‘Teatru y figures rituales n’Asturies’ ye’l nome del trabayu qu’Antón Caamaño dedica al teatru ritual. L’actor y direutor d’escena reivindica esta estaya poco conocida del teatru popular como ún de los pegoyos onde s’afita’l teatru asturianu.
Esti ‘Analís de les formes etnodramátiques y de la so función social na actualidá’, editada por La Cruz de Grau, lleva a Caamaño a estudiar los preseos y carauterístiques que se repiten y combinen de forma particular n’Asturies, dando llugar a les mazcaraes que güei conocemos: el Guirria de Ponga, Los Sidros y La Comedia de Valdesoto, y Os Reises d'Ibias y del Valledor. D’igual forma, ufre una hipótesis de la evolución del ritual dende’l so orixe hasta anguaño basándola nos estudios fechos hasta la fecha sobre la tema por Uría Ríu, Cabal, Iglesias Cueva y Rodríguez Hevia, I-Riguilón, Gómez Pellón, Aurelio del Llano o Menéndez Peláez, y analiza’l sentíu del teatru ritual o etnodrama y “la so función social, güei, que yá paez que perdió (o non) muncho del so significáu primixeniu”, esplica l’autor. Ente les idees que rescamplen d’esta obra atopamos que’l teatru nun ye namái lliteratura, sinón que ye una estaya que se pue estudiar aparte como cualquier otra disciplina; que’l teatru occidental nun tien orixe relixosu; y que “el teatru asturianu nun ye namái que teatru costumista. Pueden definise más pegoyos, y ésti ye un d'ellos”.
Les razones que llevaron al cabezaleru de Producciones Nun Tris –xunto con Inma Rodríguez– a escribir esti llibru son “l'enfotu por trazar eses llinies que xunen nel colar del tiempu'l nuesu presente coles tradiciones populares, en cuantes qu'al teatru se refier, y que permiten analizar la historia del nuesu teatru al traviés del tiempu y la historia del nuesu país al traviés del teatru”, amás de “facer una aportación dende la discipina del Arte Dramáticu; el teatru nun ye lliteratura y los rituales tampoco son sólo materia d'estudiu de l'Antropoloxía”. Por último, añade como causa d’esti trabayu la necesidá que vio, “depués de que tolo referente al teatru n'Asturies tea esaniciao pola crisis económico y la curtiedá de mires ya incultura de los nuesos políticos, de volver a perfacelo too, a entamar dende'l principiu, a llevantar otra vegada l'horru del teatru asturianu dende lo primero, iguando los erros nos que se cayeron nel pasáu; ún d'ellos ye’l desconocimientu y despreciu sobre lo que somos y sobre les nueses tradiciones y historia”.
La obra del xixonés, que cuenta con un prólogu de Vicente Iglesias Cueva y Luis M. Rodríguez Hevia, incorpora delles semeyes del Archivu de la Tradición Oral y de Xosé Antón Fernández ‘Ambás’, Pablo Canal y Carlos González Ximénez. La cubierta ye obra de Gloria Caamaño y el llibru ta a la venta, al preciu de 10 euros, en l’Espaciu Sociocultural La Manzorga (Xixón), Cervantes (Uviéu), Palabras de Caramelo (Candás) y San Andrés (La Puela), amás de na rede.
Presentación en Corvera. Tres dar a conocer ‘Teatru y figures rituales n’Asturies. Analís de les formes etnodramátiques y de la so función social na actualidá’ nel xixonés Espaciu Cultural La Manzorga, Caamaño va facer lo propio esta tarde en Corvera nun actu previstu pa les 18 hores na sala d’arte del Centru Sociocultural de Les Vegues con motivu del Antroxu. Xunto col direutor d’escena van tar presentes César Santiago, de la editorial La Cruz de Grau; y Rafael Rodríguez Valdés, responsable del Serviciu de Normalización Llingüística de Corvera. Fonte: Asturies.com
.jpg)
