Esti llunes va tener llugar la primer sesión del club de llectura n'asturianu qu'entama Iniciativa pol Asturianu en collaboración col uvieín Pub Corner's. El llibru col que se va abrir esta actividá ye 'La vuelta al mundu n'ochenta díes', de Jules Verne, tornáu al nuesu idioma por Xesús González Rato.
Esta actividá va tener llugar nel chigre asitiáu na cai Xeneral Zuvillaga, númberu 6, de magar les 20 hores y tien un preciu de 20 euros, qu'inclúi la asistencia'l llunes y el día 30, na que va celebrase la segunda sesión, y una consumición pa caúna de les xornaes. Los interesaos en matriculase pueden facelo nel propiu Pub Corner's, de 19 a 1 hores, o nel teléfonu 669.441.046.
L'oxetivu d'esta propuesta, que va tener continuidá, "ye ameyorar los conocimientos d'asturianu asina como encamentar a los participantes a lleer llibros na nuesa llingua", anuncien dende Iniciativa pol Asturianu, que tamién pretende asina averar "a la lliteratura asturiana a espacios onde davezu nun suel tener presencia, buscando públicos nuevos que s'averen a les Lletres Asturianes y al propiu idioma".
Fonte: Asturies.com
