC pol so comportamientu respetuosu col alumnu asturianu del máster que pidió facer el trabayu nel so idioma, pol exemplu que supón pa la Universidá d’Uviéu, qu’hasta va poco, y namás dempués de les protestes del CUPA y otros colectivos y persones afectaes, nun dexaba presentar tesis n’asturianu con normalidá, xenerando munchos perxuicios a quien quería facelo nesta llingua.

El fechu demuestra que la llingua asturiana precisa d’un meyor tratamientu na Universidá d’Uviéu, pues dende’l CUPA entiéndese que “nun ye normal que l’asturianu pueda usase con más facilidá fuera que dientro de los territorios onde ye llingua propia y amás, protexida polos Estatutos de la Universidá”.

Fonte: Blogue Conceyu Universitariu pol Asturianu

El CUPA entama un cursu d'asturianu en Xixón

El Conceyu Universitariu pol Asturianu (CUPA) abre’l plazu p’apuntase a la que yá ye la tercer edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y qu’esti añu va organizase de forma conxunta ente’l CUPA y Iniciativa pol Asturianu. El cursu, que se va facer na sé del Conseyu de la Mocedá de Xixón, va empezar el martes 13 de payares y va contar con 35 hores llectives.

El cursu va celebrase los martes y xueves, de 19 a 21 hores, parando pa les fiestes navidiegues. Ta empobináu a persones ensin conocimientos d’asturianu o con nivel baxu de conocencia y inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu. El preciu de la inscripción ye de 50 euros, incluyendo los materiales necesarios pa llevar alantre’l cursu. Les inscripciones puen facese nel corréu lletrónicu conceyuasturianu@gmail.com o nel teléfonu 615 982 816, hasta’l 10 de payares.

Fonte: Les Noticies

El CUPA robla actuaciones en política llingüística na Universidá d'Uviéu

El CUPA firma con Gotor y Andrés un programa d’actuaciones en política llingüística na Universidá d'Uviéu.

Les propuestes firmaes colos dos candidatos incluyen la rotulación n’asturianu de los edificios universitarios y el cambiu del logotipu de la institución, que sedrá billingüe.

Representantes del Conceyu Universitariu pol Asturianu (CUPA) aconceyaron estes selmanes atrás colos dos candidatos a ocupar la Rectoría de la Universidá d’Uviéu, Vicente Gotor y Paz Andrés pa estudiar la situación de la política llingüística nos últimos años, conocer el programa nesta cuestión de dambes candidatures y propone-yos la firma d’un documentu nel que se planteguen dalgunos puntos esenciales pendientes y un calendariu pa llevalos alantre.

La respuesta de dambos candidatos foi positiva y los dos roblaron l’Alcuerdu Programáticu pa la Política Llingüística na Universidá d’Uviéu (2012-2016), lo que garantiza que nos próximos años sigan dándose pasos pola normalización del asturianu na Universidá d’Uviéu, seya quien seya’l candidatu que resulte escoyíu nes elecciones al Rectoráu del xueves que vien, 15 de marzu de 2012.

Los conteníos del Alcuerdu
L’alcuerdu inclúi 5 puntos que’l CUPA considera esenciales pal futuru del asturianu na Universidá d’Uviéu: en 6 meses aprobar un reglamentu de rotulación pa la Universidá d’Uviéu nel que se recueya la rotulación billingüe (asturianu/castellán) de tolos cartelos que seyan renovaos y reclamar con firmeza énte’l Gobiernu d’Asturies y el Gobiernu d’España’l reconocimientu de les categoríes profesionales de los mayestros y profesores d’asturianu.

Amás nel plazu d’un añu, reforzar les competencies de la Comisión de Normalización Llingüística de la Universidá d’Uviéu, encargándo-y la redaición d’un Plan de Normalización Llingüística pal periodu del mandatu rectoral, coles midíes que se consideren necesaries pa completar el procesu de normalización del idioma asturianu na institución. Nel plazu d’un añu y mediu, diseñar y oficializar un logotipu billingüe (asturianuy/castellán) de la Universidá d’Uviéu / Universidad de Oviedo, nel que dambos nomes apaezan siempres y ensin diferencies gráfiques ente les dos llingües.

Amás los candidatos comprométense a siguir impulsando la presencia del asturianu nes cuestiones yá llevaes alantre nel mandatu anterior, con especial esfuerciu na puesta en valor de la investigación realizada n’asturianu, creando un repositoriu nel que s’axunten trabayos, tesis, etc. redactaos nesta llingua.

El CUPA celebra’l consensu xeneráu alredor de les polítiques llingüístiques na Universidá d’Uviéu, dempués de los pasos daos alantre n’estos años, anque recuerda qu’entá queden munches coses por facer pa garantizar la igualdá de dambes llingües na institución.

Amás el CUPA felicita a los candidatos por usar l’asturianu a lo llargo la campaña, anque fuera de forma llimitada y anímalos a facer medrar esi usu.

Fonte: Aruelu.com

EL CUPA y l’Academia entreguen los diplomes de la segunda edición de los sos cursos d’asturianu

L’Academia de la Llingua Asturiana y el Conceyu Universitariu pol Asturianu celebren la entrega de diplomes de la Segunda Edición de los Cursos d’Asturianu en Xixón, de 35 hores llectives caún Redacción

El Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los sos II Cursos d’Asturianu CUPA/ALLA esti xueves 26 de xineru a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, que van dar llectura a dellos testos, el profesor del cursu y un representante de l’Academia, que va dar los diplomes a los trenta alumnos inscritos ente los dos cursos.
El CUPA valora mui positivamente esta esperiencia formativa qu’entamó en collaboración cola Academia de la Llingua Asturiana y la financiación de Caxa Rural y que tuvo una perbona acoyida ente universitarios y ciudadanos de dellos conceyos d’Asturies. Nos cursos cuntóse amás con delles charres de dalgunos espertos, como l’antropólogu Roberto González-Quevedo o la coordinadora de la Oficina de la Llingua de Xixón, María Xosé Rodríguez.
Nel cursu participaron 30 persones de conceyos como Piloña, Uviéu, Valdés o Xixón, cuntando, con tou tipu de profesiones: estudiantes, ames de casa, xubilaos, profesores, sector banca, psicólogos, periodistes y hasta un conceyal de la corporación xixonesa, lo qu’amuesa que del interés pol idioma d’Asturies participen persones de tolos sectores sociales y profesionales. Nel cursu de nivel II siguió’l cursu a distancia, un alumnu brasileñu, que yá participare na primer edición de los cursos y que ye yá tou un embaxador de la nuesa llingua al otru llau del charcu.

Fonte: asturnews

Cursu d'asturianu de Nivel II del CUPA y l'ALLA en Xixón

El CUPA y l’ALLA organicen un cursu de NIVEL II pa persones interesaes en meyorar l’asturianu.

Queden pocos díes pa matriculase nesti cursu que va cuntar con dellos talleres y conferencies.

El Conceyu Universitariu pol Asturianu (CUPA) anuncia que queda alrodiu d’una selmana de plazu p’apuntase al cursu d’asturianu Nivel II que se fai dientro de la segunda edición de los Cursos Básicos d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural en Xixón.

Nesti momentu ta celebrándose un cursu de nivel I p’alumnos con conocimientu baxu d’asturianu, y nes próximes selmanes va entamar otru de nivel II. El cursu d’asturianu Nivel II, que se va facer na sede del Conseyu de la Mocedá de Xixón (Avda. Manuel Llaneza 68), va entamar a partir del 3 del mes próximu, payares, cuntando con 35 hores llectives.

CURSU BÁSICU D’ASTURIANU. NIVEL II

Martes y xueves, de 19 a 21 hores

-Empobináu a persones que ficieren el primer nivel del cursu o tenga conocencia media d’asturianu y quieran afondar nes sos habilidaes llingüístiques

-Feches: 3 de payares a 15 d’avientu de 2011 & 10 a 26 de xineru de 2012

El preciu de la inscripción ye de 30 euros, incluyendo los materiales necesarios pa llevar alantre’l cursu, nel que van cellebrase dellos talleres y conferencies alrodiu de la llingua asturiana, adiéntrandose nel mundu de la radio y otros medios de comunicación, afondando nel conocimientu de la toponimia asturiana, y en xeneral l’usu del asturianu en contestos de la sociedá actual.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l 3 de payares.

Fonte: Asturnews

El CUPA entama dos cursos d’asturianu en collaboración cola ALLA

El CUPA convida a los miembros de la comunidá universitaria y a tol públicu en xeneral a averase a la conocencia básica de la llingua asturiana al traviés d’estos cursos de 35 hores llectives.
El Conceyu Universitariu pol Asturianu (CUPA) abre’l plazu p’apuntase a la segunda edición de los Cursos Básicos d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural que va cellebrase nel conceyu de Xixón.

Los cursos, que se va facer na sé del Conseyu de la Mocedá de Xixón (Avda. Manuel Llaneza 68), van entamar a partir d’ochobre nel casu del Nivel 1 y en payares el Nivel 2 y cuntando en dambos casos con 35 hores llectives.


CURSU BÁSICU D’ASTURIANU. NIVEL I

Llunes y miércoles, de 19 a 21 hores

-Empobináu a persones ensin conocimientos d’asturianu o con nivel baxu de conocencia

-Feches: 3 d’ochobre a 14 d’avientu de 2011


CURSU BÁSICU D’ASTURIANU. NIVEL II

Martes y xueves, de 19 a 21 hores

-Empobináu a persones que ficieren el primer nivel del cursu o tenga conocencia media d’asturianu y quieran afondar nes sos habilidaes llingüístiques

-Feches: 3 de payares a 15 d’avientu de 2011 & 10 a 26 de xineru de 2012

El preciu de la inscripción ye de 30 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.

Les inscripciones puen facese nel corréu lletrónicu conceyuasturianu@gmail.com
Esta direición lletrónica ta curiada escontra spam bots. Precisa activase JavaScript para vela o nel teléfonu 615 982 816, fasta’l 30 de setiembre nel casu del NIVEL I y fasta’l 30 d’ochobre nel casu del NIVEL II.

Fonte: Infoasturies

Alcuerdu pa presentar tesis n'asturianu

Nel Reglamentu d’Estudios de Doctoráu.

El CUPA llega a un alcuerdu col Reutor pa que se puedan presentar tesis n’asturianu.

El Conceyu Universitariu pol Asturianu (CUPA) aconceyó esta tardi (vienres 15 de xunetu) con Vicente Gotor, Reutor de la Universidá d’Uviéu, col envís de guetar una solución pal conflictu denunciáu pol CUPA y pol que nel nuevu Reglamentu d’Estudios de Doctoráu nun se permitía la presentación de tesis n’asturianu.

Javier Cubero ya Inaciu Galán, miembros del CUPA, tuvieron nel conceyu nel que Vicente Gotor prometió aprobar una redaición nueva del Reglamentu, nel Conseyu de Gobiernu de la Universidá, del prósimu xueves 21 de xunetu.

El borrador nuevu queda de la siguiente manera no que cinca al usu del asturianu:

Artículu 25, 2.a) La memoria que recueye’l llabor fechu na tesis doctoral redactarase en castiellán. Sicasí, la Comisión de Doctoráu va poder autorizar la so redaición n’otru idioma oficial de la Xunión Europea, previu informe de la Comsión Académica del Programa de Doctoráu, y siemprres que se garantiz que los miembros del Tribunal tán en condiciones de xulgala. N’esti casu, la memoria ha contener el resume y les conclusiones en castiellán. Coles meses condiciones, y d’alcuerdu col artículu 6.2 de los Estatutos de la Universidá d’Uviéu, la redaición podrá facese en llingua asturiana.

D’esta manera dase solución a un problema hestóricu na Universidá d’Uviéu y van poder presentase tesis n’asturianu ensin torgues de tipu llegal, pesie al deficiente status del asturianu, que dende’l CUPA creemos necesariu declarar oficial p’acabar con toes estes torgues d’una vegada.

El CUPA quier agradecer el sofitu nesta iniciativa de los ciudadanos que presentaron la protesta propuesta por esta organización a la Universidá d’Uviéu, que recibió cientos de sofitos particulares. Amás de reconocer el llabor de l’Academia de la Llingua Asturiana (ALLA) nesti procesu y de profesores y estudiantes de la propia Universidá, coles sos valioses aportaciones.

Dende’l CUPA, agradecen la solución d’esti conflictu al Reutor de la Universidá d’Uviéu y al Vicerreutor al que-y correspuende esta responsabilidiá y cellebramos la fin d’esta situación de marxinalidá qu’esistía pa la llingua asturiana "dende va más de 400 años" y que vien causando dellos casos qu’enfrentaron a la Universidá d’Uviéu colos sos alumnos nos xulgaos, contradiciendo a los estatutos propios de la Universidá y la Llei d’Usu del Asturianu de 1998 que diz que Tolos ciudadanos tienen drechu a emplegar el bable/asturianu y a espresase nél, de pallabra y per escritu.

"Taremos sollertes al cumplimientu d’esti Reglamentu y animamos a tolos doctorando a facer y presentar la so tesis n’asturianu, cuntando col sofitu llegal algamáu gracies a esta redaición nueva del Reglamentu yá citáu. Esta ye una bona noticia pa la llingua asturiana y pa la Universidá d’Uviéu y amás, el cumplimientu d’ún de los oxetivos principales del CUPA dientru del procesu de normalización del asturianu na Universidá" terminen afitando nel so comunicáu.

Fonte: Aruelu.com
Información apurrida por Manuel

El CUPA reclama a la Universidá cambios nel borrador del Reglamentu d’Estudios de Doctoráu, pa que seya llegal presentar tesis redactaes n’asturianu

El CUPA presentó esti vienres 24 de xunu una reclamación de cara a que la redaición final del Reglamentu recueya la posibilidá que’l borrador esclúi agora El Conceyu Universitariu pol Asturianu (CUPA) acaba de presentar al traviés d’un representante y énte la Universidá d’Uviéu, una reclamación formal sobre’l Reglamentu d’Estudios de Doctoráu, que ta nesti momentu en fase de consultes, reclamaciones y suxerencies. El CUPA reclama un cambiu nel puntu 2.A del Artículu númberu 23 que nel borrador diz: a) La memoria que recoge la labor realizada en la tesis doctoral se redactará en español. No obstante, la Comisión de Doctorado podrá autorizar su redacción en otro idioma oficial de la Unión Europea, previo informe de la Comisión Académica del Programa de Doctorado, y siempre que se garantice que los miembros del Tribunal están en condiciones de juzgarla. En este caso, la memoria deberá contener el resumen y las conclusiones en español. Y el puntu 4 del Artículu númberu 27, que diz: 4. Si la tesis se presenta en un idioma distinto del español, es necesario presentar la conformidad de todos los miembros del tribunal. Dende’l Conceyu Universitariu pol Asturianu esixen al Rector de la Universidá d’Uviéu y al Vicerrector al que-y correspuende esta responsabilidiá "que camude esta situación de marxinalidá que se crea pa la llingua asturiana y que vien causando dellos casos qu’enfrentaron a la Universidá d’Uviéu colos sos alumnos nos xulgaos, en llargos procesos llegales que podríen superase con una redaición afayadiza d’esti reglamentu". CUPA camienta que yá son munches les tesis que se vienen presentando n’asturianu a lo llargo de los venti años últimos y que "ye’l momentu de recoyer esta posibilidá de forma llegal y normal". Asina proponse que la redaición de los Artículos mencionaos quede de la siguiente forma: a) La memoria que recoge la labor realizada en la tesis doctoral se redactará en español y asturiano. No obstante, la Comisión de Doctorado podrá autorizar su redacción en otro idioma de la Unión Europea, previo informe de la Comisión Académica del Programa de Doctorado, y siempre que se garantice que los miembros del Tribunal están en condiciones de juzgarla. En este caso, la memoria deberá contener el resumen y las conclusiones en español o asturiano. 4. Si la tesis se presenta en un idioma distinto del español o asturiano, es necesario presentar la conformidad de todos los miembros del tribunal. D’esta forma, espliquen, tolos alumnos podrán escoyer ente presentar la so tesis n’asturianu o en castellán, ensin provocar perxuicios a nadie y permitiendo que se cumpla la llexislación vixente na Universidá d’Uviéu, casu de lo afitao nos Estatutos de la Universidá d’Uviéu/Universidad de Oviedo, que nel so Artículu 6.2 dicen que “La Llingua Asturiana va ser oxetu d'estudiu,enseñanza ya investigación nos ámbitos que correspuendan. Asinamesmu'l so usu va tener el tratamientu qu'establezan l'Estatutu d'Autonomía y la llexislación complementaria, garantizándose la non discriminación de quien la emplegue” Amás, la Llei d’Usu del Asturianu del añu 1998, que fai referencia a dellos drechos llingüísticos de los ciudadanos asturianos, diz que “Tolos ciudadanos tienen drechu a emplegar el bable/asturianu y a espresase nél, de pallabra y por escrito” El CUPA pregúntase: ¿Cómo puede ser llingua d’investigación si nun se permite’l so usu na ferramienta por escelencia d’investigación dientro d’una universidá, les tesis doctorales?, ¿cómo puede garantizase la non discriminación de quien emplegue l’asturianu si nun pueden usar l’asturianu pa redactar la so tesis?, ¿cómo puede quedar en manes d’un tribunal un derechu elemental ciudadanu a usar la llingua propia? Amás, reclama que’l Regalmentu s’espublice tamién en versión n’asturianu, como se fizo col máximu reglamentu d’esta Universidá, los sos Estatutos, de forma que los alumnos qu’usen l’asturianu pueden acceder al testu n’igualdá de condiciones. Reglamentu que reclama’l Conceyu Universitariu pol Asturian

Fonte: Infoasturies

Cursu Básicu d'Asturianu en Xixón

El Conceyu Universitariu pol Asturianu abre’l plazu p’apuntase al so I Cursu Básicu d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural que va cellebrase nel conceyu de Xixón. El CUPA convida a los miembros de la comunidá universitaria y a tol públicu en xeneral a averase a la conocencia básica de la llingua asturiana al traviés d’esti cursu de 35 hores llectives.

El cursu, que se va facer na sé del Conseyu de la Mocedá de Xixón (Avda. Manuel Llaneza 68), va entamar en marzu y va cuntar con 35 hores llectives. L’horariu que se plantega, a falta de apautalo colos alumnos, ye los llunes y miércoles de 19 a 21 hores. El preciu de la inscripción ye de 25 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.

Les inscripciones pueden facese nel corréu lletrónicu
conceyuasturianu@gmail.com

o nel teléfonu 615 982 816, hasta’l 27 de febreru de 2011.

Fonte: Infoasturies

Nueva versión n'asturianu de la web de la Universidá d'Uviéu

El CUPA contentu cola versión de la web de la Universidá n'asturianu.
El CUPA cellebra la puesta en marcha de la nueva web de la Universidá con una versión n’asturianu, anque cree que’l procesu de normalización tien qu’acelerase.

Pal Conceyu Universitariu pol Asturianu, esta acción supon el cumplimientu d'ún de los puntos más importantes de los alcuerdos ente l'equipu reutoral y el CUPA, que sofitó la candidatura de Gotor nel so día.

El Conceyu diz que trabaya col equipu reutoral nestes meyores y entiende qu'ésti, tien de responder a les espectatives abiertes pa la normalización del asturianu. “Pal CUPA ye'l momentu d'acelerar estes polítiques llingüístiques na Universidá, con nueves midíes que sirvan pa normalizar l'asturianu na Institución”, afirmen.

Fonte: Asturies.com