Reaiciones a la campaña “Vuelve al Paraíso, ven a Asturies”

Andecha Astur critica la hipocresía del “Principado” y Ecoloxistes d’ AsturiesVerde.Net llancen un videu nel qu’asonsañen la campaña de turismu

Denuncien la utilización fraudulenta de la nuesa bayura natural al tiempu que permiten el so desaniciu. “Ye un contrasentíu aprofitar la guapura del nuesu país con fines económicos ya al tiempu consentir toa triba d’abusos a la mesma” diz Arturu Xosé Bermeyu, Secretariu Xeneral d’Andecha Astur, quien tamién recalca la nula presencia del asturianu na presentación de la campaña, na que, per otru llau, abonden los términos ingleses.

Asturies ye un paradisu, si, pero tan estrozándolu. Llargues xornaes llaborales p’algamar infrasueldos, atascos sofitaos na falta d’un eficiente tresporte públicu, contaminación, comida basoria, tele basoria… non too ye tan guapo comu te lo pinten. Esi ye’l mensaxe principal del videu que, asonsañando a la campaña oficial de turismu, circula peles redes.

Nelli dan un repasu a dellos de los problemes ecolóxicos que carecemos anguañu nel país, vertíos, animales colgaos peles carreteres, desproteición de la mesma ñatura que quieren vender y munchos más problemes que namás unos pocos s’atreven a denunciar… “¿Que nos ta pasando?” entruga’l narraor.

Tamién remarca la pasividá de la población énte l’espoliu del nuesu padrimoniu natural “Quiciás que nun desiximos una vida sana y natural…Nun queremos una Asturies de folletu publicitariu, de Greenmarketing, sinón una Asturies real”.

Nun queremos convertinos nel Paradisu perdíu, o meyor dicho, arrampluñáu.

Fonte: Infoasturies

SUATEA pide a la Conseyería que nun “venda fumu” cola especialidá d'asturianu

El sindicatu mayoritariu na enseñanza docente non universitaria n’Asturies, SUATEA, salía esti miércoles al pasu de les declaraciones que’l Conseyeru d’Educación, Genaro Alonso, ficiera nos medios alredor de la Especialidá Docente de Llingua Asturiana, porque pal sindicatu nun hai más que dos soluciones: “Que’l Ministeriu cumpla l’alcuerdu del Conseyu Escolar del Estáu o que’l Parllamentu asturianu conceda la oficialidá”.

SUATEA quier esclariar que “les noticies espublizaes nes que la Conseyería anuncia la creación d’una comisión, a comuña col Ministeriu, pa ellaborar un decretu autonómicu, nun puen entendese como avances pa la creación de la Especialidá, nel momentu nel que namás hai dos soluciones: Que’l Ministeriu cumpla l’alcuerdu del Conseyu Escolar del Estáu nos términos enantes espuestos o bien que’l Parllamentu asturianu conceda l’estatus xurídicu y constitucional que convierta n’oficial el nuesu idioma. Nun caben terceres víes“.

Tóca-y, eso sí, al Conseyeru esixir al Ministeriu d’Educación la modificación de los decretos d’especialidaes; pidir al Gobiernu d’Asturies l’apoyu a la oficialidá del nuesu idioma y dar desplicaciónes clares a la comunidá educativa y profesoráu asturianos del procesu y conteníu de les negociaciones col Ministeriu: “Lo demás ye allongar, vender fumu y distrayemos del compromisu d’algamar LA ESPECIALIDÁ DOCENTE DE LLINGUA ASTURIANA contrayíu pol so Gobiernu dende l’anterior llexislatura”.

Nesti sen, SUATEA quier recordar a la comunidá educativa delles cuestiones que desplica nun comunicáu de prensa qu’asoleyare esti día:

“-Que la creación de la especialidá docente en Primaria y Secundaria ta sofitada dende Asturies pola demanda de la Xunta Xeneral del Principáu d’Asturies, polos sindicatos mayoritarios de la educación pública, poles asociaciones de padres y madres con más implantación, pola Academia de la Llingua Asturiana, pola Xunta de Personal Docente non universitariu, pol Conseyu Escolar del Principáu y a nivel estatal pol Conseyu Escolar del Estáu, que ye la institución que fai’l llabor consultivu, d’asesoramientu y propuestes al Gobiernu español rellacionaes col sistema educativu.

-Ye, efectivamente, falso dafechu dicir que’l Ministeriu nun tien les competencies esclusives pa crear les especialidaes docentes (Adicional séptima LOE, apartáu 2: “Corresponde al Gobierno, previa consulta a las Comunidades Autónomas, la creación o supresión de las especialidades docentes de los cuerpos a los que se refiere esta disposición”). Esta competencia exercióla’l gobiernu al traviés de los decretos d’especialidaes d’Infantil y Primaria, y Educación Secundaria. Nestos decretos, y no referío al enseñu de les llingües, la llexislación recueye que serán especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria).

-El Conseyu Escolar del Estáu a propuesta de STES (a la que pertenez SUATEA) fixo va tiempu una propuesta pa desbloquear lo que ye non solo una demanda unánime sinón una discriminación flagrante ya intolerable con un colectivu d’enseñantes que lleva años nuna situación irregular y ensin los derechos que tien el restu de la comunidá educativa asturiana. Esta propuesta consiste en que los reales decretos d’especialidaes amiesten un apartáu que diga: “Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva”.

-Nun ye posible nel ordenamientu xurídicu estatal nin autonómicu crear una especialidá que nun tea fixada pol Ministeriu“. Fonte: Asturnews

Andecha Astur prioriza la oficialidá pa poder cuntar con unos presupuestos afayadizos

por Pablo R. Guardado

Los nacionalistes comparten la denuncia de discriminación pal asturianu fecha pola ALLA, pero ven básico la oficialidá. Mentes, Podemos demandó a Alonso más recursos pal nuesu idioma nos presupuestos na Comisión sobre les cuentes d’Educación y Cultura.

“Pa poder cuntar con una partida presupuestaria afayadiza nos presupuestos asturianos y acceder tamién a les sovenciones millonaries de los presupuestos del Estáu y de la XE pa les llingues oficiales, nun hai que perder de vista lo fundamental: que la llingua asturiana seya oficial”, entiende Andecha Astur, que cree que “mientres siga dándose l’actual situación de falta de reconocencia llegal, la discriminación presupuestaria ye inevitable. Lo único esperable son les migayes que los partíos de la Xunta Xeneral tengan a bien conceder”.

La organización nacionalista sofita la postura presentada esta selmana pola Academia de la Llingua Asturiana (ALLA), pero apunta que “por munchu presupuestu que destine’l ‘Principado’ al asturianu, seya pa la so rede clientelo-familiar de la Oficina de Política Llingüística, seya pa la mesma ALLA, la represión siguirá siendo un fechu”. Por ello afirma “que mentes nun se garantice’l drechu de los asturianos y asturianes a utilizar la so propia llingua dientru’l so país con toles consecuencies, tarémos falando de concesiones arbitraries, non de drechos”.

Ello lleva a Andecha a esixir “la oficialidá del asturianu como pasu obligáu pa la normalización democrática en materia llingüística y primer pasu pa la so recuperanza”, al empar que denuncia “les actitúes de posturéu de los que dicen tar a favor d’esi drechu pero nun lu reconocen allí onde tienen poder políticu”.

Otra manera, el sábadu pasáu Andecha Astur celebró’l so Conceyu Nacional, que coincidía col 25 aniversariu de la formación, nel que participaron representantes d’Alternativa Nacionalista Canaria, CUP, Chunta Aragonesista y BNG, amás del diputáu d’Amaiur Jon Iñarritu. Nél la militancia afitó les bases de la organización: “soberanía, socialismu, oficialidá, igualdá y futuru”.

Más recursos

Genaro Alonso, conseyeru d’Educación y Cultura, compareció ayeri énte la Comisión de Facienda de la Xunta Xeneral pa presentar les cuentes del so departamentu. Lucía Montejo, de Podemos, aprovechó la so comparecencia pa demandar más recursos pal asturianu nel presupuestu. Tamién pa criticar l’ausencia de programes de formación en llingua asturiana, dalgo que reconoció’l propiu Alonso. Al respeuto, Montejo emponderó l’actitú conciliadora del conseyeru.

Concha Masa, d’IX, solicitó pela so parte más apoyu al asturianu. Otra manera, na so intervención, Alonso defendió la necesidá d’aprobar el presupuestu pa poder convocar asina les oposiciones previstes pal mes de xunu, con 400 plazes en xuegu.

Fonte: Asturies.com

L’ALLA llama a los partíos favoratibles al asturianu a presentar enmiendes al presupuestu, que considera insuficiente

1.570.664 euros ye la cantidá destinada a la política llingüística pal 2016, esto ye, 1,5 euros por asturianu. “Plantegar que se pue facer dalgo con esi presupuestu ye daqué ofensible”, afirmen dende la institución académica.

L’Academia de la Llingua Asturiana (ALLA) amuesa la so deceición llueu de conocer pelos medios de comunicación la propuesta presupuestaria destinada al asturianu. “Les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada –a mediaos d’ochobre pasáu– mayoritariamente nel Parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX”, señalen dende la institución, qu’asegura que “plantegar que se pue facer política llingüística con un presupuestu de 1.500.000 d’euros, esto ye, 1,5 euros por asturianu, ye daqué ofensible pa toles persones con una mínima sensibilidá llingüística y cultural asturiana”.

En comparanza coles llingües d’otres zones del Estáu, la situación del asturianu ye llaceriosa. Según los datos apurríos pola ALLA, Galicia y la Comunitat Valenciana tripliquen por persona’l presupuestu asturianu; Illes Balears, pela so parte, cuadriplícalu. Mentes, l’aranés multiplica la cantidá d’euros por persona invertíes por 10. Nel casu navarru, territoriu cola metá de población qu’Asturies y con una proporción d’usuarios de la llingua autóctona que nun sobrepasa’l 10 por cientu de la población, el Gobiernu dedica a política llingüística 4.000.000 d’euros.

Soluciones a una situación “que nos avergoña como asturianos”

“Na nuesa comunidá, llueu de lo anterior, faise dafechu imposible falar de recuperación llingüística – y mesmamente de política llingüística favoratible– cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero – por exemplu, les rotulaciones de nueves instancies y servicios públicos cuesten tanto n’asturianu como en castellanu; espublizar un anunciu institucional nos medios de comunicación cuesta lo mesmo n’asturianu qu’en castellanu; etc. –, pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creyibles”, entienden dende l’ALLA.

Por esti motivu, la insititución presidida por Ana María Cano quier llamar l’atención sobre’l problema pa que “de nengún mou se puea repitir situación asemeyada n’años venideros”, al empar que llama a los partíos políticos que llevaron nos sos programes midíes concretes de política llingüística “la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies”.

“Ye obligación de l’Academia de la Llingua Asturiana denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos”, añede.                             Fonte: Asturies.com

L’Academia critica unos presupuestos “fondamente discriminatorios”

L’Academia siéntese deceicionada polos presupuestos del Principáu y “la situación oxetivamente inxusta y fondamente discriminatoria” de los mesmos.

L’allugamientu de l’Academia de la Llingua Asturiana énte la propuesta presupuestaria del Gobiernu d’Asturies en rellación cola llingua asturiana, o “la imposibilidá de facer política llingüística ensin presupuestu económicu que la sofite” como la noma’l comunicáu qu’ayeri ufiertaba pela tarde l’Academia, conozse después de que delles de les asociaciones de defensa del idioma coincidieren nes crítiques.

L’Academia de la Llingua Asturiana, llueu de conocer pelos medios de comunicación la propuesta presupuestaria destinada al asturianu que’l Gobiernu d’Asturies acaba d’unviar a la Xunta Xeneral del Principáu, quería trasladar ayeri a la opinión pública “la so más fonda deceición pol conteníu de la mesma: N’efeutu, les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada (a mediaos d’ochobre pasáu) mayoritariamente nel parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX”.

Pala Academia, “plantegar que se pue facer política llingüística con un presupuestu de 1.500.000 d’euros (esto ye, 1,5 euros por asturianu) ye daqué ofensible pa toles persones con una mínima sensibilidá llingüística y cultural asturiana. Da que pensar, nesti sen, el fechu de qu’otres comunidaes con llingua propia, ente elles les que menos dediquen a política llingüística, s’estremen tanto de la propuesta asturiana. Asina -y al marxe de partíes económiques concretes destinaes a educación, vida parllamentaria, xestión de diputaciones y universidaes, etc.- Galicia y Valencia tripliquen por persona’l presupuestu asturianu; Baleares cuadriplícalu; y Navarra, pa cuasi la mitá de población qu’Asturies y con una proporción d’usuarios de la llingua autóctona que nun sobrepasa’l 10% de la población, dedica a política llingüística 4.000.000 d’euros. Too ello por nun falar del presupuestu destináu a la proteición del aranés que, cenciellamente, multiplica por 10 euros el presupuestu por persona n’Asturies”.

Na nuesa comunidá, llueu de lo anterior, faise dafechu imposible falar de recuperación lingüística pala Academia, ya inclusu de política lingüística favoratible “cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero (por exemplu, les rotulaciones de nueves instancies y servicios públicos cuesten tanto n’asturianu como en castellanu, espublizar un anunciu institucional nos medios de comunicación cuesta lo mesmo n’asturianu qu’en castellanu, etc.), pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creíbles”.

Esta ye la “llaceriosa situación cola que nos atopamos agora na tramitación parllamentaria de los presupuestos. ¿Qué facer, entes?” Pues, en primer llugar, pala Academia de la Llingua ha llamase  “l’atención sobre estos fechos pa de nengún mou se puea repitir situación asemeyada n’años venideros y, sobre too, actuar agora mesmo, nel intre, faciendo ver a los partíos políticos que llevaron nos sos programes midíes concretes de política llingüística la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies”.

Ye obligación de l’Academia de la Llingua Asturiana “denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos”.

Fonte: Asturnews

El PAS noma de “camelu” los pautos IX-PSOE sobre l’asturianu

Pal Partíu Asturianista, “una vegada más, los alcuerdos ente IU y el PSOE nun son más qu’un cuentu chinu”, talante como dix el PAS qu’asocediera nel 2005.El Partíu Asturianista dix que “primero anunciaren, dempués d’apoyar a Javier Fernández como presidente, que diben poner en marcha un plan estraordinariu d’apoyu al asturianu. Pues bien, tolos acuerdos qu’anunciaren nun yeren nada más qu’un resume de la Llei d’Usu y Promoción del PAS,que lleva ensin cumplise dende que Vicente Alberto Álvarez ganó les eleiciones en 1999″.

Per otru llau, “agora, dempués de proclamar que diba haber recursos dinerarios mayores pal asturianu, enterámonos de que tola suba son 20.000 euros, en concretu el presupuestu pasa de los 1.552.684 € en 2015 a 1.570.664 €, una capitalina”.

Ocurriera ya satemente igual nel 2005, cuando IU gobernaba col PSOE, alienten los asturianistes: “el primer presupuestu d’aquel gobiernu seguía siendo mui inferior a los de 1997 y 1998 pautaos ente’l PAS y el Gobiernu Marqués. Camelu tres camelu, nada de nada, esa ye la traducción del les proclames d’IU sobre l’asturianu (y la de la presencia d’un “asturianista”, Genero Alonso, al frente del departamentu)“.

Fonte: Asturnews

Reaición unánime na rede énte les crítiques al asturianu del fíu d'Alarcos

por Pablo R. Guardado

Una llectura d’un poema n’asturianu mientres un ‘Homenaje a los poetas de la Cátedra Emilio Alarcos’ na Universidá d’Uviéu provocó l'enfadu de Miguel Alarcos. Tres esbabayar contra’l nuesu idioma nesi mesmu actu, apuntó darréu en Facebook que la llingua asturiana ye “una puta mentira” de la que s’aprovechen “políticos y filólogos paletos”.

Foi nel grupu zarráu Agrupación Emilio Allarcos Llorach ‘Pervivencia y actualidá’, formáu por 222 miembros, pero les sos pallabres corrieron como la pólvora peles redes sociales, qu’enantes conocieron de la mano de Raquel F. Menéndez lo qu’asocedió’l llunes nel actu celebráu nel Edificiu Históricu. “Pa la mesma, a la vez que se-y encargó al poeta Lorenzo Oliván una conferencia sobre universidá y poesía, lleeron dalgunos de los poetes incluyíos dos poemes caún. Fui la primera que lleí. En primer llugar, recité un poema n’español na memoria d’Amparo Pedregal, feminista y profesora d'hestoria antigua de la Universidá. Depués, decantéme por un poema n'asturianu. Non por ánimu provocador, sinón, simplemente, porque nel últimu añu nun escribí casi en nada más que nun fuera na nuesa llingua. Dende la mesma mesa oí un murmuru, pero intenté nun da-y muncha importancia”, esplicó la poeta na plataforma Change.org, onde abrió un pedimientu tres pensar en frío lo acontecío.

“Cuando volví al mio sitiu dixéronme que les cares de la directora de la Catedra Emilio Alarcos –trátase de Josefina Martínez, viuda d’Alarcos– fueron de rechazu cuando yo dixi que diba lleer n’asturianu. Sinceramente, nun me lo tomé en serio. Insisto: nun foi nengún actu de rebeldía, sinón de lleer lo que nesi momentu m'apetecía. Nun sabía que la posición de la Cátedra Emilio Alarcos fuera de total negación de la realidá llingüística d'Asturies. Amás, Claudia Elena Menéndez y Lluis Xabel Álvarez lleeran nel alcuentru orixe d’esta antoloxía n’avientu de 2013 los sos poemes n'asturianu, y asina fueron recoyíos na mesma. Llamentablemente, nengún dellos taben presentes ayeri”, continuó rellatando Menéndez.

La falta de respetu vieno darréu, cuando Miguel Alarcos, profesor de la Universidá d’Uviéu y fíu del fundador del coleutivu de desagradable recuerdu Amigos de los Bables, afirmó pa zarrar l’actu que “consideraba una falta de respeto a la memoria de su padre que en ella se incluyeran poemas en llingua asturiana”.

Amplió les critiques en Facebook

La cosa nun quedó ehí, yá que’l profesor universitariu siguió coles critiques nel grupu de Facebook “destinado a recoger y comentar todo cuanto en el presente siglo contribuye a la vigencia de Emilio Alarcos Llorach, tanto en su aspecto vital y humano como en su condición de filólogo, poeta y pensado”. Asina refirióse al nuesu idioma como “constructo artificial que nadie habla y que tanto denostó Emilio Alarcos, lo que le costó insultos y sinsabores”.

Tamién apuntó que nun s’arrepentía de nada de lo que dixo nel actu y inclusive atrevióse a insultar al vicealcalde d’Uviéu, presente nel mesmu, Roberto Sánchez Ramos ‘Rivi’, al que tachó de “apologeta de la llingua”. Por último, tamién prohíbe nel grupu “cualquier uso o difusión del acto o de cualquier otro en que el nombre de Alarcos Llorach se vea mezclado con las actividades de ese invento del asturiano... una puta mentira que se aprovecha de la gente de bien y beneficia a políticos y filólogos paletos”.

Estes pallabres provocaron una repercusión amplia nes redes sociales, con una reaición unánime contra la postura y les pallabres faltoses de Miguel Alarcos sobre la llingua asturiana.

Más de 1.400 firmes d’apoyu a Menéndez

El pidimientu de Menéndez ta dirixíu a Estensión Universitaria de la Universidá d’Uviéu y al Conceyu d’Uviéu. “Paezme vergoñoso que, partiendo d'estes idees sobre la diversidá llingüística, la Cátedra Emilio Alarcos reciba subvenciones del Ayuntamientu d'Uvieu, y que la propia Universidá d’Uvieu nun condene’l mensaxe d’un profesor qu’atenta contra la conciencia llingüística de munchos falantes del Principáu. Con esta recoyida de firmes  lo únicu que se quier ye dexar constancia de que negámonos a que siga censurándose la llingua asturiana dende los órganos de poder y dende la Universidá d'Uviéu”, afirma la poeta, qu’asegura que-y entró la murnia “al oyer les pallabres de Miguel Alarcos. Frustráronme y fixéronme sentir que, como nel Franquismu, sigue tando prohibío o  velao espresase na llingua qu’unu tien como suya”.

L’apoyu a esta propuesta ta siendo importante, yá que yá nel momentu de redactar esta noticia llevaba 1.447 firmes de sofitu. Pue accedese a esti pidimientu en Chage.org calcando equí.

Negóse a falar en ‘Naguando’

Naciu Varillas, presentador de ‘Naguando’, l’espaciu n’asturianu de ‘El tren de RPA’, convidó a Miguel Alarcos a falar nel so programa, ufierta que’l profesor universitariu refugó.

“Declaraciones xenófobes”

El Conseyu d'Estudiantes y les Asamblees d'Estudiantes de la Universidá d’Uviéu nun tardaron n’asoleyar un comunicáu tres conocer les declaraciones de Miguel Alarcos, que calificaron de “xenófobes”. “Creemos que namás un inorante con fondos sentimientos d’odiu puede llamar ‘paletu’ a daquién por utilizar una llingua, creyéndose superior”, continúen, pa depués afirmar que “esti señor ye una vergoña pa la filoloxía, pal departamentu de Filoloxía Clásica y Románica y pal conxuntu de la Universidá d’Uviéu”.

Por esti motivu, señalen que’l rectoráu “debiera non solo dar públicamente la so opinión del asuntu, sinón entamar un procesu sancionador contra Miguel Alarcos énte la enorme falta de respetu a les y los estudiantes falantes, a la llingua asturiana y a los mesmos Estatutos de la Universidá”. D’igual forma, anuncien que van llevar el casu énte’l Defensor Universitariu.

Fonte: Asturies.com

La XDLA critica “la vaguedá y inconcreción” del plan de dignificación no que se refier a la RTPA

por Pablo R. Guardado

Llamenta’l “desaxuste ente les motivaciones d'esta PNL y les aiciones que se proponen al final”. “Les midíes puen quedar en nada ensin una direición xeneral de RTPA comprometida colos drechos llingüísticos”, alerta énte los nomes que se manexen.

“Lo primero que rescampla ye'l contraste ente l'argumentación que se fai na esposición de motivos y l'articuláu posterior de la proposición. Na esposición de motivos recuéyese de manera acertada la falta de drechos llingüísticos que sufre Asturies y l'agraviu comparativu que supón que n'otros territorios sí tean reconocíos al traviés de la cooficialidá. Tamién se destaca lo inxusto, discriminatorio y antidemocrático d'esta situación que nun se pudo o nun se quixo iguar en toos estos trenta años últimos. Llama l'atención que la conclusión d'esti preámbulu nun sía la de tratar de solucionar d'una vez esta falta de derechos diendo camín del reconocimientu del estatus xurídicu d'oficialidá, sinón que se vuelvan a proponer midíes de ‘proteición y impulsu’ que nos párrafos anteriores reconociéronse ‘insuficientes y ineficaces’”, espón la Xunta pola Defensa de la Llingua Asturiana (XDLA) nun comunicáu.

La organización cívica entiende que d’aplicase les midíes del plan de dignificación de la llingua asturiana qu’ha d’aprobar el Conseyu de Gobiernu “seríen positives pal procesu de normalización llingüística del  asturianu”, pero considera qu’hai delles cuestiones nes que detecta vaguedaes y inconcreciones, sobre manera no que se refier a la RTPA. “La ferramienta de comunicación básica y principal d'Asturies, que tenía que tener un papel fundamental como vehículu de normalización social del asturianu, queda despachada con un oxetivu tan probe como'l de ‘impulsar l’ampliación d'espacios’, viendo que llevamos una década de porcentaxes ínfimos, tematizaos y marxinales. Ye inasumible que los drechos de la ciudadanía y el cumplimientu de les lleis queden a los deleres de los órganos xestores del ente y d’una dirección xeneral continuista na falta de rigor y compromisu col asturianu”, critica al empar demanda una direición del ente “comprometida colos drechos llingüísticos”.

González Orejas y Virgili, posibles direutores xenerales.

La negociación pola eleición del direutor próximo de la RTPA yá tien dellos nomes sobre la mesa. La FSA-PSOE propón a Francisco González Orejas, mientras que’l PP quier la continuidá d’Antonio Virgili. Nengún de los dos cumple col perfir de persona comprometida colos drechos llingüísticos, como demanda la XDLA. En redes sociales, el coleutivu yá amosó'l so malestar énte les opciones que se manexen.

Un nome que yá quedó descartáu ye’l de José Luis Muñiz Viejo, refugáu pol PP tres ser propuestu en primer llugar polos socialistes. Otra manera, Foro denunció que les negociaciones tán siendo llevaes polos dos partíos con mayor representación na Xunta Xeneral ensin cuntar col restu.

Estaya educativa

No que se refier al tema educativu, la XDLA apunta que’l plan de dignificación incorpora “reivindicaciones que vienen faciéndose dende bien de tiempu como la Especialidá, el Grau, los proyectos pilotu de vehicularidá, modificaciones curriculares, etc., y que tendríen un efeutu positivu na situación tan dramática del idioma nel enseñu”, pero puntualiza que “la negociación col MEC, que na llexislatura pasada nun dio nengún resultáu, ye una manera de nun encarar el tema de la oficialidá” y que “la optatividá de la ufierta de l'asignatura tien que cambiar buscando un mecanismu que favoreza la voluntariedá d'eleición”, amás de que “tien que reforzase la supervisión del cumplimientu pola inspeición educativa”.

Tamién recuerda que “la situación actual ta llevando a la desapaición de l'asignatura en Secundaria” y puntaliza, no que se refier a los proyeutos d'usu vehicular, que “diez centros son pocos pa dar cobertoria a les esperiencies individuales que se tán faciendo dende va años y que sufren una situación d'allegalidá”. Por último, nesta estaya echa en falta “que se recueya l'usu del asturianu n'otros aspectos del trabayu del profesoráu como nos informes, formación, innovación, investigación...”.

No que se refier a les midíes alministratives del plan de dignificación, la XDLA saluda que “por fin, depués de más de 17 años, se piense n'aspeutos como la creación del reglamentu p'aplicar la Llei d'Usu, la culminación del procesu de recuperación toponímica, la estensión del conocimientu del asturianu ente'l personal funcionario, etc.”. Por último, la organización cívica alerta de que “vamos tar sollertes a les aiciones del Executivu pa dar cumplimientu a esti mandáu de la Xunta Xeneral y vamos vixilar el cumplimientu de toes estes midíes pa que supongan un camín ensin vuelta hacia'l reconocimientu plenu de los drechos de les persones falantes d'asturianu”.

Fonte: Asturies.com

La XDLA cree que la comisión pa la proteición y potenciación de la llingua asturiana llega 33 años tarde

por Pablo R. Guardado

Demanda la oficialidá como solución única a la situación del idioma, anque empondera’l consensu qu’hebo pa sacar alantre la iniciativa. Ve necesario qu'actúe como "un Conseyu qu'asesore al Parllamentu y al Gobiernu", con capacidá de decisión.

“Tenía más sentíu entamala nel añu 1982, cuando l'autonomía echó a andar, o nel 1998, namás aprobase la Llei d'Usu”, considera la Xunta pola Defensa de la Llingua Asturiana (XDLA), qu’entiende “que preguntase cómo se pue protexer o potenciar l'idioma nel añu 2015 –ensin esclariar si depués se va llevar alantre lo alcordao– nun tien munchu xacíu cuando toos sabemos que l'aniciu de too ello tien que venir d'una reforma del Estatutu que recueya la oficialidá. Lo contrario ye poner estorbos al procesu de recuperación llingüística y a una reivindicación social que lleva na cai más de tres décades reclamándolo”.

La XDLA recuerda que “esta comisión d'estudiu nun va ser permanente y nun va tener capacidá llexislativa”, amás de que recupera les pallabres ‘proteición’ y ‘potenciación’, “dando un pasu atrás na ‘normalización’ que la FSA paecía qu'empezaba a asumir (obligada) col cambéu na denominación de la Direición Xeneral encargada de les cuestiones llingüístiques”. Tres recordar que “como organización comprometida col futuru del asturianu aplaudimos toles iniciatives parllamentaries que busquen reconocer el nuesu patrimoniu llingüísticu”, apuntó que “esperamos que la comisión acabe convirtiéndose nun Conseyu qu'asesore al Parllamentu y al Gobiernu y que tenga dalguna capacidá de decisión o pesu nes midíes qu'hai que tomar pa normalizar l'usu del asturianu na nuesa sociedá”.

D’igual forma, tamién emponderó “consensu algamáu pa echar alantre esta iniciativa”, con 31 de los 45 diputaos del Parllamentu asturianu a favor d'ella, esto ye, los d’IX, FSA-PSOE, Podemos y Foro. “Agora, esta mayoría tien que tomar nota y apoyar otres iniciatives qu'ayuden a salvaguardar el nuesu patrimoniu llingüísticu, como pue ser la puesta en marcha d'un Plan de Normalización o que se tenga en cuenta la sensibilidá llingüística de los futuros miembros del Conseyu d'Alministración de RTPA, preséu fundamental pa dar un reblagu a les polítiques de normalización nos medios de comunicación”.

Crítiques a PP y Ciudadanos

La organización cívica tamién tuvo pallabres critiques pa PP y Ciudadanos, les dos úniques formaciones con representación parllamentaria que votaron en contra de la Comisión de proteición del asturianu. “Yá nun ye que nun quieran dar pasos alantre col asturianu: nin quieren analizar qué se pue facer col ello (porque tar na comisión nun los comprometía a nada). Mesmamente echaron mano d'un argumentu masuñáu y demagóxicu: nun ye una cuestión prioritaria y lo que preocupa ye l'empléu. Esperamos que l'actividá parllamentaria d'estos dos grupos trate de más asuntos que l'emplegu nestos cuatro años que falten”, afirma la XDLA.

Pa finar, asegura que “más que prioritario, la supervivencia del nuesu patrimoniu llingüísticu ye dalgo urxente, porque la UNESCO y otros organismos internacionales lleven años alertando del peligru de muerte que cuerre. Nun sabemos entós a qué hai qu'esperar y cuál sería'l momentu más afayadizu según los 14 diputaos del PP y Ciudadanos ¿Cuándo nun quede nengún falante? Con too, y como muestren les encuestes sociollingüístiques, sabemos que la sociedá ve con simpatía la defensa de la llingua de los güelos y nun ta a favor d'eses actitúes de despreciu de los que, a pesar de les pallabres y la sonrisa, quiten la mázcara cuando sal la cuestión y queden retrataos como los principales enemigos de la llingua asturiana”.

Fonte: Asturies.com

El PAS califica de "estafa" l'alcuerdu ente la FSA y IX sobre l'asturianu

El Partíu Asturianista (PAS) criticó  l'alcuerdu de la FSA-PSOE y IX no que respeuta al asturianu tres conocer qu'ésti va quedar nun aumentu de les competencies a la direición xeneral encargada de la política llingüística. "Lo que se tresmitió a los medios ye, simplemente, que va intentase cumplir la Llei d’Usu y Promoción del asturianu impulsada pol PAS nel 1998 (Llei 1/98, de 23 de marzu) y apoyada nel so día pol PP", apunta especificando los artículos nel que tán incluyíos: “competencies del asturianu en rellación cola Alministración (Llei d’Usu, artículos 3, 4, 5, 6 y 7), col asturianu nel enseñu (artículos 9,10,11) y col asturianu nos medios de comunicación (artículos 12 y 13)".

"Esto ye lo que se nos vien a dicir; que ¡17 años después! va tratase de cumplir parcialmente cola Llei d’Usu y Promoción del Asturianu", continúen los asturianistes, que califiquen de "estafa" l'alcuerdu entre la FSA-PSOE y IX sobre l'asturianu.

Fonte: Asturies.com

Podemos Asturies considera impresentable’l recorte a los medios de comunicación n’asturianu decretáu pol Gobiernu socialista

 Fonte: Nota de prensa de Podemos Asturies

El Grupu Parllamentariu de Podemos Asturies quier manifestar la so sorpresa y malestar por un nuevu capítulu de recortes protagonizáu pol actual Gobiernu del Principáu d’Asturies, encabezáu por Javier Fernández, y onde esta vez la víctima ye la cultura asturiana y particularmente la promoción de la llingua asturiana y el gallego-asturianu nos medios de comunicación. Na actual convocatoria de subvenciones pa medios de comunicación destinaes al fomentu del usu del asturianu recórtense 47.000 euros respecto al añu anterior; ye dicir, un 37%. Lo que, sumao al recorte fechu na anterior convocatoria, da como resultáu que nos dos últimos años les partíes destinaes a esti ámbitu sufrieren una mengua d’un 50%. Esti tisoriazu inda ye más grave si se tien en cuenta que’l sector de los medios de comunicación ye ún de los más perxudicaos pola crisis económica.

Anque nun nos sorpriende, porque ye la manera na que vien actuando la FSA nesta materia nos últimos años, llama l’atención que la midida se lleve alantre depués de que nos alcuerdos alcanzaos na investidura ente IX y PSOE ún de los puntos anunciaos ye potenciar los medios de comunicación n’asturianu y gallego-asturianu y la política llingüística.

El Grupu Parllamentariu de Podemos Asturies considera impresentable y preocupante qu’una vez más se recorten les partíes que yá de por sí son mui escases, ensin nenguna xustificación y más cuando na Xunta Xeneral del Principáu nel caberu mes s’acaba de perder una oportunidá pa reducir les partíes que los grupos parlamentarios reciben. Nesi sentíu, vamos tar mui sollertes con estos ataques, y otros que puedan venir, a la promoción del asturianu nos medios de comunicación y que nun faen más que debilitar entá más una posible recuperación de la nuesa llingua.

Pidimos que, yá que la partida final va cuntar namás con una cantidá de 80.000 euros, esi dineru sía repartío ente medios de comunicación que fagan un apueste claru pola visualización del asturianu.

Dende Podemos Asturies esperamos que, a lo que la llingua asturiana y el gallego-asturiano se refier, estos recortes nun vayan ser el camín que buscaben en materia de política llingüística los dos partíos que llegaron al reciente pautu d’investidura y que fexo presidente por segunda vez a Javier Fernández.

Fonte: Asturias Verde

Crítiques a los retayos nes sovenciones

Iniciativa pol Asturianu vieno acabante llamentar, como ya ficiere la Xunta pola Defensa de la Llingua, la decisión de la Conseyería de Cultura de retayar nun 37% les ayudes pa la normalización de la llingua. Les cifres recoyíes na cabera convocatoria de sovenciones a los medios de comunicación n'asturianu recueyen una mengua del 37% respectu al añu anterior y d'un 16,7% nel casu de les ayudes a la producción discográfica. Nos caberos dos años, el departamentu que dirixe Ana González, menguó nun 50% el presupuestu d'estes partíes. Pa Inaciu Galán, presidente d'Iniciativa pol Asturianu, trátase d'un "fechu llamentable" qu'espeya "la falta de compromisu llingüísticu que yá se veía recoyíu nel pautu d'investidura". Critica que'l nuevu Executivu entame la llexislatura "queriendo acabar con tolos espacios de normalidá" y encamienta a la Conseyería a rectificar. Fonte: Asturnews