L'asturianu nun tará n'Expolangues de París

Esti añu Asturies tampoco nun va tar representada n’Expolangues, el salón internacional de les llingües “por motivos presupuestarios” según la Conseyería de Cultura.

Expolangues ye un salón internacional de llingües falaes en tol mundiu, tanto con calter mayoritariu como minoritariu. Esta edición, dedicada a la llingua catalana, va desarrollase ente’l 3 y el 6 de febreru y va cuntar con representación, per parte del Estáu, de les llingües castellana, vasca, gallega y el propiu catalán, protagonista d'honor esti añu.

El Principáu participó nel alcuentru de 2008, que tuvo llugar los díes 6 y 9 de febreru en París. El Gobiernu asturianu distribuyó d’aquella información documental, ente la que rescamplaba un folletu informativu escritu n'asturianu y tornáu al inglés, francés y alemán, y per otru al catalán, vascu y gallegu, nel que s'esplica'l conceutu, l'orixe, la hestoria y la situación del idioma.

Consuelo Vega, como Direutora Xeneral de Política Llingüística, sorrayó na rueda de prensa onde se presentó la participación asturiana, la importante oportunidá de promoción internacional de la llingua que suponía esti foru. Amás, esclariaba qu’anque’l principal enfotu del Principáu yera la promoción del idioma dientro d’Asturies, “nun queremos renunciar a facenos visibles nel esterior, con una imaxe de modernidá y de futuru, y más nel añu internacional de les llingües”.

Sicasí, la participación asturiana nun foi vista con bonos güeyos por dellos seutores. Asina, l’Aconceyamientu de Xuristes pol Asturianu amosó la so “indignación” énte la presencia n’Expolangues, yá que camentaben que yera una "falsura del Principáu”, qu'unviaba voceros a París “pa enchipase de nun se sabe qué imaxinarios o lliterarios llogros en porgüeyu de la llingua asturiana", mientres "prohibe'l so emplegu polos funcionarios públicos; ellabora un proyeutu de Decretu que torga dafechu la so presencia na educación de los neños; y pieslla los pocos Servicios Municipales de Normalización Llingüística", en referencia al pieslle de los de Mieres del Camín y Samartín del Rei Aurelio.

Inclús, el mesmu día de la inauguración d’Expolangues, l’ex diputáu d’IX, Francisco Javier García Valledor, declaraba que la intención del Principáu yera desterrar la llingua de l'Alministración, anque afitaba que valoraba positivamente iniciatives como la de la presencia del asturianu n’Expolangues de París. Esclariando que les más de les actuaciones del Gobiernu asturianu entraben dientro d'una proteición como un elementu d'esposición nos museos “y non como una llingua viva que tien de tener unos drechos básicos nuna sociedá democrática”.

Fonte: Asturies.com

El catalán, invitáu d'honor nel Expolangues de París

La llingua catalana sedrá la invitada d’honor de la prósima edición de la feria Expolangues de París, que tendrá llugar del 3 al 6 febreru. El direutor del Institut Ramon Llull (IRL), Josep Bargalló, señaló ayeri nun alcuentro cola prensa que "la presencia de la llingua catalana en París tendrá un significáu especial porque ye conocida la tradición francesa en rellación a les llingües que nun son d’Estáu".

Baxo’l llema "El catalán, la llingua de 10 millones d’europeos", el IRL organizará’l pabellón central d’Expolangues, onde nunos 100 metros cuadraos "informaráse sobre la presencia del catalán n’Internet y nos programes informáticos, asina como de la ufierta de cursos de llingua catalana en 15 universidaes franceses". Con más de 25.000 visitantes y unos 200 espositores que representen a más de 60 llingües de 20 países, Expolangues ye un referente nel ámbitu de la educación. L’oxetivu d’Expolangues, afita Bargalló, ye presentar les diverses posibilidaes de deprender un idioma ya informar sobre les cultures, les carauterístiques llingüístiques y los programes d’educación de les llingües que participen na feria. Expolangues ye tamién un puntu d’alcuentru de los profesionales, les editoriales y les instituciones implicaes nel enseñu y el deprendimientu de les llingües.

Nes caberes ediciones, Expolangues tuvo como invitaos d’honor a la Xunión Europea (2009), China (2008) y la Federación Rusa (2007).Bargalló calcó en que "la llingua catalana nun tará presente en París en nome de Cataluña, sinón que la programación del Llull sedrá paragües d’otres instituciones" como’l Gobiernu d’Andorra, la Generalitat, el Gobiernu Balear, el Conseyu Xeneral de los Pirineos Orientales, l’ayuntamientu de L'Alguer, la rede Vives d’Universidaes, Perpiñán y los municipios valencianos del IRL.

Fonte: La Vanguardia