Podemos abre camín al plan de Genaro Alonso pa la especialidá docente

Nuna proposición non de llei, presentada esti llunes día 11, Podemos reclama que “los cuerpos de catedráticos y de profesores d’Enseñanza Secundaria puedan tener asinamesmo, a pitición de la comunidá autónoma y sigún necesidaes educatives, la especialidá propia de la llingua respeutiva”, abriendo-y camín al plan del Conseyeru d’Educación.

La diputada de Podemos Asturies Sofía Castañón y el diputáu de Podemos Aragón Jorge Luis Bail presentaron nel rexistru del Congresu una proposición non de llei, pal so debate y aprobación na Comisión d’Educación de la cámara baxa, que pide que naquelles comunidaes autónomes nes qu’esistan llingües non oficiales que gocen de proteición oficial y formen parte del currículu, los cuerpos de catedráticos y de profesores d’Enseñanza Secundaria puedan tener «asinamesmo, a pitición de la comunidá autónoma y sigún necesidaes educatives, la especialidá propia de la llingua respectiva».

La proposición prevé que «les alministraciones correspondientes van determinar l’atribución docente a les mentaes especialidaespor analoxía colo dispuesto nel real decretu pa la especialidá de llingua castellana y literatura».

La proposición non de llei presentada pola parllamentaria xixonesa y pol parllamentariu oscense tamién pide «tomar en consideración» un dictame del Conseyu Escolar del Estáu«modificando’l Real Decretu 665/2015, de 17 de xunetu, pol que se desarrollen determinaes disposiciones relativas al exerciciu de la docencia na Educación Secundaria Obligatoria, el Bachilleratu, la Formación Profesional y les enseñances de réxime especial, a la formación inicial del profesoráu y a les especialidaes de los cuerpos docentes d’Enseñanza Secundaria».

Sofía Castañón y Jorge Luis Bail consideren necesario que los poderes públicos se comprometan a garantizar la enseñanza del asturianu y del aragonés «en tolos niveles y graos nos términos qu’estipulen les determinaes lleis y disposiciones normatives autonómiques y que se garantice al profesoráu d’estes llingües los mesmos derechos que s’otorguen al d’otres llingües d’España que sí son cooficiales».

Fonte: Asturnews

Una "inquieta" Mercedes Fernández afirma que "nun se podrá facer la especialidá ensin cooficialidá"...

...y Javier Fernández respuende-y que "el so oxetivu ye confundir"

Mercedes Fernández y Javier Fernández

   La presidenta del PP d'Asturies entrugó al presidente pola so postura sobre la cooficialidá y afirmó que "nun se podrá crear la especialidá" ensin declarala. Acusó a "los comunistes" de querer introducila "ensin tener los votos pa ello".

  Na sesión plenaria d'esta mañana na Xunta Xeneral, Mercedes Fernández treslladó al presidente del país si "la promoción de la cooficialidá llingüística ye una prioridá", esixendo una "respuesta diáfana" al respeuto. Javier Fernández reseñó'l so discursu d'investidura, "onde nun taba la cooficialidá".

  Tres esta rápida respuesta, Mercedes Fernández entamó una intervención con descalificaciones y continues referencies a "los comunistes" cuando falaba de los diputaos d'Izquierda Xunida, qu'al terminar les intervenciones sacaron unos cartelos nos que se lleía 'Dexáinos emplegar la llingua asturiana", siendo reprendíos pol presidente de la Xunta Xeneral, Pedro Sanjurjo. N'Asturies.com facemos una esbilla de les frases más llamatives:

• "Agradezo la concreición na so respuesta. Hai acontecimientos y compromisos del so Gobiernu inquietantes".
• "El conseyeru na materia fixo declaraciones nos qu'apuntaba que la cooficialidá yera un oxetivu en sí mesmu".
• "Los sos socios de gobiernu, los comunistes, trataron d'introducir la cooficialidá pela puerta d'atrás. Pretenden modificar l'Estatutu d'Autonomía ensin tener los votos".
• "La vocera comunista nun viviera n'Asturies d'aquella, por eso quiciabes cuesta-y dicir frases n'asturianu/bable, cuando Xuan Xosé Sánchez Vicente puxó pol compromisu reglamentariu del artículu 4 del Estatutu d'Autonomía  nel Gobiernun nun taben nin los socialistes nin los comunistes, sinón el PP".
• "El PP ye contrariu abiertamente, ensin paliativos, a la cooficialidá".
• "Pa qu'haya especialidá tien qu'haber cooficialidá. Nun sé podrá facer la especialidá".
• "Toi inquieta cola idea que tienen de convertir l'asturianu en llingua vehicular. Nun tien amparu llegal nengún. Defendemos les costumes, pero siempre dientro l'amparu llegal. Los consensos son pa otra cosa, non pa eludir los que diz el reglamentu de la Xunta Xeneral o lo que diz l'Estatutu".
• "L'únicu amparu llegal —en referencia a la Llei d'Usu— nun lo fixeron nin los comunistes nin los socialistes. Y el voceru de Ciudadanos d'aquella debía tar nel PSOE".Fonte: asturies.com

SUATEA esixe a Javier Fernández

SUATEA esixe a Javier Fernández “terminar cola inxusticia que viven los docentes d’asturianu” El sindicatu del enseñu SUATEA emitió estos díes un comunicáu nel que trataba les cuestiones más urxentes de cara a la nueva alministración del Gobiernu d’Asturies, encabezada pol socialista Javier Fernández. Ente les cuestiones más destacaes la solución a los yá tradicionales problemes que vive l’enseñu del asturianu y gallego-asturianu nes escueles. Pal sindicatu “yá ye tiempu de facer casu a una reivindicación hestórica y terminar con una inxusticia que lleven careciendo dende va años los y les docentes qu'imparten clases de llingua asturiana y gallego-asturianu, a los que se-yos niega la posibilidá de tener una plaza fixa y a los que se conderga a la precariedá llaboral”.

SUATEA afirma qu’estos cambios un son más “qu'una cuestión de voluntá política” y recuerden qu’asina lo dexa claro “l'últimu informe, fechu pol gobiernu anterior”, nel que se conclúi que nun esisten torgues xurídiques insalvables pa la creación de la especialidá de llingua asturiana. El sindicatu recuerda qu’“el camín yá ta abondo percorríu, esisten los currículos de primaria y secundaria, esisten les titulaciones nes enseñances reglaes de la Universidá d'Uviéu, esiste profesoráu interín y funcionariu pa faese cargu de la enseñanza de la llingua asturiana cola calidá educativa que garantiza la esistencia de la especialidá”. Ye por ello que nun entienden dende SUATEA que dándose toles circunstancies entá “nun esista un ámbitu profesional nel que puedan trabayar, n'igualdá de condiciones, lo mesmo que n'otres especialidaes, la xente qu'escueye esta opción”. Per otru llau emplacen al nuevu gobiernu a que cumpla y faiga cumplir la Llei d’Usu y Promoción del Asturianu, que na so artículu 10 diz que se va garantizar la enseñanza del asturianu y del gallego-asturianu en tolos niveles y graos del sistema educativu asturianu. Pa ello píden-y “la ellaboración d'unes instrucciones, clares, d'inscripción y matriculación de la llingua asturiana pa tolos centros y niveles educativos, respetando la Llei d’Usu y aplicando, en tolos niveles, la sentencia qu'esanicia la ratio mínima na ESO pal cursu que vien”, cumpliendo la sentencia qu’eliminó apocayá’l cupu de matricules na asignatura pa que s’imparta. Fonte: Asturnews