26/4/11

"Da-y al play, movilízate", na manifestación pola oficialidá de 2011




La Xunta pola Defensa de la Llingua Asturiana acaba de facer públicu’l llema y cartelu de la Manifestación pola Oficialidá del Día de les Lletres Asturianes 2011, que comenten “tien que ser una xornada de fiesta pa la lliteratura asturiana pero tamién ye un momentu pa facer balance de la situación del idioma y pa reivindicar un estatus d’igualdá pa tola ciudadanía que quier usar l’asturianu como la so llingua de cada día”. Amás, recuerden qu’esti añu “tamos a pocos díes d’unes elleiciones onde vamos poder escoyer diputaos y diputaes pa la Xunta Xeneral: eses persones van tener la responsabilidá hestórica d’aprobar un estatutu d’autonomía p’Asturies que recueya la oficialidá de la llingua asturiana”. Por ello, albidren que ye’l momentu de “da-y al play”, de movilizase pa poder exercer los nuesos drechos y posibilitar la salvación del asturianu. La manifestación va cellebrase’l vienres 6 de mayu, a les siete y media la tarde, n’Uviéu.


Balance d’un añu más ensin oficialidá.

A naide-y pue cayer embaxo la situación tan preocupante que carez la llingua asturiana pola perda cada vegada más grande de falantes. La presencia testimonial del asturianu nos medios de comunicación públicos y el so usu tan escasu pola Alministración asturiana nun aíden precisamente a que la nuesa llingua gane prestixu y reconocencia ente la xente. La precariedá de l’asignatura nes primeres etapes educatives y na Secundaria dan una idega de la poca importancia que merez pa l’Alministración educativa.


Namái se pue tarazar el retrocesu d’un idioma minorizáu como’l nuesu con una política de normalización decidida qu’abra espacios d’usu al asturianu, que lo faiga daqué normal na vida diaria n’ámbitos como la educación, los medios de comunicación o l’Alministración y que nun seya ensin más un adornu aneudóticu o folclóricu. La política llingüística del Gobiernu asturianu, por desgracia, va nesta llinia: usos testimoniales per un llau y, cuando se trata d’iniciatives fundamentales como’l trabayu de les Oficines de Normalización nos Conceyos, precariedá na dotación y falta de control. Otro tanto se pue dicir de la recuperación toponímica, que se fai namás sobre’l papel, porque la propia Alministración qu’apreba esos topónimos nun los usa.
Poro, esti vienres 6 de mayu, vamos volver a venos a les 19:30 hores na Estación del Norte d’Uviéu pa percorrer les cais hasta’l Teatru Campoamor. Vamos ponenos en marcha y demostra-yos que ye’l momentu, que nesta llexislatura tien que salir p’alantre la oficialidá y que nun van ser quién a paranos.

Fonte: Asturnews

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.