L'equipu
de gobiernu del Conceyu de Bimenes aconceyó'l miércoles xunto con
téunicos municipales pa empezar a trabayar na declaración d'oficialidá
de la llingua asturiana prevista pal 2 de xunetu. L'alcalde Aitor García
Corte afirma que con esti pasu "queremos saldar una deuda histórica".
"Yá ye hora d'avanzar nesti asuntu", añade l'asturianista, qu'asegura
que la so intención cola declaración de la oficialidá ye "la
reconocencia d'un derechu". Y ye que nel 1997, Bimenes foi'l primer
conceyu del país en facer oficial l'asturianu nel so territoriu,
iniciativa que llueu siguieron una decena d'ayuntamientos.
Finalmente, el Tribunal Superior de Xusticia d'Asturies torgó estes
declaraciones nel so momentu por considerales antiestatutuaries tres una
denuncia de la Delegación del Gobiernu estatal n'Asturies, dalgo que
García Corte nun descarta que pudiera volver a asoceder tres el 2 de
xunetu. "Ehí veremos si dalgunos son o non los demócrates que dicen
ser", asegura l'alcalde del Partíu Asturianista (PAS).
Interés de coleutivos
Tres l'anuncia fecha'l martes por Asturies.com de la
intención de Bimenes, coincidiendo col venti aniversariu de la Fiesta
de la Oficialidá de la Llingua Asturiana, de facer oficial l'asturianu,
foron delles los coleutivos y persones que se punxeron en contautu con
García Corte pa interesase pola iniciativa. Na reunión celebrada ayeri,
na que finalmente participó sólo l'equipu de gobiernu —del que tamién
forma parte Izquierda Xunida y Xente Yerbato— xunto con téunicos
municipales cola intención d'empezar a poner les bases del procesu,
decidióse entamar pa esti mes un conceyu con toles organizaciones y
grupos políticos interesaos cola fin d'involucrar a la mayor cantidá de
xente posible.
Na semeya, García Corte xunto col grupu Pauliteiras mientres la
presencia del Conceyu de Bimenes con stand propiu na feria 'Sabores
mirandeses' celebrada en febreru en Miranda de l Douro.
