Lurdes Álvarez, Piquero y la Fundación Belenos, merecedores de los Premios Timón 2017

• 
  

por Pablo R. Guardado

La escritora Lurdes Álvarez ye la ganadora del XI Premiu Timón p’autores en llingua asturiana y eonaviego de l’Asociación Cultural L’Arribada, mentes que la Fundación Belenós resultó merecedora del V Premiu Timón de Cultura Asturiana. Otra manera, el xuráu decidió conceder el VIII Premiu Timón p’autores asturianos en llingua castellana al poeta y traductor José Luis Piquero.

José Rogelio Álvarez Hevia, Esther García López, Humberto Gonzali, David M. Rivas, Pilar Sánchez Vicente y Xuan Xosé Sánchez Vicente, con María Teresa González Cobo como secretaria, decidieron los Premios Timón 2017 mientres una cena lliteraria celebrada en Xixón na nueche del vienres. Nesta ocasión aspiraben a los gallardones lliterarios que premien toda un trayeutoria creativa aquellos escritores nacíos nel añu 1967 o anteriores, pa lo que’l xuráu tuvo en cuenta “l'apueste pola creación d'unes obres lliteraries de gran calidá qu'espeyen una voz singular y que son a constituyise como referentes mui significativos de la poesía asturiana” de los dos premiaos.

Asina los ganadores foron los mierenses Álvarez y Piquero. Los dos recibieran una distinción consistente nuna obra del escultor y ceramista xixonés Jesús Castañón mientres la decimosegunda edición de L’Arribada.

Esta mesma recompensa tamién va dir pa la Fundación Belenos, que lleva’l gallardón más mozu de los trés, el Timón de Cultura Asturiana. Con esti fallu, el xuráu quier reconocer “un trabayu de munchos años desarrolláu per aciu de conferencies y homenaxes, del Seminariu d'Estudios Asturianos y, mui n'especial, de la revista ‘Asturies. Memoria encesa d'un País’ que vienen publicando dende 1996”. Precisamente, esta fin del selmana esti coleutivu celebra en La Puela’l XVII Seminariu d’Estudios Asturianos baxo’l nome de ‘Asturies: la viesca habitada’.

Palmarés

Álvarez, Piquero y la Fundación Belenos súmense poro al palmarés d’unos gallardones que, añu tres añu, ganen en sonadía y prestixu. Los ganadores n’ediciones anteriores foron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014), Esther Prieto (2015) y Esther García López (2016) nel casu del Timón p’autores en llingua asturiana y eonaviego; y Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) Francisco García Pérez (2015) y Pilar Sánchez Vicente (2016), nel d’ autores asturianos en llingua castellana.

Nel casu del de Cultura Asturiana, n’años anteriores recibiéronlo l’Asociación Cultural Ensame Sidreru (2013), la Xunta pola Defensa de la Asturiana (2014), l’Asociación pola Recuperación de Sidros y Comedies ‘El Cencerru’ (2015) y Ramón d’Andrés (2016).

Fonte: Asturies.com

Abiertu'l plazu pa inscribise nel taller de Wikipedia n'asturianu d'Arcu Lliterariu

Va celebrase los díes 26 y 27 dientro de la programación del Festival Arcu Atlánticu

 L'usuariu Víctor Suárez Piñero, alministrador y divulgador del proyeutu d'enciclopedia llibre n'Asturies, va impartir esti taller de dos hores dividíu en dos díes. Nél los presentes van deprender a xenerar artículos pa la enciclopedia llibre, que yá cuenta con casi 50.000 artículos na so versión asturiana, lo que convierte a la llingua asturiana na 78 de los 291 idiomes nos que se trabaya en Wikipedia.

 El taller, entamáu pola actividá Arcu Lliterariu qu'organiza l'Asociación Cultural L'Arribada, va celebrase nel aula 1 del xixonés Centru de Cultura Antiguu Institutu el martes 26 y miércoles 27, a les 19.30 hores. La inscripción ye de baldre cola tarxeta ciudadana de Xixón nes oficinas d'atención al ciudadanu, caxeros ciudadanos o na web d'actividaes de Xixón, y el requisitu únicu ye tener más de 16 años. El día caberu pa formalizala ye'l vienres 22.
Fonte: asturies.com

La Vagamar lliteraria de l’Arribada cumple diez años

  L’Arribada ye un proyectu de difusión que nuna década d’actividá cuntó con varies decenes de miles d’asistentes a los actos que se programaren, y nos que tienen intervenío cientos de participantes.

  La Vagamar lliteraria, una de les sos estayes, cumple’l décimu aniversariu esti añu y, pa cellebralo, l’asociación cultural entama un eventu nomáu 10 años de L’Arribada onde fai analís, ente’l 14 de payares y el 26 d’avientu, de la evolución cultural de Xixón y Asturiesper aciu d’un abanicu ampliu de propuestes en forma d’alcuentros con lliteratos y creadores artísticos, proyecciones, tertulies, presentaciones, conferencies, actos institucionales, actuaciones musicales, y otros

.

  Inclúyense l’homenaxe a la obra cinematográfica documental del director asturianu José Antonio Quirós, del que se verán les películes Solas en la Tierra y Gran Casal, me como el mundo. Igualmente, habrá una xornada dedicada al conceyu de Mirando do Douro, a la qu’asistirá’l so alcalde, xunto col escritor Mário Correia, que presentará’l so llibru José Afonso, andarilho nas Astúrias, y que participará nuna tertulia sobre temes mirandeses onde falará de Música y Etnografía y fadrá compaña a Alfredo Cameirão (Léngua Mirandesa) y Herminio Bernardo (Historia). Per otra parte, el día últimu del eventu, el xuráu de los Premios Timón comunicará’l fallu correspondiente a los gallardones de 2016.

  Los díes con actos van ser el 14,19,26, 27 y 28 de payares; y el 1, 2, 3, 4, 5, 9, 10, 11, 12, 14,1 5, 16, 18, 21, 22, 23 y 26 d’avientu. 10 años de L’Arribada tien una subvención estraordinaria del Ayuntamientu de Xixón, pola que se soscribió’l conveniu correspondiente. Los conteníos del programa podrán siguise nel blog del eventu.                                                                                                Fonte: asturnews.com

L’Arribada escueye a Gonzali de presidente

Na semeya, Humberto Gonzali

  L'Asociación Cultural L’Arribada vieno acabante d’escoyer como presidente nuevu a Humberto Gonzali, escritor y xestor cultural mierense, amás d’autor de guiones cinematográficos,  traductor y axustador audiuvisual que foi miembru de Conceyu Bable y profesor d’asturianu.

  En 1985 nómenlu secretariu de la Xunta pola Defensa de la Llingua Asturiana, coordinando daquella numberoses acciones de protesta pola denegación de derechos llingüísticos, destacando les promovíes ante la sanción al factor de FEVE de Nava por usar la toponimia tradicional. Xunto con Juan Bonifacio Lorenzo Benavente y Xicu Monteserín fundó en 1988 Orbayando, revista asturiana d’información, que codirixe hasta l’añu 1990.

  Nel 1990 creó con otros autores asturianos l’asociación Escritores y Traductores en Llingua Asturiana (ETLLA) de la que foi’l so presidente. Promovió la IV Xunta d’Escritores Asturianos celebrada en Villaviciosa en 1996, y promovió y foi’l coordinador de la V Xunta d’Escritores Asturianos fecha en Lluanco en 1998.

  En Xixón forma parte del Conseyu Asesor de la Llingua Asturiana dende 2008, foi miembru de la xunta rectora de la Fundación Municipal de Cultura, Educación y Universidá Popular(2005-2015) y asesor municipal nel Ayuntamientu (mandatu 2007-2011). Foi miembru de númberu de representación nel Real Institutu d’Estudios Asturianos (periodu 2007-2012)

  En 2006 crea ya impulsa L’Arribada como foru lliterariu y cultural, siendo dende 2008 el so coordinador d’actividaes na Vagamar, nes xonaes lliteraries del Arcu Atlánticu y na Semana Negra, asina como nos actos entamaos nos conceyos de Bimenes, Caravia, Castrillón, Colunga, Corvera, Santiso d’Abres y Villaviciosa.

  Como narrador, tien asoleyao los llibros de relatos Anatomíes de la mañana (1995) ya Histories escabroses (2002). Y como poeta, los poemarios Augua d’invocación (1988), Poemes en prosa (1992), Hábitat azul (1995), Ámbitu elemental (1997), Del país de la caliza (1997), Les esferes del tiempu (1998), De nueche y agua (2000), Tiempu de nós (2001) y Decenariu (2005). Tien traducío del francés y del catalán a los escritores François Sautereau y Maria Barbal. Como traductor audiuvisual versionó n’asturianu los diálogos de 16 doblaxes, ente ellos los de los llargumetraxes One-Eyed Jacks y Dirty Harry, qu’emitiera delles vegaes la Televisión del Principáu d’Asturies. La so obra atópase tamién en revistes lliteraries y en 28 llibros colectivos.                                                       Fonte: asturnews.com

L’Arribada abre’l plazu pa presentar candidatures pa los Timón 2016

por Pablo R. Guardado

Fina’l 10 d’avientu pa les trés categoríes. Nesta edición aspiren al gallardón los escritores nacíos nel añu 1966 o enantes.

Los Premios Timón creáronse nel 2007 col oxetivu de “reconocer la trayeutoria creativa de los escritores d’Asturies”. Nun primer momentu, taben centraos nos autores qu’emplegaben la llingua asturiana o eonaviego, anque dende’l 2010 sumóse una segunda categoría p’aquellos escritores del país qu’usaren el castellanu. Finalmente, nel 2013, l’Asociación Cultural L'Arribada sumó un Timón nuevu, el de Cultura Asturiana, nesti casu destináu a “asociaciones, sociedaes, fundaciones ya instituciones con sede n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu”.

Dende ayeri, y hasta’l 10 d’avientu, ye posible presentar candidatures a les tres categoríes nel corréu lletrónicu larribada@gmail.com. Éstes pueden facese de manera individual o en nome d’un coleutivu. Nesta ocasión aspiren a los Timón lliterarios los autores nacíos nel 1966 o enantes.

Trés xuraos valorará ente toles candidatures presentaes a la persona o entidá merecedora del X Premiu Timón p’autores en llingua asturiana y eonaviego, del VII Premiu Timón p’autores asturianos en llingua castellana y del IV Premiu Timón de Cultura Asturiana. Los ganadores recibirán una obra del ceramista y escultor xixonés Jesús Castañón na XI Vagamar.

Palmarés

Los ganadores del Timón n’asturianu y eonaviego son: Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013),  Xosé Bolado (2014) y Esther Prieto (2015). Mentes, llevaron el d’autores asturianos en castellanu Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013),  Carmen Ruiz-Tilve (2014) y Francisco García Pérez (2015).

Por último, nes trés ediciones del Timón de Cultura Asturiana resultaron condecoraos  l’Asociación Cultural Ensame Sidreru (2013), la Xunta pola Defensa de la Llingua Asturiana (2014) y l’Asociación pola Recuperación de los Sidros y les Comedies ‘El Cencerru’ (2015).

Fonte: Asturies.com

El llargumetraxe gallegu ‘A Esmorga’ va proyeutase en Xixón nel marcu del Arcu Atlánticu

   Les Xornaes Lliteraries del Arcu Atlánticu, entamaes pola Asociación Cultural L'Arribada, van mirar nesta ocasión a Galicia. La creación del país vecín va centrar gran parte de les actividaes, ente les que destaca la proyeición del llargumetraxe "A Esmorga", basáu na novela d’Eduardo Blanco Amor.

   La cultura del Arcu Atlánticu va enllenar la zona d’El Muelle un añu más del 24 de xunetu al 2 d’agostu y, como asocede dende l’aniciu del festival, nel 2012, L’Arribada encárgase de la organización d’Arcu Lliterariu, xornaes centraes nesta ocasión na lliteratura gallega. Presentaciones de llibros, conferencies, tertulies y actividaes teatrales y cinematográfiques van desendolcase mientres estos díes. Asina, va facese un repasu a la nómina d’autores del país vecín que tuvieren títulos de la so obra traducíos a la llingua asturiana, como ye’l casu ente más otros de Carlos Casares, Xosé Luis Méndez Ferrín, Álvaro Cunqueiro, Xosé Neira Vilas, Paco Martín, Xabier P. Docampo, Ánxel Fole o Úrsula Heinze.

   Blanco Amor, un autor de referencia pa les lletres gallegues, tamién va tener el so protagonismu, cola presentación d’un llibru y la proyeición, tres una xestión de Gonzali Producciones, del llargumetraxe d’ésitu basáu na so novela ‘A Esmorga’ (1959, n'Arxentina; 1970, en Galicia). Esta película en gallegu, nominada a los Goya na categoría de ‘Meyor guión adaptáu’, va poder vese n’Asturies per primer vegada tres acumular bones critiques y una bona respuesta de públicu, sobre manera en Galicia. Dirixida nel 2014 por Ignacio Vilar –que va tener un alcuentru col públicu en Xixón–, ta protagonizada por Miguel de Lira (Cibrán), Karra Elejalde (O Bocas) y Antonio Durán ‘Morris’ (Milhomes). “‘A esmorga’ ye la crónica tensa ya intensa de veinticuatro hores na vida de trés homes, compañeros de folixa que, dexando un regueru de destrucción, de sexu enquívocu y reprimíu, van zarrando puertes tres d’ellos y tirando les llaves, como pa nun naguar por volver y como si s’enfotaren en dir camín de la so perdición”, apunten dende L’Arribada. La fecha de la proyeición y l’alcuentru col direutor ta tovía por confirmar.                                                                            Fonte: asturies.com

"SIDROS Y COMEDIES” DE VALDESOTO LLOGREN EL III PREMIU TIMÓN DE CULTURA ASTURIANA

   L’Asociación pola recuperación de los Sidros y les Comedies "El Cencerru" de Valdesoto ye la ganadora de la edición tercera del Premiu Timón de Cultura Asturiana. Un xuráu formáu por Aurora García Rivas, Carlos Espina Alonso, Illán Gonzali, Verónica Rodríguez y Humberto Gonzali (presidente), actuando de secretaria Mayte González Cobos, otorgó’l gallardón en reconocencia al pervaloratible trabayu que vien faciendo esta entidá poles mazcaraes d’inviernu, les comedies de sidros y otros elementos rellacionaos que formen parte d’un patrimoniu inmaterial d’enorme valir cultural.

   El Premiu Timón de Cultura Asturiana va destináu a asociaciones, sociedaes, fundaciones y otres entidaes que tengan como fin la conservación y promoción de la identidá cultural de nueso. Esti añu, amás de l’asociación ganadora, tuvieron nominaos Fundación Belenos, Asociación Cultural San Tirso del Eo, Fundación Nueva Asturies, Fundación Caveda y Nava, Iniciativa pol Asturianu y Wikipedia n’asturianu

   Los gallardonaos anteriores fueron l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).

   El gallardón del Premiu Timón, consistente nuna obra del escultor y ceramista xixonés Jesús Castañón, entregaráse mientres la cellebración de la décima edición de La Vagamar.
Fonte: arribada.wordpress.com

Prieto y García Pérez lleven los Timón 2015

   L’uviedín Francisco García Pérez resultó gallardonáu col VI Premiu Timón p’autores asturianos en castellanu que convoca l’Asociación Cultural L’Arribada. Enantes diose a conocer el IX Premiu Timón pa escritores en llingua asturiana y eonaviego, que foi pa la cabraliega Esther Prieto.

   La codireutora d’Ediciones Trabe resultó escoyida ente los autores nacíos nel añu 1965 o enantes nominaos pa esta edición, una llista conformada por Lurdes Álvarez, Cristina Muñiz Martín, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano. El xuráu tuvo conformáu por Vicente García Oliva, David M. Rivas, Xuan Pandiella y Humberto Gonzali. Como secretaria actuó Mayte González.

   D’esta forma, Prieto pon el so nome al prestixosu palmarés d’esti gallardón, conformáu por Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013) y Xosé Bolado (2014).

La entrega, mientres La Vagamar        No que respeuta al Timón p’autores asturianos en castellanu, García Pérez superó nes votaciones a Fulgencio Argüelles, Pilar Sánchez Vicente, Pepe Monteserín, José María Ruilópez, Carmen Gómez Ojea, Herme G. Donis, Tino Pertierra, Aurelio González Ovies, Francisco García Pérez, José Luis Campal, Paco Abril, Luis Arias Argüelles-Meres, Fernando Fonseca, Ricardo Labra, Javier Lasheras, Pedro de Silva, José Luis Argüelles, Juan Cueto, Olvido García Valdés y Ángel García Prieto. Nesti casu, Alberto Álvarez Peña, Carlos Espina Alonso, José Luis Valladares, Jorge Hurlé y Humberto Gonzali, ésti últimu como presidente, formaron el xuráu. Mayte González tamién fixo la función de secretaria.

   El doctor en Filoloxía y caderalgu de Lengua Castellana y Literatura sucede nesta estaya del Timón a Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013) y Carmen Ruiz-Tilve (2014). Tovía queda por fallar el III Premiu Timón de Cultura Asturiana, gallardón pal que son candidatos la Fundación Belenos, l’Asociación Cultural San Tirso del Eo, la Fundación Nueva Asturies, la Fundación Caveda y Nava, Iniciativa pol Asturianu y l’Asociación pola Recuperación de los Sidros y les Comedies ‘El Cencerru’ de Valdesoto.

   Tolos ganadores van llevar una figura del ceramista xixonés Jesús Castañón que s’entregará nun actu mientres La Vagamar, actividá setembrina de L’Arribada que cumple diez ediciones.   Fonte: Asturies.com

Esther Prieto algama'l IX Premiu Timón 2015

Na semeya, Esther Prieto, Premiu Timón 2015

   La escritora cabraliega Esther Prieto ye la ganadora del IX Premiu Timón pa escritores en llingua asturiana y eonaviego convocáu pola Asociación Cultural L'Arribada, según alcuerdu d'un xuráu formáu por Vicente García Oliva, David M. Rivas, Xuan Pandiella y Humberto Gonzali, actuando como secretaria Mayte González.

L'autora, nacida n'Arenas en 1960, ye llicenciada en Filoloxía Hispánica pola Universidá d'Uviéu. Ente los títulos qu'integren la so obra espublizao destaquen los llibros de poesía Edá de la memoria (1992) y La mala suerte que ganó en 1998 el premiu Teodoro Cuesta. En 2001 llogra'l XXII Premiu Xosefa de Xovellanos cola novela Güelu Ismail. Creadora tamién d'obres de lliteratura infantil, apaez nes principales antoloxíes poétiques asturianes y, con dos cuentos, na antoloxía Muyeres que cuenten (1994).

   Esther Prieto ye la responsable de la edición lliteraria de la obra de dos autores de postguerra, Llorienzu Novo Mier (1991) y Cuno Corquera (1993) y autora de Gramática d'asturianu. Guía de consulta rápida. Trabaya na editorial Trabe en calidá de codirectora.

   A la edición de 2015 del Premiu Timón presentárense, amás de la d'Esther Prieto, les candidatures de Lurdes Álvarez, Cristina Muñiz Martín, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano.

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014)

   El gallardón del Premiu Timón, consistente nuna obra del escultor y ceramista xixonés Jesus Castañón, entregaráse en setiembre mientres la cellebración de la décima edición de L’Arribada.        Fonte: asturnews.com

Presentaes 46 candidatures a los Premios Timón

El sábadu pasáu, 10 de xineru, zarró’l plazu pa presentar candidatures a los Premios Timón 2015 entamaos pola Asociación Cultural  L’Arribada

   Estos premios destínense a reconocer la trayectoria lliteraria de los escritores d’Asturies.  Pa esta edición, nes estayes lliteraries, optaron a los gallardones los/es escritores que nacieren nel añu 1.965 o antes. Trátase del IX Premiu Timón, p’autores en llingua asturiana y n’eonaviego, y del VI Premio Timón, p’autores asturianos en llingua castellana.

   Igualmente, prémiase tamién a asociaciones, sociedaes y fundaciones con sede n’Asturies que tengan por fin la conservación y promoción de la identidá cultural de nueso, per aciu del III Premiu Timón de Cultura Asturiana.

    Les candidatures presentaes son les que siguen:

IX PREMIU TIMÓN (autores n’asturianu y n’eonaviegu)
Lurdes Álvarez, Cristina Muñiz Martín, Esther Prieto, Xosé Miguel Suárez, Esther García López, Belén Rico, Adolfo Camilo Díaz, Taresa Lorences, Xavier Frías Conde, Ignaciu Llope, Xosé Lluís Campal, Xulio Berros, Xulio Arbesú, Alberto Cobreros Gil, Consuelo Vega, Milio’l del Nido, Carme Martínez Pérez, Xilberto Llano y Ánxel Álvarez Llano.

VI PREMIO TIMÓN (autores asturianos en castellano)
Fulgencio Argüelles, Pilar Sánchez Vicente, Francisco Álvarez Velasco, Pepe Monteserín, José María Ruilópez, Carmen Gómez Ojea, Herme G. Donis, Tino Pertierra, Aurelio González Ovies, Francisco García Pérez, José Luis Campal, Paco Abril, Luis Arias Argüelles-Meres, Fernando Fonseca, Ricardo Labra, Javier Lasheras, Pedro de Silva, José Luis Argüelles, Juan Cueto, Olvido García Valdés y Ángel García Prieto.

III PREMIU TIMÓN DE CULTURA ASTURIANA
Fundación Belenos, Asociación Cultural San Tirso del Eo, Fundación Nueva Asturies, Fundación Caveda y Nava, Iniciativa pol Asturianu y Asociación pola recuperación de los Sidros y les Comedies “El Cencerru” de Valdesoto.

   P’alcordar los gallardones l’asociación va conovcar trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de la décima edición de L’Arribada.

   Los ganadores anteriores fueron, del Premiu Timón, Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013) y Xosé Bolado (2014); del Premio Timón, Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013) y Carmen Ruiz-Tilve; y del Premiu Timón de Cultura Asturiana l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).                                                                                     Fonte: infoasturies.net

Principia La Vagamar con un actu n'alcordanza del xesuíta asturianista González-Fierro Botas

Cartelu de la IX La Vagamar

    L’Asociación Cultural L’Arribada da aniciu esti vienres a la novena edición de La Vagamar con un actu d’homenaxe al xesuita asturianista Federico González-Fierro Botas. Les actividaes, que continúen mañana cola entrega de los premios Timón, van allargase hasta'l mes d'avientu.

   El patiu del xixonés Centru de Cultura Antiguu Institutu va acoyer esti primer eventu de La Vagamar col que L’Arribada quier reconocer el llabor de González-Fierro Botas, asina como del Coleutivu Manuel Fernández de Castro –del que foi fundador– “pola normalización llingüística ente la comunidá cristiana asturiana”. Nacíu n’Uviéu nel 1942, cursó los sos estudios nel Institutu de Bachilleratu Alfonso II, diplomóse en Llingües Clásiques (Llatín y Griegu) y doctoróse en Teoloxía y en Ciencies Polítiques y Socioloxía cola tesis doctoral titulada ‘La formación sindical impartida por Centrales representativas en España, 1976-1992’. Llicencióse tamién n’Historia, siendo profesor d’Historia Social, y foi espertu en llingua y lliteratura ruses y profesor visitante en delles universidaes de l’antigua Xunión Soviética y de l’actual Federación Rusa. Nesi país precisamente finó a los 59 años d’edá por mor d’un accidente de tráficu asocedíu nel 2002.

   Enantes, foi un cura obreru que vivió en Catalunya, Galicia y otres partes d’Europa, hasta acabar destináu na Fundación Revillaxixéu, onde foi xefe d’estudios, consiguiendo inxertar nel currículu del centru educativu la Llingua y Cultura Asturiana. Presidió tamién dende 1988 y hasta la so muerte’l Coleutivu Manuel Fernández de Castro, qu’axunta a sacerdotes favorables a la normalización de la llingua asturiana. Esta organización ye la responsable de la torna al nuesu idioma de la Lliturxa Católica y otres obres del mesmu calter, asina como del Evanxeliu de San Lluques, nes que participó González-Fierro Botas de manera mui activa, ente otres iniciatives.

   Esta tarde, a partir de les 19.30 hores, va tener llugar esti actu d’alcordanza que va presentar Humberto Gonzali, coordinador de L’Arribada. La primer actuación va protagonizala la Coral Asturiana de Gijón, pa depués siguir con delles intervenciones sobre la vida y obra de González-Fierro Botas a cargu de Carlos Rubiera, conceyal de Cultura, Educación, Mocedá y Fiestes; Xosé Nel Riesgo, direutor de la Fundación Municipal de Cultura, Educación y Universidá Popular; Xosé Ramón Iglesias Cueva, representante de l'Academia de la Llingua (ALLA); Ramón d'Andrés, filólogu y miembru del equipu de traductores y espertos de la Biblia n'asturianu; Pablo González-Fierro Huerta, sobrín del homenaxáu; y Xuan Pandiella, presidente de l'Asociación de Vecinos San Emiliano de Vega.

Tres una llectura poética n’asturianu y rusu a cargu d’Aurora García Rivas, D’Andrés, Xosé Bolado, Xuan Xosé Sánchez Vicente, Gonzali y Marina Mikayelyan, con acompañamientu musical de Dani García de la Cuesta, va facese una alcordanza de dos llibros qu'espeyen la faceta de traductor de Fierro Botas: ‘Antoloxía Poética Asturiana’ y ‘Poesíes Llíriques d'Aleksandr Pushkin’. L'actu terminará cola segunda parte de l'actuación de la Coral Asturiana de Gijón.

Premios Timón y otres actividaes

   Mañana va continuar la programación de La Vagamar cola entrega de los premios Timón, nel mesmu llugar y a la mesma hora. Esti añu los gallardonaos son l’escritor y miembru de l’ALLA, Xosé Bolado (VIII Premiu Timón p'autores n'asturianu y eonaviego); la escritora y cronista oficial d'Uviéu, Carmen Ruíz-Tilve (V Premio Timón p'autores asturianos en castellanu); y la Xunta pola Defensa de la Llingua Asturiana (II Premiu Timón de Cultura Asturiana). L'actor Alberto Rodríguez va conducir l’actu, nel que va actuar el grupu Taranus.

   L’actividá de La Vagamar nun fina esta fin de selmana, yá que tán previstos actos hasta’l mes d’avientu. De momento, ta programáu pa ochobre’l ciclu ‘Asturies y les sos lliteratures’, con sede na sala de conferencies del Antiguu Institutu. José Luis Valladares va abrir esta estaya’l llunes día 6, a les 20 hores, cola presentación del llibru ‘La casta política, sus abusos y complicidades’, qu'axunta artículos sobre la política española de los últimos años, espublizaos nel so momentu en diversos diarios dixitales y na prensa asturiana. El martes 7, a les 19:30, ye'l turnu de ‘Les manes enceses’, una antoloxía d'Eugénio d'Andrade con poemes traducíos a la nuesa llingua por Antón García, mentes que’l miércoles 8, a les 19:30, va protagonizar la xornada ‘Contra'l silenciu’, esbilla y compilación de Berto García de poemes pertenecientes a la cuasi totalidá de los poetes del Surdimientu. Zarra esti ciclu’l xueves 9, a les 20 hores, Pilar Sánchez Vicente cola presentación de la so novela más recién, ‘Luciérnagas en la memoria’.

   Pa payares y avientu, L’Arribada anuncia tertulies, proyeiciones cinematográfiques y más actos lliterarios, tovía por confirmar. Como gran ausencia d’esta edición ta la tradicional arribada d’escritores a El Muelle, que nun se celebra por motivos presupuestarios.      Fonte: Asturies.com

L'Arribada fadrá en setiembre un homenaxe a Federico González-Fierro Botas

Nueva actividá de L'Arribada, programada pa setiembre.

    El vienres 26 de setiembre, mientres la Vagamar 2014, l’Asociación Cultural L’Arribada va entamar un homenaxe al xesuita y escritor Federico González-Fierro Botas. Nacíu n’Uviéu (30 de payares de 1942), cursó los sos estudios nel Institutu de Bachilleratu Alfonso II, diplomóse en Llingües Clásiques (Llatín y Griegu) y doctoróse en Teoloxía y en Ciencies Polítiques y Socioloxía cola tesis doctoral titulada “La formación sindical impartida por Centrales representativas en España, 1976-1992”. Llicencióse tamién n’Hestoria siendo profesor d’Historia social. Foi espertu en llingua y lliteratura ruses y profesor visitante en delles universidaes de l’antigua Xunión Soviética y de l’actual Federación Rusa.

   Cura obreru nos años 60 y 70 del sieglu XX, trabayando d’empleáu manual de fábriques, carteru y otros en Cataluña, Galicia y per Europa. Nesi tiempu collabora con delles organizaciones obreres, sobremanera en materia de formación de los sos militantes. En 1996, fai un manual de formación sindical. Viaxa en numberoses ocasiones a la Xunión Soviética onde surde’l so interés pola cultura rusa. Destináu pola so orde a Xixón trabaya como profesor na Fundación Revillaxixéu, onde sedría xefe d’estudios ya inxerta  nel curriculu del centru educativu Llingua y Cultura Asturiana.

   Foi miembru fundador del Coleutivu Manuel Fernández de Castro, entidá qu’axunta sacerdotes favorables a la normalización de la llingua asturiana y que presidiría ente 1988-2002. Dende esta asociación publica col tamién sacerdote Alexandru Rodríguez Alonso la torna al asturianu de la Lliturxa Católica y otres obres del mesmu calter. Ye cotraductor delEvanxeliu de San Lluques al asturianu. En1991 tradució tamién al asturianu les Poesíes Líriques del rusu Alexander Pushkin. Asinamesmo, collaboró dende’l primer momentu cola Sociedá Bíblica Internacional nel proyectu de torna al nuesu idioma de los distintos llibros de les Sagraes Escritures.

   Col estudiu Reflexión ético-política ante o referéndum do Estatuto de Autonomía para Galicia, espublizáu na revista “Encrucillada” nel 1980, recibe’l XXIII Premiu periodísticu “Fernández Latorre” de La Voz de Galicia.

   Foi Asesor de Xusticia y Paz d’Asturies dende 1985 y tamién Cordinador de la Vicaría Xeneral del Arzobispáu d’Uviéu pa les traducciones bíblico-llitúrxiques al asturianu 1988-2002 y patronu de la Fundación Caveda y Nava.  El 26 xunu de 2002  morría a los 59 años nun acidente de tráficu en Vladivostok (Rusia).

   El Conceyu de Xixón convoca añalmente, dende 2008, el Premiu Federico G. Fierro Botas d’ensayu y trabayos d’investigación. Igualmente, L’Academia de la Llingua Asturiana convoca’l Concursu de recoyida de material lliterario escrito Federico Fierro G.-Botas.

   L’actu de la Vagamar sedrá un homenaxe a esti autor asturianista y, al empar, al coleutivu de sacerdotes que trabayen y trabayaron pola normalización llingüísticu ente los cristianos.      Fonte: Infoasturies.net

Los Premios Timón 2014 convocáronse ayeri pola Asociación Cultural L'Arribada

Los Premios Timón 2014 arrancaron esti llunes
Ayeri llunes, 18 de payares de 2013, abriose la convocatoria de los Premios Timón 2014 entamaos pola Asociación Cultural L’Arribada y destinaos a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones quienes nacieren nel añu 1.964 o antes Les candidatures, razonaes, puen ser presentaes por una persona o un colectivu nes señes de corréu electrónicu de l’asociación hasta’l 2 de marzu de 2014.    Los Premios Timón destínense a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones los/es escritores que nacieren nel añu 1.964 o antes. Trátase del VIII Premiu Timón, p’autores en llingua asturiana y n’eonaviego, y del V Premio Timón, p’autores asturianos en llingua castellana.    Igualmente, prémiase tamién a asociaciones, sociedaes y fundaciones con sé n’Asturies que tengan como fin la conservación y promoción de la identidá cultural de nueso, per aciu del II Premiu Timón de Cultura Asturiana.    P’alcordar los gallardones l’asociación convocará trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de La Vagamar 2014.    Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013); del Premio Timón, Luis Fernández Roces (2010), Juan Méjica (2011), Fernando Menéndez (2012) y Gonzalo Suárez (2013); y del Premiu Timón de Cultura Asturiana, l’Asociación Cultural Ensame Sidreru (2013). Fonte:  Asturnews.