Con unes poques hores de distancia -si ye que’l tiempu y la distancia puen mezclase- fallecieron dos escritores famosos, con llibru d’ésitu, pero mui estremaos en cuantes a lo que fue la so vida.
La primera en facer “mutis” pol foru fue la mio almirada Harper Lee, autora d’una gran novela que dio pasu a una, tamién, gran película. Porque “Matar a un ruiseñor” ye una espléndida novela, ganadora nel so día (un día mui llonxanu) del premiu Pulitzer y que dio fama inmediata a la so autora. Pero la señora Lee, asustada de les campañes mediátiques montaes al rodiu d’ella, decidió separtase del mundanal ruiu pa recluise nel so ranchu d’Alabama onde vivió, hasta la so recinte muerte sin conceder entrevistes.
Anque nun pudo evitar que’l so nome siguiere sonando, nun sólo pola novela y el premiu, sinón pola guapísima película que Robert Mulligan rodó un par d’años depués. Nun recuerdo en qué circunstancies entrugáronnme un día, nuna encuesta, cuál yera la mio película favorita, y de toles que me prestaron, que fueron munches, escoyí “Matar a un ruiseñor“. Y nun ye sólo pola grandiosa interpretación de Gregory Peck, una de les meyores que yo recuerdo, sinón porque poques veces se ve nuna película p’adultos, una visión del mundu de los neños más axustada.
El verdaderu protagonista de la novela/película nun ye l’abogáu Atticus Finch, como pudiere paecer, sinón la so fía pequeña Scout, onde Harper Lee afita perfeutamente los sos sentimientos, mieos, aventures y duldes d’una neña como fue ella mésma. El puntu de vista de l’autora ye, pues, el de la neña, nun mundu d’adultos que nun siempre entiende y nel que facese mayor paez un riesgu non demasiao petecible.
Umberto Eco
A munchos kilómetros de ralura, xeográfica y vital, muerre otru gran escritor como ye Umberto Eco.
Si pudierenescoyese dos vides más dixebraes ente dos persones, estos dos escritores seríen l’amuesa perfeuta. Si Harper Lee fue la persona silenciosa que se separtó de la lluz de los “mass media” tando nel picalín de la fama, p’abellugase nun apartáu llugar del campu, l’italianu Eco tuvo siempres baxo los focos. Fue un paisano mundial y mundanal. Catedráticu de Filosofía, espertu en Semioloxía (el llinguaxe de los signos), ensayista, novelista… fue un home de saberes múltiples y que siempres fue noticia por too ello.
Nun entiendo nada de Semioloxía y mui poco de Filosofía, polo que’l mio acercamientu a él fue a traviés de la lliteratura, sobre too de les noveles. “El nombre de la rosa” encantóme. Inclusive la primer parte, un poco erma hasta que principia l’aición, resultóme interesante. Cuando ficieron la película fui a vela con una cierta rocea, seguru de que diba a desilusioname. Tolo contrario.
Ye tamién, como nel casu de “Matar a un ruiseñor”, una maraviosa película con un Sean Connery desllumante nel papel de Guillermo de Baskerville -guiñu del autor a Sherlock Homes- y una ambientación exemplar. Ensin embargu, tolo que lleí depués d’Umberto Eco nun me dio más por ello. “El péndulo de Foucault” paecióme un peñazu y nun fui a ella, y la de “Baudolino” nun llega a les sueles a otres munches noveles de “pícaros”, incluyíes les munches del Sieglu d’Oru español.
Total, que se nos marcharon dos grandes escritores, y dos persones que fueron dafechamente distintes nel so comportamientu vital y social. Y ye que pa escribir, abasta con un papel y un llápiz o, agora, un ordenador, auquiera que t’alcuentres: solu o arrodiáu de tola xente del mundu. En fin, que la tierra-yos seya leve a los dos.
“Cuando se acercaba a los trece años, mi hermano Jem sufrió una peligrosa fractura del brazo, a la altura del codo. Cuando sanó, y sus temores de que jamás podría volver a jugar al fútbol se mitigaron, raras veces se acordaba de aquel percance.” Esti ye l’empiezu de “Matar a un ruiseñor”, de Harper Lee. In memoriam. Fonte: trabayudecampu.com
