La XDLA critica “la vaguedá y inconcreción” del plan de dignificación no que se refier a la RTPA

por Pablo R. Guardado

Llamenta’l “desaxuste ente les motivaciones d'esta PNL y les aiciones que se proponen al final”. “Les midíes puen quedar en nada ensin una direición xeneral de RTPA comprometida colos drechos llingüísticos”, alerta énte los nomes que se manexen.

“Lo primero que rescampla ye'l contraste ente l'argumentación que se fai na esposición de motivos y l'articuláu posterior de la proposición. Na esposición de motivos recuéyese de manera acertada la falta de drechos llingüísticos que sufre Asturies y l'agraviu comparativu que supón que n'otros territorios sí tean reconocíos al traviés de la cooficialidá. Tamién se destaca lo inxusto, discriminatorio y antidemocrático d'esta situación que nun se pudo o nun se quixo iguar en toos estos trenta años últimos. Llama l'atención que la conclusión d'esti preámbulu nun sía la de tratar de solucionar d'una vez esta falta de derechos diendo camín del reconocimientu del estatus xurídicu d'oficialidá, sinón que se vuelvan a proponer midíes de ‘proteición y impulsu’ que nos párrafos anteriores reconociéronse ‘insuficientes y ineficaces’”, espón la Xunta pola Defensa de la Llingua Asturiana (XDLA) nun comunicáu.

La organización cívica entiende que d’aplicase les midíes del plan de dignificación de la llingua asturiana qu’ha d’aprobar el Conseyu de Gobiernu “seríen positives pal procesu de normalización llingüística del  asturianu”, pero considera qu’hai delles cuestiones nes que detecta vaguedaes y inconcreciones, sobre manera no que se refier a la RTPA. “La ferramienta de comunicación básica y principal d'Asturies, que tenía que tener un papel fundamental como vehículu de normalización social del asturianu, queda despachada con un oxetivu tan probe como'l de ‘impulsar l’ampliación d'espacios’, viendo que llevamos una década de porcentaxes ínfimos, tematizaos y marxinales. Ye inasumible que los drechos de la ciudadanía y el cumplimientu de les lleis queden a los deleres de los órganos xestores del ente y d’una dirección xeneral continuista na falta de rigor y compromisu col asturianu”, critica al empar demanda una direición del ente “comprometida colos drechos llingüísticos”.

González Orejas y Virgili, posibles direutores xenerales.

La negociación pola eleición del direutor próximo de la RTPA yá tien dellos nomes sobre la mesa. La FSA-PSOE propón a Francisco González Orejas, mientras que’l PP quier la continuidá d’Antonio Virgili. Nengún de los dos cumple col perfir de persona comprometida colos drechos llingüísticos, como demanda la XDLA. En redes sociales, el coleutivu yá amosó'l so malestar énte les opciones que se manexen.

Un nome que yá quedó descartáu ye’l de José Luis Muñiz Viejo, refugáu pol PP tres ser propuestu en primer llugar polos socialistes. Otra manera, Foro denunció que les negociaciones tán siendo llevaes polos dos partíos con mayor representación na Xunta Xeneral ensin cuntar col restu.

Estaya educativa

No que se refier al tema educativu, la XDLA apunta que’l plan de dignificación incorpora “reivindicaciones que vienen faciéndose dende bien de tiempu como la Especialidá, el Grau, los proyectos pilotu de vehicularidá, modificaciones curriculares, etc., y que tendríen un efeutu positivu na situación tan dramática del idioma nel enseñu”, pero puntualiza que “la negociación col MEC, que na llexislatura pasada nun dio nengún resultáu, ye una manera de nun encarar el tema de la oficialidá” y que “la optatividá de la ufierta de l'asignatura tien que cambiar buscando un mecanismu que favoreza la voluntariedá d'eleición”, amás de que “tien que reforzase la supervisión del cumplimientu pola inspeición educativa”.

Tamién recuerda que “la situación actual ta llevando a la desapaición de l'asignatura en Secundaria” y puntaliza, no que se refier a los proyeutos d'usu vehicular, que “diez centros son pocos pa dar cobertoria a les esperiencies individuales que se tán faciendo dende va años y que sufren una situación d'allegalidá”. Por último, nesta estaya echa en falta “que se recueya l'usu del asturianu n'otros aspectos del trabayu del profesoráu como nos informes, formación, innovación, investigación...”.

No que se refier a les midíes alministratives del plan de dignificación, la XDLA saluda que “por fin, depués de más de 17 años, se piense n'aspeutos como la creación del reglamentu p'aplicar la Llei d'Usu, la culminación del procesu de recuperación toponímica, la estensión del conocimientu del asturianu ente'l personal funcionario, etc.”. Por último, la organización cívica alerta de que “vamos tar sollertes a les aiciones del Executivu pa dar cumplimientu a esti mandáu de la Xunta Xeneral y vamos vixilar el cumplimientu de toes estes midíes pa que supongan un camín ensin vuelta hacia'l reconocimientu plenu de los drechos de les persones falantes d'asturianu”.

Fonte: Asturies.com

Los porcentaxes na RTPA quedaron fuera del alcuerdu del plan de dignificación de la llingua

por Pablo R. Guardado

La FSA-PSOE argumentó l’autonomía del ente públicu de comunicación pa refugar la propuesta d’IX. La coalición pidía un 30 por cientu de programación n’asturianu en TPA y un informativu, y un 50 por cientu na RPA.

Los proposición non de llei d’Izquierda Xunida (IX) foi la base final del documentu qu’alcordaron FSA-PSOE, Podemos, Foro y la formación de Gaspar Llamazares, tres la presentación de delles enmiendes, y que s’aprobó ayeri na Xunta Xeneral colos votos en contra del PP y l’astención de Ciudadanos. Ésti insta al Conseyu de Gobiernu “a aprobar, enantes del final del periodu de sesiones próximu, un plan de dignificación y normalización de la llingua asturiana, que contenga un conxuntu d’aiciones urxentes col oxetivu d’algamar la so dignificación sociollingüística, la so proteición y el so puxu, con suficiente dotación presupuestaria pa cumplir tolos oxetivos, y nel que s’especifique la entidá responsable de la so execución, la previsión del costu de caúna de les aiciones, la so temporalización y los criterios pa la so evaluación”.

Del documentu orixinal l’ausencia única son los porcentaxes d’emisión na RTPA que pidía IX. “Emisión n’asturianu d’un 30 por cientu de la programación de la TPA en toles sos franxes horaries y en too tipu de conteníos, lo qu’incluyiría la emisión d’un informativu (el de la tarde o’l de la nueche) n’asturianu dafechu asina como la so utilización na programación infantil, programes deportivos, magazines, etc. El gallego-asturiano ha de tener el so espaciu proporcional nestos medios”, rezaba no que se refería a la televisión, mentes que pa la radio demandaba “la emisión n’asturianu d’un 50 por cientu de la programación de la RPA en toles sos franxes horaries y en too tipu de conteníos”. Pa la web del ente públicu de comunicación señala que ésta “ha d’aparecer por defeutu n’asturianu dafechu, ensin perxuiciu de que tamién pueda consultar la so versión en castellanu”.

Finalmente, el plan de dignificación de la llingua asturiana aprobáu ayeri queda reducíu a “puxar pola ampliación de la emisión d’espacios n’asturianu na programación de la RTPA, d’alcuerdu colos criterios de planificación y programación establecíos polos órganos rectores de la empresa pública RTPA”. Esta modificación nel documentu final vieno pol refugu de la FSA-PSOE, col argumentu de querer defender la autonomía de la direición del ente públicu de comunicación, que se va anovar próximamente.

Incorporaciones del restu de grupos

El restu de grupos parllamentarios incorporaron al documentu propuestes propies:  introducción del asturianu nel currículu d’Infantil; aprobar un reglamentu pa desarrollar la Llei d’Usu y Promoción del Bable/Asturianu y facer cumplir ésta a les alministraciones llocales; potenciar la capacidá de la direición xeneral encargada de la política llingüística; fomentar la industria cultural en llingua asturiana; fomentar la investigación científica; facilitar el conocimientu del idioma a los emplegaos públicos y a la población adulta en xeneral; y resaltar el valor de la llingua asturiana como marca identificativa d’Asturies y factor de la so promoción cultural y turística. Amás, incorporóse la demanda de Podemos de facer un tercer estudiu sociollingüísticu, que cuntaría cola collaboración de la Universidá d’Uviéu y que debería servir pa la ellaboración, xunto “coles organizaciones y axentes sociales más representatives del ámbitu llingüísticu”, del II Plan para la Normalización Social del Asturianu.

Fonte: Asturies.com

La Xunta Xeneral aprueba un plan de dignificación de la llingua asturiana

La propuesta ‘transaccional’ de la FSA-PSOE, Podemos, IX y Foro salió alantre colos votos d’estos cuatro grupos parllamentarios, que sumen 31 escaños. El PP posicionóse en contra y Ciudadanos, astúvose.

Esta votación del plan de dignificación de la llingua asturiana, alcordáu poles cuatro formaciones, celebróse esta mañana na Xunta Xeneral. El documentu aprobáu insta al Conseyu de Gobiernu “a aprobar, enantes del final del periodu de sesiones próximu, un plan de dignificación y normalización de la llingua asturiana, que contenga un conxuntu d’aiciones urxentes col oxetivu d’algamar la so dignificación sociollingüística, la so proteición y el so puxu, con suficiente dotación presupuestaria pa cumplir tolos oxetivos, y nel que s’especifique la entidá responsable de la so execución, la previsión del costu de caúna de les aiciones, la so temporalización y los criterios pa la so evaluación”.

Ente les midíes qu’ha d’incluyir ta’l sacar alantre la especialidá docente de Llingua Asturiana y Gallego-asturiano y l’establecimientu de proyeutos pilotos d’usu del vehicular del idioma en tolos niveles educativos; puxar pola creación del grau de Llingua Asturiana na Universidá d’Uviéu; garantizar l’enseñu na concertada; l’establecimientu d’un plan pilotu d’enseñanza parcial n’asturianu y gallego-asturianu de dalgunas asignatures en diez centros estratéxicos del país; l’ampliación de la programación en llingua asturiana na RTPA; la implantación progresiva nel BOPA; xeneralizar la rotulación nos edificios públicos y l’usu na publicidá institucional; garantizar la presencia de les espublizaciones n’asturianu en tola rede de biblioteques d’Asturias, con atención especial a les de los centros educativos; cumplimientu de la toponimia oficial; introducción del asturianu nel currículu d’Infantil; aprobar un reglamentu pa desarrollar la Llei d’Usu y Promoción del Bable/Asturianu y facer cumplir ésta a les alministraciones llocales; potenciar la capacidá de la direición xeneral encargada de la política llingüística; fomentar la industria cultural en llingua asturiana; fomentar la investigación científica; facilitar el conocimientu del idioma a los emplegaos públicos y a la población adulta en xeneral; y resaltar el valor de la llingua asturiana como marca identificativa d’Asturies y factor de la so promoción cultural y turística.

Amás, demanda la ellaboración del tercer estudiu sociollinguísticu que propunxo Podemos Asturies, que siguiría al encargáu pola Academia de la Llingua Asturiana a primeros del sieglu, que llevó’l nome de ‘II Estudio sociolingüístico de Asturias 2002’ con Franscisco José Llera Ramo como autor, responsable tamién del primeru, fechu por demanda del Gobiernu nel 1991 y espublizáu nel 1994 col títulu ‘Los asturianos y la lengua asturiana. Estudio sociolingüístico para el Principado de Asturias’. Ésti contaría cola collaboración de la Universidá d’Uviéu y debería servir pa la ellaboración, xunto “coles organizaciones y axentes sociales más representatives del ámbitu llingüísticu”, del II Plan para la Normalización Social del Asturianu.                                                                                             Fonte: asturies.com

Adxuntu	Tamañu
Plan Dignificación Asturianu.doc	33 KB