IX denuncia que'l PSOE ta desenvolviendo'l vieyu programa políticu del PP n'Educación implantando'l "Cheque escolar"

La diputada considera que suponen consagrar el principiu de llibertá d'elección de los padres que defende'l PP   (programa de 0 a 3 años)

   Emilia Vázquez, diputada d'IX d'Asturies responsable d'Educación na Xunta Xeneral, cuestionó'l pactu col PP qu'en materia educativo nel programa 0 a 3 supon consagrar el principiu de llibertá d'elección de los padres, o lo que ye lo mesmo'l "cheque escolar", una de les señes d'identidá del PP, frente a una planificación pública que vele pola equidá y la afayadiza redistribución de los recursos públicos ente los que más lo precisen.

El sistema de desgravaciones fiscales, a cualquier familia que lleve a los sos fíos a una escuela de 0 a 3, pon n'igualdá los centros públicos colos privaos, alvirtió Vázquez. Lo mesmo va asoceder col sistema de financiamientu del material escolar por idénticu sistema de desgravación que va entrar a valir colos presupuestos pal próximu añu.

   “Nun critico al PP por apautar ya intentar sacar alantre'l so modelu educativu, que nun ye'l nuesu, pero nun querdríamos qu'esi modelu introduzase n'Asturies amparáu por un gobiernu socialista”, alvirtió la diputada na presentación na Xunta del Presupuestu d'Educación que xube a 756.437.886.

   La diputada d'IX denominó como “cheque escolar” a la deducción que plantega l'executivu asturianu pa pagar escueles de 0 a 3 años yá que supon una quiebra nel modelu que propón IX, que ye que, el dineru público sía pa la escuela pública, cuando la media de cobertoria d'estos centros ye del 15%. Ye ciertu que yá esiste la enseñanza alcordada, aseguró la diputada, pero ésta tien unes obligaciones y controles, que nun va haber nesta nueva modalidá, yá que va significar que partir d'agora van financiase aquellos centros educativos o guarderíes que los padres decidan. Lo mesmo asocede coles nueves ayudes de material escolar. Ye ciertu, dixo qu'hai un aumentu na llínea que se venía desenvolviendo, pero'l modelu que va subvencionar pela vía de les desgravaciones, namá van ser efectivos nes families nes que'l poder adquisitivo dexar, “porque la xente que realmente lo precise nun se va poder dexar mercar lo que sía y esperar a que-y lo deduzan un añu dempués”, sostuvo.

   Na vez d'entrugues, la diputada demandó información sobre los oxetivos del contratu programa pa la Universidá d'Uviéu que ta ensin roblar, cuestión que quedó ensin respuesta per parte de la directora d'Universidaes y el so financiamientu que, como tarrez la diputada d'IX, va ser consolidar los presupuestos actuales, que son claramente insuficientes yá nesti momentu.

   Vázquez incidió tamién en que'l presupuestu global de la Conseyería d'Educación, Cultura y Deportes baxó. Polo xeneral, esplicó nel apartáu de cultura, el presupuestu intenta ser más bien de caltenimientu “a la desesperada pero bien a la baxa”, ensin poder amenorgar no que fai a les empreses l'aplicación del IVA cultural del 21% impuestu pol Ministeriu de Cultura. Al director de Deportes, la diputada deseyó, con ironía, bona suerte pa poder xestionar los sos trés programes, dos d'ellos a la baxa y un terceru “tremeciendo”.

   La diputada tamién esplicó “el so disgustu” pola baxada del programa de defensa del asturianu, anque la Conseyera afirmara que les partíes taben incluyíes de manera tresversal n'otres de la Conseyería , y suxurió que podría emplegar esos 150.000 euros que baxa n'afitar otros programes que tienen que ver col asturianu, por casu en dotar meyor a l'Academia de la Llingua.                                                                          Fonte: asturnews

La XXXV Selmana de les Lletres Asturianes va tar dedicada al cómic

Na semeya,  cubierta de "Manzajú" de Barbero,  primer trabayu que llevó l'Alfonso Iglesias

   Coincidiendo col 125 aniversariu de la primer narración fecha n’asturianu con dibuxu artísticu, la Selmana de les Lletres Asturianes va tar dedicada al cómic. L’eventu va celebrase del 2 al 11 de mayu baxo’l lema "Dibuxando un camín".

   Foi nel 1889 cuando la revista "La Comedia Gijonesa" espublizó un cuentu popular firmáu por Pepe Priendes baxo’l nome "Un cuento viejo". Esta historia, contada en cuatro viñetes, llevaba un testu n’asturianu nel pie de caún d’elles, polo que se considera’l primer cómic fechu na llingua del país. Por esti motivu, 125 años depués, la Conseyería d’Educación, Cultura y Deporte va centrase nesti xéneru lliterariu que ta garrando puxu nos años últimos n’Asturies, lo que provocó la creación del Premiu Alfonso Iglesias dientro de los Premios Lliterarios, gallardón que nel 2013 recibió Alfonso Zapico por "Cuadernos d’Ítaca".

   Precisamente l’autor blimeín, residente na ciudá occitana d’Engoulaeme, va protagonizar el llibru qu’edita la conseyería por mor de la Selmana de les Lletres xunto col restu de ganadores del premiu, esto ye, Ruma Barbero (2009, con "Manzajú"), Isaac Rivero (2011, con "Doña Berta") y Javier Antonio Marinas (2012, con "Homes"). Ésti va constar de cuatro histories gráfiques feches de manera especial pa esta ocasión. La obra, de nome "Dibuxando un camín",  va regalase’l Día de les Lletres Asturianes (9 de mayu), xornada na que tamién se celebra’l Día del Llibru y el Discu n’Asturianu, con cada compra que se faiga d’artículos en llingua asturiana. Toos van tener, amás, un 10 por cientu de descuentu.   Fonte: Asturies.com

N’Ast denuncia la esapaición de l'aidanza a les asociaciones culturales pa la normalización del asturianu

N’AST ta acabante denunciar la esapaición de les ayudes económiques que veníen recibiendo les asociaciones y colleutivos culturales del país pa la normalización social del asturianu. El Plan Estratéxicu de Subvenciones 2013 nun recueye la "tradicional llinia".


Na mesma llínia del postrer comunicáu que ficiera públicu, onde criticaba la eliminación de les subvenciones a los Conceyos, güei, dende N’AST, quieren denunciar "la esapaición de les ayudes económiques que veníen recibiendo les asociaciones y colleutivos culturales del país pa la normalización social del asturianu".

Esta circustancia queda espeyada tamién nel “Plan Estratéxicu de Subvenciones pa 2013” de la Conseyería d’Educación, Cultura y Deporte, asoleyáu nel Boletín Oficial del Principáu d’Asturies del pasáu 8 d’abril, documentu "nel que nun apaez per dengún llau la tradicional llinia de subvenciones".

N’AST camienta que la responsabilidá de normalizar socialmente l’asturianu ye de la institución cimera, la Xunta Xeneral d'Asturies, "que tien la obligación de mirar pola nuesa llingua y de facela oficial" y de los sos órganos de gobiernu. Pero sorraya que la “dexadez activa” haza l’asturianu, cuando non "ataques en toa riegla", prauticada poles estremaes Alministraciones públiques fizo que "nos últimos cuarenta años fuera la sociedá civil la que más puxare por esa normalización social".

Ye por ello, que pa N'AST dexar ensin les ayudes económiques, "coles que s’entamaben milenta actividaes, al cientu d’asociaciones y colleutivos culturales que les veníen pidiendo supón un duru guelpe pa la propia llingua asturiana". Critiquen que'l PSOE "torna a amosar qu’esta dómina de crisis económica viéno-y perbién pa siguir col procesu de dexar morrer al asturianu baxo la escusa de que `nun hai perres´".

Fonte: Infoasturies

Axenda Didáctica Escolar d'actividaes n'asturianu

Conseyería d'Educación: yá ta disponible l'Axenda Didáctica Escolar d'actividaes n'asturianu

   La Conseyería d’Educación, Cultura y Deporte, al traviés de la Dirección Xeneral de Política Llingüística, organiza, en collaboración cola Asesoría d’Enseñances de Llingua Asturiana y siguiendo coles iniciatives d’usu, promoción llingüística y apoyu al llabor educativu, l’Axenda Didáctica Escolar.

   L’oxetivu ye averar la lliteratura, el teatru y la música asturiana al públicu más mozu de la mano d’escritores, actores y músicos de l’actualidá asturiana. Toes estes actividaes, unes n’asturianu y otres en gallego-asturianu, van dirixíes a los alumnos y alumnes de los centros educativos d’Educación Primaria, Secundaria y Bachiller nos que simparte Llingua Asturiana o Gallego-Asturianu.

   Pa la participación de les entidaes y de los centros educativos establécense unes normes que pueden consultase na web de la Conseyería.

   Más información: Documentos pa participar y ufierta.

   Fonte: Asturnews.