Mercedes Fernández confirma que va llevar a los tribunales el plan pa facer l’asturianu vehicular en Primaria

. Mercedes Fernández acusa al Gobiernu d’incumplir la llei col plan pa facer l’asturianu llingua vehicular

• . Pal PP la llingua asturiana ye dalgo de “sectores radicales que quieren coses que nun quieren los asturianos”
• . Educación espubliza les instrucciones pal desarrollu del plan esperimental pa facer l’asturianu llingua vehicular

Mercedes Fernández nel Comité Autonómicu del PP

30 Xunu, 2017 por Pablo R. Guardado

 “Nun ye llegal”, señaló Mercedes Fernández énte’l comité executivu del Partido Popular (PP) asturianu al referise al Plan Pilotu esperimental de Promoción del Usu del Asturianu que va ponese en marcha’l cursu viniente en seis centros de Primaria. La presidenta del partíu confirmó que va recurrilu nos tribunales.

 El 13 d’esti mes espublizáronse nel BOPA les instrucciones pa desarrollu de dichu plan, que finalmente queda bien curtiu al llendase namái a cuartu de Primaria y a una hora selmanal nuna de les árees siguientes: Ciencies Sociales, Ciencies Naturales, Educación Artística o Educación Física. La participación pa los escolinos y escolines ye voluntaria.

 El PP, dende que’l conseyeru d’Educación y Cultura dio anuncia d’esta iniciativa, vien posicionándose en contra, apuntando a una supuesta illegalidá al ser el castellanu la única llingua oficial n’Asturies. Inclusive, Fernández acusó al presidente Javier Fernández de dir “pela puerta d’atrás a una cooficialidá que nun esiste n’Asturies, que nun afita l’Estatutu, polo que nun se pue convertir l’asturianu en llingua vehicular; lo que nun ye llegal nun se pue elixir; lo que contravién al Estatutu no se pue someter a eleición”.

 Ayeri, na so intervención énte’l comité del so partíu, la presidenta del PP d’Asturies confirmó qu’interpondrá un recursu énte los tribunales pa tratar de valtar el plan pilotu esperimental.                                                                                                                         Fonte: asturies.com

Javier Fernández entiende que cola so postura contra l’asturianu’l PP quier disputar "la derecha montuna” a Foro

El Presidente asturianu Javier Fernández

 “Voi dici-y una cosa. Va prestame muncho velo”, respondió’l presidente nun asturianu perfeutu a la popular Mercedes Fernández, qu’enantes dixera que nunca sintiera al socialista “decir ni un 'ye'”. El PP siguió na Xunta Xeneral col so ataque al plan esperimental pa facer l’idioma vehicular en Primaria.

 Na ronda d’entrugues al presidente del país, Mercedes Fernández preguntó a Javier Fernández si-y paecía afayadizu que los escolinos y escolines de cuartu de Primaria recibieren Ciencies Sociales “en bable”, a lo que Javier Fernández respondió-y que “sí”. La vocera popular espetó-y que “no le está sentando bien Madrid; desde que se fue a Madrid hace y dice cosas que antes ni decía ni hacía”, y  insistió nos mesmos argumentos d’una supuesta illegalidá de la midida “impropia de un Gobierno”.

 D’igual forma, acusó al líder socialista de “buscar un atajo con el señor Llamazares” pa facer cooficial l’idioma y recordó-y que “nunca le escuché decir ni un ‘ye’”. Javier Fernández, pela so parte, apuntó-y que se trata de “un plan esperimental, esto es, voluntario” y acusó al PP de persiguir la llingua asturiana.

 “Si usted hace suposiciones, yo también puedo suponer, y tal vez esa persecución a la lengua asturiana es para disputar a Foro la derecha montuna, preparándose para una batalla para ocupar ese espacio. Voi dici-y una cosa. Va prestame muncho velo”, finó’l presidente del país.                                                                                     Fonte: asturies.com

Una "inquieta" Mercedes Fernández afirma que "nun se podrá facer la especialidá ensin cooficialidá"...

...y Javier Fernández respuende-y que "el so oxetivu ye confundir"

Mercedes Fernández y Javier Fernández

   La presidenta del PP d'Asturies entrugó al presidente pola so postura sobre la cooficialidá y afirmó que "nun se podrá crear la especialidá" ensin declarala. Acusó a "los comunistes" de querer introducila "ensin tener los votos pa ello".

  Na sesión plenaria d'esta mañana na Xunta Xeneral, Mercedes Fernández treslladó al presidente del país si "la promoción de la cooficialidá llingüística ye una prioridá", esixendo una "respuesta diáfana" al respeuto. Javier Fernández reseñó'l so discursu d'investidura, "onde nun taba la cooficialidá".

  Tres esta rápida respuesta, Mercedes Fernández entamó una intervención con descalificaciones y continues referencies a "los comunistes" cuando falaba de los diputaos d'Izquierda Xunida, qu'al terminar les intervenciones sacaron unos cartelos nos que se lleía 'Dexáinos emplegar la llingua asturiana", siendo reprendíos pol presidente de la Xunta Xeneral, Pedro Sanjurjo. N'Asturies.com facemos una esbilla de les frases más llamatives:

• "Agradezo la concreición na so respuesta. Hai acontecimientos y compromisos del so Gobiernu inquietantes".
• "El conseyeru na materia fixo declaraciones nos qu'apuntaba que la cooficialidá yera un oxetivu en sí mesmu".
• "Los sos socios de gobiernu, los comunistes, trataron d'introducir la cooficialidá pela puerta d'atrás. Pretenden modificar l'Estatutu d'Autonomía ensin tener los votos".
• "La vocera comunista nun viviera n'Asturies d'aquella, por eso quiciabes cuesta-y dicir frases n'asturianu/bable, cuando Xuan Xosé Sánchez Vicente puxó pol compromisu reglamentariu del artículu 4 del Estatutu d'Autonomía  nel Gobiernun nun taben nin los socialistes nin los comunistes, sinón el PP".
• "El PP ye contrariu abiertamente, ensin paliativos, a la cooficialidá".
• "Pa qu'haya especialidá tien qu'haber cooficialidá. Nun sé podrá facer la especialidá".
• "Toi inquieta cola idea que tienen de convertir l'asturianu en llingua vehicular. Nun tien amparu llegal nengún. Defendemos les costumes, pero siempre dientro l'amparu llegal. Los consensos son pa otra cosa, non pa eludir los que diz el reglamentu de la Xunta Xeneral o lo que diz l'Estatutu".
• "L'únicu amparu llegal —en referencia a la Llei d'Usu— nun lo fixeron nin los comunistes nin los socialistes. Y el voceru de Ciudadanos d'aquella debía tar nel PSOE".Fonte: asturies.com

"Esti ataque supón un saltu cualitativu del nivel de represión que solemos tener", asegura Pulgar

La Xunta pola Defensa de la Llingua convoca una concentración el xueves 25

El vetu al asturianu na Xunta Xeneral lleva a la XDLA a movilizase al suponer "un saltu cualitativu del nivel de represión que solemos tener". Esti miércoles entamó una protesta convocada d'urxencia frente al Parllamentu, nel que tornó a apaecer la Pita, p'anunciar una concentración 'Pola digninidá del asturianu' pal xueves 25.

"Siempre la reservamos pa los momentos más indicaos", apunta Carlos Pulgar, voceru de la Xunta pola Defensa de la Llingua Asturiana (XDLA). Y ye que la situación lo merez: "Esti ataque supón un saltu cualitativu del nivel de represión que solemos tener", afirma.

"Ye dalgo surrealista. La propia llei recueye'l derechu a emplegar l'asturianu a tolos ciudadanos, y los diputaos y trabayadores de la Xunta Xeneral tamién son ciudadanos", añade Pulgar, qu'apunta a la oficialidá como la única manera de salvar esta situación.

Sobre'l polémicu tweet de Mercedes Fernández, el voceru de la XDLA apunta que la presidenta del PP n'Asturies "quitóse la careta. Yá conocemos bien la so postura dende los años 90. Diz que nun hai conflictu llingüísticu, pero cuando s'usa l'asturianu con normalidá apaecen los pantasmes del pasáu".

El xestu de Fernández

Entrugáu si la parte positiva d'esta polémica torna a ser la importante reación social, Pulgar asiente. "Tuvo repercusión dientro del movimientu de reivindicación llingüística y tamién fuera d'él. La xente respondió ante esti ataque brutal. La cuestión yá entra nel terrén del respetu a los demás".

El voceru de la XDLA atendió a Asturies.com tres una convocatoria urxente p'anunciar la concentración prevista pal xueves 25 a les 17 hores frente a la Xunta Xeneral baxo'l lema 'Pola dignidá del asturianu'. Dellos militantes, acompañaos pola Pita, mostraron una pancarta y glayaron 'oficialidá' nel momentu nel que, por coincidencia, salía del edificiu Fernández, que respondió con un xestu de 'non' cola mano enantes de xubir a un coche.

Fonte: asturies.com

Iniciativa pol Asturianu felicita a les fuercies polítiques asturianes y llamenta la decisión del PP de votar en contra del reconocimientu del profesoráu d'asturianu

El PP llevaba nel so programa de 2012 el reconocimentu del profesoráu d’asturianu contra’l que votó güei.

Dende Iniciativa pol Asturianu queremos felicitar a Izquierda Xunida pola so propuesta votada güei na Xunta Xeneral col envís de que se reconoza la especialidá docente de Llingua Asturiana, decisión que ta pendiente de l'aprobación del Ministeriu d'Educación y que yá cuntó col sofitu de toles fuercies n'otres ocasiones y apocayá, cola petición esplícita del Conseyu Escolar Estatal.

Queremos felicitar tamién a la FSA-PSOE, Foru Asturies y UPyD pol so sofitu a esta propuesta que busca normalizar la situación del profesoráu d'asturianu, que lleva trenta años d'interinidá por mor de la falta d'un reconocimientu llegal a l'asignatura, cuestión que dexa afitada la nueva llei educativa y que namás precisa de la reconocencia de la especialidá per parte del Ministeriu d'Educación, pa permitir que los profesores d'asturianu tean les mesmes condiciones y obligación de pasar per una oposición, como'l restu de les especialidaes docentes. 

Ye un bon momentu pa recordar al Partíu Popular d'Asturies llevaba nel so programa electoral de 2012, últimos comicios autonómicos celebraos n'Asturies, un apartáu dedicáu al enseñu del asturianu, onde dicía especificamente "Reconoceremos la especialidad de asturiano para el profesorado" (páx. 68 http://es.slideshare.net/mer…/programa-electoral-pp-asturias)

 Entrugámonos si Mercedes Fernández piensa cumplir esti programa reclamando al Ministeriu dirixíu pol so partíu esta reconocencia que ta agora nes sos manes o si va siguir tomando decisiones como la d’esta mañana, n’absoluta contradición colo prometío a los sos votantes                                                                                                                       Fonte: Infoasturies

Iniciativa denuncia que PSOE y PP pauten una llei nueva de RTPA "que va dexar fuera l'usu del asturianu"

Na semeya, los líderes del PP

d'Asturies y de la FSA-PSOE, Mercedes Fernández y Javier Fernández, de manera respeutiva

   Los votos de la FSA-PSOE y del PP van llevar alantre la llei de reforma del sector públicu que va regular la RTPA. Iniciativa pol Asturianu denuncia qu’esta norma “va dexar fuera l’usu del asturianu” y pide una rectificación.

   La organización que trabaya pola normalización del idioma amuesa nun comunicáu’l so descontentu pola nula presencia de la promoción del asturianu na nueva llei de la RTPA, que va  aprobase en comisión de la Xunta Xeneral esti llunes que vien. La llei nun sigue, al nuesu xuiciu l’espíritu del artículu cuartu del Estatutu d’Autonomía d’Asturies, onde s’especifica que ‘va promovese la difusión del asturianu nos medios de comunicación’, asina como la Llei d’Usu del Asturianu de 1998, que nel artículu 13 ye mui clara: ‘El Principáu d'Asturies va contribuir a la difusión nos medios de comunicación del asturianu’”. Por contra, felicita a Foro y Izquierda Xunida poles enmiendes presentaes, que sí demanden un espaciu pa la llingua asturiana na televisión pública que contribuyiría a la creación d’una industria audiovisual nel país.

   Los responsables d’esti coleutivu caltuvieron nes selmanes últimes conceyos con formaciones polítiques “buscando un cambiu nesti proyectu de llei que podría suponer un importante pasu alantre pa la llingua asturiana”. Pese a que nun s’esperen cambios significativos, Iniciativa pol Asturiana espera que FSA-PSOE y PP “entren en razón y camuden el testu pa permitir que la RTPA seya una ferramienta útil pa la difusión de la llingua asturiana, lo que ye de sentíu común, y ta acordies colos resultaos de les audiencies, que dan un mayor ésitu a los programes emitíos n’asturianu na canal”.                                   Fonte: Asturies.com