Analicen en Bilbo delles llingües ergatives

Analicen en Bilbo delles llingües ergatives, como l'euskera, l'hindi o les malayo-polinesies.
Espertos en llingüística analizaron dellos idiomes, nel tercer Congresu Internacional sobre Llingües Ergatives, aquélles nes que'l suxetu de les construcciones intransitives márcase de la mesma manera que l'oxetu de les transitives, y el suxetu de les transitives márcase de manera diferente. Ente elles alcuéntrense l'euskera, l'hindi, aborixes australianes como'l dyrbal, malayo-polinesies como'l tagalog, caucásiques como l'avar, y daguestanes y xinotibetanes como'l tibetanu.
Les xornaes, que se cellebraron la selmana pasada en Bilbo, tán organizaes pol grupu d'Investigación Gogo Elebiduna-La Mente Billingüe de la UPU/EHU, col oxetivu d'aldericar sobre la natura d'estes llingües.

Según desplicaron los sos organizadores, aprosimadamente un 25 % de les llingües del mundu descríbense como llingües ergatives. Esti tipu llingüísticu, indicaron, "ye menos conocíu que'l tipu nominativu-acusativu, al que pertenecen la mayoría de les llingües d'Europa, como l'español o l'inglés, y nesti momentu "siguen plantegando cuestiones fundamentales nel determín de les característiques xenerales del llinguaxe humanu y les llendes de la variabilidá de les llingües".
Demientres la conferencia que se realiza con una periodicidá biañal, celebrándose pasaes ediciones nel 2005 na Universidá de Tornot y nel 2007 nel Massachusetts Institute of Technology, aldericóse sobre cuestiones como si la ergatividá ye una carauterística llingüística homoxénea o si s'inclúi baxo esta categoría un grupu heteroxéneu de llingües.
Amás, presentáronse trabayos de llingüística y tipoloxía gramatical y discutiéronse los resultaos d'estudios sobre conocencia y procesamientu de llingües ergatives.

El conceyu convocó a una trentena de ponentes d’estremaos países, espertos en diferentes llingües y árees d'investigación llingüística. Amás de los ponentes, seleccionaos por un comité científicu internacional, asistieron como convidaos los profesores Anoop Mahajan (UCLA), Julie Legate (University of Pennsylvania) y Esther Torrego (University of Massachussetts Boston).

Fonte: Europa Press

Los Oscar 2011 podríen tener una película candidata en llingua catalana

L’Academia de Cine Catalán quier presentar un filme que compita como meyor película de fala non inglesa. En Hollywood piden qu’haiga consensu cola Academia Española. "Dir a los Óscar daría esnales al cine catalán y al español en xeneral", según l’actor Joel Joan, presidente de la institución.

L’Academia de Cine Catalán nagua por presentar a los Oscar de 2011 un filme en versión orixinal -en catalán- como candidatu a meyor película estranxera.Asina lo ha espresara en Los Ángeles Joel Joan, presidente de la institución, tres xuntase col so homólogu de l’Academia de Hollywood, Tom Sherak, qu’acoyera con agradu la propuesta, anque pidió consensu cola Academia de Cine Español. "Quedóse sosprendíu pola cantidá de películes que rodamos en versión orixinal, qu’esti añu foron más de 15, y de conocer esta cultura tan reconocida per toa Europa", comentó Joan, añediendo que "dende va 10 años" Cataluña tien "una industria suficiente pa presentar les nueses propies películes". Tamién, desplicó que "dir a los Oscar daría esnales al cine catalán y al español en xeneral". L’Academia de Cine Catalán proyeuta en Hollywood estos díes una amuesa d’11 películes col envís de promover la participación nos Oscar de filmes en llingua catalana.

Joan desmarcóse de posibles polémiques y fizo un apueste por arriquecer el cine español abriendo puertes al catalán. "Teniendo la llingua como puerta pa entrar nos Oscar ye una llástima que nun se promocione más cine español; ésa ye la batalla na que tamos metíos", argumentó.

Fonte: 20 minutos

I Concursu de Cuentos Curtios "José Antonio Robles"

L’Ayuntamientu d’Ayer ta acabante convocar el Primer Concursu de Cuentos Curtios pa xóvenes. Al concursu puen presentase toles persones interesaes ente 14 y 30 años con cuentos de fasta cuatro fueyes con temática ye llibre.

El certame cunta con dos premios de 500 euros, unu pa cuentos n'asturianu y otru pa los cuentos en castellán.

El plazu d'entrega d’orixinales ta abiertu hasta’l 15 de febreru de 2010, pudiendo entregase les obres en mano o unviase per corréu certificáu a la Casa Cultura (Avenida de la Constitución 31, 33670 Morea d’Ayer), conseñando nel sobre "Pal I Concursu de Cuentos D. José Antonio Robles".

· Bases completes

Fonte: Infoasturies

La lliteratura infantil y xuvenil n'asturianu llegó a la maurez

García Oliva considera que la lliteratura infantil y xuvenil n'asturianu llegó a la so etapa de maurez y espoxigue.
L'escritor y académicu de la llingua Vicente García Oliva consideró güei que la lliteratura infantil y xuvenil n'asturianu ta nesti momentu na so etapa d'espoxigue y maurez, cola apaición de temes diversos estremaos de los yá tradicionales, como yeren los didáuticos o mitolóxicos.

Foi la conclusión principal de la so intervención güei nes Xornaes d'Estudiu de la Llingua Asturiana, qu'organiza l'Academia de la Llingua na Facultá de Filoloxía de la Universidá d'Uviéu.
García Oliva dio dellos apuntes que debe valir como base pa ellaborar una hestoria de la lliteratura infantil y xuvenil, considerando qu'había que tomar como puntu de partida 'Montesín' de María Xosefa Canellada, "con dalgún referente anterior, pero ensin importancia". Sí matizó que se debería dedicar un capítulu previu a la lliteratura oral y escrita. "Los cuentos populares yá vienen de munchu tiempu, y los neños participen del disfrute d'ellos y de les alvertencies que trayíen".

Dempués consideró qu'hai cuatro etapes cronolóxiques. La primera refierse al didautismu, al ser na so mayoría llibros didáuticos, dirixíos al deprendimientu. Una segunda etapa sedría'l traduccionismu, onde predominaríen les traducciones, non sólo de castellán, sinón d'otres llingües. La tercer etapa sedría'l mitoloxismu, porque cola apaición de nuevos autores, "munchos sacaben llibros de seres mitolóxicos faciendo coses de les más diverses, como dir al espaciu o pegase".

A lo último, taría la etapa actual, "la del espoxigue, o maurez" d'esta lliteratura. "Los temes yá son abiertos: temes importantes como l'ecoloxismu, la guerra civil, violencia, el terror", comentó. Como exemplos d'esti últimu pasu, mentó llibros como 'El nome de Roselina' de Carmen Ojeda, o 'Elemental querida Lisa', del propiu García Oliva, sobre la guerra civil. Tamién señaló otres obres, como 'Caos' de Dolfu Camilo, o 'La neña de les trences al revés' d'Iris Díaz Trancho, que trata les diferencies ente cultures y países.

Fonte: Europa Press

La Wikipedia en bretón algama 30.000 artículos

La versión en bretón de Wikipedia algamó 30 000 artículos el 25/10/2009, lo que la posiciona nel rangu 51 sobre más de 250 llingües partícipes. Esto ye un proyeutu d’enciclopedia coleutiva establecida sobre Internet, universal, multillingüe. Wikipedia tiene como oxetivu ufiertar un conteníiu llibre, neutru y verificable que caún pue editar y meyorar. Wikipedia n’inglés foi fundada’l 15 de xineru de 2001 por Jimmy Wales, la versión en bretón surdió’l 22 de xunu de 2004. Nel llicéu Diwan de Karaez, tán cinco participantes dende va dos años nun club Wikipedia. Equí tán les rempuestes de Gwenn y Yves-Marie.

«Quién contribúi a Wikipedia bretón?» - Los qu’escriben en Wikipedia son de los lliceos, universitarios y profesores de bretón. Los redautores investiguen informaciones sobre otres bases de datos, coles sos conocencies personales, o tovía con llibros, de los documentos, y nun copien si hai un copyright.

«Que vos aporta tou esti tiempu pasáu énte’l vuesu computador p’alimentar Wikipedia bretón?» - Toi motiváu, porque ye un mou de facer adelantrar la llingua bretona con esta triba d’“escaparate” qu’eso podría ser. Deprendí muncho escribiendo estos artículos. Pero tamién en cuanto al bretón, porque nun soi perfeutu y toi contentu cuando los collaboradores me despliquen riegles, cómo escribir ciertes pallabres, etc ... - Pa min, yes cuasi un relaxu cuando trescurre tanto tiempu de trabayar al llicéu demientres la selmana! Ye que motiva porque depréndese muncho tornando los pasaxes, y amás, faense coses pa que’l bretón avance!

«Qué conseyos prudentes daríais- a los qu’entá nun tuvieren na Wikipedia ?» - Nun ye enxamás demasiáu sero, ye fácil de deprender y si sabéis escribir bretón podéis escribir na Wikipedia. Pasaréis un pocoñín de tiempu pa deprendere tolos códigos, ye too. -Los asuntos s’escueyen dependiendo de les propiedaes que presten a los contribuyentes: nós por exemplu, tenemos un especialista de los animales, otru d’Hestoria, otru d’Alemaña, otru puestu n’Informática. Wikipedia ta abierta a toos. Ye una triba de comunidá, un llugar que foi fechu pa los intercambios y cada usuariu tien una páxina onde pue plantegar cuestiones a los demás. El mio conseyu: lleer bien les primeres páxines pa los qu’entamen (desplica too) y nun tener llercia de plantegar cuestiones.

Fanny Chauffin

Fonte: Agence Bretagne Presse

32 Congresu Internacional d'IBBY

Ente l’8 y el 12 setiembre de 2010 cellebraráse en Santiago de Compostela, Galicia’l 32 Congresu Internacional de IBBY tituláu “La fuercia de les minoríes”.

El llema del Congresu: “La Fuercia de les Minoríes”
Porque d’un mou o otru toos formamos parte d’una inmensa minoría. Promocionar, escribir o illustrar llibros pa neños/as y xóvenes. Espublizalos dende una llingua o cultura alloñada de los códigos mayoritarios. Lleelos en situaciones de precariedá económica o con dificultaes fisico-síquiques qu’impidan l’accesu n’igualdá a la cultura. Tener que ser neñu y adultu al mesmu tiempu en sociedaes que nun respeten los drechos fundamentales de la infancia. Vese obligáu a emigrar y entamar de nuevu nuna llingua o cultura que nun ye la que mos identifica. Nun tener país propiu. Sentir en minoría. Falar en minoría. Amar en minoría. Lleer en minoría. Esti ye’l sentíu y el tema xeneral del congresu. Una cuestión, la de la situación de les minoríes, que lleva ocupando a IBBY dende va años. D’esa ocupación ñació’l Centru IBBY de los Llibros Infantiles y Xuveniles pa Neños con Discapacidaes, d’Oslo, y ñacerá’l futuru Centru IBBY de les Lliteratures Infantiles y Xuveniles de la Diversidá Cultural, de Santiago de Compostela.

Temes del Congresu
Lliteratura infantil y xuvenil: una minoría nel conxuntu de la lliteratura
Lliteratura infantil y xuvenil en llingües minoritaries: de la diferencia a la sobrevivencia
Llectores en situación de minoría.
Llectores ensin infancia
Yo soi llectora, tú yes llector
Globalizando pluralidá y tolerancia al traviés de los llibros infantiles

Idiomes oficiales
Les llingües oficiales del Congresu sedrán el gallegu, el castellanu y l’inglés: les dos que tienen esa categoría en Galicia, el gallegu y el castellanu, amás del inglés como idioma de comunicación internacional.

Seminarios
Los Seminarios tán previstos pa recoyer les comunicaciones propuestes polos congresistes, que sedrán seleicionaes pol comité científicu y obedecerán a les llínies temátiques numberaeas nos conteníos del Congresu.
1. Tradición oral: la inmensa minoría
2. Torna: pontes haza les mayoríes
3. Lliteratura infantil y xuvenil. Minoríes de xéneru y opción sexual
4. Lliteratura infantil y xuvenil. Minoría llingüística y cultural
5. Editar dende la minoría
6. Minoría y crítica ya investigación
7. Minoría y promoción llectora
8. Lliteratura infantil y xuvenil. Medios de comunicación y globalización
9. La illustración: ¿un papel minorizáu dientro l’arte?
10. La lliteratura infantil y xuvenil escontra la invisibilidá cultural
11. Lliteratura infantil y xuvenil. La creación lliteraria en situación de minoría llingüística
12. Lliteratura infantil y xuvenil y les demás formes de minoría
13. Lliteratura infantil y xuvenil ya internet: nueves ferramientes a favor de les minoríes
14. Los xéneros lliterarios minoritarios I: la poesía
15. Los xéneros lliterarios minoritarios II: el teatru
16. Los xéneros lliterarios minoritarios III: el cómic
17. Lliteratura infantil y xuvenil. Cine y animación

El multillingüismu ye bonu pal cerebru

Según un estudiu dirixíu por un equipu internacional d’investigadores, falar varies llingües refuercia la nuesa capacidá de meyorar los procesos de reflexón complexa. Los resultaos, fundaos sobre’l macroanalís d’un arcu d’estudios, amuesen inclusu que’l multillingüismu podría retrasar l’alteración de les facultaes síquiques debíes a la edá. Esti estudiu foi encargáu pola Comisión europea. Amás del so potencial de ralentizar la demencia, los investigadores identificaron otres propiedaes pa les cuales el multillingüismu paez tener un impautu positivu, sobre tou nel deprendimientu, la reflexón positiva y la creatividá, les competencies interpersonales, la flexibilidá mental y l’aptitú de la comunicación. Otres prebas científiques amuesen igualmente que les funciones de la memoria beneficien les conocencies y la utilización de varies llingües. «Paez evidente qu’entrenar la so memoria tendrá un impautu d’entidá sobre la función cognitiva», declara David Marsh de la universidá Jyväskylä en Finlandia, que coordinó la investigación. M. Marsh añede que ye ensin dubia la xida pa la cuala los multillingües lleguen más fácilmente a resolver problemes complexos y esixentes que los sos homólogos unillingües. Al entamu, opinábase qu’esta hipótesis namái se verificaba nes persones totalmente billingües o trillingues que poseyen un mui bon dominiu de les llingües que prautiquen. Por embargu, les investigaciones más recientes amosaron que los procesos nel orixe de los cambeos de l’actividá llétrica del cerebru actívense en cuantes s’entama a deprender una nueva llingua. «Ye un descubrimientu estimulante pal que tien la oportunidá de deprender una nueva llingua o d’utilizar activamente una llingua adicional na so vida de cotidián», añede M. Marsh. Poro los investigadores opinen que los sos descubrimientos sobresalen del argumentu puramente llingüísticu. «La conocencia de más d’una llingua podría abrir la vía a nueves formes valioses agregada que sobresalen la esfera de les llingües y lleven a aquella de les 'pluri-aptitúes'», prosigue l’informe. «Les implicaciones son vastes. Si la conocencia de más d’una llingua resulta en beneficios cognitivos y comportamentales, sedría interesante d’estudiar el mou cuyu potencial pue ser desendolcáu col envís d’optimizar les ventaxes.»

L’informe afita que’l multillingüismu tien que ser consideráu como una palanca del xorrecimientu económicu y de la cohesión social», enantes que como un inconveniente. El valir de les llingües tien que ser comunicáu y el so desendolcu constante per aciu de les polítiques y de la educación. «Les prebas descrites nesti informe amuesen que’l multillingüismu ye un recursu que podría aidar a facer frente a los envites del presente y del porvenir», conclúi l’informe. «Trátase d’un recursu esistente que podría alimentar procesos emerxentes de creatividá, los cualos contribuirán a diseminar les oportunidaes na estaya individual y de la sociedá.»

L’estudiu foi fechu ente mayu 2008 y xunu 2009 nos 27 estaos miembros de la XE asina como Noruega y Turquía. Tien en cuenta la documentación científica d’Europa, asina como les informaciones proporcionaes por 30 espertos de los países estudiaos y d’un equipu científicu cimeru. L’analís foi comparáu a cinco hipótesis formulaes anteriormente pola Comisión, les cuales establecen un venceyu ente’l multillingüismu y la creatividá: el multillingüismu amplía l’accesu a les informaciones y ufierta de les alternatives pa la organización del camientu asina como pa la perceición del mundiu que mos arrodia. Finalmente, emitióse la hipótesis de que’l deprendimientu d’una nueva llingua reforciaba’l potencial d’una reflexón creativa.

Pa más informaciones, consultar:

Academia de Finlandia: http://www.aka.fi/

Universidá Jyväskylä: https://www.jyu.fi/en/

Campaña pa promover casos llegales n'irlandés

Ta llanzada una campaña p’aconseyar a los falantes irlandeses que tienen un estatutu correutu de tener el so casu dirixíu n’irlandés en cualesquier tribunal. El Coimisinéir Teanga Seán Ó Cuirreáin dixo que la campaña ta llanzada pa contrarrestar la perceición “d’inglés obligatoriu” n’asuntos llegales.

Sobre 10,000 pidimientos foron fechos al Serviciu de Tribunales el caberu añu pa intérpretes pa 71 llingües estremaes. Les anuncies de pidimientos pa los intérpretes polacos coronaron la llista. Les otres llingües principales yeren el rumanu, llituanu, rusu, chinu, lletón, portugués, francés, checu y árabe. La factura pa los intérpretes nel Serviciu de Tribunales foi alrodiu los €2m, mientres el coste de servicios d’interpretación pal irlandés yera menos que €2,000 en total demientres 2006 y cayó acullá de €1,012 en 2007.

El señor Ó Cuirreáin dixo que “la interpretación nun ye riquida onde’l xuez y otros participantes son falantes fluyíos n’irlandés, pero’l porcentaxe de tales casos ye neglixible nuna basa añal y nun contestu nacional.” Ye correutu utilizar l’irlandés nel tribunal si como testigu, defensor, plantegador o la víctima ye garantizáu baxo l’Acta de Llingües Oficiales. El señor Ó Cuirreáin continuó afitando qu’una persona nun pue tener desvantaxes o inconvenientes o incurrir nun gastu adicional pola mor de la so escoyeta de llingua oficial.

Fonte: RTE.ie

VII Concursu de cómic n'asturianu "Comarca de la Sidra"

BASES
1. Participantes

Van poder participar persones de cualesquier nacionalidá, de forma individual o coleutiva, qu’a la fecha d’entrega de los trabayos tengan fechos los 14 años.
2. Tema y Formatu

El tema va ser llibre, pero tanto los personaxes como los guiones y la pinta final han ser inéditos y orixinales y han presentase en formatu DIN A-4. Los dibuxos van poder facese tanto en blancu y prietu como en collor, emplegando la téunica que se vea más afayadiza. Nun hai estensión acotada.Los testos han tar escritos n’asturianu. Nesti sen, pa estimar la obra, el xuráu va valorar los trabayos en conxuntu, illustración y testu, pero cincando más en testu lliterariu.
3. Entrega

Los trabayos han entregase en Serviciu de Normalización Llingüística de la Mancomunidá de la Comarca de la Sidra na Cai Escueles de Paraes, n u 47 - 33529 Nava, o bien nes Oficines d’Información Xuvenil de la Comarca, Cai La Llaguna, baxos 33520 – Nava y Centru Cultural San Xuan de Capistranu C/ Asturies 22, 33300 Villaviciosa. Han presentase nun sobre zarráu nel qu’habrá de conseñase’l títulu de la obra y el seudónimu del/l'autor/a o autores Xunta la obra presentada, y dientro del mesmu sobre inxertarase otru (plica). Nesti últimu (na parte de fuera) conseñaráse’l títulu de la obra y (dientro) los datos que van darréu: nome y apellíos, señes, teléfonu, títulu y seudónimu, y copia del DNI o tarxeta residente.El plazu pa presentar los trabayos peracaba’l 13 de Payares de 2009 (inclusive)
4. Fallu del Concursu

El xuráu va tar formáu principalmente por creativos, artistes y illustradores cualificaos, periodistes y profesores d’asturianu. El so fallu va ser públicu y inapellable, comunicándolu darréu a los concursantes premiaos y a los medios de comunicación autonómicos.
5. Premios

El xuráu va conceder los siguientes premios: -.Un primer premiu de 500 € al meyor trabayu presentáu.-.Dos accésit de 200 € caún pa los dos trabayos finalistes.(premios arreyaos a les correspondientes retenciones fiscales).
6. Otros

Delles obres seleicionaes van formar parte d’una esposición que va viaxar polos diferentes centros culturales de la Comarca de la Sidra y de fuera d’esta que lo soliciten. Arriendes de lo anterior, la organización va editar una espublización coles obres premiaes.En acabando la esposición los trabayos volveránse a los autores que lo pidan.La organización d’esti concursu reserva’l drechu d’usar pa dalgún tipu de material promocional, los dibuxos presentaos, faciendo referencia al autor.
La participación nesti concursu supón la total aceutación de les presentes bases.

La metada les películes en Cataluña sedrán en catalán

Habrá sanciones dicá 75.000 euros por nun doblar al catalán.
El Gobiernu sovencionará les sales de cine que proyeuten les películes en llingua catalana.

El conseller de Cultura, desplicó que la llei del cine "tendrá una incidencia nel seutor audiovisual namái comparable a los grandes canales de televisión o radio que tenemos". Los encargaos del doblaxe sedrán los distribuidores. La norma ta avalada pol artículu 27.3 de la llei de política llingüística vixente, que prevé les cuotes de distribución del 50% en catalán y l’otru 50% en castellanu.

El redautáu de la llei prevé un réxime sancionador estrictu por incumplimientu de la norma, que pue aportar a multes de 5.000 euros por cada copia de menos, y puen aportar a ser de 75.000 euros. En cambiu, suprime la posibilidá d'establecer una tasa que grave les versiones doblaes col envís d'impulsar les versiones orixinales. Les películes en catalán sedrán sovencionaes.El conseller indicó que l'aplicación de la llei sedrá progresiva y cifró “nunos 4 años" esti periodu.

Manifestación pola oficialidá del euskera nel País Vascu francés

Remembren al presidente Sarkozy que prometió una llei pa les llingües minoritaries.

Unes 5.000 persones manifestáronse esta fin de selmana nes cais de Baiona (Iparralde) pa vindicar una llei que reconoza les llingües minoritaries, de mou que seyan consideraes oficiales nos sos respeutivos territorios. El presidente francés, Nicolas Sarkozy, incluyó ente les sos promeses elleutorales, la promulgación d’esta llei, que güei en día nun vio inda la lluz, y que ta lloñe de que seya ellaborada, según sorrayaron los organizadores de la marcha, que sirvió como colofón a una campaña qu’entamaron el pasáu mes de mayu.

El caberu intentu lleváu a cabu por representantes d’estremaes asociaciones y organismos que trabayen en y pal euskera, foi la visita que realizó de recién el ministru de Cultura, Frédéric Miterrand, al País Vascu francés. Nella quedó nidio que nun teníen previsto l’alderique de dengún proyeutu de llei pa la defensa de les llingües minoritaries.

La manifestación diba encabezada por una pancarta col llema «Euskarari lege geriza. Ofizialtasuna» (Proteición llegal al euskera. Oficialidá), a la que siguía una segunda pancarta portada por representantes d’estremaos partíos políticos.

Ente los manifestantes, Max Brisson, presidente de la Oficina Pública del Euskera y conceyal de Biarritz pola UMP, partíu llideráu por Sarkozy, calcó na importancia de que’l presidente y la so anterior ministra de Cultura, Christine Albanel, cumplan la pallabra dada y s’aprebe una llei que permita caltener una política llingüística duradera.

Lleis estatales
L’escritor Xabier Mendiguren tamién intervino tres la marcha y abogó por que les autoridaes franceses reconozan nes lleis estatales a les llingües minoritaries del país vecín.

Na manifestación participaron, asinamesmu, el parllamentariu d’Aralar Mikel Basabe, y la de Nafarroa Bai y representante d’esta formación Nekane Pérez. Tamién miembros de Gazte Abertzaleak, les mocedaes d’Eusko Alkartasuna.

Ésta nun ye la primer vegada que los euskaltzales del País Vascu francés salen a la cai a vindicar la oficialización del euskera. En 1989 foi la primer manifestación con esti envís, y l’actual foi la sesta convocatoria.

Manifestación en defensa del occitanu

Unes 20.000 persones vindiquen la reconocencia de la llingua en Carcasona.

Unes 20.000 persones manifestáronse esti sábadu peles cais de la ciudá de Carcasona en defensa de la reconocencia de la llingua y la cultura occitana. La manifestación desendolcóse nun ambiente festivu y vindicativu.

La marcha, organizada pola asociación de coleutivos Anem Oc!, axuntó representantes de tolos territorios que formen parte del dominiu llingüísticu d'esta llingua, incluyida la Vall d'Aran, que participó con una delegación encabezada pol síndic d'Aran, Frances Boya. Tamién asistieron la teniente d'alcalde de Carcasona, Jean-Claude Pérez (PS) y l'activista José Bové. L'actu cuntó cola representación de los trenta departamentos franceses nos que se fala l'occitanu y del Piamonte italianu, onde l'occitanu se caltién na fastera de les Valades. Tres de pancartes con llemes como Occitan lenga oficiala, libertat per la lenga, per el pais! y l'occitan a l'escola los manifestantes marcharon mayoritariamente vestíos de bermeyu, el mesmu collor de la bandera occitana y s'empobinaron haza’l recintu amuralláu de la ciudá.

La organización gueta algamar un estatutu xurídicu pa les llingües que se falen en Francia amás del francés, la creación de televisión y radio públiques en llingua occitana y l'establecimientu d'una "política llingüística ambiciosa" pa incluyir el desendolcu de la educación n'occitanu.

Fonte: Avui

El catalán, invitáu d'honor nel Expolangues de París

La llingua catalana sedrá la invitada d’honor de la prósima edición de la feria Expolangues de París, que tendrá llugar del 3 al 6 febreru. El direutor del Institut Ramon Llull (IRL), Josep Bargalló, señaló ayeri nun alcuentro cola prensa que "la presencia de la llingua catalana en París tendrá un significáu especial porque ye conocida la tradición francesa en rellación a les llingües que nun son d’Estáu".

Baxo’l llema "El catalán, la llingua de 10 millones d’europeos", el IRL organizará’l pabellón central d’Expolangues, onde nunos 100 metros cuadraos "informaráse sobre la presencia del catalán n’Internet y nos programes informáticos, asina como de la ufierta de cursos de llingua catalana en 15 universidaes franceses". Con más de 25.000 visitantes y unos 200 espositores que representen a más de 60 llingües de 20 países, Expolangues ye un referente nel ámbitu de la educación. L’oxetivu d’Expolangues, afita Bargalló, ye presentar les diverses posibilidaes de deprender un idioma ya informar sobre les cultures, les carauterístiques llingüístiques y los programes d’educación de les llingües que participen na feria. Expolangues ye tamién un puntu d’alcuentru de los profesionales, les editoriales y les instituciones implicaes nel enseñu y el deprendimientu de les llingües.

Nes caberes ediciones, Expolangues tuvo como invitaos d’honor a la Xunión Europea (2009), China (2008) y la Federación Rusa (2007).Bargalló calcó en que "la llingua catalana nun tará presente en París en nome de Cataluña, sinón que la programación del Llull sedrá paragües d’otres instituciones" como’l Gobiernu d’Andorra, la Generalitat, el Gobiernu Balear, el Conseyu Xeneral de los Pirineos Orientales, l’ayuntamientu de L'Alguer, la rede Vives d’Universidaes, Perpiñán y los municipios valencianos del IRL.

Fonte: La Vanguardia

Cuasi 200 llingües amenazaes na India

Cuasi 200 llingües de la India cuerren el riesgu de desaniciu si los pás nun faen esfuercios pa calteneles nun sistema educativu que privilexa l’hindi y l’inglés, aseguraron na capital india dellos espertos.
"Podemos aidar, como llingüistes, n’iguar material pa preservar eses llingües, pero en realidá depende de les comunidaes, qu’han querer preservar la so llingua", dixo a l’axencia IANS l’investigador de la UNESCO pa les llingües en pelligru nos Himalayes, l’espertu Jean Robert Opegnort.

Xunto a otros llingüistes, Opegnort participó nun seminariu internacional de dos díes cellebráu en Nueva Delhi y organizáu pol organismu indiu encargáu del caltenimientu del padrimoniu (INTACH) p’alcontrar formes de protexer les llingües en pelligru.
Según l’Atles de les Llingües en Pelligru del Mundiu, ellaboráu pola UNESCO esti añu, na India hai 196 llingües amenazaes.
"En fasteres del Himalaya hai pequeños númberos de falantes de lligües xino-tibetanes, que nun cunten con carauteres escritos y tán probemente documentaes. Equí los pás puen tener un papel esencial", dixo Opegnort.

D’alcuerdu col presidente d’INTACH, S.K. Mishra, el dominiu del inglés a nivel mundial, y del hindi a nivel nacional, "ta matando munches llingües" y, poro, los educadores han fomentar el deprendimientu de les llingües tradicionales nes primeres etapes.
Anque l’hindi ye l’idioma maternu d’un 25 % la población de la India, el so usu como llingua oficial fai que les llingües tribales pierdan tarrén tamién nel ámbitu domésticu, según la investigadora Lisa Lomdak.

Un sondéu oficial de 1962 señaló que na India había más de 1.600 llingües, mientres qu’otru de 2002 amenorgóles namái a 122, según dixo a l’axencia IANS fai unos díes l’investigador G.D. Prasad Sastry. "¿Nun hai entós daqué que nun marcha si l’Atles de la UNESCO afita que les llingües en pelligru son 196?", dixo Sastry, quien criticó la "falta de voluntá" del Gobiernu indiu p’afrontar esti problema.

XVIII Xornaes Internacionales d'Estudiu

El martes 4 de payares l’Academia va inaugurar na Facultá de Filoloxía d’Uviéu la edición XVIII de les sos Xornaes Internacionales d’Estudiu. Les xornaes, de llibre asistencia, y con certificáu d’asistencia pa los que s’apunten, van entamar esi mesmu día, a les 16:45 cola ponencia de Fernando Sánchez Miret “La hipótesis de la diptongación asturiana ante yod y wau a la luz de la Romanística” pa sentir darréu a Clara E. Prieto Entrialgo col so estudiu “Reflexones sobre la marcación preposicional del OD n’asturianu. Dellos datos medievales”.
A les 17:45, Xabiel Fernández García y Fernando Quintas González van falar, na so comunicación, de “Toponimia y territoriu. Antrotoponimia y haxotoponimia como fontes d’estudiu de la estructura feudal del espaciu nel noroeste peninsular”, darréu va cellebrase un alderique.
A les 18:30 l’escritor, cantautor y académicu Carlos Rubiera Tuya va lleer la so ponencia “Asturianu y castellanu nun inventariu de bienes d’una casa d’aldea del añu 1906”, siguiéndo-y Rubén Fernández Martínez con “L’aire n’Asturies: un averamientu a la cultura del aire al traviés del léxicu”.
La filóloga inglesa y escritora Laura Marcos Domínguez va abrir a les siete l’alderique cola so comunicación “Cómo facer té n’asturianu: dificultaes léxiques, morfosintáctiques y culturales na traducción inglés-asturianu”.
A les 19:30 Xosé Martínez González y Xuan Xosé Llastra Menéndez van comenta dellos aspectos de los “Nomes asturianos de dalgunes plantes de güerta”, pesllando la xornada l’ex presidente de l’ALLA, Xosé Lluis García Arias, cola comunicación “Continuadores del llat. -ULUS” y un alderique alredor del tema.

La xornada del miércoles va abrila a les cuatro y media, el profesor Vicente J. Marcet Rodríguez de la Universidá de Jaén, con “La representación de las sibilantes en la documentación notarial leonesa en el paso del latín al romance”, siguiendo darréu Miguel Ramos Corrada con “La poesía asturiana a xuiciu del modernismu” y Xuan Santori Vázquez-Azpiri con “La lliteratura de les escritores asturianes. Perspectives d’un trabayu d’investigación sociollingüística”, a la que va siguir un alderique.
Dempués del descansu de les seis, Vicente García Oliva va lleer dellos “Apuntes pa una Historia de la Lliteratura Infantil y Xuvenil n’asturianu”. A les 18:30 Paula Pulgar Alves y José Antonio Calzón García van falar de los “Patrones temático-formales na narrativa curtia de Xosé Álvarez ‘Pin’”.
“La cama de Vanessa Gutiérrez: la escritura como revelación”, ye’l tema escoyíu por Marta Mori d’Arriba pa la so comunicación, pesllando’l día Aurelio González Ovies con “Locus amoenus et classicus nos poetes contemporáneos d’Asturies” y un alderique.

La cabera de les xornaes, la del vienres, va entamar cola ponencia de Michele Loporcaro, de la Universidá de Zürich, “Sobre el origen del neutro asturiano: evidencia comparativa”. A les 17:15 Montse Machicado Compañy va falar de la “Llingua asturiana nel Llibru d’acuerdos del Conceyu d’Avilés (1479-1492)”, siguiendo darréu a les 17:30, la comunicación de Cristina García-Sampedro Clérigo, “Contribución de la toponimia al debate sobre el origen romano de Uviéu”, siguida d’un alderique y descansu.
Les últimes conferencies de les Xornaes Internacionales van entamar a les 18:15 cola comunicación de Francisco Fernández-Guisasola y Joaquín Fernández García sobre les “Claves etnollingüístiques pa entender la melecina popular asturiana”. Más tarde Rodrigo Fernández Alonso y José Martínez González van lleer la conferencia “Paremioloxía asturiana del nacimientu, vida, pasión, muerte y resurrección del guchu”.
A les 18:45 Nicolás Bartolomé Pérez va falar de l’asturianu al otru llau del cordal, con “La regulación xurídica de la nuesa llingua en Castiella y Lleón”, a la que va siguir un alderique. Ángel Iglesias Ovejero, de la Universidá d’Orléans va falar alredor de la “Situación actual del habla de El Rebollar, analogías y contrastes con las hablas extremeñas”, cellebrando a les ocho, el pieslle de les Xornaes.

XIX Premiu de Poesía Elvira Castañón

L'Ayuntamientu d'Ayer vien de convocar el XIX Premiu de Poesía Elvira Castañón nel que se pue participar con obres n’asturianu o castellanu de tema llibre. El Premiu ye de 2.000 euros, 1000 euros pa cada modalidá llingüística.

Los poemarios han tener un llargor mínimu de 250 versos y máximu de 500, pudiendo presentase orixinales fasta’l 30 de payares.

Los trabayos tienen que mandase per corréu certificáu a la Casa de la Cultura del Ayuntamientu d'Ayer, asitiada n'Avenida de la Constitución 31, 33670 Morea d’Ayer, conseñando nel sobre "Pal XIX Premiu de Poesía Elvira Castañón".

Más información na Casa Municipal de Cultura d'Ayer, nel teléfonu 985 482 885 o nel corréu lletrónicu:
cmc@ayto-aller.es

El Nafarroa Oinez más internacional

El Nafarroa Oinez 2009 na so edición más internacional.
La ikastola Andra Mari d’Etxarri-Aranatz organiza’l Nafarroa Oinez d’esti añu, que tendrá llugar esti domingu nes llocalidaes d’Arbizu, Lakuntza y Arruazu. Baxo’l llema, 'Txikiak handi', (los pequeños grandes), esta folixa en favor del euskera vindicará la "grandeza" de les llingües minoritaries na so edición "más internacional".

Asina, lo desplicó esta mañana’l direutor de la Federación d’Ikastoles de Navarra, quien destacó que la xornada ta preparada p’acoyer a más de 100.000 persones, de "tolos ámbitos". "Ye una folixa diseñada pa families, xóvenes, neños, euskaltzales o non, y xente d'ideoloxíes estremaes que quieran compartir cultures y allegríes", añedió.

Nesta ocasión, el dineru recaldáu na cellebración del Nafarroa Oinez sedrá pa financiar un nuevu edificiu pa la ikastola Andra Mari d’Etxarri-Aranatz.

El Nafarroa Oinez 2009 tien ente los sos oxetivos vindicar la "grandeza" de les llingües minoritaries, como’l catalán, aragonés o’l bretón, ente otres. Pa ello, los organizadores crearon na páxina web de la xornada festiva una rede de les llingües minoritaries d’Europa, contautaron y visitaron instituciones, grupos y organismos d’esti ámbitu ya invitaron a representantes de los idiomes minoritarios a participar na cellebración del domingu.

Fonte: Europa Press

Internet en llingua maya

Les instrucciones del navegador tán en maya, pero’l conteníu caltién l’idioma orixinal.
U ts’áalal uts’ íibil, pa imprimir una páxina.
Ta’ ak bey, pa guardar un testu.
Túumben jáatsmanjáats, p’abrir una nueva pestaña nel ordenador.
¿Paez-y estrañu? Son les instrucciones en llingua maya pa esplorar Internet al traviés del navegador Firefox, que desendolcó Mozilla Méxicu.

Trátase d’una interfaz creada por un grupu de xóvenes falantes del maya, que quieren averar a les comunidaes d’esta etnia a la teunoloxía d’Internet.
Les instrucciones p’acceder al navegador tán tornaes al maya, anque los conteníos de les páxines caltienen l’idioma en que foron orixinalmente escrites.
Ye un proyeutu que xorrecerá coles aportaciones de los usuarios, díxo-y a BBC Mundo Julián Ceballos, responsable del equipu que tornó la interfaz.
"Queremos que la cultura nun s’estanque, que la xente sienta Internet como parte de la so vida y entiendan que’l so idioma sirve pa muncho más que solo pa falar colos vecinos", afitó.

Tamién pa tarahumares
Ye integrar a les persones y les sos comunidaes, qu’apurran conteníu nel so propiu idioma. Cuando la xente tien conocencies fai coses impresionantes
La idega pa tornar un navegador d’Internet a llingua maya surdió l’añu pasáu, cuando’l gobiernu mexicanu reconoció 364 llingües indíxenes, amás del español, como idiomes nacionales.
Dende entós desendolcáronse tres proyeutos pa tornar la interfaz de Firefox.
Actualmente esisten instrucciones en zapotecu, que falen más de 700.000 persones, especialmente n’Oaxaca, al suroeste de Méxicu; y la interfaz en maya, llingua orixinaria de 759.000 habitantes según datos del Instituto Nacional de Estadística (INEGI).
Amás, ta en desendolcu’l proyeutu de tornar Firefox a rarámuri, la llingua de la comunidá Tarahumara, que vive en Chihuahua, al norte del país.
Julián Ceballos diz que nun se trata namái d’una ferramienta pa navegar na web.

Nun ye pa toos
Acullá del optimismu, lo cierto ye que según especialistes el proyeutu entá tien un llargu camín por percorrer.
Una torga ye que la mayoría de les comunidaes indíxenes nun tienen accesu a Internet, díxo-y a BBC Mundo Ismael May, académicu del Centro Peninsular en Humanidades y Ciencias Sociales.

De fechu, según datos oficiales, en promediu namái’l 27% de los mexicanos utilicen el serviciu, cantidá que se reduz nes poblaciones de dalguna etnia que son, amás, les más probes del país.
Ye un problema adicional a la torna de navegadores web, pues el nivel educativu neses comunidaes ye mui baxu, según datos de la Secretaría de Educación Pública.
"Munchos de los maya-falantes nun saben lleer nin escribir na so llingua materna, y eso ye un gran elementu de desconfianza", desplicó May.
Pel momentu, pa vencer la resistencia a les computadores, el próximu año los desendolcadores de Firefox en maya nagüen por visitar les comunidaes indíxenes de la Península de Yucatán, al sureste de Méxicu, pa enseñar a los habitantes a navegar n’Internet.

Alberto Nájar

Fonte: BBC Mundo, México

Ier Festival del Llibru Infantil y Xuvenil

El martes 13 d'ochobre a les 12:00 hores va presentase na sede de la Conseyería de Cultura y Turismu del Principáu d'Asturies el Ier Festival del Llibru Infantil y Xuvenil.

Esta primer edición del Festival, organizada pola Conseyería de Cultura y Turismu en collaboración cola Mancomunidá de la Comarca de la Sidra y el Gremiu d'Editores d'Asturies, va desendolcase en Villaviciosa del 15 al 18 d'ochobre y con él guétase que los neños y neñes y les sos families puean averase al mundiu de la lliteratura infantil y xuvenil pero tamién que los profesionales del seutor tengan a la so dimposición un panorama del estáu actual de la lliteratura fecha n'Asturies pa la xente mozo.

Va haber esposiciones, presentaciones de llibros, talleres y actuaciones músicales (ente elles les de Tejedor y Alfredo González), too ello na carpa asitiada na plaza Obdulio Fernández Pando, al par del teatru Riera.

XIX Premiu Teodoro Cuesta de Poesía n'asturianu

La conceyalía de Cultura convoca'l XIX Premiu Teodoro Cuesta de Poesía. La conceyalía de Cultura del Ayuntamientu de Mieres del Camín, informa de que yá foi convocáu’l XIX Premiu Teodoro Cuesta de Poesía. Los poemarios deberán entregase enantes del 9 de payares de 2009, cuando se conmemoren los 179 años de la nacencia de Teodoro Cuesta. Los participantes opten a un premiu de 4.000 euros.

BASES:

L’Ayuntamientu de Mieres, pente medies de la Casa de la Cultura “Teodoro Cuesta”, y la Conseyería de Cultura y Turismu del Principáu d’Asturies, convoquen el XIX Premiu Teodoro Cuesta de Poesía 2009, coles siguientes bases:

PRIMERA

Van poder participar toles persones que lo deseyen con un poemariu inéditu, orixinal y escritu en llingua asturiana.

SEGUNDA

De los poemarios entregaránse orixinal y cuatro copies. Podrá facese per corréu certificáu o entregándolu en mano en: Casa de Cultura “Teodoro Cuesta” (secretaría). Manuel Llaneza 8, 33600 Mieres del Camín. Asturies.

TERCERA

Los poemarios dirán ensin firma, con alcuñu o llema y figurando’l so nome y les señes en sobre zarráu.

CUARTA

Concederáse un únicu premiu dotáu con 4000€ (CUATRO MIL EUROS), contemplándose promover la so espublización.

QUINTA

El xuráu podrá declarar desiertu’l premiu yel fallu será inapelable.
SESTA

Los poemarios habrán entregase enantesdel 9 de payares de 2009, día nel que se cumplen 179 años de la nacencia de Teodoro Cuesta.

SÉTIMA

El fallu del xuráu daráse a conocer nel plazu d’un mes y mediu.

OCTAVA

El premiu entregaráse n’actu públicu que sedrá comunicáu nel so momentu.

NOVENA

Los trabayos non premiaos van poder recoyese na Secretaría de la Casa de Cultura dientro de los 30 díes siguientes al fallu del xuráu, n’horariu de mañana (8:00a 15:00).

DÉCIMA

Presentase a este premiu supón tar d’alcuerdu coles sos bases

MÁS INFORMACIÓN

Casa de Cultura “Teodoro Cuesta”Manuel Llaneza 833600 Mieres del Camín

Tfnu: 985 45 62 92 / 45 06 66

www.ayto-mieres.es/cultura

E-mail: cultura@ayto-mieres.es