L’Academia de la Llingua Asturiana y la sociedá civil asturiana, con asociaciones como la Xunta Pola Defensa de la Llingua o Iniciativa pol Asturianu amosaron esti martes el so más fondu refugu a la postura del PP na Xunta Xeneral del Principáu d’Asturies.
L’Academia de la Llingua Asturiana, enterada de la prohibición del usu de la llingua asturiana na Comisión d’Estudiu sobre Réxime, Proteición y Promoción del Asturianu, treslladaba a la opinión pública asturiana esti martes “la so más fonda esmolición énte la falta de respetu haza la nuesa llingua de los parllamentarios qu’afalaron tal prohibición na Xunta Xeneral”.
Nuna nota de prensa facía referencia a que “refugar l’usu del asturianu xunto col castellanu nes actividaes parllamentaries da cuenta perfeutamente del allugamientu, oxetivamente anti-asturianu, de dalgunos de los nuesos representantes políticos y, sobre manera, de Mercedes Fernández, cabezalera del Partíu Popular y entamadora d’esta vergoñosa iniciativa. L’Academia, nesti sen, nun pue sinón escandalizase al lleer el “tweet” col que la Presidenta del Partíu Popular facía alarde del so “llogru” anti-asturianu: “hemos logrado que el castellano sea la única lengua del parlamento en Asturias”.
La verdá ye que na oponión de l’Academia “ye difícil alcontrase con una manifestación tan inequívoca de despreciu a Asturies, d’autoodiu y de falta de sensibilidá pa cola cultura de los asturianos. Y dende llueu, ye ablucante qu’una dirixente política asturiana s’atreva a espresase nesos términos. L’Academia de la Llingua Asturiana dizse sabedora de que la igua de situaciones como les acabantes de describir namái pasa pol reconocimientu de la oficialidá de la llingua histórica del pueblu asturianu. Poro, l’Academia “pide a tolos Grupos Parllamentarios que, llegáu’l momentu, sofiten esti procesu de reconocimientu xurídicu del asturianu y qu’actúen (mentanto esa figura llegal nun seya plenamente efeutiva) afalando calces de dignificación y de planificación llingüística que, acordies col marcu normativu vixente, enconten l’usu del asturianu en toles instituciones del País y, n’especial, na Xunta Xeneral, muérganu máximu de representación de los ciudadanos y ciudadanes d’Asturies”.
La verdá ye que na oponión de l’Academia “ye difícil alcontrase con una manifestación tan inequívoca de despreciu a Asturies, d’autoodiu y de falta de sensibilidá pa cola cultura de los asturianos. Y dende llueu, ye ablucante qu’una dirixente política asturiana s’atreva a espresase nesos términos. L’Academia de la Llingua Asturiana dizse sabedora de que la igua de situaciones como les acabantes de describir namái pasa pol reconocimientu de la oficialidá de la llingua histórica del pueblu asturianu. Poro, l’Academia “pide a tolos Grupos Parllamentarios que, llegáu’l momentu, sofiten esti procesu de reconocimientu xurídicu del asturianu y qu’actúen (mentanto esa figura llegal nun seya plenamente efeutiva) afalando calces de dignificación y de planificación llingüística que, acordies col marcu normativu vixente, enconten l’usu del asturianu en toles instituciones del País y, n’especial, na Xunta Xeneral, muérganu máximu de representación de los ciudadanos y ciudadanes d’Asturies”.
La Xunta pola Defensa de la Llingua Asturiana (XDLA) tamién quería amosar esti martes “la so condena más enérxica al ataque contra los derechos llingüísticos y les llibertaes individuales que’l PP asturianu, col preste de la FSA y Ciudadanos, acaba de llevar alantre. Na opinión de la XDLA “estos partíos sumaron los sos votos pa impidir que la convocatoria pa una Comisión sobre’l nivel de proteición del asturianu pudiera redautase de manera billingüe. Quier dicise, nun permiten que s’use l’asturianu pa falar del so futuru nin anque s’acompañe d’una traducción al castellanu. ¡Nun se nos permite nin la presencia aneudótica y testimonial!”.
Sicasí, tovía abulta más grave pala Xunta Pola que la presidenta del PP d’Asturies, Mercedes Fernández, “mostrara al traviés de les redes sociales lo contenta que taba por “llograr” que los nuesos derechos llingüísticos volvieren al añu 1973, por volver a enantes de que se dieren los primeros pasos pa recuperar la democracia y el patrimoniu llingüísticu. ¿Cómo pue un representante públicu de l’Asturies democrática del sieglu XXI mostrar el so contentu por nun dexar usar l’asturianu na sede de los representantes d’Asturies nin siquiera de manera testimonial?”.
Pela mañana, Iniciativa pol Asturianu yá afeaba la conducta del PP y de les otres fuercies polítiques que torgaron l’emplegu del Asturianu na Xunta Xeneral, Ciudadanos, Foro y la FSA-PSOE. N’asociación de defensa del idioma dicíen tar “énte una de les aiciones más llamentables escontra l’asturianu de los últimos años, yá que Mercedes Fernández y el so partíu presumen nos medios de discriminar a los falantes d’una de les llingües d’Asturies y afonden nos prexuicios yá superaos pola mayor parte de los asturianos, que nun entienden, como nun entendemos nós, que s’ataque d’un mou tan agresivu a una llingua que ta nuna situación de gran debilidá cuando se trata de facer un usu que nun pasa de lo simbólico y pa falar de la propia llingua”.
Dende l’asociación denunciaben tamién “la postura de la FSA-PSOE y C’s sofitando la prohibición del PP d’usar l’asturianu nesta comisión, siendo cómplices d’esti llamentable ataque a los falantes d’asturianu, que ven como los insulten los sos representantes na Xunta Xeneral”. Entrúguense cómo ye posible que’l PP califique de “pequeña victoria importante” un “llogru” antidemocráticu y anticonstitucional como esti y qu’al mesmu tiempu tengan l’atrevimientu de falar de que quieren “que el bable forme parte de nuestro acervo cultural”, mientres faen tolo posible p’acabar col idioma. Por mor d’ello, dende Iniciativa esixíen “al PP y a les fuercies polítiques qu’apoyaron al so propuesta na comisión, una rectificación total y que se permita usar l’asturianu con total normalidá, cola mesma normalidá cola que los asturianos usen cada día la so llingua nes cais y nos caminos d’Asturies”. Fonte: Asturnews
.jpg)
