L’escándalu de les sovenciones de Feijóo a la llingua gallega nos medios

'La Voz de Galicia' y 'Faro de Vigo' se llevan más de un millón de euros en subvención mientras que el resto de la prensa digital totalmente en gallego apenas llega a los 3.000 euros por las condiciones que exige la Xunta de Galicia.

PÚBLICO

MADRID.- Un sinsentido. Así es como podría resumirse el reparto de las subvenciones de la Xunta de Galicia a los medios de comunicación para promocionar la lengua gallega.

Según los datos publicados a cierre de año, Feijóo ha concedido la mayoría de los fondos a medios de comunicación escritos que apenas utilizan el gallego en sus publicaciones, como La Voz de Galicia (718.000 €) o Faro de Vigo (305.000 €). Entre las dos cabeceras suman más de un millón de euros, mientras que el conjunto de la prensa digital, totalmente en gallego, apenas superan los 3.000 euros.

La convocatoria de ayudas para los medios de comunicación escritos de Galicia no es precisamente equitativa, según ha publicado el diario Galicia Confidencial. Existen condiciones que, en la práctica, dejan fuera a la mayoría de medios digitales que publican totalmente en gallego. Da la casualidad que, lo general, su línea editorial es crítica con el PP. Para tener derecho al subsidio para medios totalmente en gallego es necesario contar con una edición impresa. Pero, salvo Sermos Galiza, éstos carecen de papel, por lo que no pueden acceder a esta subvención.

Al mismo tiempo hay ayudas para medios de comunicación en español que contengan un 8% en gallego, pero sólo para la edición de en papel. De ahí que las dos grandes cabeceras gallegas se lleven prácticamente todo el pastel de esta ayuda. Toda una contradicción en un momento en el que la revolución digital es ya una realidad y los medios en papel tiene menos lectores que los digitales.

Del mismo modo, para acceder a la ayuda general de medios, las plantillas han de estar formadas por más de cinco trabajadores. Algo poco corriente. De esta forma se está consiguiendo justo lo contrario de lo que la subvención pretende: fomentar el uso del gallego.

Fonte: Público

Concedíes sovenciones a 7 proyeutos pa promoción de la música n’asturianu

Nel Boletín Oficial del Principáu d’Asturies del miércoles 9 d’avientu espublizóse la resolución de concesión de sovenciones pa promoción de la música n’asturianu y gallego-asturianu. Son 7 proyeutos con un importe total de 17.212,54 euros.

Na resolución d’esti añu namái tres de los proyeutos son individuales, axuntando los otros cuatro interpretaciones de varios autores. Los 7 CD suvencionaos son “Que nun t’aborreza la naturaleza” de Petit Pop, “Con estes y otres palabres” de Fernando Valle Roso; el CD llibru “A guerra dos mundos” del grupu Bacotexo de pop-rock en gallego-asturianu; y los recopilatorios “Bestiariu”, “Cuenca del Caudal, 18 aniversariu”, “XX Concurso de la Nueva” y “Viendren 2015″.

L’oxetu d’esta llinia d’actuación ye la concesión d’ayudes económiques en réxime de concurrencia competitiva a empreses privaes (persones físiques o xurídiques) que presenten proyeutos discográficos onde l’asturianu y/o gallego-asturianu seya la llingua normal y vehicular na qu’aparezan les lletres de los cantares y tolos testos impresos o dixitales qu’acompañen la obra musical. A lo menos la metá de los temes del discu han tar escritos y cantaos en dalguna d’eses llingües.

La resolución de la concesión de les sovenciones pa promoción de la música puen consultase nel BOPA. Fonte: Asturnews

Sovenciones concedíes

La XDLA pide retirar la subvención a la Cátedra Alarcos

​La XDLA pide al Conceyu d’Uviéu que retire la subvención a la Cátedra Alarcos y a la Universidá que tome midíes, al tiempu que quier espresar la so condena más firme a les declaraciones llamentables y deliriantes feches por Miguel Alarcos.

Les declaraciones feches nel marcu de la cátedra que lleva’l nome de so padre y que preside so madre son pala la Xunta pola Defensa de la Llingua Asturiana (XDLA) un ataque “que da vergoña ayena y que ye más grave tovía al venir d’un miembru de la comunidá universitaria. La Universidá d’Uviéu, institución encargada y pagada pa curiar la cultura asturiana, tien que refugar dafechu esti tipu de comportamientos ente’l so profesoráu. Ye indignante pensar que nes sos facultaes habiten personaxes que faen escarniu públicu de manera irracional y acientifica de los derechos de les persones a usar la so propia llingua en cualesquier circunstancia y que desprecien a compañeros investigadores qu’estudien la llingua asturiana. Esperamos, por eso, que la Universidá tome les midíes necesaries pa evitar d’una vez estes agresiones”.

De la mesma manera, soliciten al Conceyu d’Uviéu “la retirada de tou fondu públicu a la cátedra mentada al nun respetar los drechos de les persones falantes d’asturianu recoyida na llexislación vixente nin el patrimoniu llingüísticu d’Asturies. Nun se pue consentir gastar dineru público pa patrocinar entidaes que discriminen sistemáticamente a una parte importante de la sociedá asturiana”.

Fonte: Asturnews

Podemos Asturies considera impresentable’l recorte a los medios de comunicación n’asturianu decretáu pol Gobiernu socialista

 Fonte: Nota de prensa de Podemos Asturies

El Grupu Parllamentariu de Podemos Asturies quier manifestar la so sorpresa y malestar por un nuevu capítulu de recortes protagonizáu pol actual Gobiernu del Principáu d’Asturies, encabezáu por Javier Fernández, y onde esta vez la víctima ye la cultura asturiana y particularmente la promoción de la llingua asturiana y el gallego-asturianu nos medios de comunicación. Na actual convocatoria de subvenciones pa medios de comunicación destinaes al fomentu del usu del asturianu recórtense 47.000 euros respecto al añu anterior; ye dicir, un 37%. Lo que, sumao al recorte fechu na anterior convocatoria, da como resultáu que nos dos últimos años les partíes destinaes a esti ámbitu sufrieren una mengua d’un 50%. Esti tisoriazu inda ye más grave si se tien en cuenta que’l sector de los medios de comunicación ye ún de los más perxudicaos pola crisis económica.

Anque nun nos sorpriende, porque ye la manera na que vien actuando la FSA nesta materia nos últimos años, llama l’atención que la midida se lleve alantre depués de que nos alcuerdos alcanzaos na investidura ente IX y PSOE ún de los puntos anunciaos ye potenciar los medios de comunicación n’asturianu y gallego-asturianu y la política llingüística.

El Grupu Parllamentariu de Podemos Asturies considera impresentable y preocupante qu’una vez más se recorten les partíes que yá de por sí son mui escases, ensin nenguna xustificación y más cuando na Xunta Xeneral del Principáu nel caberu mes s’acaba de perder una oportunidá pa reducir les partíes que los grupos parlamentarios reciben. Nesi sentíu, vamos tar mui sollertes con estos ataques, y otros que puedan venir, a la promoción del asturianu nos medios de comunicación y que nun faen más que debilitar entá más una posible recuperación de la nuesa llingua.

Pidimos que, yá que la partida final va cuntar namás con una cantidá de 80.000 euros, esi dineru sía repartío ente medios de comunicación que fagan un apueste claru pola visualización del asturianu.

Dende Podemos Asturies esperamos que, a lo que la llingua asturiana y el gallego-asturiano se refier, estos recortes nun vayan ser el camín que buscaben en materia de política llingüística los dos partíos que llegaron al reciente pautu d’investidura y que fexo presidente por segunda vez a Javier Fernández.

Fonte: Asturias Verde

Crítiques a los retayos nes sovenciones

Iniciativa pol Asturianu vieno acabante llamentar, como ya ficiere la Xunta pola Defensa de la Llingua, la decisión de la Conseyería de Cultura de retayar nun 37% les ayudes pa la normalización de la llingua. Les cifres recoyíes na cabera convocatoria de sovenciones a los medios de comunicación n'asturianu recueyen una mengua del 37% respectu al añu anterior y d'un 16,7% nel casu de les ayudes a la producción discográfica. Nos caberos dos años, el departamentu que dirixe Ana González, menguó nun 50% el presupuestu d'estes partíes. Pa Inaciu Galán, presidente d'Iniciativa pol Asturianu, trátase d'un "fechu llamentable" qu'espeya "la falta de compromisu llingüísticu que yá se veía recoyíu nel pautu d'investidura". Critica que'l nuevu Executivu entame la llexislatura "queriendo acabar con tolos espacios de normalidá" y encamienta a la Conseyería a rectificar. Fonte: Asturnews

“Un ataque grave a la viabilidá de los medios n’asturianu”

por Pablo R. Guardado

La XDLA critica’l recorte nuevu a les ayudes a empreses informatives pa la normalización del idioma. Les perres destinaes menguaron un 81 por cientu con respeuto a les cifres del 2010.

La quita de 47.000 euros, tres pasar de 127.000 a 80.000, nes subvenciones pa medios de comunicación ye pa la Xunta pola Defensa de la Llingua Asturiana (XDLA) “un ataque grave a la viabilidá de los proyectos informativos n'asturianu y un intentu claru d'acabar, añu tres añu y pasín a pasu, col presupuestu que la Direición Xeneral de Política Llingüística dedica a les ayudes a los medios de comunicación, un sector que ta siendo de los más castigaos pola crisis económica”. La mengua, que pa esti 2015 ye del 37 por cientu –del 52, 98 por cientu en comparanza con hai dos años–, llega al 81 por cientu si miramos les cifres del 2010.

La organización cívica entiende que “los fechos son tovía más graves si tenemos en cuenta que los medios de comunicación son fundamentales pa que l'idioma propiu d'Asturies algame'l rangu social de normalidá” y recuerda que la Llei d’Usu y Promoción del Bable/Asturianu obliga al Gobiernu a ayudar a los medios qu’empleguen l’asturianu y gallego-asturiano. “Sicasí, l'Executivu paez actuar pa impedir l'afitamientu del asturianu nos mass media, la sostenibilidá d'estos medios, la so independencia económica y la so llibertá de prensa”, añaden.

Tampoco nun ta d’alcuerdu la XDLA cola forma d’espublizar la convocatoria de subvenciones, “a metá d'añu y con quince díes hábiles pa presentar la documentación”, lo que fai “que dalgunos medios esperen a que se conceda la subvención pa facer el proyectu, colo que namás apaecen conteníos n'asturianu dos o tres meses a final d'añu”. “Esta situación pon mui dificíl la viabilidá y continuidá de cualquier proyeutu nesti 2015”, añade.

Otra manera, “ye de reseñar qu'añu tres añu, el Gobiernu castiga a los medios de comunicación n'asturianu nun poniendo nellos publicidá institucional, colo que s'imposibilitá'l nacimientu de cualesquier ufierta nueva que quiera tener l'asturianu como llingua vehicular y con unos recursos económicos dignos pa los profesionales”, apunta la XDLA.

Tres l’alcuerdu de la FSA-PSOE ya IX

Nun escaez la organización cívica que la espublización nel BOPA de les ayudes a medios de comunicación vien tres la escoyeta de Javier Fernández como presidente del país tres llegar a un alcuerdu con Izquierda Xunida (IX), nel que la oficialidá quedó guardada nun caxón. “Ún de los principales alcuerdos en materia de política llingüística ye que se va ameyorar la presencia del asturianu nos medios de comunicación. Sicasí, hores dempués de la investidura de Javier Fernández, una de les primeres midíes qu'espubliza'l Gobiernu dexa bien claro cómo se mete la tisoria peles ayudes al asturianu”.

“Asturies y la so cultura necesiten medios de proximidá qu'ayuden a difundir y prestixar el so idioma, que visibilicen la so existencia y tola actividá cultural y económica que xeneren. Por eso, ye imprescindible la existencia de medios d'asturianu y tamién qu'esti idioma tea presente nos medios que mayoritariamente utilicen el castellanu. Ye imprescindible que los profesionales de la información que puen y quieren utilizar esti idioma nun se vean condergaos a la precariedá. Ye dalgo fundamental nuna sociedá que s'autoproclama democrática como la nuesa”, sentencia la XDLA.

Fonte: Asturies.com

Cultura reduz les subvenciones a medios de comunicación n’asturianu nun 37 por cientu

por Pablo R. Guardado

Les ayudes a empreses informatives pa la normalización del idioma pasen de 127.000 euros a 80.000. No que respeuta a la producción discográfica n’asturianu, el descensu ye del 16,7 por cientu.

Siguiendo la dinámica de los años últimos, la Conseyería d’Educación, Cultura y Deporte mete la tisoria nes ayudes al asturianu. Pendiente todavía de conocer les correspondientes a la producción editorial, que saldrán en díes próximos nel BOPA, tanto les subvenciones a medios de comunicación como a la producción discográfica descendió de manera significativa.

No que respeuta a empreses informatives, la cantidá presupuestada ye de 80.000 euros, 47.000 menos que l’añu pasáu, lo que supón una mengua del 37 por cientu. La reducción nes ayudes ye entá más significativa si comparamos los datos d’esti añu colos del 2013, cuando Cultura dedicó 168.000 euros a esti apartáu, esto ye, 88.000 euros más. Poro, el recorte n’ayudes a medios de comunición foi en dos años del 52,98 por cientu.

Tamién la metá de perres qu’hai dos años

La cantidá total d’ayudes pa la producción discográfica n’asturianu y gallego-asturianu ye de 20.000 euros polos 24.000 del añu anterior, lo que supón 4.000 euros menos, una mengua del 16,7 por cientu. Hai dos años, l’importe dedicáu a esti apartáu foi del doble qu’agora, 40.000 euros.

Fonte: Asturies.com

Nueva xirigoncia del Principáu

Les bases que van regular les subvenciones a Conceyos pa la merca de llibros n’asturianu son una auténtica xirigoncia.

El pasáu 11 de payares el Boletín Oficial del "Principado" asoleyaba una resolución de la Conseyería d’Educación, Cultura y Deporte pola que s’aprobaben les “bases reguladores de la concesión de subvenciones pal incrementu bibliográficu y l’adquisición d’obres publicaes n’asturianu por parte d’entidaes locales que sían titulares de bilblioteques integraes na Rede de Biblioteques del Principáu d’Asturies”. Con estes bases tienen l’enfotu de regular les convocatories añales que, supuestamente d’equí p’alantre, se dirán asoleyando pa que los Conceyos merquen llibros n’asturianu.

Los oxetivos d’estes ayudes son los de de facilitar “la constitución d’un fondu bibliográficu en llingua asturiana” y “l’accesu de la población asturiana a la llectura de les obres escrites n’asturianu d’una manera gratuita pa la ciudadanía”. Sicasí, dende N’Ast nun somos a pescanciar el conceutu de ciudadanía que manexa la Conseyería Cultura, porque una de les condiciones que se ponen pa tener drechu a subvención ye que “l’adquisición de les obres habrá de facese n’establecimientos de comerciu minorista de llibros (llibreríes) que los sos puestos de venta al públicu tean allugaos nel conceyu solicitante de l’ayuda”.

Ello ye, que munchos Conceyos nos que nun hai llibrería –Bimenes, Cabranes, Samartín d’Ozcos, Pezós, Sariegu, Yernes y Tameza…– nun tendríen opción nenguna a recibir la subvención nin, siempres según los dimpuesto pola Conseyería Cultura, los sos vecinos y vecines a esfrutar, de baldre, de la llectura d’obres n’asturianu nes sos respeutives biblioteques o centros de llectura. Poro, dende N’Ast queremos calificar de tomadura de pelo les presentes bases reguladores y empobinar a la señora conseyera a camudales pa que tola ciudadanía pueda beneficiase d’estes ayudes.

Fonte: N'Ast

El proyeutu presupuestariu contempla una baxada pa Política Llingüística de cerca'l 5%

IVÁN LLERA Xuben les partíes pa servicios de normalización y Academia de la llingua y baxen les sovenciones a medios de comunicación, música y llibros n'asturianu. Sanidá consume'l 39% del presupuestu El proyeutu de presupuestos pa 2014 presentáu pol Gobiernu d'Asturies y pendiente d'alderique na Xunta Xeneral contempla una baxada del 4,9% pa los fondos de Política Llingüística. D'aprobase, la direición xeneral d'Ana Fueyo vería amenorgada la so partida en 106.735 euros , pasando de 1.706.735 euros d'anguaño a los 1.623.624 previstos pal 2014. La propuesta de cuentes de la FSA-PSOE pal próximu añu ameyora la partida pa l'Academia de la Llingua Asturiana en casi 3.000 euros, hasta los 170.000 euros, y caltién el presupuestu de los premios lliterarios nos 15.000 euros. Amás, amonta les sovenciones a los conceyos pal caltenimientu de los servicios de normalización llingüística, que pasa de los 157.000 a los 176.400 euros pola incorporación de los nuevos servicios de Castrillón y Llanes. Les ayudes a la normalización repártense ente: Mancomunidá de la Sidra (15.840), Mancomunidá del Cabu Peñes (14.400), Avilés (12.960), Siero (14.400), Mieres (9.360), Llangréu (14.400), Llena (14.400), Cangas del Narcea (14.400), Samartín del Rei Aurelio (9.360), Corvera (12.960), Llaviana (9.360), Mancomunidá Oscos-Eo (15.840), Castrillón (9.360) y Llanes (9.360). Les que sí que caen son les ayudes a la normalización del asturianu nos medios de comunicación, que pasen de 168.000 euros anguaño a 127.000; la música n'asturianu pierde 16.000 euros y pasa de los 40.000 de 2013 a 24.000 pal próximu añu; mientres que les publicaciones n'asturianu caen hasta los 90.000 euros (-10.000). "Falta de compromisu" Pa la Xunta pola Defensa de la Llingua Asturiana el proyeutu de cuentes "nun vien más que a sumase a más brutales recortes que vien sufriendo la supuesta 'política llingüística' gubernamental nos últimos años" y añeden que los recorte fain ver que "les verdaderes intenciones de la clase dirixente asturiana son facer desaparecer la llingua de la nuestra memoria y el nuesu futuru". Pa Inaciu Galán, presidente d'Iniciativa pol Asturianu, estes cifres amuesen la "falta de compromisu cola normalización del asturianu" y rescampla que "lo más grave nun ye la baxada de la cantidá, sinón que les partíes nun tán diseñaes pensando en normalizar l'asturianu". Galan propón un nuevu modelu nes que les sovenciones a los medios de comunicación dexen de llimitase a páxines concretes "en llugar de sovencionar un usu por porcentaxes, qu'equilibre l'usu del asturianu ente les distintes seiciones del periódicu o la programación d'un mediu audiovisual". Fonte: Queyeho.com

Les sovenciones al asturianu mengüen un 3,88 por cientu y pierden trés llinies d’ayudes

Pablo R. Guardado

La Conseyería d’Educación, Cultura y Deporte concede nesti 2013 un total de 308.000 euros de subvención pa la normalización del idioma. Ello supón una mengua del 3,88 por cientu con respeuto a les ayudes del añu pasáu.

Como s’esperaba, nesta convocatoria desapaecen trés llinies d’ayudes al asturianu y al gallego-asturiano: a les d’actividaes d’asociaciones y otres entidaes ensin ánimu d’arriquecimientu, a les d’empreses privaes y a la promoción d’actividaes cinematográfiques y de videu. Por contra, caltiénense les subvenciones a la producción editorial, a la discográfica y a los medios de comunicación. El montante total de l’ayuda ye de 308.000 euros, 12.248,63 euros menos que l’añu pasáu (320.428,63 euros), lo que supón una mengua total del 3,88 por cientu.

El recorte de llinies de subvención provoca que, pese a esa reducción de 12.248,63 euros, xuban les perres destinaes a les trés estayes que sí mantienen les ayudes. Asina, el dineru destináu pa la producción editorial pasa de 84.480 euros a 100.000; la discográfica, de 24.000 euros a 40.000; y a los medios de comunicación, de 127.759,63 euros a 168.000 euros.

Hai que recordar que les cantidaes del 2012 sufrieron una mengua de 60.771,37 euros, tres la entrada del Gobiernu del PSOE nes eleiciones de mayu, con respeuto a les ayudes convocaes pol Executivu de Foro, qu’ascendíen a 381.200 euros. Estes cifres iniciales yá suponíen una reducción de más de la metá con respeuto a a les ayudes del añu anterior.

Fonte: Asturies.com

Foru denuncia la negativa de la Conseyería de Cultura a patrocinar la Fiesta de la Oficialidá en Bimenes

Ainara García: “La negativa de la Conseyería a patrocinar la Fiesta de la Oficialidá de la Llingua Asturiana pon en peligru la so celebración” Pa Foru Asturies “ye vergoñoso ver cómo la Conseyera abellugándose na crisis y mientres caltién seis millones d'euros pa RECREA, dexa ensin financiamientu a la Fiesta de la Oficialidá". Y ye que como cada añu, el próximu 6 de xunetu, Bimenes va celebrar la Fiesta de la Oficialidá de la Llingua Asturiana, fiesta cola que, recuerden dende Foru "el conceyu conmemora la hestórica fecha del 5 de xunetu de 1997, día nel que'l Plenu municipal aprobó la oficialidá del asturianu nel conceyu yerbatu". Sicasí, “la negativa de la Conseyería a patrocinar esti actu, basándose en cuestiones económiques, pue poner en peligru la so celebración”, tal qu'alvirtió la vocera de Foru en Bimenes, Ainara García. García apuntó que “resulta paradóxicu que nieguen esi sofitu a una fiesta que tien por finalidá poner en valir nuesa llingua como parte irrenunciable del nuesu patrimoniu cultural, cuando apocayá menos d'un mes el Viceconseyeru de Cultura y Deporte del Principáu, Alejandro Calvo, y la Direutora Xeneral de Política Llingüística, Ana María Fueyo, presentaron pa la celebración de la 34 Selmana de les Lletres Asturianes un programa d'actividaes llaráu d'actos institucionales, que como queda patente, nun son más qu'eso, meros actos institucionales que nada tienen que ver con un compromisu real cola llingua y la cultura asturiana”. “Resulta vergoñoso ver como la Conseyería de Cultura encabezada pola Conseyera Ana González, s'abelluga na crisis pa nun sofitar la celebración de la Fiesta de la Oficialidá de la Llingua en Bimenes, mientres destina más de 6.000.000 d'euros del presupuestu de cultura a satisfaer les necesidaes de RECREA, sociedá xestora ente otros equipamientos del Centru Cultural Oscar Niemeyer, símbolu ya iconu del esbardie de dineru públicu”, llamentó la vocera de Foru. “Ana González dexa asina claro una vegada más, cuál ye'l so conceptu de cultura, poniendo de manifiestu'l so despreciu absolutu y el del so partíu pola cultura polo xeneral, y l'asturiana en particular- añadió. Afortunadamente, Bimenes cunta con un bon númberu d'asociaciones y colectivos bien concenciaos cola importancia y valor de los nuesos raigaños y tradiciones, que nun van dexar que l'ausencia de financiamientu públicu, avafe la celebración d'una romería pionera que reivindica nuesa llingua como factor sustancial de la nuesa identidá como país y pilastra del nuesu patrimoniu cultural”. Fonte: Asturnews

N’Ast denuncia la esapaición de l'aidanza a les asociaciones culturales pa la normalización del asturianu

N’AST ta acabante denunciar la esapaición de les ayudes económiques que veníen recibiendo les asociaciones y colleutivos culturales del país pa la normalización social del asturianu. El Plan Estratéxicu de Subvenciones 2013 nun recueye la "tradicional llinia".


Na mesma llínia del postrer comunicáu que ficiera públicu, onde criticaba la eliminación de les subvenciones a los Conceyos, güei, dende N’AST, quieren denunciar "la esapaición de les ayudes económiques que veníen recibiendo les asociaciones y colleutivos culturales del país pa la normalización social del asturianu".

Esta circustancia queda espeyada tamién nel “Plan Estratéxicu de Subvenciones pa 2013” de la Conseyería d’Educación, Cultura y Deporte, asoleyáu nel Boletín Oficial del Principáu d’Asturies del pasáu 8 d’abril, documentu "nel que nun apaez per dengún llau la tradicional llinia de subvenciones".

N’AST camienta que la responsabilidá de normalizar socialmente l’asturianu ye de la institución cimera, la Xunta Xeneral d'Asturies, "que tien la obligación de mirar pola nuesa llingua y de facela oficial" y de los sos órganos de gobiernu. Pero sorraya que la “dexadez activa” haza l’asturianu, cuando non "ataques en toa riegla", prauticada poles estremaes Alministraciones públiques fizo que "nos últimos cuarenta años fuera la sociedá civil la que más puxare por esa normalización social".

Ye por ello, que pa N'AST dexar ensin les ayudes económiques, "coles que s’entamaben milenta actividaes, al cientu d’asociaciones y colleutivos culturales que les veníen pidiendo supón un duru guelpe pa la propia llingua asturiana". Critiquen que'l PSOE "torna a amosar qu’esta dómina de crisis económica viéno-y perbién pa siguir col procesu de dexar morrer al asturianu baxo la escusa de que `nun hai perres´".

Fonte: Infoasturies

El presupuestu va desaniciar delles llinies de sovenciones pol usu del asturianu

DAMIÁN BARREIRO . UVIÉU - 
La conseyera d'Educación y Cultura, Ana González, anunció esti 11 d'avientu na Xunta Xeneral que'l presupuestu que va dedicar el Gobiernu d'Asturies nel 2013 pa la promoción del asturianu ye de 1.706.735 euros, una cifra que supón un 14% menos de lo que se destinó anguaño. Esto supón que van desapaecer les llinies de subvenciones en concurrencia competitiva p'asociaciones, empreses y p'actividaes cinematográfiques. Sicasí, la conseyera afirmó que diba medrar la destinada a medios de comunicación y música, proyectos que consideró como de más visibilidá social.

Ana González comparez nel Parllamentu autonómicu pa falar sobre'l proyectu de los presupuestos pal 2013 xunto al so equipu, ente ellos Ana Fueyo, directora xeneral de Política Llingüística. La conseyera destacó qu'a pesar de la eliminación d'estes partíes de subvenciones, va medrar el presupuestu de l'Academia de la Llingua Asturiana pal gastu corriente, amás de que van mantenese les otres llinies de subvenciones y les actividaes de la Selmana de les Lletres, Premiu al Meyor Cantar, Axenda Didáctica Escolar o Día de les Ciencies, ente otres eventos.

El gastu corriente de la Dirección Xeneral va amenorgase en 110.000 euros, «el principal axuste», mentes que se van mantener les subvenciones pal gastu de personal a los Conceyos que cuenten con un Serviciu de Normalización Llingüística

Fonte: Les Noticies

Los medios n’asturianu lleven la metada les sovenciones

DAMIÁN BARREIRO . UVIÉU -
El BOPA d’esti 22 d’ochobre publica la resolución pola que se conceden y denieguen subvenciones pa los medios de comunicación pol usu del asturianu y del gallego-asturianu. Son un total de 127.759,63 euros, lo que supón cuasi un terciu de la cuantía cola que contaron nel 2011, que foi de 373.500 euros. Sicasí, nesta ocasión parez que los proyectos con mayor puntuación son los que vienen de medios qu’utilicen n’esclusiva l’asturianu, que se reparten un 47,68% del total de la cuantía. Nel 2010 y 2011, la partida pa estos medios namás supunxo alredor d’un 21% del total.

Ello ye que según les bases de la convocatoria de subvenciones, l’oxetu d’esta midida ye la concesión d’ayudes económiques en réxime de concurrencia competitiva pa empreses periodístiques, radiofóniques, televisives o d’internet, poles inversiones realizaes na producción d’espacios onde s’utilice l’asturianu, o’l gallego-asturianu nel so ámbitu, a lo llargo l’añu 2012, bien de manera habitual n’informaciones xenerales, bien n’espacios periódicos y fixos, bien en programes estraordinarios d’interés especial, «pero siempre que tal usu contribuya a la normalización y dignificación del usu social de la llingua y sían espacios configuraos como propios del mediu de comunicación y asumíos por él».

Amás, dende anguaño, incluyóse una cláusala pola que s’establez que va valorarase’l distintu grau d’usu del asturianu o gallego-asturianu que faiga’l mediu de comunicación nel que s’inserta’l proyectu. Otra manera, establezse que van quedar escluíos aquellos proyectos que nun cumplan colos Decretos d’oficialización toponímica aprobaos pol Conseyu de Gobiernu.

Esto supón qu’empreses como Editorial Prensa Iberica (EPI), editora del diariu La Nueva España y qu’hasta’l momentu yera la más beneficiada nesta convocatoria, pase de los más de 60.000 euros que recibió nel 2011 a los 10.700 que recibe anguaño. Mentes que les distintes sociedaes d’El Comercio pasen de 49.461 nel 2011 a 12.336,22 nel 2012. Asina, rescampla la partida de «Alitar Asturies», la sección decana de la prensa n’asturianu y que pasa de los más de 18.000 euros del añu pasáu a los 4.934 d’anguaño. Otra manera, l’únicu programa n’asturianu de la televisión privada del país, L’andariegu de Canal 10, pasa de recibir 3.000 a 1.644 euros. Per otru llau, el servidor d’asturianu d’Europa Press tien la metá de la subvención que nel 2011 y queda con poco más de 15.000 euros.

La prensa n’asturianu tamién recibe menos subvención. Sicasí, al comparar el porcentaxe cola prensa en castellanu l’amenorgamientu ye muncho menor. Asina, Araz.net, editora del diariu dixital Asturies.com, pasa de 16.000 a cuasi 11.000 euros, mentes qu’Asturnews queda con cuasi 8.000 euros, en comparanza colos 10.000 del 2011. Publicaciones Ámbitu, editora de LES NOTICIES, recibe 17.000 pol diariu dixital y 13.500 polos númberos editaos anguaño del selmanariu en papel, desaparecíu en febreru. L’añu anterior recibiera 51.481 euros en total pol dixital y el selmanariu en papel. Una cifra que chocaba colos 60.565 de EPI, los 49.461 d’El Comercio o los 39.368 de la yá desaparecíu La Voz de Asturies. Per otru llau, Radio Sele, la única emisora 24 hores n’asturianu, pasa de 6.000 euros l’añu pasáu a 3.666 anguaño. Per otru llau, el portal dixital Infoasturies recibe pela primer vez una subvención, otorgándo-y el Gobiernu una partida de más de 7.800 euros.

Otra manera, la conseyería aprobó hai selmanes una modificación nos criterios de valoración. Esti cambiu supunxo que los proyectos de «ambitu comarcal o de siguimientu social restrinxíu» pasen de valorase con 10 puntos a facelo con 5. Esto supunxo que la emisora billingüe Onda Peñes, la más escuchada na so contorna, pase de recibir 7.000 a 822 euros.

Fonte: Les Noticies

«La Razón» escontra les sovenciones al asturianu

El diariu La Razón publica na edición del 8 de setiembre una noticia onde se critiquen les subvenciones pa la normalización del asturianu. Pal diariu conservador, «gastar» 32.000 euros pa rotular «etiquetes de morciella y quesu» ye un gastu chocante nun momentu de crisis «y nun parez el más afayadizu pa normalizar una llingua, que per otru llau, nun ta reconocida como oficial».


El periódicu dirixíu por Francisco Marhuenda afirma que, no que va d'añu, el Gobiernu asturianu dedicó 320.000 euros a promocionar l'asturianu y el gallego-asturianu na lliteratura, nos medios y na sociedá, anque afirma que ye dalgo «chocante» que l'Executivu autonómicu decida promocionar el nuestru idioma «al traviés de les etiquetes de los embutíos, los quesos o los menús de los chigres». Depués, la noticia de La Razón fai un repasu peles empreses que recibieron una partida pa etiquetar n'asturianu o pa ufrir dalgún serviciu a los veceros nesti idioma.

Desque Francisco Marhuenda ye director, el diariu foi protagonista de delles polémiques, sobre too por dalgunes portaes. La edición del 9/05/2012 llegó a ser criticada pol prestixosu diariu francés Le Monde, porque aparecíen les fotografíes de cinco estudiantes con nomes y apellíos y debaxo de les imaxes un testu calificándolos d'axitadores por llamar a la participación na manifestación contra los recortes educativos. Nesi momentu, el sindicatu d'estudiantes d'España decidió denunciar al periódicu.

Fonte: Les Noticies

Toponimia asturiana y sovenciones n'asturianu

Les sovenciones pal usu del asturianu esixen l’usu de la toponimia y unos porcentaxes mínimos de conteníos Una de les novedaes de la cabera convocatoria de sovenciones pa la normalización del asturianu espublizada esti xueves 24 de mayu pol tovía Conseyeru de Cultura, Marcos Vallaure, ye que los medios de comunicación que quieran recibir estes ayudes por usar l’asturianu, tienen de facer usu nel so mediu de la toponimia oficial aprobada pol Gobiernu d’Asturies y los conceyos, pues col sistema nuevu de puntuación, esti ye un puntu con gran pesu. Esto supondría, por exemplu, que medios como El Comercio, La Nueva España o la Cadena Ser tendríen munches menos posibilidaes de recibir ayudes de nun cambiar l’usu que faen anguaño de la toponimia. Va tenese en cuenta amás l’horariu d’emisión, la calidá llingüística y si’l mediu usa l’asturianu como llingua vehicular del mesmu. La convocatoria conxunta de sovenciones pa la normalización social del asturianu y el gallego-asturianu pa esti añu tien una cuantía de 245.600 euros, frente a los 316.000 euros de 2011, cuntando con cinco llinies d’ayudes: actividaes d'asociaciones y entidaes ensin propósitu d'interés económicu, actividaes d'empreses privaes, actividaes cinematográfiques y de vídeu, música y medios de comunicación. Fonte: Asturnews

L'Asociación de Trabayadores de la Normalización Llingüística alarma sobre les sovenciones pa la normalización

Dende l’Asociación de Trabayadores de la Normalización Llingüística vienen d'amosar nun comunicáu esti vienres "la nuesa preocupación cola “tranquilidá” que ta teniendo’l Gobiernu Asturianu pa resolver les sovenciones d’asociaciones, empreses y particulares pa la normalización social del asturianu. Vemos con munchu esmolecimientu’l fechu de que téamos a día de güei, 6 d’ochobre, (a piques de que fine’l períodu llegal pa resolver los espedientes presentaos) a la espera de la resolución de la Conseyería de Cultura no tocante a les sovenciones pa la normalización social del asturianu y del gallego-asturianu pa empreses, asociaciones y particulares, que se convocaron por resolución d’esa mesma Conseyería’l 14 d’abril del 2011 y publicaes nel BOPA del 29 d’abril del 2011".

Pa l'asociación "ye chocante que tovía nun se sepia nada al respeutu, teniendo como tienen les persones o entidaes beneficiaries d’atropar tola documentación requerida, asina como les muestres escrites o/y fotográfiques que xustifiquen el destín de les perres sovencionaes, si ye que les hubiere, primero del 30 de noviembre, por nun mencionar a les persones y organismos que yá invirtieren eses perres nos proyectos pa los que solicitaren sofitu económicu".

Dende l’ATNLL "preocúpanos que nun se resuelvan nel plazu llegal porque eso supondría la pérdida de les sovenciones, como yá ta pasando n’otres comunidaes con llingua propia".
Estes sovenciones sofiten proyeutos mui importantes pa la normalización social de les llingües d’Asturies. Empreses y asociaciones desenvuelven actividaes de sensibilización social, usen l’idioma como llingua vehicular de la empresa, etc., cumpliendo de llargo col oxetivu pal que se destinen eses ayudes que nun ye otru que prestixar y normalizar los idiomes d’Asturies.

Por too esto, a l’Asociación de Trabayadores de la Normalización Llingüística "prestaría-y enforma que la Conseyería de Cultura materializara l’apoyu a la normalización del asturianu y del gallego-asturianu anunciada na campaña del so partíu y nes sos intervenciones públiques resolviendo aína les sovenciones destinaes a la normalización ente empreses, asociaciones y particulares, tan necesaria pa finar cola diglosia que se vive n’Asturies".

Fonte: Asturnews