N'Ast esixe la oficialidá énte casos como la negativa pa la creación de la especialidá docente d'asturianu

"El gobiernu asturianu nin ye asturianu nin-y interesa un res lo asturiano", apunten.

L’Asociación Cultural N’Ast camienta que la nueva refuga del Ministeriu d’Educación, Cultura y Deporte a incluyir Llingua Asturiana comu especialidá nel Real Decretu d’Especialidaes del Oficiu Docente "nun tien de sorprender a naide, y menos a los responsables educativos del “Principado”, qu’aprovecharen la Conferencia Seutorial d’Enseñu cellebrada’l pasáu miércoles en Madrid pa tornar a plantegar esta reclamación hestórica cola que se pretenden igualar les condiciones del profesoráu qu’imparte esta materia coles del restu docentes d’otres especialidaes".

Señalen que "Victorina Fernández, representante asturiana na Conferencia Seutorial d’Enseñu en calidá de Direutora Xeneral de Formación Profesional, Desendolcu Curricular ya Innovación Educativa del "Principado", afitó que “lo que queríemos ye que nel artículu sobre les llingües cooficiales s’abriera un puntu nel que se dixera qu’aquelles llingües d’especial proteición puedan ser definíes como una especialidá autonómica. Eso daría estabilidá al profesoráu d’asturianu, pero dixérenme que non”".

Consideren asina que "coles sos pallabres, ella mesma ta dando cola clave del asuntu: esto nun pasaría si l’asturianu fuera llingua oficial. El problema ye esi, comu yá manifestemos dende N’Ast en más d’una ocasión, y non que Wert refugue o nun refugue l’asturianu comu especialidá docente. ¿Cómo nun lo van refugar dende Madrid si los que mos gobiernen n’Asturies nun faen un res por regularizar y normalizar la nuesa llingua apurriéndo-y la oficialidá?".

Fonte: Infoasturies

Siguen les reaiciones de refugu pola negativa pa la creación de la especialidá docente d'asturianu

Dende la propia ALLA hasta l'ámbitu sindical, siguen les amueses de refugu a la decisión ministerial, con fuertes crítiques tamién al gobiernu asturianu.

Dende l'Academia de la Llingua Asturiana treslladen nun comunicáu que "ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes".

Nesi sen, ceyen "llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería".

Poro, consideren "inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique. L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones".

Les crítiques lleguen tamién pel ámbitu sindical, dende organizaciones como la CSI o SUATEA. Éstos últimos señalen que "la redacción d'esti nuevu decretu nun s'axusta al textu de la LOMCE, onde'l ministeriu aceptó añadir la Disposición Adicional 38.6 (*) pa permitir que les comunidaes autónomes con llingües ensin calter d'oficial pudiesen mantener la so ufierta educativa. Esti ye'l casu d'Asturies, onde la presencia de la llingua asturiana tien presencia curricular en tolos niveles educativos y está regulada por la Lley de Usu y contemplada nel Estatutu d’Autonomía".

Apunten que "la situación anguaño ye complicada, y ye necesaria l'actuación urxente de tolos axentes implicaos, Academia,  Conseyería,  sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien".

Amesten tamién l'alcordanza "que'l Plenu del Conseyu Escolar del Estáu yá se pronunció nel mes de setiembre favorable a la creación d'esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, recomendó-y al Ministeriu la creación de la Especialidá de LLingua Asturiana. Pero agora el Ministeriu mira pa otru llau y desatiende la desixencia del mayor muérganu consultivu del Estáu en materia educativa".

Amás, afiten qu' "esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d'Asturies pronuncióse favorable a la so creación na primavera pasada, asina como la Xunta de Personal Docente d'Asturies que se tien manifestao nel mesmu sentíu en delles ocasiones. Asina mesmo, la propia Conseyera d'educación Ana González tien manifestao en reiteraes ocasiones que yera un de los compromisos que quería cumplir enantes d'acabar la presente llexislatura col enfotu de dignificar y normalizar la presencia de la llingua asturiana nel sistema educativu".

Fonte: Infoasturies

Izquierda Xunida fala de “despreciu a los asturianos” y fai referencia a la oficialidá como solución definitiva al asuntu de la especialidá

por Pablo R. Guardado

Emilia Vázquez, diputada d’Izquierda Xunida (IX) na Xunta Xeneral, declaró que’l refugu del Ministeriu d’Educación, Cultura y Deporte a la especialidá ye un “despreciu a los asturianos”. Solicitó implicación al Gobiernu y apuntó necesaria la oficialidá del idioma pa solucionar el problema.

“Ye un despreciu al sentir de los asturianos”, apuntó Vázquez, que cargó contra’l Partido Popular (PP) por nun respetar el pidimientu de la Xunta Xeneral de la declaración de la especialidá d’asturianu, moción propuesta por IX que contó col votu favoratible de tolos grupos a esceición del popular na sesión del 21 de payares. Al so xuiciu, el Gobiernu nun se pue dar por satisfechu cola negativa del ministeriu y demanda la implicación de la conseyera Ana González o del presidente Javier Fernández pa reconducir la situación. “Eso ayudaría a que’l ministru viese que ye una cuestión importante pal Gobiernu d’Asturies”, esplica la diputada.

Por último, apuntó a la oficialidá como solución a estes negatives continues que sufre la llingua asturiana en cuestiones educatives. “Cualquier otra consideración más moderada amosó’l so fracasu”, sentenció Vázquez. La intención d’IX ye llamar l’atención del Gobiernu pa que declare la oficialidá si de verdá ta pol llabor de defender los derechos llingüísticos de los asturianos y va presentar iniciatives na Xunta Xeneral nesi sen.

Fonte: Asturies.com

Wert denega l’ajut de 6000 euros a les famílies que volien escola en castellà

Fins ara, a Catalunya, només s'han tramitat 3 peticions. El Ministeri d'Educació preveia un miler de sol·licituds

Fonts del Ministeri d'educació han confirmat a SER Catalunya que han denegat les 3 peticions formals que s'han tramitat fins ara a Catalunya de famílies que volien que se'ls hi pagués una escola privada en castellà. És una possibilitat recollida a la Llei Wert a la que segons els càlculs fets en el seu dia pel Ministeri que dirigeix José Ignacio Wert -que va reservar un pressupost de 5 milions d'euros- s'havien d'acollir en el primer any almenys un miler d'alumnes.

La realitat però és que fins al mes d'octubre s'havien formalitzat només tres peticions i que a totes tres, la resposta ha estat negativa. El motiu, segons que han explicat a Ser Catalunya fonts del Ministeri, és que les famílies demandants havien matriculat els seus fills en escoles totalment privades, però catalanes, que no ofereixen una educació diferent de la que els alumnes rebrien a qualsevol escola pública o concertada del seu entorn.

Fonts del Govern espanyol intenten treure ferro a la situació. Asseguren que ara mateix tenen altres 80 peticions pendents d'analitzar a Catalunya, del total de 721 que han rebut a tot l'Estat. Des del Departament d'Ensenyament subratllen que oficialment només tenen constància de les tres sol.licituds rebutjades i que abans de decidir respecte de la resta, el Ministeri s'ha de posar en contacte amb el govern català per comprovar si la petició està fonamentada.

Fonte: Cadena SER

SUATEA busca la implicación de tola comunidá educativa na defensa de la especialidá de cara a la reunión del Conseyu Escolar del 3 de febreru

   El refugu del Ministeriu d’Educación, Cultura y Deporte a la especialidá d’asturianu obliga a mover ficha con urxencia. El día 3 ye’l Conseyu Escolar Estatal, cita que SUATEA considera como la posibilidá última d’adaptar el Decretu de les Especialidaes Docentes d’Educación Secundaria a la demanda d’Asturies, pa lo que ve necesaria la implicación de tola comunidá educativa.

   “La situación anguaño ye complicada, y ye necesaria l'actuación urxente de tolos axentes implicaos: Academia,  conseyería, sindicatos educativos, asociaciones d’estudiantes y de madres y padres… La posibilidá última de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien”, alvierte’lSindicatu Unitariu Autónomu de Trabayadores de la Enseñanza d’Asturies (SUATEA). Esti muérganu asesor que representa a tola comunidá educativa del Estáu yá se pronunciara en setiembre a favor de la especialidá de Llingua Asturiana y Gallego-asturiano, nel so ámbitu, a instancia de laConfederación de Sindicatos de Trabayadores de la Enseñanza (STEs), de la que forma parte SUATEA, “pero agora el ministeriu mira pa otru llau y desatiende la desixencia del mayor muérganu consultivu del Estáu en materia educativa”.

   El sindicatu educativu asturianu recuerda que la redaición actual del decretu d’especialidaes, que nun s’axusta al testu de la Llei de Meyora de la Calidá Educativa (LOMCE) al nun tener en cuenta la disposición adicional 38 –la qu’inclúi a aquelles llingües non oficiales pero con proteición llegal–, “impide cumplir coles aspiraciones de dignificación profesional del colectivu de docentes de llingua asturiana”. Tamién calca en que la demanda de la especialidá “vien avalada por inumerables pidimientos tanto sindicales y sociales como institucionales”. Asina,  la Xunta Xeneral d'Asturies pronuncióse favoratible a la so creación na primavera pasada, al igual que la Xunta de Personal Docente d'Asturies en delles vegaes. D’igual forma, trátase d’un compromisu de  la propia conseyera Ana González pa esta llexislatura col enfotu de dignificar y normalizar la presencia de la llingua asturiana nel sistema educativu.

El Gobiernu ha d’asumir “les sos responsabilidaes”

   Dao que’l tiempu cuerre en contra, SUATEA yá tien solicitáu un conceyu con González al entender que “ye perimportante que tol Gobiernu asturianu asuma les sos responsabilidaes de lluchar pola nuesa llingua”. “SUATEA nun va parar hasta algamar que, a pesar de les torgues puestes dende el Gobiernu estatal y el pocu puxu amosau pol Gobiernu asturianu na defensa del patrimoniu cultural y llingüisticu de nueso, l’asturianu seya una especialidá docente de plenu drechu nel camín de consiguir la oficialidá”, afirma.

   L’Academia de la Llingua Asturiana (ALLA) tamién solicitara un alcuentru cola conseyera cola fin de que mueva un conceyu urxente col ministeriu al más altu nivel pa negociar la reconocencia de la especialidá.
                                                                                  Fonte: asturies.com

L’ALLA reclama a González qu’acuda a Madrid pa negociar con urxencia la especialidá d'asturianu tres el refugu de Wert a la so reconocencia

Ana Cano y Xosé Antón González Riaño

  Victorina Fernández, direutora xeneral de Formación Profesional, Desarrollu Curricular y Planificación Educativa, anunció esti miércoles que’l ministru José Ignacio Wert nun reconociera la especialidá docente d’asturianu que demandara’l Gobiernu del país. L’ALLA reclama a la conseyera Ana González qu’acuda “espresamente a Madrid a negociar esta cuestión”.

  Na tarde d’ayeri, Fernández anunciaba nuna rueda de prensa previa a la Conferencia Sectorial de Educación convocada nel Ministeriu d’Educación, Cultura y Deporte pa conocer la opinión de les comunidaes autónomes sobre’l Proyeutu de Decretu de les Especialidaes Docentes d’Educación Secundaria, que dichu ministerio nun incluyera la Llingua Asturiana y el Gallego-asturiano, nel so ámbitu, dientro del decretu d’especialidaes de la Llei Orgánica de Meyora de la Calidá Educativa (LOMCE). Darréu, apuntó que “n’Asturies hai un grupu importante de docentes a quienes tenemos que dar una especialidá” y que “del mesmu mou que se permite desarrollar les respeutives especialidaes a les comunidaes autónomes que cuenten con una llingua cooficial, pidimos que tamién lo permitan cola llingua asturiana, que ye un bien protexíu y con una presencia importante na ufierta educativa”. Por último, señaló que “puesto que la competencia pertenez a la comunidá autónoma, el ministeriu habría de danos la posibilidá de que podamos cumplir dafechu colos nuesos compromisos cola comunidá educativa”.

  Tres conocer la noticia, l’Academia de la Llingua Asturiana (ALLA) convocó a los medios de comunicación con urxencia pa dar a conocer la so postura.  La institución académica quita responsabilidá a Fernández, recién nomada nel cargu, pero sí critica la “inxenuidá” del Gobiernu con esta cuestión y recordó que yá avisara a la conseyera qu’un asuntu “tan delicáu como ésti esixía una xestión personal y decidida de la propia titular de la conseyería”, señaló Ana María Cano, presidenta de l’ALLA. “Ésti ye un tema qu’interesa a Asturies. Ye una inxusticia que venimos sufriendo dende fai munchísimos años y nun se pue facer una dexación de funciones. Esto hai que negocialo al máximu nivel y col mayor de los convencimientos si realmente queremos que salga p’alantre. Entendemos que sería la conseyera d’Educación  la que tendría que dir espresamente a Madrid a negociar esta cuestión porque nun ye lo mesmo facelo al máximu nivel que mandando a una persona que tea por debaxo de la conseyera”, demandó Cano, qu’aguarda que González o’l propiu presidente “tomen cartes nel asuntu y pidan una entrevista urxente col ministru pa solucionar esti tema. Yo toi convencía de que si se plantega como se tien que plantegar, el ministeriu nun va tener nengún problema n’aceptar la especialidá”.  

Desigualdá col restu de profesionales del enseñu

  Cano quixo recordar que “hai unos profesionales que tán exerciendo una profesión regulada por llei, que tienen una titulación oficial reconocía nel Estáu, y que de nenguna de les maneres pueden tar en desigualdá de condiciones respeuto a los otros profesionales de la enseñanza”. Estos profesores condenaos anguaño a la interinidá, nel casu d’algamase la tan demandada especialidá, podríen participar en concursos d’oposición o tresllaos al igual que’l restu de los coleutivos docentes.

  Pela so parte, Xosé Antón González Riaño, vicepresidente de l’ALLA, reseñó que “la decisión nun implicaría al ministeriu, que nun tien por qué poner dificultaes si ve convinción per parte del Gobiernu d’Asturies. La xestión nun la tien que facer el ministeriu, sinón que correspuende a la comunidá autonóma dende’l puntu de vista organizativu y de los recursos. ¿Por qué va dicir que non el ministeriu a esa demanda? Lo que se necesita ye xustamente treslladar qu’hai esa necesidá educativa y organizativa n’Asturies”. Pa finar, el responsable d’Educación de la institución esplicó que l’aprobación de la especialidá ye dalgo “meramente téunicu; ye un decretu, nin siquier una llei, nel qu’hai qu’amestar un párrafu” que señale que “les otres llingües non oficiales pero con reconocimientu xurídicu como llingua y implantación curricular, podrán tener especialidá si hai necesidaes oxetives que lo xustifiquen”.

  L’ALLA, que s’ufierta a collaborar nel supuestu alcuentru ente’l ministerio y el Gobiernu “pa encontar téunicamente la discusión y ver de llograr una redaición afayadiza del Decretu d’Especialidaes que respete los intereses profesionales del profesoráu de Llingua Asturiana, tien solicitada una entrevista “urxente” cola conseyera y tien pensao aconceyar colos sindicatos que tán representaos nel Conseyu Escolar del Estáu, que yá diera’l preste a la especialidá y va tratar otra vuelta l’asuntu’l día 3 de febreru. Tamién pretende aconceyar col PP, “que tien inxerta esta reconocencia de la especialidá nel so programa eleutoral”, y col restu de fuercies polítiques.

Iniciativa pol Asturianu califica la situación de “tomadura de pelo”

  La organización Iniciativa pol Asturianu tampoco nun tardó en responder a la negativa de Wert a la especialidá, decisión que calificó de “tomadura de pelo” pol fechu de que “nel programa del Partido Popular del 2012, el de les últimes eleiciones autonómiques, la formación lleva la promesa de reconocer” dicha especialidá. “La situación d'anguaño ye d'una plantiya de profesoráu de Llingua Asturiana inestable, precarizada y que nun gana esperiencia, yá que los profesores fuxen en cuantes-yos ye posible hacia otres especialidaes onde sí pueden algamar una plaza, al tar la reconocida la especialidá pol Ministeriu d'Educación. Esto supón una importante perda na calidá de l'asignatura y una inestabilidá na mesma, pese al importante sofitu de les families asturianes, matriculando a los sos neños de forma mayoritaria en Llingua Asturiana”, alvierten.

  Por esti motivu, el coleutivu que trabaya na normalización del idioma solicita al PP “que faiga cumplir el so programa” y a la conseyera “que dea una respuesta contundente al Gobiernu d'España y reclame la solución d'esta situación que s'allarga yá más de trenta años, dende que l'asturianu llegó a los primeros centros educativos públicos. La máxima responsabilidá de que la situación siga siendo de precariedá ye de l'alministración autonómica y tien de demostrar la so voluntá nidia d'algamar esti oxetivu xustu siendo clara y enfrentándose al Gobiernu central en tolos ámbitos posibles”.                                                                    Fonte: asturies.com

Presentáu'l calandariu "Tiempu de muyeres, muyeres nel tiempu"

Empobináu pola Organización de Muyeres de SUATEA.

Tal como despliquen, "esti calandariu da encontu a una propuesta educativa pa trabayar la coeducación nos centros educativos de tol estáu. Surdió con un oxetivu y un envís concretu: Reconstruyir la historia incompleta conocía y tresmitida tanto en llibros de testu, curriculum educativu, formación personal del profesoráu y alumnáu pa, a partir d’ella, visibilizar énte la comunidá educativa les aportaciones de les muyeres de tolos tiempos a la historia, l’arte, la ciencia, el conocimientu, la xusticia social, les cuales se-yos negaron y se les privó del reconocimiento que merecen pol saber androcéntricu de la nuestra cultura".

Ye polo que recuperen "los sos nomes, les sos vides, les sos histories y les sos aportaciones, y a partir d’estes, proponemos una necesaria reflexón critica que contribuya a la tresformación del imaxinariu colectivo, del formatu d’estereotipos de xéneru que tovía güei siguen asitiando a les muyeres fundamentalmente nel ámbitu de la dependencia y na subordinación y que perpetúen llaceries como la violencia de xéneru  na nuestra sociedá".

Amesten tamién que'l calandariu "siguiendo les pautes confederales de respetu a la diversidá llingüística, edítase en toles llingües oficiales na Confederación Intersindical, incluyendo l’asturianu, y anque per dellos años, aquellos onde la coeducación y la igualdá de xéneru yeren valoraes pol gobiernu, recibió ayuda económica del Institutu de la Muyer, desde hai dellos años finánciase dafechu pola Confederación Intersindical a la que pertenez SUATEA y espárdese per tolos centros educativos del estáu de baldre, y nes últimes ediciones  amás en múltiples centros de trabayu,  qu’en conociéndolu, quiérenlu".

Fonte: Infoasturies

Ana Cano pide menos inxenuidá y más convencimientu al Principáu na tema la especialidá docente de Llingua Asturiana

Ana Cano, presidenta de l'ALLA

   Nuna rueda de prensa urxente convocada tres de la negativa del ministru Wert a reconocer la especialidá docente de Llingua Asturiana pal profesoráu de secundaria, la presidenta de l'Academia de la Llingua Asturtiana, Ana Cano, pidía esti día menos inxenuidá y más convencimientu al Principáu nesta tema y desixía que se negocie al más altu nivel la cuestión.

   Ensin facer crítica denguna a la Diretiroa Xeneral de Desarrollu Currícular, Victorian Fernández, que presentó la cuestión al Ministeriu d'Educación na Conferencia Sectorial ayeri, Ana Cano pidió que fore la COnseyera y non la Direutora, recién nomada, la que negociare l'asuntu col Ministeriu.

   Na rueda de prensa, Ana Cano tenía al llau a Xosé Antón González Riañu qu'esclarió que'l Ministeriu "namái da'l preste, porque la competencia y el presupuestu pa reconocer la especialidá son d'Asturies, colo que namái ye negocialo amosando convencimientu".

   Na rueda de prensa Ana Cano dió ellctura a un comunicáu de l'Academia onde s'afitaba que darréu de lo anterior, "L'Academia de la Llingua Asturiana, cumpliendo'l so deer institucional de tutela de los derechos llingüísticos de los asturianos, quier manifestar lo siguiente:

   1. Ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes.

   2. Ye llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería.

   3. Ye una gran inxenuidá –o otra cosa– camentar que’l Ministeriu va dicir que sí, de mano, ensin una negociación fecha con convicción per parte del Gobiernu d’Asturies, na que s’argumente con datos educativos (alumnáu, centros, profesores, etc. a los qu’afecta esta decisión) la necesidá de la demanda.

   4. Ye inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique.

   L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones.

   L’Academia de la Llingua Asturiana, nel so casu, ufiértase pa participar nesti alcuentru (Ministeriu-Principáu) pa encontar téunicamente la discusión y ver de llograr una redaición afayadiza del Decretu d’Especialidaes que respete los intereses profesionales del profesoráu de Llingua Asturiana".                                                  Fonte: Asturnews.com

Iniciativa pol Asturianu califica de “tomadura de pelo” la decisión de Wert de negar la especialidá d’asturianu pal profesoráu que’l PP lleva nel so programa

Pa Iniciativa, "el Ministeriu d'Educación vuelve a tratar a la llingua asturiana con despreciu como tantes ocasiones nos caberos trenta años"

El Ministru d'Educación, Ignacio Wert

La Direutora Xeneral de FP, Desendolque Curricular y Anovación Educativa, Victorina Fernández, esplicaba ayeri a los medios que'l Ministeriu d'Educación diz agora non a crear la especialidá docente de Llingua Asturiana pal profesoráu. Pa Iniciativa pol Asturianu esta decisión del ministeriu dirixíu por José Ignacio Wert ye una inxusticia pal profesoráu d'asturianu, una torga pa la calidá de l'asignatura y sobre manera, una "tomadura de pelo" pues nel programa del Partíu Popular de 2012, el de les últimes eleiciones autonómiques, la formación lleva la promesa de reconocer la especialidá docente pal profesoráu d'asturianu.

La situación d'anguaño ye d'una plantilla de profesoráu de Llingua Asturiana inestable, precarizada y que nun gana esperiencia, pues los profesores fuxen en cuantes-yos ye posible hacia otres especialidaes onde sí pueden algamar una plaza, al tar la reconocida la especialidá pol Ministeriu d'Educación. Esto supón una importante perda na calidá de l'asignatura y una inestabilidá na mesma, pese al importante sofitu de les families asturianes, matriculando a los sos neños de forma mayoritaria en Llingua Asturiana.

Ye por ello que solicitamos al Partíu Popular d'Asturies que faiga cumplir el so programa electoral al Ministeriu d'Educación de forma inmediata, en cumplimientu de lo prometío. Esta petición tuvo'l votu favoratible de la FSA-PSOE, Foru Asturies, Izquierda Xunida y UPyD na Xunta Xeneral, y cuenta col votu a favor del Conseyu Escolar estatal, asina como cola unanimidá de tolos sindicatos y en xeneral, de la sociedá asturiana.

A la Conseyera d'Educación, Ana González, solicitámos-y que dea una respuesta contundente al Gobiernu d'España y reclame la solución d'esta situación que s'allarga yá más de trenta años, dende que l'asturianu llegó a los primeros centros educativos públicos. La máxima responsabilidá de que la situación siga siendo de precariedá ye de l'alministración autonómica y tien de demostrar la so voluntá clara d'algamar esti oxetivu xustu siendo clara y enfrentándose al gobiernu central en tolos ámbitos posibles.

El Ministeriu d'Educación vuelve a tratar a la llingua asturiana con despreciu como tantes ocasiones nos caberos trenta años, negándo-y cualesquier pasu alantre, por más que'l consensu seya total n'Asturies, mesmo nel ámbitu educativu que políticu y social.

La reconocencia de la especialidá d'asturianu al profesoráu tien de ponese en marcha lo primero posible pa garantizar que'l profesoráu d'asturianu tenga les mesmes obligaciones y drechos que'l restu y non tener a l'asignatura nuna continua interinidá y falta de dignidá.   Fonte: Infoasturies.net

Asturies va pidir esti día nel real decretu d'especialidaes la especialidá l'asturianu y retrasar la LOMCE xunta Andalucía y Canaries

14/01/2015
Les comunidaes autónomes d'Andalucía, Canaries y Asturies volverán pidir al ministru d'Educación, Cultura y Deporte, José Ignacio Wert, na Conferencia Sectorial d'Educación que se celebra esti miércoles, que retarde la implantación de la Llei Orgánica de Meyora de la Calidá de la Educación (LOMCE) na Educación Secundaria y en Bachilleratu porque consideren que nun hai tiempu nin dineru abondo p'aplicala y qu'esisten una serie de "llagunes". Y Asturies va xuntar a esi pidimientu la desixencia de que nel real decretu d'especialidaes del oficiu docente pueda definise como especialidá l'asturianu. Nuna rueda de prensa conxunta, el conseyeru d'Educación y Cultura de la Xunta d'Andalucía, Luciano Alonso, afirmó que'l ministru puede escoyer ente "faer les coses bien y de forma consensuada" coles comunidaes o "siguir ampliando la sienda de los disparates", tres empecipiase la implantación en tres cursos d'Educación Primaria y na Formación Profesional Básica nel cursu 2014-2015. Alonso criticó la "azotada" puesta en marcha nel actual cursu académicu en Primaria y la desigualdá que, na so opinión, favoreció la llei ente los alumnos. Sobre la FP Básica, dixo que fracasó " nos sos oxetivos", porque esti cursu quedaron vacantes "miles de places", y que les autonomíes nun vieron "nin un solu euru" de los prometíos pol Ministeriu pal so financiamientu. Nesti contestu, apuntó que la LOMCE ye la primer llei d'educación que s'aprueba n'España "ensin memoria económica". Pela so parte, la directora xeneral de Formación Profesional, Desenvolvimientu Curricular ya Innovación Educativa del Principáu, Victorina Fernández, afirmó que n'Asturies tán "trabayando a estazón" nos desenvolvimientos curriculares pero nun lleguen a tiempu. Igualmente, aseguró que la llei tien "serios defectos" técnicos y que ente los centros educativos y les families xeneróse "muncha molición", a lo que se suma que'l financiamientu "nun ta clara" porque la fórmula ufiertada pol Ministeriu, usar el Fondu Social Européu, ye una solución "coyuntural". Per otru llau, Fernández dixo que va solicitar de nuevu a Wert que nel real decretu d'especialidaes del oficiu docente pueda definise como especialidá l'asturianu. "Tenemos la ufierta de la llingua en tola comunidá autónoma y los profesores que lu imparten precisen estabilidá", comentó. Fonte: Asturnews

Los internautes voten la emisión de la serie infantil ‘Los Bolechas’ como ‘Meyor noticia del añu pal asturianu’

La emisión de la serie infantil ‘Los Bolechas’ doblada al asturianu foi considerada polos internautes que siguen la propuesta que fai cada añu'l periodista y escritor Inaciu Galán como la ‘Meyor noticia del añu pal asturianu’. En segundu llugar empataron l’ésitu de les esperiencies de doblaxe de películes al asturianu en TPA y el votu favoratible de la Xunta Xeneral y el Conseyu Escolar del Estáu pa que’l profesoráu d’asturianu vea reconocida la so especialidá pol Ministeriu d’Educación. El periodista y presidente d'Iniciativa pol Asturianu, Inaciu Galán, ponía en marcha a entamos d’añu una votación popular al traviés d’internet col oxetivu de conocer les meyores noticies pa la llingua asturiana del añu 2014. Una votación qu’organiza per segundu añu consecutivu. Esti añu la encuesta recibió más de 300 respuestes de ciudadanos que quixeron contestala y escoyer ente les 23 noticies que propunxo Inaciu Galán. Los resultaos diéronse a conocer güei martes nel programa ‘La radio es mía’, presentáu por Pachi Poncela y Sonia Avellaneda na RPA, onde Galán tien una seición selmanal los martes a les 9:20 de la mañana. Dempués de dos selmanes de votaciones, y con un 27% de los votos, los internautes escoyeron como meyor noticia pal asturianu de 2014 la emisión de la serie ‘Los Bolechas’ doblada al asturianu, una de les primeres esperiencies nesti ámbitu na TPA. La reivindicación per parte de la sociedá civil, el sector educativu y munches families de cuntar con programes n’asturianu pa los neños na canal pública asturiana entama a vese cumplida anque con una duración bien curtia, de namás unos 10 minutos a la selmana. En segundu llugar, col votu d’un 23,8% de los participantes, empataron dos noticies. L'ésitu de les primeres esperiencies de doblaxe de películes al asturianu en TPA, que cuntaron con bona aceptación popular y audencia, y les votaciones de la Xunta Xeneral y el Conseyu Escolar del Estáu que tuvieron por resultáu la posición a favor del reconocimientu de la especialidá d'asturianu pal profesoráu, nel casu del parllamentu asturianu, col votu de tolos grupos políticos de la cámara, menos el PP, que chocantemente llevaba esta promesa nel so programa electoral de 2012. Los comentarios de los votantes per internet coincidieron na necesidá de que la emisión de películes doblaes y la programación infantil tenga continuidá, y que seya normal ver na televisión pública asturiana, películes y programes infantiles, ente otros conteníos, na nuesa llingua. En tercer llugar, col 20,6% de los votos, tuvo la noticia xenerada pola apaición del primer sistema operativu que permite tener un móvil dafechu n’asturianu. Un proyectu de Softastur que se presentó esti añu y que dio accesu a la llingua asturiana, gracies al software llibre, a un espaciu hasta agora torgáu. La cuarta noticia escoyida, col 17,5% de los votos, foi la puesta en marcha d'un informativu diariu na radio autonómica (RPA), que se fai cada día a les 13 hores baxo la direición de Naciu Varillas. La quinta noticia, col 16,7% de sofitos, ye la noticia que xeneró la cadena de distribución vasca Eroski, usando l'asturianu na rotulación del so centru en Mieres y nes redes sociales, onde contesta n’asturianu a les persones que-yos escriben nesta llingua. En sestu llugar los internautes escoyeron, col 15,1% los votantes decidieron que la votación en contra de la Xunta Xeneral pa refugar l’intentu del PP de facer competir al asturianu con otres llingües en primaria, amás de con Cultura Asturiana. Otres votaciones, nes que se consiguieron unos importantes consensos, siempres ensin el PP, que cola so mayoría absoluta bloqueó l’aprobación, foi la votación llevada alantre nel Congresu los Diputaos pa dotar a l’Academia de la Llingua Asturiana d’una partida nos Presupuestos Xenerales del Estáu, como tienen toles academies de llingües del Estáu español, asina como la solicitú presentada por Llamazares pa que’l Gobiernu solicitare a la RAE’l cambéu de denomación del asturianu nel so diccionariu. Estes midíes fueron propuestes por Iniciativa pol Asturianu. La noticia quedó en séptimu llugar col 11,9% de los votos. Con unos porcentaxes cercanos tuvieron la publicación del llibru ‘El Hobbit’ n’asturianu, la puesta en marcha de la tv dixital n’asturianu ‘Alderiques d’Asturies’, que’l RIDEA usara l’asturianu como llingua vehicular d’un congresu, la continuidá de la coleición d’Asterix n’asturianu (la salida del primer exemplar yera pa los internautes la meyor noticia del añu en 2013), la salida de Telegram n’asturianu o la llegada al Altu Comisionáu de Drechos Humanos de les Naciones Xuníes de la situación del asturianu, ente otres. Fonte: Asturnews

Presentaes 46 candidatures a los Premios Timón

El sábadu pasáu, 10 de xineru, zarró’l plazu pa presentar candidatures a los Premios Timón 2015 entamaos pola Asociación Cultural  L’Arribada

   Estos premios destínense a reconocer la trayectoria lliteraria de los escritores d’Asturies.  Pa esta edición, nes estayes lliteraries, optaron a los gallardones los/es escritores que nacieren nel añu 1.965 o antes. Trátase del IX Premiu Timón, p’autores en llingua asturiana y n’eonaviego, y del VI Premio Timón, p’autores asturianos en llingua castellana.

   Igualmente, prémiase tamién a asociaciones, sociedaes y fundaciones con sede n’Asturies que tengan por fin la conservación y promoción de la identidá cultural de nueso, per aciu del III Premiu Timón de Cultura Asturiana.

    Les candidatures presentaes son les que siguen:

IX PREMIU TIMÓN (autores n’asturianu y n’eonaviegu)
Lurdes Álvarez, Cristina Muñiz Martín, Esther Prieto, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano.

VI PREMIO TIMÓN (autores asturianos en castellano)
Fulgencio Argüelles, Pilar Sánchez Vicente, Francisco Álvarez Velasco, Pepe Monteserín, José María Ruilópez, Carmen Gómez Ojea, Herme G. Donis, Tino Pertierra, Aurelio González Ovies, Francisco García Pérez, José Luis Campal, Paco Abril, Luis Arias Argüelles-Meres, Fernando Fonseca, Ricardo Labra, Javier Lasheras, Pedro de Silva, José Luis Argüelles, Juan Cueto, Olvido García Valdés y Ángel García Prieto.

III PREMIU TIMÓN DE CULTURA ASTURIANA
Fundación Belenos, Asociación Cultural San Tirso del Eo, Fundación Nueva Asturies, Fundación Caveda y Nava, Iniciativa pol Asturianu y Asociación pola recuperación de los Sidros y les Comedies “El Cencerru” de Valdesoto.

   P’alcordar los gallardones l’asociación va conovcar trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de la décima edición de L’Arribada.

   Los ganadores anteriores fueron, del Premiu Timón, Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013) y Xosé Bolado (2014); del Premio Timón, Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013) y Carmen Ruiz-Tilve; y del Premiu Timón de Cultura Asturiana l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).                                                                                     Fonte: infoasturies.net

Viñetes d'Efrén d'Andrés

Toos  somos  Charlie  Hebdo

Ensin pallabres

Les viñetes d'Efrén d'Andrés.                    Fonte: asturies.com

Instala fontes n'asturianu

Dende esta selmana pasada ya puen instalase les fontes de lletra 'Noto' de Google pa la llingua asturiana, como pa delles otres lingües minoritaries, en Linux, Windows y Mac. La noticia dábala recién l'asociación Softastur. Más información: Páxina de Google pa les fontes Noto Fonte: Asturnews

Un añu de televisión 100% n'asturianu

Prestaríanos celebrar nesti xineru de 2015 un añu d’emisiones 100% n’asturianu na radiotelevisión pública. Pero magar los pasinos daos esti añu con unes mínimes esperiencies col doblaxe y la programación infantil, ente otros conteníos, la RTPA sigue siendo un mediu de comunicación estrañu, fuera de lo común nun territoriu con llingua propia. Gallegos, vascos, catalanes, baleares… toos tienen una televisión cola so llingua propia como llingua principal de la mesma.

Siguimos viendo imprescindible que la RTPA seya un mediu que sirva pa normalizar l’asturianu y non p’agrandar la diglosia y la marxinalidá del asturianu, como llingua pa la chancia, pa lo poco serio, namás pa lo rural y lo tradicional nel meyor de los casos. Sicasí, mientres trabayamos pa consiguilo contra la falta de voluntá política y la rocea pa col asturianu de los sos responsables, nun podiamos tar paraos.

La sociedá civil respuende con fuercia a esta falta de proyectu seriu pa la RTPA cola apaición d’Alderiques d’Asturies, el proyeutu de televisión 100% n’asturianu que ñació de la primer esperiencia de nueso nos medios, Iniciativa pol Asturianu nes ondes. Un programa de radio selmanal que consiguimos emitir en más d’una docena d’emisores nel territoriu asturianu  y que lleva yá un llargu camín, siendo voceru de la situación del asturianu y tolo qu’arrodia a la nuesa llingua.

Dende Iniciativa pol Asturianu, y en collaboración con Infoasturies y Conocer Asturias  siempres vimos nel proyectu d’Alderiques d’Asturies un elementu imprescindible pa la comunidá asturfalante, p’Asturies en xeneral. Y un añu más tarde nun podemos tar más satisfechos del llabor desendolcáu. Una televisión, que magar los pocos medios colos que cuntamos, ye digna, plural y cada vegada con más conteníos variaos.

Celebramos esti aniversariu cola seguranza de que ye’l primeru de munchos y namás l’entamu d’una profesionalización cada vegada mayor. El perfectu exemplu del lema col que ñació Iniciativa pol Asturianu, “Toma la inciativa”, porque nesti ámbitu, como en tantos, va tocanos siguir reclamando l’acción de les alminsitraciones públiques, pero tamién, como ciudadanos concienciaos y responsables, ponenos al llabor y ufrir a la sociedá lo que los poderes públicos-yos niega.

Fonte: Iniciativa pol Asturianu

El Cantar del Vasu - la llingua asturiana tien futuru

2015: Un añu decisivu

Escomencipia un añu que va ser movíu no político, con delles convocatories eleutorales que van decidir la configuración del poder nos nuesos conceyos, nel gobiernu del país y nel del estáu. Too apunta a que van producise cambeos importantes cola apaición de fuercies polítiques nueves y la reconfiguración del repartu de votos.

Ye nel campu políticu onde más va xugase’l futuru del asturianu, la so supervivencia. Y de lo bien que seyamos quien a convencer a toles fuercies polítiques nel necesariu consensu a favor de la normalización y la oficialidá del asturianu, va depender en gran parte’l futuru del idioma nesta etapa nueva que paez que se ta abriendo na política.

Nós, como siempres dende la nuesa postura apartidista, taremos sollertes a la configuración de los programes electorales, collaborando pa que seyan lo más ambiciosos posibles en toles fuercies polítiques. Taremos trabayando tamién pa xenerar consensos alredor del asturianu, pa siguir faciendo d’esta causa xusta, una causa amable, cada día más popularizada y asumida por toos cola importancia que tien p’Asturies caltener esti idioma. Y por supuestu, tres les elecciones, siguiremos sollertes al cumplimientu de los programes.

Tócanos convencer a los ciudadanos pa que la cuestión llingüística, ensin ser la única pa decidir el so votu, sí seya condición indispensable pa tener en cuenta a una formación a la hora de da-y el votu. La oficialidá ye l’oxetivu irrenunciable, pero non como fin en si mesmu, sinón como ferramienta necesaria pal posterior procesu de normalización que tien de ponese en marcha. En 2015 aguardamos cuntar contigo, con tola sociedá, pa que l’asturianu pueda facese coles ferramientes necesaries pa da-y la vuelta al procesu qu’anguaño ta llevándolu al desaniciu en pocos años.

Fonte: Iniciativa pol Asturianu

Una modesta zarzuela asturiana

 

Cartelu de la zarzuela asturiana "La promesa"

   Presentóse’l xueves 8 de xineru nel Teatru Xovellanos la obra ganadora del I Premiu de Teatru n’asturianu Pachín de Melás. El premiu fue pal conocíu grupu de teatru “Nun Tris”, capitanéau por Antón Caamaño, bon conocedor del mundu de les tables y meyor persona. La obra en custión fue la recuperación y actualización de la zarzuela d’Eduardo Martínez Torner  La Promesa.

   Fuimos, pues, al estrenu cola garantía del bon facer del musicólogu ovetense y la veteranía de los teatreros de “Nun Tris”, ensin embargu la obra nun tuvo l’altor esperáu. Munchos fueron los fallos que cualisquier aficionáu caltriaría na más sentase na butaca. El  primeru una especie de reportax como de vidiu-aficionáu que se  visionaba sobre’l telón, y nel cuál actores y responsables de la obra falaben alrodiu d’ella. Una cosa bastante probe na que, amás, salvo’l propiu Caamaño, toos falaben en castellán, cuando la obra taba anunciada como n’asturianu normativu. Sonaba a aquello del monologuista que s’espresa en perfeutu castellán hasta que principia’l monólogu. 
   Diglosia de llibru.  En cuantes a la obra en sí, la parte de los diálogos falaos llegaben nun tonu mui baxu al públicu, polo que se perdía gran parte d’ellos. Tábemos na fila 14 y sentíase too bastante mal. Abaste dicir que malpenes si entendimos el final de la obra, cuando apaecen n’escena una pareya de la guardia civil, porque lo que dicen los autores nun llega con claridá. Tampoco la espresión n’asturianu resulta convincente, con munches mecies y  pocu comencimientu espresivu, a nun ser Fernando Marrot nel papel de Tolina.

   En cuantes a la parte musical, tuvieron bien los coros del Orfeón Gijonés, y ficieronse simpáticos y bonos actores la pareya cómica Celuca (Margarita Sierra) y Silvino (Pablo Romero) que, amás, intervinieron muncho. Prestónos la voz de la protagonista Nela (Vanesa Touza), clara y bien timbrada, anque yera de les que peor se-yos entendía cuando falaba… y poco más. El barítono que facía’l papel de Miguelón, amás de tener poca voz taba fuera de tonu cuasi siempre, y el tenor que facía de Vitor tien una voz agradable pero mui llimitada.

   En fin, hai qu’aplaudir el trabayu y l’esfuerciu de tolos componentes de la obra, y l’interés por rescatar a un autor asturianu del escaezu, pero pal futuru habrá que cuidiar más otros detalles pa qu’esi esfuerciu se vea recompensáu  por un merecíu ésitu.                                 Fonte: wasturies.com / ww.trabayudecampu.com