Bolses reutilizables, axendes y cartelos conformen el material de la campaña ‘Echa-y una mano al mundu’ qu’entama el Serviciu de Normalización Llingüística de Ḷḷena. Va tar destinada a comercios de papelería, venta de prensa y asemeyaos. David Suárez, conceyal de Cultura y Política Llingüística, ya Inés Prada, conceyala de Xestión Ambiental, encargáronse de presentar esta campaña nueva pa esparder l’usu del asturianu nel conceyu. ‘Echa-y una mano al mundu’ ta fecha en collaboración cola Rede de Normalización Llingüística nos Conceyos, en concreto colos de Siero, Cangas del Narcea, Mancomunidá del Cabu Peñes, Mancomunidá de la Sidra y Llaviana, y tamién gueta concienciar a los ciudadanos sobre la importancia del reciclaxe y el cudiáu del mediu ambiente.
El material de la campaña, que va repartise dende esta mesma selmana, ta formáu por 1.000 bolses reutilizables, editaes nos tres collores que tamos avezaos a ver nos contenedores de reciclaxe –verde, mariellu y azul–, qu’incoporen instrucciones sobre cuála ye la manera correuta de separtar la basoria.
Amás, tamién van distribuyise cartelos de la campaña y 500 axendes ecolóxiques con conseyos pa cudiar el mediu ambiente. ‘Echa-y una mano al mundu’ cunta con una sovención de la Conseyería de Cultura y Turismu de 1.500 euros.
Fonte: Asturies.com
Perbién fechu, alantre cola campaña y enforma ésitu, ye lo que fai falta darréu.
ResponderEliminar