'Naguamos pe la anistía, llibertaes y autonomía', 40 años de la primer manifestación asturianista

 Tuvo llugar en Xixón el 22 de xunu del 1976 entamada por Conceyu Bable baxo'l lema'Bable a la escuela y autonomía rexonal'. Salió del paséu de Begoña y axuntó a miles de persones (6.000 según 'Triunfo') pese al agua que cayó al iniciu de la marcha.

 La revista semanal 'Triunfo', una referencia nel campu políticu y cultural de la prensa española de la dómina, recoyía una crónica de la mesma na que dicía que "la organización corrió a cargu del grupu Conceyu Bable y a ella asociáronse una serie d'entidaes cíviques –sobre manera les Asociaciones de Vecinos dePumarín, Roces, La Calzada y Nuevu Xixón–, asina como Coordinación Democrática Asturiana y otros grupos políticos non encuadraos nella". La Coordinación Democrática yera'l principal grupu de la oposición democrática na que s'integrabenPSOE, PCE, PSP, CCOO o MC, ente otros munchos grupos.

 El testu recuerda que'l Gobiernu Civil tardó en dar el permisu a la manifestación, que foi la primera llegal que se celebró n'Asturies tres de la muerte del dictador, pero que finalmente aplicó "el decretu nuevu sobre derechu de reunión".

 "La xente comenzó a concentrase nel paséu de Begoña hacia les siete y media de la tarde. Munches banderes azules d'Asturies, mil banderines, más de cuarenta pancartes qu'espresaben les reivindicaciones básiques ('Naguamos pe la anistía, llibertaes y autonomía'), y les específiques del problema llingüísticu y los barrios ('Falái bable', 'Apautámonos co la cultura rexonal, pero nun hay escueles'). Otres referíense a la situación socioeconómica de les materies primes: 'El petróleu de Ribasella, d'Asturies autónoma'", rellataba la crónica.

 L'Asturies Patria Querida, que l'autor defín como l'himnu tanto de los borrachos como de los fuelguistes, y los glayíos de 'Autonomía' y 'Puxa Asturies' foron la banda sonora de la marcha, que percorrió la cai Corrida en direición a la Plaza Mayor. Nella lleóse un escritu nel que se demandaba la necesidá de "devolver la llingua asturiana al pueblu", asina como'l control de los recursos económicos asturianos y a la llibertá d'aición de les asociaciones cíviques nun momentu nel que la de La Calzada taba zarrada por orde gubernativa.

 La marcha disolvióse ente glayíos de 'Anistia' y 'Puxa Asturies Llibre'.    Fonte: Asturies.com

García Arias repasa esti vienres en La Llegra 40 años de reivindicación llingüística n'Asturies

Esti vienres a les 19:30 nel Llar La Llegra (Cai El Postigu Baxu 40, Uviéu)

   Charra a cargu de Xosé Lluís García Arias, caderalgu de Dialeutoloxía na Universidá d'Uviéu, primer presidente de Conceyu Bable y de l'Academia de la Llingua Asturiana dende la so creación, en 1981, a 2001 y máxima figura de la filoloxía asturiana.

   Un repás a la historia del movimientu de reivindicación llingüísticu n'Asturies dende la creación de Conceyu Bable, organización qu'entamó hai xusto 40 años, hasta anguaño. Llogros algamaos, perspeutives y retos pal patrimoniu llingüísticu del país.                Fonte: Infoasturies.net

40 años de Conceyu Bable

Esti pasáu mes de payares cumpliéronse cuarenta años del entamu del movimientu de reivindicación llingüística modernu. El ñacimientu de Conceyu Bable en 1974 supunxo un cambiu importante na forma d’entender lo que ye la llingua asturiana, pasando de ser un elementu cásique namás folclóricu, a ser una seña d’identidá, una ferramienta pa espresase en tolos ámbitos de la vida, una llingua más y al mesmu tiempu la nuesa llingua, l’elementu más importante del nuesu patrimoniu cultural inmanterial.

Güei, 40 años más tarde, munchos de los oxetivos siguen vixentes y pendientes. Anque se dieren pasos importantes na presencia del asturianu en dellos ámbitos como la educación, la lliteratura, la música y los medios de comunicación, y tenemos de tar arguyosos por ello, entá queda muncho por facer.

D’estos cuarenta años deprendimos muncho. Avanzóse abondo, pero sabemos que nun ye suficiente pa salvar al asturianu. Esi sedrá’l camín pa les próximes décades y nesi camín vamos siguir trabayando na herencia de Conceyu Bable y de les organizaciones que-y siguieron y que mos traxeron al puntu nel que tamos anguaño, unos pasos más alantre nel llabor de caltener y recuperar la llingua asturiana.

Ye bono facer alcordanza y facer un posa nel camín pa reflexonar sobre’l tiempu pasáu, pero namás pa garrar puxu y siguir alantre con más ganes y con una mayor implicación de toes y toos nesti procesu, nel que más que nunca, precisamos de munches manes trabayando en tantes estayes pendientes a les que llevar la normalidá pal usu del asturianu.

Fonte: Iniciativa pol asturianu

La política llingüística y la construcción frustrada del nacionalismu asturianu

“Faer Asturies. La política llingüística y la construcción frustrada del nacionalismu asturianu (1974-1999)” ye una obra de Patrick W. Zimmerman con versión asturiana de Cesáreo García Fernández. Asoléyala la editorial Trabe na so colección d’ensayu Batura. Nel llibru Patrick Zimmermam pon la mirada oxetiva y distanciada de quien nun ye del nuesu llar, con lucidez y, al tiempu, empatía, y fai un estudiu eshaustivu del movimientu asturianista, dende los tiempos de la nacencia de Conceyu Bable –y el so antecedente, l’asociación Amigos del Bable– allá pel añu 1974 hasta l’acabu del sieglu xx.

Tres más de trenta años d’esporpolle, l’asturianismu cultural, que dio más tarde, o quixo dar, en ser políticu, tien lluces y sombres en sí mesmu y en rellación colos partíos mayoritarios d’Asturies, que fueron quien a emburriar esti movimientu a la marxinalidá.

Nel terrén políticu, l’asturianismu tuvo ciertu puxu allá pelos años noventa del sieglu pasáu, de la que foi a llevar a la Xunta Xeneral un diputáu, representante de la xuntura ente’l PAS y la UNA. L’ocasu llegó cola perda d’esti diputáu y la atomización d’un movimientu que, si bien cuenta coles simpatíes d’una parte de la sociedá asturiana, nun foi a dar el saltu definitivu que lu llantara daveres como una posibilidá real de facer política con mayúscules.

Con un trabayu de campu –documental y oral– de gran caláu, l’autor céntrase nel casu asturianu como paradigma de frustración d’un nacionalismu que nunca nun foi a guarir na sociedá asturiana, bien a la contra de lo qu’asocedió n’otres comunidaes autónomes vecines, como Galicia, Euskadi, Cataluña o mesmamente Andalucía. Esi mesmu trabayu llévalu a amosanos les contradicciones d’una corriente que nació baxo’l franquismu y que nun s’adaptó apode a la nueva realidá del Estáu de les Autonomíes y de la democracia lliberal.

Patrick Alan Zimmerman (California, 1981) ye doctor pola Universidá Carnegie Mellon de Pittsburgh; esti llibru ye’l resultáu del trabayu fechu pa la so tesis doctoral, pal que pasó dellos meses n’Asturies faciendo entrevistes ya informándose.
Fonte: asturnews