Iniciativa pol Asturianu va tener un puestu informativu nel micru abiertu de Fame Poétika

Iniciativa pol Asturianu tendrá presencia con un puestu informativu na timba poética que va facese esti vienres 24 en Mieres dende les 19 hores na llibrería-café ‘La llocura’.Nel puestu van poder mercase llibros, revistes, amás de servir d’información sobre la situación del idioma y cómo la nuesa organización desendolca un llabor perimprotante na so dignificación.

Per otru llau, la timba poética ye un micro abiertu al que podrán apuntase toles persones que lo deseen, especialmente les que quieran lleer testos propios, anque esto nun ye fundamental. Como ye vezu, nesti tipu d’eventos, agradécense les participaciones ya seya de músicos, poetes o artistes de tou tipu que quieran acercase a esti puntu d’alcuentru pal arte en direutu. Nesta ocasión , el coleutivu, vien acompañao de la banda de versiones rock “El hombre de las estrellas” que, dende les 19 hores, entamará l’eventu a ritmu de guitarra llétrica.

El colectivu de poesía Fame Poétika, que lleva cuatro años xestionando este tipu d’alcuentros poéticos y usando con total normalidá l’asturianu nos sos eventos, visita Mieres por segunda vez na so hestoria dende que’l caberu añu presentaren ellí’l so poemariu ‘Seguimos con Fame’ na Casa de cultura Teodoro Cuesta. Y esti vienres, dende les 19 hores na llibrería-café ‘La llocura’, quieren volver a semar otru ésitu pa la poesía n’Asturies.

Fonte: Iniciativa pol Asturianu

Dempués de les quexes d'Iniciativa pol Asturianu, reabre'l Serviciu de Normalización Llingüística de Mieres

Iniciativa pol Asturianu presentó va dos meses una quexa nel rexistru del Conceyu de Mieres dempués de recibir l'avisu de dellos vecinos del conceyu y saber que'l Serviciu de Normalización Llingüística taba peslláu. Dempués d'esta quexa y col entamu del mes de xunu, volvió a ponese en funcionamientu esti serviciu de gran importancia pa la normalización y promoción del idioma. 

Estos servicios, que viven momentos de continua intestabilidá habríen tener un mayor sofitu, tanto del Gobiernu d'Asturies, dándo-yos una financiación estable, como de los Conceyos, qu'en munchos casos nun dediquen nengún presupuestu a la so actividá y caltenimientu.

Fonte: Iniciativa pol Asturianu

Cerezal va presentar el so segundu trabayu, "Camín", el 23 de payares en Mieres

Cerezal

   La formación folk Cerezal va asoleyar esti mes el so segundu trabayu d’estudiu, ‘Camín’. Tres l’EP espublizáu l’añu pasáu, los mierenses dan un pasu más na so trayeutoria con esti llarga duración que van presentar el domingu 23 de payares con un conciertu en Mieres.

   ‘Camín’ (Algamar Producciones) grabóse y mezclóse en TUTU Studios de la mano de SergiAuditoriuo Rodríguez y Ruboh, y contó cola producción del propiu grupu. Con él, Cerezal continúa cola so apuesta de folk acústicu y estilu frescu averáu al pop –siendo la mayoría de los temes cantaos– que yá amosaron nel EP autoproducíu ‘Cerezal’. En total son 12 cortes, más un ‘bonus track’, a lo qu’hai que sumar una montonera de material audiovisual a la que namái van tener accesu aquelles persones que merquen dalguna de les primeres 500 copies: fotos, lletres y vídeos, ente los que ta el videuclip del tema ‘Nueche’, grabáu en direuto y nel que la banda ta acompañada de los hermanos Tejedor, Marco Antonio Guardado, Ruboh UnoMasUno, Vrienden, Rubén Alba o Fernando Oyagüez. Los cantares son principalmente composiciones propies, anque tamién hai revisiones de temes tradicionales.

   La formación de Cerezal, compuesta por Juanjo Díaz (percusiones y batería), David Mori (flauta, whistle y gaita asturiana), Andrea Álvarez (voz), Juan Yagüe (guitarra, bouzuki y mandolina) y Gonzalo Pumares (vigulín y voz), cuenta nesti trabayu discográficu con dos collaboraciones de sonadía, como la de Juan Carlos Vega Cabín (baxu) y Victor Manuel (voz). Los mierensen van presentar ‘Camín’ en casa con un conciertu previstu pal domingu 23 de payares, a les 20 hores, nel Auditoriu. Fonte: asturies.com

Mieres convoca una edición nueva del Concursu de Rellatos Curtios p'alumnos de Secundaria

Cartelu del III Concursu de Rellatos Curtios "Conceyu de Mieres"

   Yá ta abiertu’l plazu pa presentar trabayos pal III Concursu de Rellatos Curtios ‘Conceyu de Mieres’ pa estudiantes de Secundaria. El plazu fina’l 30 de payares y los ganadores van recibir un llote de llibros n’asturianu.

   Nesti concursu qu’entama’l Serviciu de Normalización Llingüística de Mieres pueden participar estudiantes matriculaos en centros educativos de Secundaria d’Asturies con edaes ente les 12 y 18 años. Pa ello, han de presentar una obra inédita, orixinal y de temática llibre que nun supere les trés fueyes per una cara en formatu DIN-A4 y tipográfía ‘Times New Roman’, cuerpo 12 y a doble espaciu. El testu ha de tar dientro d’un sobre zarráu con un alcuñu que s’indicará n’otru sobre más pequeñu onde han de dir los datos del alumnu o alumna. Nel casu de que s’opte por unvialu en formatu electrónicu, les señes del autor han de dir nun documentu axuntu.

   El día caberu pa entregar los testos fina’l 30 de payares. El mou de presentalos a concursu pue ser en mano, na Casa Cultura Teodoro Cuesta, o per vía postar a la direición de la mesma: cai Manuel Llaneza, númberu 8; 33600 Mieres del Camín. Tamién ye posible utilizar el corréu electrónicu llingua@ayto-mieres.es. Un xuráu encargaráse de seleicionar al ganador y a los dos finalistes, que van recibir un llote de llibros en llingua asturiana. La entrega de premios celebraráse nel salón d’actos de la casa cultura nun actu con fecha por determinar y los trés trabayaos vencedores van espublizase nel llibru de les fiestes de San Xuan. Pa más información, pue contautase col Serviciu de Normalización Llingüística de Mieres al traviés del so corréu o nel teléfonu 984.18.02.37, cola estensión 601.                                                                                            Fonte: asturies.com

Mieres edita'l Poema de la Danza Prima pa San Xuan

   La investigadora mierense Pilar Fidalgo Pravia, vieno acabante facer un estudio de les estremaes variantes qu'hai del romance que se canta la noche de San Xuan y l'Ayuntamientu de Mieres edita la versión de 1885 de Dn Juan Menéndez Pidal.

   La hestoriadora mierense fai un completu repasu d'esi romance que sirve pa cantar mientres se fai la danza del país.                                                                                                                                   Fonte: Asturnews

Suárez Fernández "Tapia" recueye'l Vocabulariu de Santuyano

    Les rellaciones familiares de Xosé Miguel Suárez Fernández ‘Tapia’ cola parroquia mierense de Santuyano llevaron a esti filólogu a recoyer el vocabulariu de la zona mientres cuasi venti años. L’investigador axunta agora estes pallabres nun llibru.

                                      Cubierta del Vocabulariu de Santuyano

    Baxo’l nome de ‘Vocabulariu de Santuyano (Mieres)’ esta obra ufre más de 3.000 entraes con términos recoyíos al traviés de conversaciones o encuestes direutes con persones del llugar. Xunto a cada pallabra, Tapia incorpora exemplos, frases feches, llocuciones, refranes y respuestes humorístiques usaes o recordaes pola xente de Santuyano, parroquia asitiada na zona central del conceyu con una población superior al millar. “Concebíu como una contribución al conocimientu del léxicu del asturianu, esti ‘Vocabulariu de Santuyano (Mieres)’ ye un testimoniu más de la riqueza y tamién de la resistencia a desapaecer que tien la llingua asturiana, mui viva entá nos valles mineros. Palabres a barullu, a magüeyu, a trompón, a retorcer, asgaya, a maza, a pastu..., pa lleeles, pa recordales, pero, sobre manera, pa nun dexar d’usales”, detallen denden la editorial Trabe, que va principiar cola distribución d’esti trabayu peles llibreríes del país la selmana próxima.

    Xosé Miguel Suárez Fernández (Mántaras, 1965) ye un filólogu, historiador y espertu en Filoloxía Asturiana conocíu pol alcuñu de ‘Tapia’. Estudiosu del gallego-asturiano, tien espublizaos decenes d’artículos sobre cuestiones llingüístiques, históriques, etnográfiques y lliteraries, asina como llibros d’investigación como ‘Vocabulario de Mántaras (Tapia)’ (1996), ‘¡Xa chegan Os Quirotelvos!’ (2006), ‘Unde letras falan. Antoloxía da poesía en galego-asturiano’ (2006) o ‘El «Teatro Aldeano» da Biblioteca Popular Circulante de Castripol (1929-1934)’ (2009). D’igual forma, tamién asoleyó delles obres lliteraries y traducciones, y cuenta con una esperiencia grande na correición de testos mientres la so etapa na yá desapaecida Publicaciones Ámbitu, empresa editora del históricu selmanariu ‘Les Noticies’.    Fonte:  Asturies.com

La XDLA denuncia la persecución al asturianu en Mieres

La Xunta Pola Defensa de la Llingua Asturiana refugó dafechu esti vienres la escusa dada pola Policía Llocal de Mieres, de nun entender asturianu, pa poner multes d'aparcamientu a persones que llevaben el permisu d'estacionamientu de la Casa la Cultura del Conceyu escritu n'asturianu. "Naide con dos deos de frente pue pensar" que se trate d'esi problema, señala la organización, que barrunta que lo que pasa ye que la Policía Llocal nun aceuta la llingua. Con un comunicáu nestos términos, la Xunta criticó duramente l'actitú de la Policía Llocal, asina como la del Gobiernu municipal, d'Izquierda Xunida, al tomar la decisión de retirar los permisos redactaos n'asturianu pa solucionar el problema. A xuiciu de la Xunta, trátase d'un "espectáculu llamentable que tán dando, primero la Policia Llocal, al multar a ciudadanos por nun dar por válidu un permisu d'aparcamientu pa la Casa de Cultura redactáu n'asturianu, y dempués del Conceyu de Mieres al decidir solucionalo quitando l'asturianu d'eses autorizaciones". El problema, pa esti coleutivu, ye que "servidores públicos niéguense a aceutar como normal la llingua qu'usa la población de Mieres a la que sirven". "Cola escusa de que l'asturianu nun ye oficial, ponen per delantre esos argumentos llegalistes antes que ser tolerantes y tener bona voluntá. ¿Nun entienden l'autorización o nun la quieren entender? ¿Son illegales agora tolos ciudadanos de Mieres y van quedar nuna situación d'inseguranza y desprotección xurídica? ¿Multarán a los ciudadanos que falen cola policía local por nun los entender?", llamenta la Xunta. CRÍTICA A IX POR "DOBLAR" La XDLA denuncia "los niveles d'intolerancia llingüística que tenemos que sufrir n'Asturies, y lo que ye tovía más intolerable ye ver cómo un gobiernu municipal democráticu, encabezáu por un partíu que defende la oficialidá y los drechos plenos pa los falantes d'asturianu, dobla de manera tan vergoñosa cuando daquién acusa d'illegal l'usu del nuesu idioma". "Lo que tien tola traza de ser un problema personal col responsable de la Casa de Cultura de Mieres tán amazcarándolo con lleis y reglamentos, y el resultáu ye que l'usu normal de la llingua asturiana nun permisu d'aparcamientu acaba eliminándose por orde del señor alcalde", añade la nota. La Xunta "esixe la intervención inmediata de los responsables pa reestablecer la normalidá nesti absurdu y frenar l'alarma social xenerada énte la indefensión en gran parte de la población que se sabe custodiada por unes "fuerces de seguridá" que nun los entienden o nun los quieren entender, y por un equipu de gobiernu que lo almite y que, coles sos decisiones, apóyalo". Fonte: Asturnews

Conceyu Abiertu por Mieres entamó una concentración baxo'l llema "L'asturianu llingua oficial"

La plataforma conceyil desixe que se depuren responsabilidaes pol casu de represión llingüística en Mieres, polo que convoquen concentración pa esti sábadu a les 13:00 nel Ayuntamientu Mieres.

Dende Conceyu Abiertu consideren que "la Casa Conceyu, como alministración pública más cercana al ciudadanu, y el alcalde en particular, tienen de tener la prioridá absoluta de velar por que se garanticen los drechos llingüísticos de los sos vecinos y amosar nestos casos una mayor sensibilidá. Teniendo en cuenta que l’asturianu ye la llingua tradicional d’Asturies y de Mieres, falada pola mayoría de los vecinos y fácilmente comprensible por toos, incluso por aquellos que nun son asturfalantes, camentamos que la actitú reaccionaria, provocativa y de despreciu por parte d’un axente de la policía municipal haza’l asturianu nun pué vese pa enriba reforzada pola decisión del alcalde de retirar tales autorizaciones n’asturianu".

Nesa llinia, dende Conceyu Abiertu por Mieres camienten "que l’alcalde de Mieres debería entamar un espediente disciplinariu al axente en cuestión cola fín d’esclariar si tres la actuación d’esi axente hai un fechu represivu haza un ciudadanu por motivaciones ideolóxiques, ya que la única causa aparente pa que talu axente sancionare al usuariu de la Casa Cultura ye que la autorización taba n’asturianu, y non la incomprensión de la mesma por parte del axente".

Amás, remembren que "casos como esti ponen de manifiestu nueamente la necesidá urxente de declarar l’asturianu como llingua oficial d’Asturies cola fin de garantizar los drechos de los asturfalantes". Poro, convoquen una concentración de protesta esti sábadu 9 de payares a les 13:00 hores énte la Casa Conceyu de Mieres, col llema “L’asturianu llingua oficial”, pa la que faen un llamáu a toles persones esmolecíes por esti casu de represión llingüística.

Fonte: Infoasturies

Multa en Mieres por una autorización escrita n'asturianu

La oficialidá preséntase como la única alternativa pa acabar con abusos como la multa en Mieres por escribir n'asturianu

L'abusu manifiestu d'un policía de Mieres que multó a un trabayador de la Casa la Cultura de Mieres por "nun entender" la frase n'asturianu "Autorización Aparcamientu" traxo ayeri a l'actualidá otra vuelta la necesida d'un marcu llegal d'oficialidá qu'acabe con abusos d'esti tipu de marxinación inaceptable qu'entá sufren los falantes d'asturianu nel so país. Partíos y asociaciones entamaron esti vienres a manifestar la so indignación dafechu y a reclamar darréu la "oficialidá" de la llingua asturiana. La multa provocó la quexa de la Casa Cultura de Mieres que vien d'unviar un escritu Aníbal Vázquez, alcalde del conceyu, por mor d'esti casu de represión llingüística sufrida por un conductor, a causa d'un supuestu "aparcamientu indebíu". La realidá de los fechos foi que'l vehículu, aparcáu nuna zona acutada énte la Casa Cultura, tenía nel salpicaderu una autorización escrita n'asturianu y que l'axente dixo "nun entender", polo que decidió poner una multa d'ochenta euros, repitiendo esa mesma multa a otru conductor depués. Ismael González Arias, responsable de la Casa Cultura Teodoro Cuesta de Mieres, treslladó a la Casa Conceyu'l so maltar pola situación con un escritu irónicu nel que s'ufierta "a dar clases de bable a los policíes", asina como en castellán, pola esistencia de faltes d'ortografía na multa. Asociaciones y Partíos políticos refuguen el casu A lo llargo de la mañana vienen asoleyándose abondes notes de prensa criticando la midía por parte d'asociaciones y partíos políticos, dende Andecha y Compromisu a N'Ast, esperando que sigan apaeciendo a lo llargo del día manifestaciones nel mesmu sen. Pa l’Asociación Cultural N’AST, casos como l’asocedíu va un par de díes en Mieres ponen bien a les clares la situación d’anormalidá democrática que tamos viviendo n’Asturies derivada de la falta d’oficialidá de la llingua asturiana. Por desgracia, situaciones tan esperpéntiques como l’asocedía nel conceyu mineru son, según l'asociación, "bastante más habituales de lo que pueda paecer, por eso dende N’AST perafitámonos na nuesa reivindicación d’oficialidá pal asturianu, una oficialidá que torgue estes situaciones y qu’ampare los drechos llingüísticos del pueblu asturianu". Fonte: Asturnews

Convoquen el Premiu Teodoro Cuesta con una baxa del 25% na cuantía pal ganador

Convoquen el Premiu Teodoro Cuesta con una baxa del 25% na cuantía pal ganador


El Conceyu de Mieres, pente medies de la Casa de la Cultura “Teodoro Cuesta”, y col apoyu de la Conseyería de Cultura y Turismu d’Asturies, convoca la edición de 2012 del Premiu “Teodoro Cuesta” de Poesía, pal que puen presentase orixinales hasta’l 30 de payares. El Serviciu de Normalización Llingüística del Conceyu de Mieres punxo en conocimientu de los aspirantes al gallardón, que “tendrá estí añu una cuantía de 3.000 euros en vez de los 4.000 de convocatories anteriores”.

Nel prestixosu premiu puen toles persones que lo deseen con un poemariu inéditu, orixinal y escritu en llingua asturiana, entregando orixinal y cuatro copies. La entrega podrá facese per corréu certificáu o entregándolo en mano en: Casa de Cultura “Teodoro Cuesta”(secretaría). Manuel Llaneza 8, 33600, Mieres. Asturies.

Los poemarios han dir ensin firma, con alcuñu o lema y figurando’l so nome y les señes en sobre zarráu.

Concederáse un únicu premiu dotáu con 3.000 euros, contemplándose promover la so publicación. Sicasí, el xuráu podrá declarar desiertu’l premiu y el fallu va ser inapelable.

Pa más información pue acudise a la Casa de Cultura “Teodoro Cuesta” o llamar a los teléfonos 985 45 62 92 o 985 45 06 66, escribir a cultura@ayto-mieres.es ó llingua@ayto-mieres.es ó consultar la so web www.ayto-mieres.es/cultura

Fonte: Asturnews

Reclamen que la web del Ayuntamientu de Mieres tea tamién n'asturianu

Conceyu Abiertu por Mieres reclama que la web del Ayuntamientu tea tamién n'asturianu.

La formación mierense reclamó nun comunicáu que la páxina web del Ayuntamientu tea tamién la so versión en llingua asturiana, aniciativa que s'amesta a la de Conceyu Abiertu por SMRA díes atrás.

Conceyu Abiertu por Mieres desplicó que "La páxina web del Ayuntamientu de Mieres, muérganu dixital oficial de la institución municipal, nun ufre a los usuarios de la rede la posibilidá de visualizar la mesma na llingua asturiana. Dende Conceyu Abiertu por Mieres, depués de dexar dalgo de tiempu al nuevu executivu llocal pa que tornara esta situación, queremos desixir que se nos dea la posibilidá d'una opción de visualización d'esta páxina tamién na llingua propia d'Asturies y del Conceyu de Mieres".

Poro, piden la versión n'asturianu porque "entendemos qu'un conceyu como'l de Mieres, claramente asturfalante, nun pue permitise tener la páxina web oficial namás na llingua castellana. El fechu de que la páxina www.ayto-mieres.es nun tea una versión de visualización n'asturianu tresmite una imaxe de pasotismu pa col ciudadanu, alloñando ainda más la institución municipal del pueblu. Poro, dende Conceyu Abiertu por Mieres entendemos que la realidá llingüística que se vive nes cais del conceyu nun se correspuende col diseñu monollingüísta d'esti mediu dixital".

Amás, despliquen que "dende la plataforma Conceyu Abiertu por Mieres, atalantamos que la situación del asturianu ye pergrave y yá son dellos muerganismos internacionales los que señalen que con esti camín de falsa normalización l'idioma d'Asturies ta nel camín de desapaecer dafechu. Una bona midía de normalización sedría ufrir una versión n'asturianu de la páxina web municipal y asina contribuyir a caltener viva la nuesa llingua, cosa que yá ficieron dellos conceyos de la redolada de Mieres".

Nesi sen, consideren que "L'alministración, depués de munchos escándalos y de xenerar situaciones discriminatories, yá foi avisada y llama a orde con esti tema, con resoluciones xudiciales inclusive, que llamaben a fomentar l'emplegu y usu l'idioma dende l'alministración pública. Nesti sen, sedría importante que'l gobiernu llocal y los responsables de la web punxieranse manes a la obra y normalizar y fomentaren l'emplegu del asturianu na páxina web, que ye un muérganu de l'alministración mierense na rede".

Crítiques a IX-LV

Pa finar manifiesten que "nun queremos escaecer a la xente qu'Izquierda Xunida-Los Verdes, llevaba nel conceyu enantes de ganar les eleiciones, nel so programa eleutoral, el compromisu de dignificar y normalizar la posición del idioma propiu del país. Ye una irresponsabilidá qu'enantes de ganar les eleiciones prometieran afondar nesa normalización llingüística y qu'entá nun ficieran nada. Ciertu ye qu'hai prioridaes agora mesmu, xestionaes, por ciertu, malamente hasta'l momentu, pero los ciudadanos mierenses asturfalantes tienen drechos irretrucables nesta materia y tienen de cumplise".

Fonte: Infoasturies

El centru comercial Caudalia de Mieres fai campaña n’asturianu

REDAICIÓN. UVIÉU - Ye la primer campaña de promoción de consumu d’un centru comercial que se fai n’asturianu dafechu. Caudalia, el centru comercial allugáu en Santuyano (Mieres), ta llevando alantre nesta selmana, dende’l 26 de xunu al 1 de xunetu, una promoción col lema Aforra les perres pa les vacaciones; la cesta la compra regálatela Caudalia. Los veceros que s’averen a cualquiera de les tiendes del centru, incluíu l’Eroski, van atopar publicidá de la campaña, toa n’asturianu. Nun stand, tolos visitantes que presenten un tique de compra de más de seis euros van poder ganar cheques regalu de cinco euros pa cambiar nos locales de Caudalia, entraes de cine o cestes de la compra con productos Eroski valoraes en 50 euros. Amás, ente tolos participantes va haber un sortéu d’un fin de selmana nun hotel-spa de cuatro estrelles pa dos persones.


La idea partió de la xerencia del centru comercial. «Facemos normalmente promociones de consumu, pero nunca n’asturianu. Ocurriósenos entós dir faciendo cosines nesta llingua y esta campaña ye una bona manera d’empezar», señala Pilar Suárez, xerente de Caudalia. «Más alantre puen facese más coses. Nesti casu lo que fiximos foi usar esa llingua en tolos materiales de la campaña», esplica. Son cuñes na radio, cheques, folletos informativos y vales. De momentu, anque dalgún veceru pregunta los nomes de los meses, colos que nun tán familiarizaos, la xente cuasi nin se da cuenta de que ta n’asturianu porque los mensaxes tán na llingua que falen normalmente. D’eso se trata nuna campaña n’asturianu, de que l’idioma nun sía un estorbu sinón una ventaya, dalgo familiar y averao qu'espierte simpatíes. Y nesti casu parez que se ta consiguiendo.

Fonte: Les Noticies

Presenten el cómic "Hestories del mio conceyu" en Mieres del Camín

El dibuxante Xosé Xuan González "Xuan G." presentó na Casa Cultura Teodoro Cuesta de Mieres el so caberu trabayu entituláu "Hestories del mio conceyu", cómic promocionáu pol Serviciu de Normalización Llingüística del conceyu nel que l'autor turonés desencolca delles hestories rellacionaes col conceyu a lo llargo de los años.

Asina, con unos alumnos d'institutu como filu conductor, l'autor repasa sucesos de la "Guerra d'Independencia" escontra Napoleón, los años de la industrialización, la emigración, el ñacimientu del movimientu obreru y otros episodios como l'apaición de les pantasmes de soldaos carlistes na Vera'l camín de Turón, cola doble intención de recoyer sucesos hestóricos y populares del conceyu y promocionar la llingua del país na producción lliteraria y artística.

Fonte: Infoasturies