Bimenes celebró la Fiesta de la Oficialidá con señaldá

L'ex alcalde que declaró la oficialidá nel conceyu apregonó la Fiesta Bimenes foi otra vegada esta fin de selmana el llugar d'alcuentru de les fuerces polítiques asturianes que reclamen que se cumpla la Constitución cola única llingua propia qu'entá nun ye oficial n'España, dempués de delles décades de mandatu constitucional. La popular Fiesta de la Oficialidá yerbata tuvo anguaño como protagonistes al únicu alcalde del PAS, Aitor García, y al exrexidor Joaquín García, instaurador de la Fiesta tres la so declaración de la Oficialidá nel conceyu, qu'aprovecharon les sos intervenciones pa reclamar a la clase política asturiana la reconocencia de la llingua asturiana, nun escenariu arrodiáu de pancartes favoratibles. Casar conceyu de Martimporra reclamaba la oficialidá de la llingua nuna xornada festiva na qu'el que Joaquín García, alcalde yerbatu mientres dos décades ente 1979 y 1999, protagonizó un pregón tan críticu cola situación actual como esperanzador pa los partidarios d'oficializar la llingua autóctona. L'exrexidor foi l'encargáu d'impulsar l'aprobación simbólica de la oficialidá de la llingua en Bimenes el 5 de xunetu de 1997 y aprovechó pa recordar qu'aquella iniciativa tenía unes intenciones clares: "La llingua ta viva na fala de la nuesa xente y comprometimonos col amor a la tierra, n'alcordanza de la nuesa madre y la reconocencia a la cultura asturiana", porque la llingua ye "el bien cultural más pervalible que tenemos los asturianos". García tamién tuvo una alcordanza pa los conceyos de Llangréu, Teberga, Llaviana, Llanera, Nava, Casu, Castrillón y Morcín, que nel so día siguieron l'exemplu de Bimenes y aprobaron tamién la oficialidá de la llingua asturiana. "La oficialidá nunca tuvo tan averada como agora", dixo tamién García en referencia a la nueva conformanza de la Xunta Xeneral del Principáu d'Asturies, na que trés de les seis fuercies polítiques son partidaries de la oficialidá. A los actos allegose tamién l'alcalde del conceyu portugués de Miranda do Douro, Artur Nunes, que reflexó na so intervención los raigaños comunes d'Asturies y la so tierra. Los discursos abrieron una xornada d'asturianía y folclore, na que la danza de la oficialidá" foi danciada pol públicu asistente. Fonte: Asturnews

Xuacu, l’alcalde que declaró la oficialidá, apregona la fiesta yerbata

   El sábadu celébrase la XIX Fiesta de la Oficialidá de la Llingua Asturiana en Bimenes cola participación del alcalde que puxó por ella, Joaquín García Gutiérrez ‘Xuacu’, responsable esti añu de lleer el pregón.

La novedá d’esti añu nesta celebración que conmemora la declaración d’oficialidá nel conceyu yerbatu –torgada llueu pol Tribunal Constitucional– nel Plenu del 5 de xunetu del 1997 mientres el mandatu del propiu Xuacu, ye l’entamu del I Campeonatu de Bolos pola Oficialidá na bolera del Colexu Públicu de Martimporra, nel que participen les peñes bolístiques El Biche, Villa de la Sidra Titi, El Chalupu y Rozaes.

   Güei van celebrase les semifinales a partir de les 19 hores colos cruces siguientes: El Biche-Villa de la Sidra Titi y El Chalupu-Rozaes. La final ta prevista pa mañana a les 19.30 hores.

   Tolos actos festivos van centrase na xornada de mañana, con aniciu al meudía na Plaza de la Casa Conceyu. Tres una intervención institucional y la llectura del pregón por parte de Xuacu, va tener llugar la Danza de la Oficialidá y un pasucais del Grupu Folklóricu Los Yerbatos, que va actuar a les 13.30 hores nel polideportivu de la escuela.

   Nesi llugar va celebrase la xinta popular y, dende les 17.30 hores, el II Concursu d’Escanciadores de Bimenes, puntuable pal Campeonatu d’Asturies. Tres la final de bolos, va llegar el turnu de la música, cola actuación a les 22 hores de la cantante de tonada Alicia Villanueva y, darréu, del grupu de folk progresivu N’Ochebre. Por último, DJ Lucy va allargar la xornada hasta la madrugada.

XVI Concursu de Gaita de Bimenes                El domingu, mentes, a les 17 hores, va celebrase nel polideportivu la final del XVI Concursu de Gaita de Bimenes. Ésti ta destináu a intérpretes mozos menores de 21 años y el ganador recibe una recompensa de 300 euros. Fonte: asturies.com

Joaquín García Gutiérrez va pregonar la Fiesta de la Oficialidá

La novedá d’esti añu ye la cellebración del I Campeonatu de Bolos pola Oficialidá

Imaxe d'arquivu

   El que fuera Alcalde de Bimenes ente 1979 y 1999, Joaquín García Gutiérrez, va ser el pregoneru de la XIX Fiesta de la Oficialidá de la Llingua Asturiana de Bimenes, que se va cellebrar el sábadu 4 de xunetu na capital del conceyu, Martimporra. Precisamente ente los méritos de “Xuacu”, como popularmente ye conocíu, ta el de ser la persona que más puxó pola Declaración d’Oficialidá del Asturianu en Bimenes, aprobada demientres el so mandatu, concretamente’l 5 de xunetu de 1997.

   Pa esta edición de la folixa’l Conceyu Bimenes presenta un programa d’actividaes bien completu qu’inclúi, amás del pregón y de la intervención institucional del Alcalde, baille y música tradicional, xinta popular, el II Concursu d’Escanciadores de Bimenes (puntuable pal Campeonatu d’Asturies 2015) y delles actuaciones musicales nocherniegues, ente les que rescamplen les de la cantante de tonada Alicia Villanueva Megido y del grupu de folk progresivu N’Ochebre.

   La novedá d’esti añu ye la cellebración del I Campeonatu de Bolos pola Oficialidá, nel que participen les peñes bolístiques El Biche, Villa de la Sidra Titi, El Chalupu y Rozaes. Les semifinales del campeonatu van tener llugar el vienres día 3 y la final el sábadu 4, nel trescursu de la fiesta. Y pal domingu día 5 queda la final del XVI Concursu de Gaita de Bimenes.          Fonte: asturnews.com

Más información: Programa completu na páxina web del Conceyu

Bimenes asoleya los actos de la so XVII Fiesta de la Oficialidá

La Fiesta de la Oficialidá de Bimenes va a cellebrase'l 6 de Xunetu, con actividaes complementaries en díes distintos.

Bimenes entama un añu más la so Fiesta de la Oficialidá, que cumple yá la so XVII edición. Nesta ocasión esta xornada de folixa y vindicación tendrá llugar el 6 de Xunetu, con un programa enllenu d'actividaes musicales y culturales. El pregón d'esti añu tará a cargu de Luis Portal Hevia, escritor y periodista, qu'a les 12:15 dará pasu a un programa músical, folclóricu y cultural bien diversu, cola yá tradicional Danza de la Oficialidá, y otres actividaes como les actuaciones de grupos folclóricos.

Los Yerbatos, La Flor del Pumar, Alienda, o Ajo Band, son dalgunos de los conxuntos participantes. A too ello habrá qu'amestar l'amuesa bolística de cuatriada o la xinta popular, nun programa completu y de claru conteníu cultural asturianu. A la xornada del 6 de xunetu habrá qu'amestar actividaes compementaries, como la representación teatral del día 5, o la xornada lliteraria del día 12.

Fonte: Infoasturies

Foru denuncia la negativa de la Conseyería de Cultura a patrocinar la Fiesta de la Oficialidá en Bimenes

Ainara García: “La negativa de la Conseyería a patrocinar la Fiesta de la Oficialidá de la Llingua Asturiana pon en peligru la so celebración” Pa Foru Asturies “ye vergoñoso ver cómo la Conseyera abellugándose na crisis y mientres caltién seis millones d'euros pa RECREA, dexa ensin financiamientu a la Fiesta de la Oficialidá". Y ye que como cada añu, el próximu 6 de xunetu, Bimenes va celebrar la Fiesta de la Oficialidá de la Llingua Asturiana, fiesta cola que, recuerden dende Foru "el conceyu conmemora la hestórica fecha del 5 de xunetu de 1997, día nel que'l Plenu municipal aprobó la oficialidá del asturianu nel conceyu yerbatu". Sicasí, “la negativa de la Conseyería a patrocinar esti actu, basándose en cuestiones económiques, pue poner en peligru la so celebración”, tal qu'alvirtió la vocera de Foru en Bimenes, Ainara García. García apuntó que “resulta paradóxicu que nieguen esi sofitu a una fiesta que tien por finalidá poner en valir nuesa llingua como parte irrenunciable del nuesu patrimoniu cultural, cuando apocayá menos d'un mes el Viceconseyeru de Cultura y Deporte del Principáu, Alejandro Calvo, y la Direutora Xeneral de Política Llingüística, Ana María Fueyo, presentaron pa la celebración de la 34 Selmana de les Lletres Asturianes un programa d'actividaes llaráu d'actos institucionales, que como queda patente, nun son más qu'eso, meros actos institucionales que nada tienen que ver con un compromisu real cola llingua y la cultura asturiana”. “Resulta vergoñoso ver como la Conseyería de Cultura encabezada pola Conseyera Ana González, s'abelluga na crisis pa nun sofitar la celebración de la Fiesta de la Oficialidá de la Llingua en Bimenes, mientres destina más de 6.000.000 d'euros del presupuestu de cultura a satisfaer les necesidaes de RECREA, sociedá xestora ente otros equipamientos del Centru Cultural Oscar Niemeyer, símbolu ya iconu del esbardie de dineru públicu”, llamentó la vocera de Foru. “Ana González dexa asina claro una vegada más, cuál ye'l so conceptu de cultura, poniendo de manifiestu'l so despreciu absolutu y el del so partíu pola cultura polo xeneral, y l'asturiana en particular- añadió. Afortunadamente, Bimenes cunta con un bon númberu d'asociaciones y colectivos bien concenciaos cola importancia y valor de los nuesos raigaños y tradiciones, que nun van dexar que l'ausencia de financiamientu públicu, avafe la celebración d'una romería pionera que reivindica nuesa llingua como factor sustancial de la nuesa identidá como país y pilastra del nuesu patrimoniu cultural”. Fonte: Asturnews

Romería de la Oficialidá de Bimenes

La Fiesta de la Oficialidá de Bimenes adelanta la fecha y pasa a llamase Romería de la Oficialidá Por Pablo R. Guardado. La fusión de la Romería Asturiana que tenía llugar en mayu en Bimenes cola Fiesta de la Oficialidá da como resultáu la Romería de la Oficialidá. Nesta primer edición va adelantase al 16 de xunu pa nun coincidir col Festival de la Sidra de Nava. Pese a esti cambiu nel formatu tradicional de la Fiesta de la Oficialidá de la Llingua Asturiana, qu’esti añu cumpliría dieciséis ediciones, nun se pierde la esencia d’esta folixa que conmemora la declaración d’oficialidá nel conceyu yerbatu –torgada llueu pol Tribunal Constitucional– nel Plenu del 5 de xunetu del 1997, nin tampoco les actividaes más significatives, como la llectura del pregón, qu’esti añu va correr a cargu de la escritora Ana Vanessa Gutiérrez, o’l concursu de gaiteros y gaiteres mozos. D’esta forma, amás del Conceyu de Bimenes, van participar na organización d’esta fiesta los dos coleutivos qu’entamaben la Romería Asturiana, les asociaciones culturales Los Yerbatos y El Corriellu la Pandorga, y el Palaciu del Marqués de Casa Estrada. Con esti cambiu s’espera que les celebraciones garren más puxu. No que respeuta al cambiu de fecha, trátase de dalgo circunstancia, según señala Daniel Cueli. “La Romería de la Oficialidá va celebrase, al igual que la Fiesta de la Oficialidá, el primer sábadu de xunetu. Nesta ocasión, al ser mui tardíu (el día 7), coincide col Festival de la Sidra de Nava y por eso decidimos adelantalo al 16 de xunu, fecha na que tampoco nun coincide con otres fiestes de parroquies del conceyu”, esplica’l téunicu d’emplegu y desarrollu llocal de Bimenes y responsable de la programación cultural del conceyu yerbatu. Nel prau del Palaciu del Marqués de Casa Estrada El sábadu 16 de xunu, l’actividá en Martimporra va principiar a les 11 hores con un pasucais que va dar pasu, a les 11.30 hores, a la llectura del pregón na Casa Conceyu. Al meudía va celebrase la misa y la procesión, pa depués entamar la puya’l ramu y la Danza de la Oficialidá. Tamién va haber actuaciones de bandes de gaites y de grupos de bailles infantiles. Pa les 14.30 hores ta prevista, nel polideportivu del colexu públicu, la xinta popular, que va consistir nun pinchéu con tortielles, bollos preñaos, costielles y empanaes, ente otres viandes, postre y bébora. El so preciu ye de 15 euros y ye necesario confirmar asistencia nel teléfonu 985.70.01.64 o na propia Casa Conceyu. Yá de tarde, coles fuercies recargaes, yerbatos y visitantes van poder disfrutar del XIII Concursu de Gaiteros y Gaiteres Mozos (16.30 hores) y del Festival Folklóricu (18.30 hores), nel que van participar les bandes de gaites Ciudad de Cangas de Onís, Villa y Condáu de Noreña y Los Yerbatos, amás de los grupos de baille La Flor del Pumar (Nava), La Deva (Xixón), Los Yerbatos (Bimenes) y Asubío (Vigo), y del coriquín tradicional El Corriellu la Pandorga. A les 21 hores ta prevista la llectura d’un Manifiestu pola Oficialidá por parte de neños y neñes y mayores del conceyu, pa zarrar la xornada festiva cola actuación, media hora más tarde, d’Anabel Santiago, David Varela y Javi Álvarez ‘Pitu’, que van tar acompañaos de los escolinos y escolines del cursu de canción asturiana de Bimenes. Fonte: Asturies.com