DAMIÁN BARREIRO
Faustino Zapico, miembru de la comisión permanente de Suatea, esplica que l'anteproyectu de la LOMCE supón un recorte de competencies al pasar les autonomíes que nun tienen llingua oficial, como Asturies, de determinar el 35% del curriculu al 25%. «Dientro d'esi porcentaxe ye onde entra llingua asturiana. Agora, al reducise l'ámbitu competencial asturianu hai otres asignatures dagnificaes, polo que va haber tortazos pa poder entrar nesi cupu», esplica Zapico, qu'añade que la reforma de Wert va tener consecuencies males pal asturianu y la precariedá va acentuase tovía más, «pero que sían males o horribles va depender de la voluntá del Gobiernu asturianu y al ver a quien tenemos de presidente podemos temenos lo peor».
Y ye que na Llei de Meyora de la Calidá Educativa (LOMCE), qu'impulsa'l ministru d'Educación y Cultura, José Ignacio Wert, el Gobiernu central aumenta la so capacidá de decisión sobre los conteníos comunes de les asignatures. D'esta forma, esa capacidá medra’l 65 per cientu nes comunidaes con llingua cooficial y al 75 per cientu nel restu d'autonomíes. Asina, toles autonomíes pierden diez puntos y les que nun tienen una llingua oficial –como Asturies- queden col control del 25% del conteníu.
El miembru de Suatea esplica que l'ámbitu competencial de cada comunidá pue determinar qu'en vez de dos hores de tecnoloxía sían tres o establecer qu'hai qu'ufrir determinaes optatives, mentes qu'en delles comunidaes punxeron l'enfotu en que los alumnos conozan el territoriu onde viven. Asina, Zapico esplica que falar de 17 sistemes educativos distintos ye falsu dafechu: «El modelu ye igual en toles autonomíes con diferencies mínimes». Otra manera, diz qu'agora l'asturianu yá tien que competir con otres optatives y hai centros que faen una política empobinada a que los guah.es nun escueyan asturianu pa favorecer otres asignatures o, mesmamente, por una cuestión ideolóxica, «una situación que va multiplicase cola aprobación de la Llei de Wert».
Zapico esplica que la solución sería declarar la oficialidá y, nel casu de querer avanzar ensin esi marcu llegal, afitar de dalguna manera que la lligua quedara como ta, al reducir la optatividá y facer qu'otres asignatures queden barríes, «pero col Gobiernu que tenemos esto nun va pasar y la llingua asturiana va ser la que tenga que pagar los platos rotos». Asina, afirma que dende'l so sindicatu tán recibiendo notificaciones de que nun se cumple la Llei d'Usu y que nun se ta respetando la ratio, «colo qu'en poco tiempu vamos principiar con acciones llegales, sobre too respecto a la circular d'iniciu de cursu que determinaba un cupu mínimu d'ocho guah.es pa formar un grupu nes optatives, lo qu'incumple una sentencia que diz qu'en llingua asturiana esto nun se pue facer».
Fonte: Les Noticies
