CSI, SUATEA, CCOO y UGT refuguen el nuevu currículu d'ESO y Bachilleratu y reivindiquen la oficialidá del asturianu

Consideren que'l nuevu currículu conderga'l futuru del asturianu nes etapes cimeres del sistema educativu. Les cuatro fuercies sindicales roblen el viniente comunicáu conxuntu:

L'actual Conseyera d'Educación fixo públicu'l compromisu de creación de la especialidá de Llingua Asturiana a lo llargo de la presente llexislatura. A escasu tiempu de qu'ésta termine, les organizaciones sindicales SUATEA, Fete-UGT, Fe-CCOO y CSI, vemos frustrada esa espectativa y pa con ella la posibilidá de normalizar la situación de los docentes qu'imparten esta asignatura.

Na última resolución de la Xunta de Personal Docente non Universitariu, aprobada por unanimidá, esixíase la tramitación pela vía d'urxencia de la creación d'esta especialidá, cuestión especialmente importante nun contestu d'inminente aprobación d'un nuevu decretu estatal d'Especialidaes y de la inmediata aplicación del nuevu currículu LOMCE na enseñanza Secundaria y Bachilleratu.

Lloñe d'esto, la situación na que nos atopamos ye d'incertidume absoluta sobre la posibilidá d'avanzar na regularización de l'asignatura. Tres la respuesta del Ministeriu y la falta d'iniciatives concretes per parte de la Conseyería asturiana, el profesoráu va siguir avocáu a la so situación d'inestabilidá lo que repercute negativamente na calidá de la enseñanza.

Con too esto, la situación entá pudo dir a peor. L'alministración pon sobre la mesa una propuesta de currículu que supón una agresión directa a la presencia de la Llingua asturiana y del Gallego-asturianu na educación Secundaria y el Bachilleratu. Ye una propuesta qu'incumple la Llei d'Usu y marxina l'asignatura como nunca se fixera hasta agora.

Per un llau va competir con gran númberu de materies, per otru va esixise, pa ser cursada en cursos cimeros habela estudiáu con anterioridá, y como colofón, ve amenorgáu'l so horariu de 4 hores selmanales a 1 nel Bachilleratu.

Ye indefendible la posibilidá d'impartir con un mínimu calidá esta enseñanza y menos entá cumplir col currículu que para ella foi asignáu n'esti mesmu decretu. Una hora selmanal ye una burlla tantu pa los profesionales que tendrán d'impartila como pal alumnáu qu'opte al so aprendizaxe.

Na práctica, esti apueste de l'alministración educativa supón condergar, al curtiu plazu, el futuru del asturianu nes etapes cimeres, y tener nel futuru una incidencia negativa na escolarización nel restu d'etapes educatives. En tou casu manifiesta la nula intención de contribuyir al fomentu de la recuperación, desenvolvimientu y promoción del usu de la nuesa llingua, elementos que, xuntu col establecimientu de los medios qu'amparen el derechu de los cuidadanos a conocelo y usalo, constitúin l'oxetivu que marca la Llei d'Usu y promoción.

Consideramos que declarar oficial a la Llingua asturiana ye, nestos momentos, la midía que podría solucionar el so estatus nel ámbitu educativu y la única apuesta rial que impedirá la degradación total hasta la so desapaición.

Fonte: Infoasturies

Siguen les reaiciones de refugu pola negativa pa la creación de la especialidá docente d'asturianu

Dende la propia ALLA hasta l'ámbitu sindical, siguen les amueses de refugu a la decisión ministerial, con fuertes crítiques tamién al gobiernu asturianu.

Dende l'Academia de la Llingua Asturiana treslladen nun comunicáu que "ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes".

Nesi sen, ceyen "llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería".

Poro, consideren "inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique. L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones".

Les crítiques lleguen tamién pel ámbitu sindical, dende organizaciones como la CSI o SUATEA. Éstos últimos señalen que "la redacción d'esti nuevu decretu nun s'axusta al textu de la LOMCE, onde'l ministeriu aceptó añadir la Disposición Adicional 38.6 (*) pa permitir que les comunidaes autónomes con llingües ensin calter d'oficial pudiesen mantener la so ufierta educativa. Esti ye'l casu d'Asturies, onde la presencia de la llingua asturiana tien presencia curricular en tolos niveles educativos y está regulada por la Lley de Usu y contemplada nel Estatutu d’Autonomía".

Apunten que "la situación anguaño ye complicada, y ye necesaria l'actuación urxente de tolos axentes implicaos, Academia,  Conseyería,  sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estául convocáu pal 3 de febreru que vien".

Amesten tamién l'alcordanza "que'l Plenu del Conseyu Escolar del Estáu yá se pronunció nel mes de setiembre favorable a la creación d'esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, recomendó-y al Ministeriu la creación de la Especialidá de LLingua Asturiana. Pero agora el Ministeriu mira pa otru llau y desatiende la desixencia del mayor muérganu consultivu del Estáu en materia educativa".

Amás, afiten qu' "esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d'Asturies pronuncióse favorable a la so creación na primavera pasada, asina como la Xunta de Personal Docente d'Asturies que se tien manifestao nel mesmu sentíu en delles ocasiones. Asina mesmo, la propia Conseyera d'educación Ana González tien manifestao en reiteraes ocasiones que yera un de los compromisos que quería cumplir enantes d'acabar la presente llexislatura col enfotu de dignificar y normalizar la presencia de la llingua asturiana nel sistema educativu".

Fonte: Infoasturies

La estaya d’educación de la CSI pide que se tengan en cuenta les titulaciones d’asturianu y gallego-asturiano nos baremos a les oposiciones

La CSI denuncia que l’Alministración torne a escluir les llingües d’Asturies nos baremos pa les oposiciones.

Otra vegada más l’asturianu torna a ser infravaloráu quedando fuera de xuegu nos procesos de baremación pal ingresu de los cuerpos docentes qu’alcordaron y pactaron FETE UXT y ANPE xunto a l’Alministración xestionada pol PSOE. Nesti alcuerdu queden fuera les titulaciones d’espertu en llingua asturiana y les de gallego asturianu qu’imparte la Universidá d’Uviéu.

Según indiquen dende la CSI nel so comunicáu, estes dos especialidaes quedaríen fuera de l’apartáu de formación académica, onde en cambiu si que  diríen el restu de llingües oficiales de l’Estáu español y llingües estranxeres como l’inglés entre otres, cuntando toes elles pa la baremación pal procesu d’accesu a los cuerpos docentes del sistema educativu asturianu.

Amás, dende’l sindicatu esixen qu’esta situación se igüe d’una vegada y que nun se sigan infravalorando nin despreciando les llingües d’Asturies, pidiendo la creación de la especialidá docente de Llingua Asturiana y Gallego-asturiano asina como la convocatoria d’oposiciones pa les mesmes. Tamién piden que se faiga la declaración d’oficialidá de dambes llingües como igüa a esti problema que se lleva sufriendo dende va años y finar coles torgues al drechu de falar, enseñar y deprender les llingües d’Asturies.

Fonte: Infoasturies

CSI denuncia que la nueva llei avanza haza la privatización de RTPA

Señalen direutamente a PSOE y PP como principales responsables de la nueva llei.

 

Semeya  d'archivu,  RTPA Llaboral

   La seición sindical de la CSI na radiotelevisión pública asturiana señala que "yá dende los sos oríxenes los pensadores de la RTPA discurrieron un modelu de radiotelevisión semiprivada, la pequeña parte pública, siempres bien llindada, yera namái la escusa pa que'l financiamientu del proyectu saliera del bolsu de tolos ciudadanos, daqué malo de xustificar d'otra manera. L'eufemismu de que RTPA tendría de contribuyir a impulsar el sector audiovisual asturianu yera la sida pa trespasar fondos públicos directamente a empreses privaes. Asina, empreses como Enfoque Visual, Teletemas, Videoimagen, Ten Con Ten y un llargu etcétera convertíen directamente dineru público en beneficiu priváu ensin entremedias ufiertar nengún serviciu a la sociedá", denuncien.

   Amás, tal como amesten, "cuando llegó Foro al gobiernu, negándose a financiar estos y otros chanchullos pero incapaz d'ellaborar un plan d'actuación que camudara la xestión, cortó les tresferencies a RTPA, ésta nun pagó a les empreses contrataes y éstes dexaron de pagar les nómines a los trabayadores. Esi foi'l detonante d'una serie de denuncies de cesión illegal per parte de un trabayadores yá bien ’quemaos’ y que si nun cobraben el so sueldu yá nun teníen nada que perder. Finalmente, tres les sentencies que reconocíen la esistencia de cesión illegal, RTPA hubo de faese cargu de los pagos d'estes nómines atrasaes, amás de les diferencies salariales [...]".

   Al so paecer "esti modelu semiprivado tenía dos empreses como grandes beneficiaes. Proima-Zebrastur y Asturmedia, encargaes dende l'orixe de la RTPA y hasta l'actualidá, la primera de la programación de tarde habitual de la cadena, asína como otres retresmisiones y programes especiales. El procedimientu de contratación con estes empreses siempres foi opacu", apunten.

   Pa la CSI la nueva llei plantegada nun ameyoraría pa nada la situación, y ye que nun cumpliría una llexislación qu'esixe la emisión d'al menos los informativos ensin intervención esterna, pero tamién salvaguardar la prestación del serviciu. Sicasí, manifiesten que "l'altu grau de privatización que sufre anguaño la RTPA algama árees estructurales completes que deriven na imposibilidá d'emitir nin siquier un informativu ensin la intervención de nengún trabayador subcontratao y precario. Un escenariu qu'estropia gravemente la salú llaboral de RTPA, de los sos trabayadores directos ya indirectos y que perxudica notablemente'l desenvolvimientu del sector audiovisual asturianu".                                                                                                                 Fonte: Infoasturies

Tenneco Automotiv espubliza’l so conveniu n’asturianu

Tenneco Automotiv espubliza’l so conveniu n’asturianu pola reclamación de la CSI.

La Seición Sindical de la Corriente Sindical d’Izquierda (CSI) en Tenneco vien d’algamar que la empresa multinacional “Tenneco Automotiv” (anantes “Monroe”) se viere obligada a espublizar el Conveniu Coleutivu de la empresa n’asturianu. Según espliquen dende la Corriente, "en 2011, por entamu de la Seición Sindical de CSI, los y les trabayadores de Tenneco llevaron alantre delles xornaes de fuelga demientres la negociación del Conveniu Colectivu la empresa . El resultáu d’esta movilización apareyó, anantes de nada, una riestra meyores nes condiciones llaborales de la plantía, que, inclusu, garantizaben un xorrecimientu de la contratación indefinida".

Por too ello, "ente eses reivindicaciones, la Seición Sindical de CSI-Tenneco algamó incluyir, nel Conveniu Coleutivu, una cláusula de “Fomentu del Asturianu”, que, lliteralmente, obligaba a la empresa al “Conveniu impresu en billingüe: español y asturianu".

Según treslladen dende dende'l sindicatu de clas asturianu, "Magar ello, la empresa Tenneco, obrando de mala fé, espublizó’l Conveniu esclusivamente n’español. La rempuesta de la Seición Sindical de CSI nun se fizo esperar y una denuncia delantre la Inspeición de Trabayu, con resultáu favoratible, fizo que la multinacional nun tuviera otra qu’espublizar el Conveniu n’asturianu".

Pa la CSI, fechos comu esti, "asoleyen, bien a les clares, que los avances de la clas obrera son compatibles dafechu colos avances na cultura y na identidá asturianes".

L’asociación N’ast felicitó a la CSI por esti pasu dau.

Fonte: Asturnews