Uviéu entama una campaña de matriculación na materia de Llingua Asturiana

por Pablo R. Guardado

'Nun pierdas el tren del asturianu' ye'l nome de la campaña cola que'l Conceyu d'Uviéu pretende promover la matriculación de los escolinos uviedinos na materia de Llingua Asturiana. Esta campaña ta dirixida a alumnos de Primaria, Secundaria y Bachilleratu.

Roberto Sánchez Ramos 'Rivi', conceyal de Cultura, y Mercedes González, edil responsable d'Educación, Deportes y Salú, encargáronse de presentar esta iniciativa, la primera que pon en marcha l'Ayuntamientu "de estes carauterístiques dende'l 1979, apostando asina pol asturianu como elementu cultural de primer orde", apuntó Rivi. Según los datos qu'aportó, na escuela pública, y más concretamente en Primaria "hai 58 centros con una atención del cien por cien al alumnáu n'asturianu", siendo la matriculación n'asignatura del 40 por cientu, esto ye, "alredor de 2.500 neños y neñes".

Les cifres, sicasí, baxen de manera dramática en Secundaria y Bachilleratu, onde "sólo la escueye un 2 por cientu", recuerda l'edil. No que respeuta a la escuela concertada "namái el 57 por cientu de los centros ofrecen asturianu y sólo el 6 por cientu del alumnáu de Primaria escuéyelo; n'ESO, malpenes un 1 por cientu y en Bachilleratu, nin siquier un cero por cientu".

González, qu'emplegó l'asturianu na so intervención, aseguró que "cuantos más idiomes sepamos, más llibres seremos" y reiteró la intención del equipu de gobiernu de mediar, na midida de lo posible, "ente Principáu y Ministeriu" nesta materia. D'igual forma, destacó "el compromisu d'esti Ayuntamientu pa col asturianu".

Fonte: Asturies.com

El castru de Cellagú protagoniza una conferencia de la Lliga Celta d'Asturies

• Patrimoniu da-y el preste al desanicie de Cellagú

Tuvo llugar el vienres nel Muséu Arqueolóxicu d'Asturies.

Ángel B. Villa, arqueólogu venceyáu al propiu muséu y miembru numerariu del Real Institutu d'Estudios Asturianos (RIDEA), encargóse d'esplicar a los presentes los detalles d'esti castru asitiáu en Cellagú, aldega cercana a Llatores, nel propiu conceyu d'Uviéu, y afeutáu por una cantera cercana. L'actu, con entrada llbre, celebróse ayeri a les 19 hores na sala de conferencies de la instalación museística.

La Lliga Celta d'Asturies ye un coleutivu qu'entama actividaes cola fin d'esperder la cultura asturiana nun contestu d'aculturación que vive'l país. Asina, programa conferencies y inclusive visites a enclaves importantes de la nuesa historia, como la reciente al Castru Punta'l Castiellu.

Fonte: Asturies.com

L'ATNL demanda la creación del SNL d'Uviéu pa una planificación seria de la normalización

"Ye'l principiu de la normalización llingüística n'Uviéu", afirma Álvarez López

Califica d'improvisación les midíes que se pretenden poner en marcha n'Uviéu y señala que'l primer pasu debería ser la creación del SNL. "Daría forma planificada, con personal cualificao, a estes actuaciones que se pretenden facer a saltu mata", apunta.
"Col pasu de los años, vese que los Servicios de Normalización Llingüística (SNL) son la meyor ferramienta cola que trabayar de manera planificada, directa, creando actitúes positives hacia l’asturianu y, de fechu, esta ye la manera de trabayar en 34 conceyos asturianos. Toos nun puen tar enquivocaos", señala nun comunicáu l'Asociación de Trabayadores de la Normalización Llingüística (ATNL).
Tres apuntar que nun ye que quien a atalantar cómo hasta la fecha la "capital d’Asturies y segunda ciudá en población, pudo permitise nun executar nengún tipu de midida pa protexer, recuperar y normalizar el mayor padremuñu que tien, que ye la llingua asturiana", apunta, tres conocer les propuestes d'Izquierda Xunida (IX) pa normalizar l'idioma, que "les actuaciones en política llingüística han planificase y estudiase pa que tengan efectu positivu na población y sobre manera, pa que tengan éxitu".
"Primero de promocionar unos cuantos topónimos aleatoriamente hai qu’esixir l’aprobación y aplicación del decretu de toponimia del Conceyu d’Uviéu. Falar de rotular vehículos, ente otres coses, y nun diseñar un plan d’actuaciones pa normalizar l’asturianu dientro de l’Alministración ye un error. La creación del SNL daría forma planificada, con personal cualificao a estes actuaciones que se pretenden facer a saltu mata. Eso nun ye planificación llingüística, ye improvisación y, a estes altures, la llingua asturiana nun merez eso. Merez muncho más", afirmen los trabayadores.
Presupuestu "bien ruin"
Hai selmanes, l'ATNL yá se manifestara que la creación del SNL "debería ser al más altu nivel, fuera del área de Cultura, porque la esperiencia diznos que la tresversalidá ye la única garantía d’éxitu en política llingüística". Tampoco ta conforme col presupuestu presentáu pal asturianu —44.000 euros, de los 24.000 van destinaos a l'Academia de la Llingua Asturiana—, que califica de "bien ruin" y llonxanu al d'otres ciudaes "del so nivel poblacional, como pue ser Xixón".
"Si tol presupuestu que va manexar 'pal asturianu' s’invirtiera na creación d’un SNL, Uviéu empezaría a facer les coses bien, empezaría a recuperar el tiempu perdíu y a poner soluciones pa que la llingua asturiana sía una realidá na vida del conceyu", calca l'ATNL, que s'ufre a "asesorar y collaborar" col ayuntamientu na creación del serviciu.
Fonte: asturies.com

El Conceyu d’Uviéu podría valorar l’asturianu nes oposiciones

La valoración de la llingua asturiana como méritu nes prebes d’oposiciones y concursos cuando les calterístiques de los puestos lo necesiten ye una de les propuestes novedoses que’l gobiernu d’Uviéu camienta desendolcar y va proponer nel plenu d’esta selmana.

Amás d’esta propuesta que supón un apueste nidiu pola normalización social de la llingua asturiana n’uviéu tamién s’alcuentren midíes inmediates que cinquen a la carteleria y señalética de les instalaciones municipales y de la maquinaria del Ayuntamientu. Amás, la normalización de la toponimia y ufiertar cursos de formación del personal del Ayuntamientu son otres de les midíes que se plantegarán.

L’apueste por normalizar la llingua asturiana yera una de les promeses eleutorales tanto d’Izquierda Xunida como de Somos Uviéu, qu’agora entamen a cumplir.

Fonte: Asturnews

Uviéu ufierta al comerciu llocal cartelería n’asturianu pa la campaña de rebaxes

La conceyalía d’Economía y Emplegu del Ayuntamientu d’Uviéu vieno acabante distribuyir 2.100 cartelos ente los pequenos negocios de la ciudá colo que la presencia de Podemos ya IX nel gobiernu llocal entama a notase.

La Conceyalía d’Economía y Emplegu vieno acabante d’ufiertar a los comerciantes d’Uviéu una campaña de cartelería n’asturianu pa sofitar la campaña de rebaxes. El material, dafechu gratuitu, realizóse en llingua asturiana como parte del compromisu d’esti Conceyu y d'esta Conceyalía escontra una de les llingües de la nuesa ciudá y d’Asturies sigún declaró esti día el conceyal Rubén Rosón.

Nesti sofitu al comerciu llocal sumase’l compromisu col asturianu apurriendo en positivu a la imaxe d’Uviéu y del so conceyu como garante del patrimoniu y de los derechos llingüísticos, dixo Rubén Rosón que quiso tamién aprovechar pa estimar compañeru de corporación, el conceyal Fernando Villacampa, “la so iniciativa y enfotu nesta campaña” .

L’equipu de gobiernu entiende qu’una de les claves de la normalización social del asturianu ye la implicación de toles árees de gobiernu nesta xera. Por ello, la conceyalía d’Economía, de la que depende la área de Comerciu, punxo en marcha esta iniciativa coincidiendo col tradicional periodu de rebaxes.

Nesta campaña de cartelería, que va siguise pa futures campañes de rebaxes, fixéronse 350 entregues, cada entrega constó de 6 rollos de cartelos en dos diseños distintos. En total repartiéronse 2100 cartelos, quedando de remanente 150 rollos ó 900 cartelos más a dimposición de comerciantes que lo demanden.

Fonte: Asturnews

La XDLA pide retirar la subvención a la Cátedra Alarcos

​La XDLA pide al Conceyu d’Uviéu que retire la subvención a la Cátedra Alarcos y a la Universidá que tome midíes, al tiempu que quier espresar la so condena más firme a les declaraciones llamentables y deliriantes feches por Miguel Alarcos.

Les declaraciones feches nel marcu de la cátedra que lleva’l nome de so padre y que preside so madre son pala la Xunta pola Defensa de la Llingua Asturiana (XDLA) un ataque “que da vergoña ayena y que ye más grave tovía al venir d’un miembru de la comunidá universitaria. La Universidá d’Uviéu, institución encargada y pagada pa curiar la cultura asturiana, tien que refugar dafechu esti tipu de comportamientos ente’l so profesoráu. Ye indignante pensar que nes sos facultaes habiten personaxes que faen escarniu públicu de manera irracional y acientifica de los derechos de les persones a usar la so propia llingua en cualesquier circunstancia y que desprecien a compañeros investigadores qu’estudien la llingua asturiana. Esperamos, por eso, que la Universidá tome les midíes necesaries pa evitar d’una vez estes agresiones”.

De la mesma manera, soliciten al Conceyu d’Uviéu “la retirada de tou fondu públicu a la cátedra mentada al nun respetar los drechos de les persones falantes d’asturianu recoyida na llexislación vixente nin el patrimoniu llingüísticu d’Asturies. Nun se pue consentir gastar dineru público pa patrocinar entidaes que discriminen sistemáticamente a una parte importante de la sociedá asturiana”.

Fonte: Asturnews

Algamada la presencia del asturianu nos autobuses d'Uviéu

Una moción presentada por Izquierda xunida a la Comisión d’Economía y Interior del Conceyu d’Uviéu sobre l’usu del asturianu nel tresporte urbanu salió alantre colos votos de PP y PSOE, y l’astención de Foro. Iniciativa pol Asturianu presentara tamién va un mes una quexa al Conceyu d’Uviéu pola falta d’usu del asturianu nel sistema de tresporte públicu de viaxeros d’Uviéu (TUA) lo que motivó la esmolición d'Izquierda Xunida por iguar la situación. Dende Iniciativa pol Asturianu celebren esta decisión y feliciten a los grupos políticos que votaron a favor, y n’especial a IX "por presentar la propuesta, por apostar pola normalización del idioma nun ámbitu tan importante pa la visibilización de la llingua asturiana como son los autobuses urbanos, que percuerren la ciudá y el conceyu d’Uviéu tolos díes, pasando per ellos cientos de miles d’usuarios cada añu". Tanto nes paraes como na web nueva de Tresportes Uníos d’Asturies (TUA), la empresa pública que xestiona los autobuses urbanos, la llingua asturiana nun tenía hasta agora presencia denguna, nin siquiera nel usu de los topónimos tradicionales, qu'entá nun son dafechamente oficiales n’Uviéu. Por mor d'ello Iniciativa pol Asturianu apuntaba que “ye inescusable l’escaezu de la llingua asturiana nesti casu, que presentaba una ocasión mui afayadiza pa incluyila dafechu xunto al castellán, idioma nel que la compañía opera dafechu y n’esclusiva dende’l so entamu, hai más de 30 años”. Fonte: Asturnews

IX propón l'usu del asturianu nos autobuses urbanos d'Uviéu y de la CTA

  El grupu municipal d'IX nel Conceyu d'Uviéu encamentó esti vienres al Conceyu a que promueva l'usu del asturianu nel serviciu d'autobús urbanu d'Uviéu (TUA) y nel Consorciu de Tresportes (CTA).

   En recibiendo una propuesta de 'Iniciativa pol Asturianu', dende IX envaloraron qu'esta iniciativa "afáyase a los preceutos del Estatutu d'Autonomía del Principáu", polo qu'amosaron el so sofitu a la iniciativa per aciu d'un rexistru nel Plenu municipal, unviáu a los medios.

   Asina, el voceru d'IX, el conceyal Roberto Sánchez Ramos, encamentó al Consistoriu uvieín a qu'adopte l'alcuerdu d'incorporar l'asturianu, xunto al castellán, a les llinies de tresporte d'Uviéu. Per otru llau, solicitaron que'l Conceyu " se comprometa" a llevar esta iniciativa al conxuntu de los tresportes d'Asturies.

Fonte: Europa Press

Iniciativa pol Asturianu denuncia que "T.U.A. escaez l'asturianu nel so nuevu sistema de tresporte" n'Uviéu

Pa Iniciativa ye "inescusable" l'ausencia de la llingua.

Iniciativa pol Asturianu quier amosar el so refugu a la esclusión de la llingua asturiana en toles estayes del grupu Transportes Unidos de Asturias S.A. (T.U.A.), qu’ufre’l serviciu públicu de tresporte d’autobús nel conceyu de la capital, y que ta acabante d’estrenar un nuevu web y llínies de serviciu.

L’estrenu d’esta nueva páxina nes redes débese a la puesta en marcha de les nueves llínies de tresporte qu’agora dan serviciu a los carbayones. Sicasí, Iniciativa pol Asturianu considera inescusable l’escaezu de la llingua asturiana nesti casu, que presentaba una ocasión mui afayadiza pa incluyila dafechu xunto al castellán, idioma nel que la compañía opera dafechu y n’esclusiva dende’l so entamu, hai más de 30 años.

Iniciativa pol Asturianu quier con esta nota, y la carta unviada a la compañía, facer un llamamientu a les instituciones del conceyu y a la propia empresa p’asegurar la inclusión del asturianu nel serviciu de T.U.A., qu’atiende a milenta asturfalantes a diariu y a quienes nun pue discriminar baxo dengún conceptu. Especialmente mancante ye la falta d'usu de los nomes de llugar o topónimos tradicionales del conceyu d'Uviéu pa les llinies y paraes del serviciu.

Fonte: Infoasturies 

Unanimidá pa unes ordenances d'usu del asturianu nel plenu d'Uviéu

Casa Conceyu d'Uviéu La organización Iniciativa pol Asturianu denunciare énte'l propiu Conceyu d'Uviéu y la Procuradora Xeneral d'Asturies el casu de discriminación vivíu por un miembru de la so directiva, que según esplicaron "foi obligáu a presentar un documentu en castellán nel rexistru del Conceyu, prohibiéndo-y presentalu n'asturianu". El casu, tresmitíu a les fuercies polítiques con representación nel plenu fizo surdir una propuesta d'Izquierda Xunida qu'esti vienres aprobaron por unanimidá PP, Foru, PSOE ya IX, y pola que se decidió redactar unes ordenances d'usu del asturianu qu'eviten más casos como esti y fomenten l'usu del asturianu nel conceyu que ye capital d'Asturies. Dende Iniciativa pol Asturianu celebren "el consensu xeneráu alredor del asturianu", anque anuncien que tarán "sollertes al cumplimientu de lo aprobao nel plenu d'esti vienres pasáu". Recuerden que "la situación del asturianu nel conceyu d'Uviéu ye de nula presencia per parte de l'alministración municipal" y qu'Uviéu "ye unu de los conceyos asturianos onde menos pasos se dieron hasta agora, y qu'ente otres cuestiones, tien pendiente l'aprobación de la toponimia tradicional como oficial, como yá ficieron una gran mayoría de los conceyos asturianos, incluyendo cásique tolos más poblaos, como Xixón, Avilés, Llangréu, Mieres, Siero o Castrillón", espliquen. Iniciativa pol Asturianu unvió una comunicación a tolos conceyales uvieínos felicitándolos pola so decisión del vienres pasáu y animándolos a siguir dando más pasos a favor del asturianu, asina como ufriéndose a asesor en cuestiones de normalización llingüística al equipu municipal y a la oposición. Fonte: Asturnews

La represión llingüística denunciada por Iniciativa pol Asturianu n'Uviéu llega al plenu con una moción d'Izquierda Xunida

El Grupu Municipal d'Izquierda Xunida n'Uviéu ta acabante presentar una proposición urxente pal so alderique nel plenu próximu. Na mesma van solicitar a los xestores del Conceyu qu'adopten l'usu del asturianu con normalidá, dempués de qu'Iniciativa pol Asturianu denunciara que-y prohibieron presentar un documentu nesta llingua nel Rexistru de la institución. IX va solicitar nel plenu que'l Conceyu d'Uviéu se comprometa a tramitar escritos n'asturianu y que se forme a los funcionarios nel usu del idioma. Pal voceru d'IX n'Uviéu, Roberto Sánchez Ramos, Rivi, "yá ye hora de que'l nuesu Conceyu entienda l'usu del asturianu como daqué normal", recordando qu'"hai munchos ciudadanos que quieren usar l'asturianu pa dirixise a la so institución más cercana y nun se-yos almiten los escritos". Pa Rivi, les midíes que proponen "democraticaréin la vida municipal y garantizaríen un drechu nun Conceyu que ye, amás, la capital del Principáu, y por eso tien tovía más obligación si cabe de respetar, protexer y promocionar l'asturianu". Sánchez Ramos recordó tamién que "l'asturianu ye un valor cultural, social y políticu y que la so proteición namás conlleva beneficios políticos, cívicos, sociales y económicos". Fonte: Asturnews