IX entrugará na Xunta Xeneral sobre l'enseñu del asturianu nel IES de Sotrondiu y la reconocencia de la especialidá

El grupu parllamentariu d'IX na Xunta Xeneral va preguntar sesta selmana nel plenu de la Xunta sobre la situación de la enseñanza del asturianu nel IES de Sotrondio y la reconocencia de la especialidá d'asturianu. Na vez d'interpelaciones Vázquez va realizar una interpelación a la Conseyera d'Educación y Cultura sobre la reconocencia de la especialidá de la llingua asturiana pal profesoráu d'educación non universitaria pa que les places de profesores puedan ser convocaes por aciu oposición y estos nun tengan qu'aportar a un emplegu estable al traviés de places d'otres especialidaes, a lo qu'esti Gobiernu manifestó ser favoratible. Fonte: Asturnews

SUATEA llogra l'aprobación nel Conseyu Escolar Estatal de la especialidá en Llingua Asturiana

Tres l'aconceyamientu d'esti martes.

Esti martes axuntóse'l Conseyu Escolar del Estáu y fueron aprobaes una serie d'enmiendes y meyores al documentu presentaes por Stes-intersindical. Fueron defendíes por Beatriz Quirós, conseyera y miembru de SUATEA consiguiendo l'aceptación per parte del plenu de dalgunes qu'afecten directamente al sistema educativu asturianu. Ye'l casu del encamientu que se fai al Ministeriu d'Educación pidiendo la inmediata creación de la especialidá de Llingua Asturiana, pa poner en pie d'igualdá al alumnáu asturiano y al profesoráu qu'imparte Llingua Asturiana y Gallego-asturianu nel so ámbitu col  restu de llingües propies o oficiales del Estáu. Esta propuesta foi aceptada por 34 votos a favor, 26 en contra y 6 astenciones.

Otra de les propuestes aceptaes tien que ver cola necesidá d'enllantar nel  ámbitu educativu un plan de choque contra la violencia de xéneru, faciendo dende'l Ministeriu d'Educación un esfuerzu presupuestariu pa desenvolver programes de coeducación nos centros, según la puesta en marcha nes distintes alministraciones educatives de formación específica, tantu inicial como permanente pa tol profesoráu en relación cola prevención de la violencia contra les muyeres. Esta propuesta foi aceptada por 42 votos a favor, 20 en contra y 7 astenciones.

Dende SUATEA cellebren l'ésitu de les propuestes y asperen que'l Ministeriu d'Educación fáigase ecu d'elles y comprométase na so aplicación.

Fonte: Infoasturies

Andecha lleva al congresu la oficialidá y la especialidá d'asturianu

Rafael Larreina Andecha Astur vieno acabante d'anunciar que pon enrriba la mesa del alderique políticu la especialidá d'asturianu y entruga pala Oficialidá, al presentar al traviés d'Amaiur nel Congresu de los Diputaos varies entrugues dirixíes al Gobiernu español pa conocer cuala ye la situación rial, asina comu I'actitú del mesmu respeutu a la Oficialidá de la llingua asturiana. Énte la precariedá Ilaboral de los ensiñantes d'asturianu, xunto cola hipócrita actitú de la Consevera d'Educación Cultura VyDeporte del "Principado", que lleva años ensin facer un res pola normalización del asturianu y la dignificación de la nuesa Ilingua nel sistema educativu, afirmando que diba pidir de nueu al Ministeriu d'Educación español la especialidá docente de Llingua Asturiana, Rafael Larreina, diputáu d'Amaiur nel Grupu Mistu y compañeru de la coallición Los Pueblos Deciden pa les prósimes elleiciones europees, de la qu'Andecha Astur forma parte, presentó en nome d'Andecha Astur delles entrugues al Gobiernu español pa confirmar la veracidá de tales afirmaciones y pa conocer cómo ve'l futuru que-y espera a dicha especialidá mentantu la Ilingua asturiana continúe ensin ser oficial. Concretamente les entrugues rializaes fueron: ¿Ha recibido el Ministerio de Educación, en el pasado o en la actualidad, alguna solicitud por parte del gobierno del "Principado" para que se reconozca la especialidad de asturiano? ¿Considera el Gobierno que la anormal situación de no oficialidad de la lengua asturiana puede impedir o dificultar el reconocimiento de dicha especialidad? Asina mesmo y respeutu a I'anormal situación que carecemos n'Asturies ensin la reconocencia d'Oficialidá pa la Ilingua asturiana fexo esta otra entruga: ¿Hay algún obstáculo por parte del Gobierno para que la Llingua Asturiana sea oficial en el"Principado"? P'Andecha Astur ye nidio que les pallabres de la consevera, Ana González Rodríguez, merecen la mesma credibilidá que les del restu del gobiernu del "Principado" y que "responsabilízala tantu a ella comu al so gobiernu de calterner una situación antidemocrática de represión Ilingüística que pretenden amarutar con pallabres vacíes y xestos gratuitos qu'a la fin nun tienen otru aquelli que'l distraver I'atención de la sociedá asturiana faciendo ver que fain daqué metantu continúen col esaniciu de la Ilingua y la cultura d'Asturies. Fonte: Asturnews

SUATEA critica la hipocresía de la Conseyería d’Educación

L’anuncia de que va solicitar al Ministeriu d’Educación la especialidá docente de Llingua Asturiana contrasta col so maltratu permanente a la materia L’anuncia de la Conseyería d'Educación de que va solicitar al Ministeriu d’Educación la especialidá docente de Llingua Asturiana contrasta col so maltratu permanente a la materia na opinión de SUATEA qu'esta selmana asoleyaba un duru comunicáu criticando l'anuncia: "Tando acabante d’anunciar que ta iguando la documentación pa solicita-y al Ministeriu d’Educación y Cultura el reconocimientu de la especialidá docente de Llingua Asturiana, pervieya reivindicación dende va trenta años, tantos como hai de presencia del asturianu na enseñanza, la Conseyería y el gobiernu asturianu pretenden agora mangase la medalla de grandes defensores de la llingua del país, cuando la rialidá ye que la política de l’actual Conseyería d’Educación ye la del maltratu permanente a la materia, a quien la imparte y a quien la recibe". Pal SUATEA ye abondo "llarga la llucha que los docentes d’asturianu y gallego-asturiano lleven faciendo p’algamar un reconocimientu asemeyáu al del restu del colectivu docente, polo demás bien maltratáu por esti gobiernu. Xeneralización de les medies xornaes, horarios antipedagóxicos, males artes pa desincentivar la matriculación de los estudiantes, desamparu permanente... Bona parte d’esta situación achacábase y achácase a l’ausencia d’una especialidá docente tanto en Primaria como en Secundaria que dignificara la materia y estabilizara’l so profesoráu al traviés d’un procesu de concursu-oposición, yá que’l 95% del mesmu ye personal interín". La rialidá ye que, na opibión de SUATEA "siendo la especialidá imprescindible p’avanzar na dignificación, la Conseyería d’Educación pudo y puede facer muncho más pola escolarización de la llingua asturiana. De fechu, abulta paradóxico, por nun dicir hipócrita, que pretendan agora dir de defensores del idioma cuando hubo que llevalos a los tribunales pa facelos cumplir la Llei d’Usu de 1998". Ente lo que considera autobombu SUATEA, "ente tanta recatafila de coses presuntamente feches como actu de propaganda de cara a la Selmana de les Lletres d’esti añu, la Conseyería escaeció cómo’l so gobiernu ta afogando económicamente a la institución cimera de les lletres asturianes, l’Academia de la Llingua, cola falsa sida de la crisis". Dende SUATEA dicen ser conscientes de que la igua rial al problema de la llingua asturiana y del gallego-asturiano, tanto dientro como fuera de la educación, pasa inevitablemente pela so oficialidá, que, de pasu, "serviría pa cumplir el mandáu de la Constitución de 1978, o de la Carta Europea de les Llingües Minorizaes de la que’l Reinu d’España ye firmante. Mentanto, la dignificación de la llingua ha facese dando milenta pasos, de los que la especialidá ye unu d’ellos. Esti y tolos demás siguen siendo obligación de la Conseyería". Fonte: Asturnews

SUATEA desixe darréu una solución clara pa la docencia de la llingua asturiana

SUATEA desixe darréu una solución clara pa la docencia de la llingua asturiana al entender que l’alministración asturiana nun puede siguir safándose de la so responsabilidá nun problema que lleva abiertu décades. La Secretaría de Llingua asoleyó la petición güei con motivu de l’aprobación va dellos díis de la nueva llei d’educación (LOMCE), qu’implica una modificación curiosa del currículu en toles asignatures. SUATEA entiende que ye’l momentu d’iguar la situación de precariedá del enseñu de la llingua asturiana, situación que lleva décades ensin tener una solución clara que dignifique definitivamente la situación de la materia y los docentes de la mesma. Dende l’aniciu de la presencia na escuela de la llingua asturiana, yá nel cursu 1983-84, la materia pasó per dellos encaxes normativos qu’en nengún casu valieron pa da-y una presencia amañosa en condiciones de normalidá y igualdá col restu de les asignatures. Asina, pesie a toles promeses, sigue ensin haber una especialidá docente que permita un accesu a la mesma de los docentes interesaos, que son anguaño interinos nun 95% de los casos. Sigue habiendo torgues pa la xeneralización de la ufierta en tolos tramos educativos y sigue ensin ser llingua vehicular en nenguna otra materia, pesie a la demanda existente nel alumnáu y la disponibilidá de profesionales pa facela. L’aprobación de la nueva llei d’educación puede suponer una nueva agresión a les materies de llingua asturiana y de gallego-asturiano. Yá nel primer borrador de la llei la materia directamente desapaecía, y foi la presión social y la movilización de los docentes de l’asignatura y los colectivos implicaos na defensa del idioma lo que fexo que s’incluyera una modificación nel proyectu que dexaba la puerta abierta a un desendolcu normativu de la materia per parte del Principáu. Dende SUATEA dicen persaber que la única solución clara pa encaxar dafechu y dignificar la llingua asturiana y el gallego-asturiano nel sistema educativu ye la oficialidá, qu’esti sindicatu vien reclamando dende la so fundación. Pero tamién sabemos que, énte l’ausencia absoluta de voluntá política per parte del gobiernu asturianu pa iguar esta situación, ye necesaria la presión social pa que la contrarreforma educativa del gobiernu central nun implique un deterioru tovía mayor de les condiciones nes que s’imparte l’asignatura. Por too ello, SUATEA desixe que la obligada redefinición del currículu asturianu a consecuencia de l’aprobación de la nueva llei d’educación traiga una nueva situación pa la llingua asturiana y el gallego-asturiano onde: -Se críe definitivamente la especialidá docente, s’incluya na plantiya ordinaria y salgan les places a concursu-oposición. -Se garantice la dotación horaria amañosa de l’asignatura en tolos niveles. -Se xeneralice la ufierta en tolos tramos educativos, dende educación infantil al bachilleratu. -Se dea la posibilidá d’escoyer la llingua asturiana y el gallego-asturiano como llingües vehiculares d’otres materies. P’acabar, SUATEA quier sorrayar que la igua d’esta inxusticia histórica ye responsabilidá esclusiva de l’alministración asturiana, y que polo tanto ye a esta a quien-y toca mover ficha pa solucionar un problema que tenía que tar iguáu cuantayá. Fonte: Asturnews

Ábrese'l plazu pa preinscribise nel máster de profesoráu qu'inclúi la especialidá de llingua asturiana

Ábrese'l plazu pa preinscribise nel máster de profesoráu qu'inclúi la especialidá de llingua asturiana

Esti xueves 18 d'abril la Universidá d'Uviéu abre'l plazu pa preinscribise nel Máster de Profesoráu pa secundaria, bachilleratu y FP. Nel mesmu pue acceder cualerquier persona que tengan un títulu universitariu oficial de graduáu o llicenciáu. Amás, ha demostrase dominiu d'una llingua estranxera nel nivel B1 del Marcu Común Européu de Referencia de les Llingües. Nel casu de que'l títulu nun se correspuenda cola especialidá deseada, l'estudiante tendrá de superar una prueba d'accesu al Máster o acreditar superar 60 creitos de conteníos propios de la especialidá a la que quier aportase. La especialidá d'asturianu convócase esti añu con cinco places.

El Máster va impartise nel cursu 2013-2014, n'horariu de tarde, incluyendo práctiques n'institutos nes mañanes del segundu semestre, en 2014. Ente los profesores de les asignatures de la especialidá d'asturianu tán Ramón d'Andrés y Xosé Antón González Riaño.

El Máster capacita y da cumplimientu a lo establecío na Llei Orgánica 2/2006, de 3 de mayu, d'Educación (APONDERE) qu'esixe, pa impartir la enseñanza nos niveles y etapes d'educación secundaria, amás de la titulación de Llicenciáu, Inxenieru o Arquiteutu o títulu de grau equivalente, la formación pedagóxica y didáctica de nivel de posgráu.

Esti máster constitúi un requisitu pal accesu a la función docente nos niveles de secundaria obligatoria, bachilleratu y formación profesional. Asina, la realización d'esti Máster ye la vía única p'aportar a ser profesor de secundaria y de bachilleratu tantu en centros públicos como privaos.

El plazu de la preinscripción tará abiertu hasta'l 14 de xunu.

Más información: Información completa del máster

Fonte: Asturnews

La Conseyera confirma a los docentes la so intención de dexar la materia “polo menos como taba hasta agora”

Pablo R. Guardado

Ana González nun tien en mente dar pasos alantre no que respeuta a la situación de la Llingua Asturiana na educación. Na reunión colos docentes confirmó que la so intención ye dexar l’asignatura “polo menos como taba hasta agora”.

“Bones pallabres”, pero nengún compromisu. Asina resumió l’Asamblea de Docentes d’Asturianu l’alcuentru que tuvo esta mañana cola conseyera d’Educación, Cultura y Deporte. Los maestros treslladaron-y un documentu colos sos pidimientos y espusieron-y los sos argumentos, tomando González nota “de tolo que-y diximos”. La conseyera reconoció que col tercer anteproyeutu de la Llei Orgánica pa la Meyora de la Calidá Educativa (LOMCE) la responsabilidá sobre la situación de l’asignatura de Llingua Asturiana y Gallego-asturiano cayía sobre’l Gobiernu del país y que la falta d’oficialidá foi la razón de que se llegara a esta situación, pero refugó en too momentu dar el pasu de dar reconocencia oficial al idioma y señaló que la so intención ye dexar la materia “polo menos como taba hasta agora” y cumplir la Llei d’Usu y Promoción del Asturianu, lo que supón una contradicción, yá qu’esta norma garantiza’l derechu a escolarizar n’asturianu y dende la so aprobación, nel 1998, nengún executivu fíxola efeutiva. Nun paez que la FSA-PSOE cambie agora de criteriu y dea esi pasu.

González reiteróse nel so compromisu de sacar alantre la especialidá d’asturianu nesta llexislatura, pero nun concretó nada n’asuntos como la situación del idioma n’Infantil, l’usu del asturianu como llingua vehicular o la presencia na PAU, ente otros. “Mos dixo que nun esperáremos ‘una revolución’” cola situación de la Llingua Asturiana y el Gallego-asturiano nel sistema educativu, “cosa que seguramente nengún de nós fai, polo que va ser la nuestra capacidá de presión y movilización la que sirva pa obligar a l’Alministración a mover ficha nesti tema, como en tantos otros”, aseguren dende l’Asamblea de Docentes d’Asturianu.

Na semeya, docentes y militantes del movimientu de reivindicación llingüística charren tres la concentración del xueves pasáu na Escandalera.

 Fonte: Asturies.com

IU pide al ministru d'Educación que se pronuncie sobre la demanda d'una especialidá docente de Llingua Asturiana

FAILO, LA PRIMER VEZ, N'ASTURIANU

El diputáu d'Izquierda Unida por Asturies nel Congresu, Gaspar Llamazares, presentó esti llunes cuatro preguntes a la Mesa de la Cámara, con cuenta de que'l ministru d'Educación, José Ignacio Wert, se pronuncie sobre la demanda "de prácticamente tola comunidá educativa" de qu'exista una especialidá docente de Llingua Asturiana. La primer vez na historia de la cámara, les interpelaciones redactáronse n'asturianu y en castellán.
Asina lo señala na segunda de los cuatro preguntes, na que se requier al Ministeriu sobre "la demanda de la especialidá docente d'asturianu pal profesoráu d'Educación Primaria y Secundaria de prácticamente tola comunidá educativa asturiana, del parlamentu asturianu, de la Xunta de Personal Docente Non Universitaria del Principáu, y hasta, del Conseyu Escolar del Estáu".
Llamazares tamién pregunta pol nivel de conocimientu que tien el Ministeriu d'Educación de la realidá educativa de la "Llingua Asturiana", asina como polo que "tien pensao faer, dende'l puntu de vista políticu y de regulación alministrativa, pa facer efectiva esta demanda".
A lo último, pregunta al Ministeriu si consideró les ventayes educatives, curriculares y de planificación que representa pa la educación n'Asturies la reconocencia "d'esta especialidá docente".
Antes, la pregunta del diputáu asturianu acompaña una estensa esposición, na qu'esplica que la llingua asturiana "ye un área d'enseñanza-deprendimientu curricular dafechu, contemplada na ordenación del sistema educativu n'Asturies, y que tien una implantación bien xeneralizada, pese al so calter voluntariu, nos centros públicos d'Educación Primaria y Secundaria.
Calca amás nel so "carácter regláu" nos estudios universitarios, col Minor nos graos de Filoloxía, la Mención nel Grau de Maestru en Primaria, y la Especialidá d'Asturianos nel Máster de Formación del Profesoráu de Secundaria.
Asina, señala los "graves problemes organizativos, económicos y funcionales pa la enseñanza del asturianu y una evidente desigualdá de tratu al so profesoráu que, por cuenta del so provisionalidá, nun pue exercer les sos funciones nes mesmes condiciones que'l restu de docentes d'otres especialidaes", precisamente pola ausencia de la especialidá.

Fonte: europapress n'asturianu