El Festival poéticu "Pallabra nel mundu" dara-y protagonismu a la llingua asturiana esti sábadu 9 de mayu nel Centru Valey

Esti sábadu 9 de mayu a les 20 hores, el salón d'actos del Centru Valey de Piedrasblancas, en Castrillón, va acoyer una edición más del festival poéticu "Pallabra nel mundu" nel qu'esti añu va tener un fondu protagonismu la llingua asturiana. Esti ye un festival que se celebra al mesmu tiempu en numberoses ciudaes del mundu. Nel actu tendrá especial protagonismu l'asturianu, lleéndose poemes na nuesa llingua, asina como una intervención del presidente d'Iniciativa pol Asturianu, Inaciu Galán, y de la conceyala de Cultura, María Esther García López. Fonte: Asturnews

'A la gueta los sueños' festexa la Navidá con un reportaxe sobre esta celebración y cola estrena de la seición ‘El requexu de los escolinos’

Paula 5 años de Villamayor y L'Anguleru

     Avérase la Navidá y con ella llega tiempu d’estrenos en ‘A la gueta los sueños’. Asina, los usuarios d’esta revista dixital infantil van poder conocer el significáu de la celebración y les tradiciones d’estes feches nun reportaxe, asina como disfrutar d’una seición nueva, ‘El requexu de los escolinos’, con un especial sobre L’Anguleru con dibuxos de neños y neñes de Piloña, Tinéu y Castrillón.

   L’orixe de la celebración, la cena de Nuechebona, el nataliegu, L’Anguleru, la tradición de los regalos, los villancicos, los aguilandos o mazcaraes d’iviernu y el Día de Reis son los temes que toca esti reportaxe sobre la Navidá. Nella pues amás atopar imáxenes rellatives, videos y enllaces colos que completar la información y sorprender mañana a los tos familiares colos tos conocimientos sobre esta fiesta.

   Esta xornada previa a Nuechebona aprovechamos tamién pa inaugurar ‘El requexu de los escolinos’ una estaya nueva onde podrán vese dibuxos y testos fechos pola reciella. Como nun podía ser d’otra forma, L’Anguleru protagoniza’l primer especial d’esta estaya, nel que collaboraron con nós neños y neñes de Piloña, Tinéu y Castrillón, a los que se sumarán mañana pequeños de Roces (Xixón). Si quies apurrinos los tos dibuxos o testos dedicaos a L’Anguleru –u otros sobre la temática que más te preste– pa que salgan en ‘El requexu de los escolinos’ pues facelo na direición de corréu electrónicu redaccion@asturies.com. D’igual forma, esti espaciu tamién ta abiertu a tolos trabayos que se faigan en clase de Llingua Asturiana y Gallego-asturiano y que los maestros y alumnos quieran compartir con nós y toda la comunidá que forma ‘A la gueta los sueños’.       Fonte: asturies.com

Castrillón tién yá serviciu de normalización llingüística

El Conceyu de Castrillón vieno acabante de poner en funcionamientu nesti añu 2014 el Serviciu de Normalización Llingüística, un serviciu públicu a disposición de tola ciudadanía que tien por oxetu promover y facilitar l’usu del asturianu na institución municipal y ente la vecindá castrillonense. Trátase, polo tanto, d’un serviciu pa tolos ciudadanos y toles ciudadanes, creáu pa sofitar el fomentu y la difusión de la llingua asturiana en tolos ámbitos de la vida municipal, col enfotu d’enanchar la so presencia na vida social y cultural del conceyu. Esti Serviciu, estrenáu’l pasáu 4 de payares de 2013 y que llevaba peslláu dende xineru d’esti añu, ponse de nuevo en marcha’l pasáu 22 de setiembre de 2014 col envís d’executar el Proyectu de Normalización Llingüística del Ayuntamientu de Castrillón 2014, aprobáu por Resolución d’Alcadía’l 23 de julio del 2014, y que consiste, grosso modo, na traducción al asturianu de les publicaciones, folletos, guíes, documentos, impresos, etc. que xenere’l Conceyu hasta’l 31 d’avientu del 2014, arriendes de la traducción de la páxina web del Centru Cultural Valey. Amás de les funciones enconmendaes por Alcadía, esti Serviciu tien tamién ente les sos funciones la d’asesoramientu, información y ayuda a particulares, empreses, asociaciones y entidaes de toa triba del Conceyu de Castrillón, en cuantes a la llingua asturiana se refier. Tamién ye función d’esti Serviciu’l fomentu del usu de la toponimia oficial del Conceyu, aprobada por Decretu en xunu del 2008. La sede del Serviciu de Normalización Llingüística de Castrillón, dependiente de la Conceyalía d’Educación y Cultura, ta instalada na segunda planta del Centru Cultural Valey de Piedrasblancas y tien un horariu de 8 a 15:30h, de llunes a vienres. Les persones interesaes puen ponese en contactu presencialmente ente les 10 y les 15:30h, al traviés del corréu lletrónicu: llingua@ayto-castrillon.es, o per teléfonu: 985530329. Fonte: Asturnews

N'Ast considera que'l casu de Castrillón ye "una incoherencia más d’IX pa cola llingua asturiana"

N'Ast considera que la situación de Maria Esther Díaz -nun puede emplegar l'asturianu nos plenos- ye "triste y llamentable". Dende l'Asociación Cultural sentencien que "tres sintir les declaraciones feches apocayá nel programa radiofónicu Iniciativa pol Asturianu nes ondes por María Esther García López, Conceyala de Cultura del Ayuntamientu Castrillón y reconocía escritora en llingua asturiana, nes que se quexaba de que nes sos intervenciones nos Plenos municipales nun podía emplegar l’asturianu porque la persona encargada de redautar l’acta nun la entendía, N’Ast nun pue más que calificar la situación de triste y llamentable". P'argumentalo señalen que "nun duldamos, en dengún momentu, nin de la trayeutoria como defensora de la llingua asturiana nin del llabor como Conceyala de Cultura d’Esther García, pero sí de la so coherencia política como cargu públicu d’una organización, Izquierda Unida, que lleva tiempu amarutándose d’asturianista pero que cuando-y toca defender de verdá la oficialidá o la normalización social del asturianu saca’l culu p’atrás". Nesi sen, consideren qu' "un exemplu nidiu tenémoslu nesti casu protagonizáu pola propia Esther García –que recuerda abondo al recién de les multes de la Policía Llocal de Mieres, onde tamién gobierna IU– y ye que, como se suel dicir, ye ella la que tien “la sartén pel mangu” y per ende la solución, porque pa eso forma parte del equipu gobiernu del Ayuntamientu Castrillón: ¿cómo ella y los sos compañeros y compañeres puen permitir cosa tala d’una persona subordinada?", entrúguense dende N'Ast. Pa finar, completen la so argumentación espeyando que "la persona que tien que facer l’acta de lo tratao nel Plenu –xeneralmente la qu’ocupa la Secretaría municipal– nun tien necesariamente qu’entender lo que diz la señora conceyala, sólo trescribilo, y eso nun debe de ser mui complicao teniendo en cuenta que fala n’asturianu, non en chinu. Sicasí, y si’l problema ye real, l’Ayuntamientu Castrillón bien podía entamar cursos d’asturianu empobinaos a los sos trabayadores pa qu’esto nun asoceda, o aprobar unes Ordenances Municipales que regulen l’usu del asturianu nel Conceyu y qu’amparen la necesidá de que los y les trabayadores de l’Alministración municipal conozan la llingua asturiana". Fonte: Infoasturies

García: "Cola oficialidá llegaría la preparación del funcionariáu, alfabetización y demás ferramientes"

    María Esther García, conceyala de Cultura de Castrillón por IX,declaró nún de los programes últimos de ‘Iniciativa pol Asturianu nes ondes’ que nun podía utilizar l’asturianu nel Plenu. Afirma que cola oficialidá nun se daría esti casu.

María Esther García, conceyala de Cultura de Castrillón

     Pa la escritora en llingua asturiana la razón de que se dea ésta situación débese a l’ausencia d’oficialidá del idioma. “Cola oficialidá llegaría la preparación del funcionariáu, alfabetización y demás ferramientes”, asegura, pa depués defender el llabor de la funcionaria del Conceyu de Castrillón: “Quiero dexar claro qu’en nengún momentu quixi cargar pa nada la responsabilidá nesta funcionaria que trescribe les actes del Plenu, yá que nun tien la culpa de nun tar alfabetizada n’asturianu”.

    D’igual mou, apunta que les sos intervenciones nel Plenu son escases, al nun ser vocera, “y cuando daquién tien bona intención y nun obra a mala fe,  hai que facilita-y les coses”. “Esto namás pue atayase cola oficialidá de la Llingua”, continúa García, “porque daría pie pa que, pasu ente pasu, el personal de los distintos estamentos ya instituciones del Principáu tuvieren preparaos pa esribir y trescribir n’asturianu. Pero, sobre too, que nadie punxera torgues llegales a la so utilización. Porque güei por güei, hailes”.

    García, que fixo la campaña tanto pa les eleiciones llocales como pal Senáu n’asturianu dafechu, recuerda’l so compromisu pa col idioma, como amuesa la so trayeutoria profesional como escritora, investigadora y profesora, y apunta que va siguir interviniendo n’actos públicos utilizando la llingua del país. D'igual forma, señala que va siguir trabayando pol asturianu dende'l so cargu pese a les torgues qu'atopa dende la institución, gobernada por Izquierda Xunida (IX), como espresa na entrevista qu'ufrió nel programa 'Iniciativa pol Asturianu nes Ondes' que presenta y dirixe Samuel Gradín.  Fonte: Asturies.com

VII Festival Pallabra nel Mundu poéticu-musical n'asturianu en Piedrasblancas el 17 de mayu

Abiertu plazu pa participar nel VII Festival Pallabra nel Mundu de poesía en Castrillón

   El vienres 17 de mayu a les 7 la tarde nel Centru Valey de Piedrasblancas va celebrase un recital poéticu-musical. Ta abiertu'l plazu pa mandar poemes y participar. Los organizadores animen a "da-y la máxima presencia posible a la poesía n'asturianu" y animen pa ello a mandar a administracion@valeycentrocultural.org una ficha d'inscripción qu'ha mandase cubierta xunto colos dos poemes propuestos pa la llectura. El plazu ta abiertu hasta'l 30 d'abril.

   Han incluise nome completu y apellíos, llugar de nacimientu y de residencia, dirección de corréu lletrónicu, teléfonu de contactu, blogue o páxina web (si lu tienes) y currículu lliterariu curtiu.

   Fonte:  Asturnews.

Vorto en la mondo (esperanto),  Palavra no mundo (portugués),  Parola nel Mondo (italiano),  Worte in der Welt (alemán),  Rimayninchi llapan llaqtapi (quechua),  Paràula in su Mundu (sardo),  Cuvânt în Lume (rumano),  Parole dans le Monde (francés),  Ordet i verden (danés),  Word in the world (inglés), Palabra no mundo (gallego),  Ñe’ê arapýre (guaraní),  Paraula en el Món (catalán),  Chuyma Aru (aymara),  Koze nan lemond (creole),  Kelma fid-dinja (maltés),  Milá baolam (hebreo),  Nagmapu che dungu (mapuche),  Tlajtoli ipan tlaltikpaktli (nahuatl),  Vort in Velt (idish),  Dünyada kelime (turco), lhamet ta íhi honhát (wichi),  Titzaa yeezii loyuu (zapoteco),  Dunyoda so’z (uzbeco),  Слово в мире (ruso),  Pallabra nel mundu (asturiano),  HitzaMunduan (vasco),  T'aan yóok'ol kaab (maya)...

   Fonte:  Google.

Castrillón celebra el VI Festival Internacional de Poesía "Pallabra nel Mundu"

Castrillón celebra estos díes el VI Festival Internacional de Poesía, Pallabra nel Mundu. La conceyalía de Cultura d’esti Conceyu súmase a esta VI edición del Festival con un programa qu’axunta poesía, música, escultura, y otros formatos audiovisuales. Los díes 11 y 12 de mayu, nel Valey Centru Cultural de Castrillón, van xuntase poetes de distintes procedenci

es pa celebrar un recital nel que va poder sentise al asturianu, el castellán y otres llingües. Ente los díes 11 y 28 de mayu va tar abierta una esposiciones, “Muyeres atopaes”, na que se recueyen formes, “muyeres poema” recoyíes pol autor Fernando Beltrán. L’11 de mayu va celebrase un alcuentru col poeta Fernando Beltrán, faciendo un percorríu comentáu pelos distintos poemarios del autor, presentáu por Leopoldo Sánchez Torres, director de l'Aula de les Metáfores de Grau. Tamién va poder sentise la poesía de: Cristian David López, Sara Torres, José Luis Sevillano y Ana Vega, baxo la dirección del poeta estremeñu, críticu lliterariu, profesor de la Universidá d'Uviéu y director de la Revista Clarín, José Luís García Martín. A les 11 va celebrase una velada nocherniega de llectures de poemes, nun chigre de Piedrasblancas. El sábadu 11 van celebrase dellos talleres poéticos pela mañana, de la mano de Leopoldo Sánchez Torres y Olga Cuervo. A les seis de la tarde nel Teatru Valey va celebrase l’actu central d’esti festival, un recital presentáu con autores escoyíos dempués d’una convocatoria ta. Mientres el recital va haber actuaciones musicales, y va dase a conocer el fallu del Concursu Infantil Pinta un Poema y del Concursu de Poesía Esperimental dirixíu a Moces. D'ésti proyectaránse los trabayos, rematando cola entrega de premios. Nel recital, “Poetes nel mundu”, inauguráu pola alcaldesa de Castrillón, Ángela Vallina de la Noval, y la Conceyala d’Educación y Cultura, Mª Esther García López, y presentáu pol escritor y periodista Manolo Abad, van participar Xuanxo Ashraf Bardibia Garcçelya, María Avello Martínez, Raúl Campoy Guillén, José María Castrillón, Víctor Corcoba Herrero, Daniel de Culla, Juan José Domínguez Piris, David Fueyo Fernández, Inaciu Galán y González, Laura García Calvo, Esther García López, Virginia Gil Torrijos, Iris Girón Riveros, Luis Pablo Gómez Vidales, Xosé Anxelu Gutiérrez Morán, Marisa López Diz, Esperanza Medina, Natalia Menéndez Rodríguez,Cristian Mínguez, Ana Amélia Passos Dos Santos, Teodoro Revilla Bravo, Carlos Rubio Rivera, Ivonne Sánchez Barea, Sonia Segarra, Myriam Solar y Nieves Viesca, acompañaos pol cuartetu Nicandair, del Conservatoriu "Julián Orbón" d’Avilés. Más información: Programa completu d’actividaes Fonte: Asturnews

Illas y Castrillón van tener un Serviciu de Normalización Llingüística mancomunáu

Los alcaldes d'Illas, Alberto Tirador, y de Castrillón, Ángela Vallina, y el direutor Xeneral de Política Llingüística, Alfredo Álvarez Menéndez, alcordaron entamar los trámites pa la creación d'un Serviciu de Normalización Llingüística qu'atienda de forma mancomunada la promoción y normalización del asturianu nestos dos conceyos. El serviciu, que va tener la so sede en Castrillón, va entrar en funcionamientu a partir del mes de xunu y pa ello va cuntar, mientres esti añu, con una sovención de la Conseyería de Cultura y Deporte de 9.000 euros.

Según informa la Conseyería de Cultura, col de Castrillón y Illas van funcionar n'Asturies 14 servicios de normalización, configurando una Rede de Normalización que da cobertoria a un total de 29 conceyos y a más de 685.000 asturianos (más de la metá de la población del Principáu). Estos servicios constitúin una ferramienta fundamental p'averar el procesu de recuperación y promoción del asturianu a la realidá sociollingüística de los conceyos asturianos. Por ello, y porque amás son xunidaes xeneradores de puestos de trabayu, les partíes destinaes a apoyar estos servicios son les úniques que nun se vieron afeutaes pol axuste presupuestariu de la Direición Xeneral de Política Llingüística (un total de 327.900 euros).

Los Servicios de Normalización intégrense nel trabayu de los Conceyos col llabor de planiar y executar delles actuaciones de promoción y normalización de les nueses llingües autóctones nel ámbitu del so conceyu: campañes informatives, edición d'espublizaciones, actividaes pa favorecer l'usu del asturianu ente neños y mozos, y de recuperación de la toponimia tradicional.

Fonte: Europa Press