Dende la propia ALLA hasta l'ámbitu sindical, siguen les amueses de refugu a la decisión ministerial, con fuertes crítiques tamién al gobiernu asturianu.
Dende l'Academia de la Llingua Asturiana treslladen nun comunicáu que "ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes".
Nesi sen, ceyen "llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería".
Poro, consideren "inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique. L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones".
Les crítiques lleguen tamién pel ámbitu sindical, dende organizaciones como la CSI o SUATEA. Éstos últimos señalen que "la redacción d'esti nuevu decretu nun s'axusta al textu de la LOMCE, onde'l ministeriu aceptó añadir la Disposición Adicional 38.6 (*) pa permitir que les comunidaes autónomes con llingües ensin calter d'oficial pudiesen mantener la so ufierta educativa. Esti ye'l casu d'Asturies, onde la presencia de la llingua asturiana tien presencia curricular en tolos niveles educativos y está regulada por la Lley de Usu y contemplada nel Estatutu d’Autonomía".
Apunten que "la situación anguaño ye complicada, y ye necesaria l'actuación urxente de tolos axentes implicaos, Academia, Conseyería, sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien".
Amesten tamién l'alcordanza "que'l Plenu del Conseyu Escolar del Estáu yá se pronunció nel mes de setiembre favorable a la creación d'esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, recomendó-y al Ministeriu la creación de la Especialidá de LLingua Asturiana. Pero agora el Ministeriu mira pa otru llau y desatiende la desixencia del mayor muérganu consultivu del Estáu en materia educativa".
Amás, afiten qu' "esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d'Asturies pronuncióse favorable a la so creación na primavera pasada, asina como la Xunta de Personal Docente d'Asturies que se tien manifestao nel mesmu sentíu en delles ocasiones. Asina mesmo, la propia Conseyera d'educación Ana González tien manifestao en reiteraes ocasiones que yera un de los compromisos que quería cumplir enantes d'acabar la presente llexislatura col enfotu de dignificar y normalizar la presencia de la llingua asturiana nel sistema educativu".
Fonte: Infoasturies
