Cuentacuentos pa presentar «Sali ya’l mundu de collores»

​La tarde del martes siete de marzu va tener llugar nes instalaciones del Colexu Oficial de Trabayu Social d’ Asturies, en Xixón, la presentación del cuentu infantil «Sali ya’l mundu de collores». Anantes los más pequeños pueden conocer a Sali nel cuentacuentos, que va entamar a les seis

La obra, escrita por Noelia Ordieres, illustrada por Ana Sáez y espublizada por Trabe cola collaboración del Conseyu de la Mocedá d´Asturies y l´Asociación XEGA, ye un cuentu que, amás d´entretener a grandes y reciella, abre ventanes a un mundu más lluminosu, xustu y prestosu, animando a esfrutar de la diversidá, “los collores”, ensin prexuicios.

Sali y la so amiga Cereza viven en Violeta, un país de collores onde siempres relluma un arcu la vieya bien grande que furrula como xigante tobogán, pol que s´esmucen les neñes y neños del país. Pero en Violeta tamién hai persones que nun tienen collores, que son grises, porque siempres tán de mal humor y tou yos paez mal… Hasta que Sali y Cereza crucien nes sos vides.

Pa quien nun puean asistir, el cuentacuentos repitiráse´l sábadu once de marzu a les dolce del mediudía en La Revoltosa.

Fonte: Infoasturies

Presentada la 'Cerveza pol Asturianu'

Ta producida pola empresa cervecera Bayura Asturies Craft Beer en collaboración con Iniciativa pol Asturianu.

Esti proyeutu nuevu d’Iniciativa pol Asturianu naz baxo’l llema ‘La cerveza que-y presta a la to llingua’ col oxetivu de “ufiertar al públicu un productu de calidá col que faer atractivo collaborar con Iniciativa pol Asturianu y el nuesu llabor, col qu'introducir l'usu del asturianu n'espacios onde davezu nun suel tar presente”, apuntó’l Inaciu Galán, qu’añedió que ye “una forma prestosa de da-y sofitu al asturianu, con un xestu tan cenciellu como tomar unes cerveces colos amigos en cualquier establecimientu, o llevales pa casa y poneles nuna cena”. El presidente del coleutivu que trabaya pola normalización del idioma presentó esti productu ayeri nun actu nel Conseyu de la Mocedá de Xixón xunto con Serxu Solares, direutor de Bayura.

“Ye una cerveza prestosa, que va prestar a la to llingua; ye una roxa qu’entra fácil, de poco alcohol, que permite beber unes cuantes”, apuntó Solares. La tirada inicial ye de 5.000 botelles que se van vender a un preciu d’ente 2,5 y 3 euros en chigres de magar el sábadu, cuando ta prevista una folixa de presentación en La Revoltosa (Juan Alonso, 12, Xixón) a partir de les 21 hores.

Fonte: YeXixon.com

Iniciativa pol Asturianu y el Conseyu de la Mocedá de Xixón ponen en marcha un grupu informal de conversación n'asturianu

Iniciativa pol Asturianu collabora col Conseyu la Mocedá de Xixón pa poner en marcha la so primer esperiencia con grupos informales de conversación n'asturianu. Los Grupos Informales de Conversación son una iniciativa del Conseyu de Mocedá empobinada a toles persones que quieren perder el mieu a falar n'otru idioma, o a cencielles practicar les sos conocencies nel propiu nun ambiente distendíu ya informal. Los grupos nun son clases d'idioma, sinón espacios nos qu'echar la parpayuela y tán dinamizados polos nuesos equipos de voluntariáu.

La entrada ye llibre y de baldre, y nun se precisa apuntase enantes. Esti nuevu grupu, que se suma a los esistentes hasta agora n'otres llingües, va celebrase nel llar del CMX ya Iniciativa pol Asturianu, n'Avenida Manuel Llaneza, 68, baxu. 33208, en Xixón. El grupu va entamar el miércoles 11 de xineru, y va celebrase tolos miércoles de 19 a 20:30 hores. 

Dende Iniciativa pol Asturianu animamos a participar d'esti grupu y a perder el mieu a usar l'asturianu en tolos ámbitos. Una bona forma de faelo ye entamar nesti tipu d'ambientes desenfadaos onde los nuevos falantes van poder poner en práctica l'usu oral del idioma. 

Fonte: Iniciativa pol Asturianu

Iniciativa pol Asturianu conviértese en miembru de plenu derechu del Conseyu de la Mocedá de Xixón

  Una xunta celebrada esti llunes 17 d’ochobre decidió por unanimidá aceptar a Iniciativa pol Asturianu como miembru de plenu drechu del Conseyu de la Mocedá de Xixón, la federación d’asociaciones xuveniles de Xixón.

  El CMX ye un órganu de gran implantación na vida del conceyu dende va décades ya Iniciativa pol Asturianu espera ser quien a aportar daqué de la so experiencia nel ámbitu de la reivindicación y la normalización llingüística nel campu de la mocedá.

  Al conceyu acudieron Inaciu Galán, presidente d’Iniciativa pol Asturianu, ya Iván Llera Huerta, responsable de medios de la entidá. Galán fixo una intervención curtia na que faló del interés de la organización por aportar al CMX un mayor compromisu llingüísticu, asina como reforzar los llazos d’Iniciativa pol Asturianu con otres entidaes del conceyu, pa lo que la convencia nel CMX pue ser una forma d’abrir pontes ya implicar a otres entidaes nel usu del asturianu con normalidá.                                                                 Fonte: asturnews.com

Iniciativa pol Asturianu entrega diplomes a los alumnos de los VI Cursos d’Asturianu en Xixón nun actu con actuaciones musicales

L’Actu va incluyir actuaciones musicales y la entrega de diplomes Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los VI Cursos d’Asturianu en Xixón esti miércoles 25 de marzu a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llaneza 68, baxu), cola participación de los más de 50 alumnos qu’ente presencial y a distancia participaron nos curso. Nel actu van dar llectura a dellos testos, xunto a miembros d’Iniciativa pol Asturianu, el CUPA y l’Academia de la Llingua Asturiana. L’actu va sirvir tamién pa entregar los premios del concursu lliterariu entamáu estos díes por Iniciativa pol Asturianu en collaboración editoriales asturianes pa promocionar les lletres asturianes coincidiendo col Día Internacional de la Poesía. Fonte: Asturnews

Ábrese la matrícula pa los VI Cursos d'Asturianu en Xixón (presenciales y a distancia)

Iniciativa pol Asturianu, en collaboración col Conceyu Universitariu pol Asturianu (CUPA) abre’l plazu p’apuntase a la sesta edición de los Cursos d’Asturianu en Xixón, una esperiencia formativa qu’entama en collaboración cola Academia de la Llingua Asturiana y el Conseyu de Mocedá de Xixón. 

Los cursos que se van facer una edición más na sede del Conseyu de la Mocedá de Xixón (Avda. Manuel Llaneza, 68), van entamar a partir del 26 de xineru, cuntando con 36 hores llectives cada nivel.

El cursu va celebrase los llunes y miércoles, de 17 a 19 hores nel casu del nivel inicial, y de 19 a 21 hores pal nivel II, acabando'l 25 de marzu de 2015.

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel II ta empobináu a persones con una conocencia más fonda del idioma, que yá ficieren dalgún cursu enantes.

El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les persones que nun puedan asistir por tar fuera d'Asturies o por razones d'otru tipu van poder siguir el cursu a distancia.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 25 de xineru de 2015.

Dende Iniciativa pol Asturianu animamos una ediciónn a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies. 

Novedaes nos cursos a distancia

Nesta sesta edición de los cursos abrimos una plataforma d'enseñu na rede, empobinada a los alumnos y alumnes que siguen los cursos en llinia. Un preséu que va permitir ameyorar abondo los procesos de deprendizaxe, adaptándolos meyor a les nueves teunoloxíes.

Fonte: Iniciativa pol Asturianu

Inaugúrase la quinta edición de los Cursos d'Asturianu en Xixón con un importante crecimientu de la matriculación a distancia

La inauguración va tar abierta a la prensa, permitiéndose les semeyes y recibiendo a fotógrafos y redactores

   Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) entamen la que ye yá la quinta edición de los Cursos d’Asturianu en Xixón esti llunes 6 d’ochobre dende les 17 hores, nel Conseyu de la Mocedá de Xixón (Avenida Manuel Llaneza 68, baxu). Na inauguración de los cursos van participar, xunto a los alumnos, Pablo Xuan Manzano, miembru de l’Academia de la Llingua Asturiana, Javier Cubero, del Conceyu Universitariu pol Asturianu ya Inaciu Galán, presidente d’Iniciativa pol Asturianu.

   Iniciativa pol Asturianu valora mui positivamente esta esperiencia formativa que s’entama per quinta ocasión en collaboración cola Academia de la Llingua Asturiana y que tuvo una perbona acoyida, con más de 50 matriculaos. Esti añu, per primer vegada, los alumnos matriculaos a distancia superen a los presenciales, por mor de la dispersión d’alumnos per conceyos d’Asturies y l’interés d’emigraos que tán trabayando fuera d’Asturies, amás de delles persones que nun siendo asturianos tán interesaos por conocer y deprender la nuesa llingua. Los cursos cunten con 36 hores llectives y van celebrase los llunes y miércoles pela tarde.                                                                                           Fonte: Asturnews.com

Los 25 años del Conciertu pola Oficialidá, en Xixón

   Hasta'l 31 de xineru nel Espaciu Astragal.

    La esposición '25 años de Conciertu en Cartelos' llega al Espaciu Astragal de Xixón (Conseyu de la Mocedá de Xixón, cai Manuel Llaneza, 68), y va poder visitase hasta'l 31 de xineru. Esta esposición de la Xunta pola Defensa de la Llingua Asturiana, fai un percorríu pelos cartelos de les venticico ediciones del Conciertu pola Oficialidá.

   Trátase d’un repasu a los cuasi 70 grupos que pasaron per estes 25 ediciones d’esti conciertu, y que quier valir d'homenaxe al llabor comprometíu de tola xente de la música que participan nos conciertos y tamién de denuncia y reivindicación de los drechos llingüísticos de tolos y toles asturianes.

   Fonte:  Qué ye ho! com.