“Vamos trabayar por un consensu políticu y social al rodiu del patrimoniu llingüísticu, non a esperar por ello”, aseguró Inaciu Iglesias tres la presentación esti martes del programa eleutoral de Foro na estaya de Cultura. La formación apunta qu’apoyará, cuando sea dean les condiciones que permitan la reforma del Estatutu, la oficialidá de les llingües d’Asturies.
En conversación con Asturies.com, el candidatu númberu 9 pela circunscripción central de la llista de Foro a la Xunta Xeneral señaló que “pa la ellaboración del programa tuviemos en cuenta’l sentir d’asociaciones, coleutivos y persones”, recopilando opiniones que “nun nos resulten ayenes, yá que conocemos bien el movimientu de reivindicación llingüística”. La formación liderada nesta eleiciones por Cristina Coto –presente’l vienres nel actu académicu del Día de les Lletres xunto col senador Isidro Martínez Oblanca y el propiu Iglesias– apostó por una postura “realista, escapando d’etiquetes”. “Queremos contruyir dende la base y de verdá, con fundamentu”, continuó’l presidente de la Comisión d’Economía de Foro, catalogando l’asturianu y el gallego-asturiano “como patrimoniu cultural d’Asturies” que se debe “promover y protexer”. La intención de Foro ye, poro, apartar la cuestión llingüística “del debate políticu partidista”.
Dientro del programa de Cultura de la formación asturiana inclúise una seición nomada ‘Patrimoniu Llingüísticu’ qu’espón que “les llingües autóctones d’Asturies constitúin una parte irrenunciable del nuesu patrimoniu cultural, un factor sustancial de la nuesa identidá como comunidá autónoma, pero tamién parte fundamental del patrimoniu común de tolos españoles, cuya preservación ye responsabilidá principal de los asturianos”. Asina, desendolca cinco puntos darréu, siendo’l primero’l compromisu de trabayar “por un consensu social y políticu ampliu na defensa de les llingües d’Asturies, respetando la llibertá y la voluntariedá del so usu ensin imposiciones pero tamién ensin impedimentos pa los ciudadanos”. “Vamos trabayar por ello, non esperar por ello”, puntualizó Iglesias, dexando nidio que la cuestión llingüística nun va ser un tema menor pa Foro.
El segundu puntu refiérse a la normalización, “facer normal l’usu del asturianu”, pa lo que Foro ve fundamental trés pegoyos: enseñanza, toponimia y medios de comunicación. El siguiente ye’l “cumplimiento de les lleis” en materia de defensa de derechos llingüisticos, “tanto de la Xunión Europea, como la Constitución y l’Estatutu”, apunta’l conceyal de la formación asturiana en Noreña, mentes que’l cuartu afonda nel desarrollu de la Llei de Promoción y Usu del Bable/Asturianu “d’una manera non restrictiva”, y nel “cumplimientu de la toponimia”, añadió.
Por último, Foro afita nel programa que “apoyarémos, cuando se dean les circunstancies polítiques y el consensu social necesariu que permitan la reforma del nuesu estatutu d’autonomía, la modificación del so artículu 4 pa incluyir la oficialidá, tal como se recueye nel artículu 3.2 de la Constitución española”. “Creyemos que ye la manera de defender el patrimoniu llingüísticu; la más sensata y razonable”, aseguró Iglesias, que calcó nel enfotu del so partíu por trabayar por esi consensu, alloñando’l “mieu a la imposición y a los costos”, dalgo que, comentó, “nun supón nenguna revolución” na postura de Foro.
Patrimoniu históricu
L’ex conseyeru d’Educación, Cultura y Deporte, y presidente de la Comisión de Cultura de Foro, Emilio Marcos Vallaure, afirmó esta mañana na presentación a los medios del programa que “la democracia nun llegó al nuesu patrimoniu histórico, al menos na mesma midida que n’otres comunidaes españoles y europees”. P’avalar esta afirmación refirióse a “la ruina y abandonu d’importantes monumentos asturianos, cuenten o non cola declaración de Bien d’Interés Cultural, como ye’l casu de los monasterios de San Antolín de Bedón, Curniana, Oubona y Vilanova d’Ozcos, o de munchos de los palacios de los sieglos XVI al XVIII qu’enguapece’l nuesu paisaxe, asina como la problemática qu’arrodia a les nueses construcciones etnográfiques más singulares, como los horros, cabazos y teitos”. “Debemos reflexonar, ensin falses propagandes y sectarismu, cómo se llegó a esta situación y tratar de camudala, si queremos que les actuaciones en materies como’l turismu y la educación nun se vean seriamente comprometíes”, añadió.
La necesidá d’inversiones ye pa Foro más importante que declarar el prerrománicu o’l Camín de Santiago como Patrimoniu de la Humanidá, afitando como una prioridá pa la formación “la defensa del patrimoniu monumental y cultural d’Asturies, que ye posible con instituciones culturales potentes, despolitizaes na so xestión, que non nel so control, qu’investiguen y difundan el so conocimientu, yá que sólo se conserva lo que se conoz y, por consiguiente, somos quien a valorar”, espresó Vallaure. Por último, apuntó como “imprescindible” pa esa defensa “la participación de la sociedá civil y les sos iniciatives, que deben ser apoyaes polos representantes políticos con lleis y ayudes afayadices”.
Na semeya, Iglesias, nel centru, nel actu académicu del XXXVI Día de les Lletres Asturianes xunto a Coto y Borja Fernández, candidatu de Foro a l'alcaldía de La Ribera. Detrás, d'izquierda a derecha, Martínez Oblanca, Xabel Hevia y Xuan Pandiella.
Fonte: Asturies.com
Enmiendes de Foro al PXE