Viñetes d'Efrén d'Andrés en Falar y Lleer, l'humor asturianu n'asturianu

Agobiu

Efrén d'Andrés 22 Payares, 2016

Agobiu  (l'aforfugu)

Fonte: asturies.com

L'aforfugu favorecíu pola presión de l'invasión anglófila favorecida pelos medios escritos, poles tv, les radios, la tecnoloxía, etc, acaba convirtiéndose L'aforfugu favorecíu pola presión y l'invasión anglófila favorecida pelos medios escritos,poles tv la tv, radios, la tecnoloxía, etc, acaba convirtiéndose en daqué realmente esmolecedor pa una bona parte de la ciudadanía, en desterciu de les llingües vernácules de cada llugar. Un bon motivu de reflexón.

Carbajal repite como ganadora del Premiu Xuan María Acebal de poesía dos años depués

Na semeya Ángeles Carbajal

• . Luis Navazo lleva’l VIII Premiu Alfonso Iglesias
• . Vanessa Gutiérrez gana’l XXII Premiu Máximo Fuertes Acevedo d’ensayu

 El poemariu ‘Un vasu d’agua’, de Ángeles Carbajal, resultó merecedor por unanimidá del XXII Premiu Xuan María Acebal de poesía qu’entrega la Conseyería d’Educación y Cultura. La escritora d’Argüeyes yá llevó esti gallardón nel 2014 con ‘L’aire ente la rama’.

 Ocho trabayos se presentaron a esta edición de los Premios Lliterarios na estaya de poesía, que cuenta con una recompensa de 3.000 euros. D’ellos, el xuráu presidíu por Fernando Padilla, direutor xeneral de Planificación Llingüística y Normalización, y integráu polos escritores Lourdes Álvarez, Antón García –ganador del añu pasáu con ‘Ferralla’–, Héctor Pérez Iglesias, Xuan Santori y Solinca Turbón, decidióse por ‘Un vasu d’agua’, “una reflexón empática, na que’l tonu unitariu, intensu y coherente de la voz poética, a lo llargu de la obra, emociona al llector”, esplicaron nel acta. La ganadora, una vegada abierta la plica, resultó ser Carbajal, que presentó’l poemariu baxo’l nomatu ‘La ponte’.

 Nacida n’Argüeyes nel 1959, ye llicenciada n’Hestoria del Arte pola Universidá d’Uviéu y collaboradora de les revistes ‘Clarín’, ‘Lliteratura’, ‘Reloj de Arena’ o ‘Anáfora’, ente más otres. Hai dos años yá llevara’l Xuan María Acebal con ‘L’aire ente la rama’, consideráu pola Tertulia Malory el meyor llibru n’asturianu editáu nel añu 2015.  Ente les sos creaciones destaquen tamién los poemarios en castellanu ‘La caligrafía de la distancia’ (1993) y ‘La sombra de otros días’ (2002), amás de la obra ‘En campu abiertu’, col qu’algamó nel 2012 el Premiu Teodoro Cuesta» de Poesía.                                                         Fonte: asturies.com

Villaviciosa crea un concursu de rellatos nel que namái se pue usar la “lengua española”

Bases I Premiu de Rellatos del Ayuntamientu Villaviciosa

  Iniciativa pol Asturianu denuncia l’incumplimientu de la Ordenanza sobre l’Usu del Asturianu de Villaviciosa nel recién creáu I Premio de Relatos Ayuntamiento de Villaviciosa. Namái se pue concursar con obres en “lengua española”, según afiten les bases.

“Supón una discriminación grave pa la llingua asturiana, asina como pa tolos escritores que la empleguen nes sos creaciones”, afirma la organización, que nun entiende “esti arrequexamientu del asturianu nel tarrén lliterariu”, polo que reclama “una modificación na convocatoria del concursu pa que puean presentase testos nos dos idiomes”. Al respueto, recuerda que la Ordenanza Municipal sobre l’Usu del Asturianu reconoz “la importancia de promocionar la llingua propia y favorecer el so usu en cualesquier estaya”.

  El primer movimientu fechu por Iniciativa pol Asturianu foi facer llegar la quexa de forma oficial al alcalde, el socialista Alejandro Vega, y a toles fuercies polítiques con representación, esperando “una respuesta positiva que camude esta situación nes próximes convocatories del premiu”.  “Ésta ye una midida de costu cero, yá que nun sunpondría añadir un mayor presupuestu al yá aplicáu. Amás, daría un importante prestixu a les obres lliteraries n’asturianu y favorecería la creación”.

  El I Premio de Relatos Ayuntamiento de Villaviciosa ta destináu a mayores de 18 años y tien una recompensa de 1.000 euros y una mazana de plata.                           Fonte: asturies.com

Asturia, País Ástur o Tierres Ástures: la xunión d'Asturies, Llión, Zamora y Miranda do Douro

El profesor Xosé Lluis García Arias propón l'adopción d'una terminoloxía común pa toos esos territorios

    El profesor, investigador y filólogu Xosé Lluis García Arias propón l'adopción d'una terminoloxía común p'Asturies, Llión, Zamora y Miranda Do Douro (Portugal), les tierres de lo que denomina'l Dominiu Llingüísticu Ástur, como primer pasu pa la forxa d'una conciencia llingüística y cultural común ente estos territorios. Dalgunes de la so propuestes son Asturia, País Ástur o Tierres Ástures.

   Arias publica un artículu sobre esta tema nel últimu númberu de revistir Lletres Asturianes, presentáu nes recién Xornaes d'Estudiu de l'Academia de la Llingua. L'autor escribió'l trabayu tres la so participación esti branu nunes xornaes sobre la llingua y la cultura mirandesa nes qu'hubo una fuerte presencia asturiana.

   Propón tamién falar de dominiu llingüísticu ástur acutando los términos asturianu, lleonés o mirandés solu pa les variantes llingüístiques de cada unu de los territorios. Tendría De dise, según Arias, «a la consecución del términu xeneral llingua ástur anque, enagora, por razones alministratives y sociales, non siempres sía posible que sustituya nel usu a los de llingua asturiana o llingua mirandesa».  Pa la creación d'una conciencia cultural y llingüística común nos mentaos territorios, l'autor entiende territorios que lo primero ye «atopar una terminoloxía mínima común nos aspeutos que los xunten como entidá coleutiva. Asina sería bonu falar de Asturia, País Ástur o de Tierres Ástures, como focu d'esa xunión qu'allampamos», añede.

   «Última hora, fadría falta llingüísticamente dir dando pasu a un nuevu conceutu de asturidad (la identidá de los pueblos ástures) que devase, ensin borrar, los conceutos más localistes d'asturianidá, lleonesidá, mirandesidá o d'asturianu, lleonés, mirandés», comenta Arias

Mayor xunión escrita
   De la mesma, sofita l'académicu impulsar «una posible mayor xunión escrita». Reconoz que nun sedría senciellu, y que «nun ye problema que pueda iguar ensin arrenunciar, adulces, a vezos bien asumíos de los falantes más conscientes». Pero, matiza, que fala «non d'entamar un tiempu ortográficu constituyente sinón de la conveniencia de dir falando, de dir averándose a la problemática d'una mayor homoxeneidá de la escritura, ensin resolver por decretu lo que nengún órganu del inesistente poder ástur podría faer. Ello ye posible porque güei atopamos muncho meyor que va unos años gracies a la mayor fondura de la nuesa conocencia del dominiu llingüísticu», comenta

  Na busca d'esta identidá común, según Arias, «fai falta dir afitándose n'aspeutos culturales que configuren tamién l'espaciu ástur». Asina, comenta que «ye perfrecuente ver nel llabor de el investigadores ayenos al país una falta d'atención a la nuesa especificidá cultural. Especialmente soi la fastera occidental del dominiu, onde davezu tracamundien lo ástur col galaicu o gallegu-portugués ensin la mínima finura intelectual de faer ver cuándo los elementos llingüísticu y cultural de dambos mundos coinciden y cuándo tienen una descripción autónoma y estremada», considera

   Propón asina «que sían munchos más los coloquios y xuniones culturales que s'entamen p'afayar les nueses converxencies escaecíes por polítiques culturales onde lo ástur quixo presentase como inesistente o como incluyíu n'otres cultures ayenes».

   Sicasí, reconoz el lingüísta que «les tierres que llamamos ástures ufierten güei en el so circunstancies toes los elementos negativu y centrífugu más acusaos que faen difícil cualquier tipu d'actuación conxunta». Ente les torgues, plantega la separación del dominiu en dos estaos distintos (España y Portugal) y en dos comunidad distintos (Asturies y Castiella y Llión), amás de «l'ausencia d'órganos alministrativos comunes», la falta de conciencia política común y curties referencies icónicas hestóriques, culturales y sociales asumíes como mesmes», la llingua falada caltenida en proporciones bien distintes», o l'ausencia d'un estándar común».                    Fonte: lavozdeasturias.es

Rafael Rodríguez Valdés pon una conferencia sobre la toponimia de Corvera

Cartelu de la conferencia

 La charra del responsable de la Casa de la Llingua lleva'l nome de 'Toponimia de Corvera: historia y patrimoniu'.

 El Club Popular de Cultura Llaranes entama esta actividá dientro de los II Encuentros de Arqueología 'Historia y Patrimonio del Alfoz de Gauzón' que se tán desendolcando dende'l día 8 nel Valey Centru Cultural de Castrillón. Na xornada de güei l'historiador Rafael Rodríguez Valdés analizó la toponimia de Corvera como valor del so patrimoniu y de la so historia.

 La conferencia celebróse a les 19.30 hores nel centru cultural asitiáu en Piedrasblancas. La entrada a la mesma foi llibre.                                                                  Fonte. asturnews.com

El IX Outono en Bual yá tien feches

Cartelu  IX Outono en Bual

  Bual va fixar el focu de la cultura n’Asturies los díes 9, 10 y 11 d’avientu. Son les feches nes que se va celebrar la novena edición del Outono en Bual, actividá que va llevar conciertos, conferencies, talleres, gastronomía y documentales a esta villa del occidente del país.

  L'Asociación Xuvenil Mezá entama esti “mini-festival autoxestionáu” dende’l 2008 cola fin “motivar y dar un pouco de vida al occidente asturiano y, sobre todo, espertar as mentes d’aquellos que pasan el día delantre da televisión y da cultura institucional”. Un oxetivu que vien cumpliendo añu tres añu, como amuesa’l crecimientu d’esti certame de baldre dafechu que tamién quier ser “un acto de reivindicación das dúas llinguas propias d’Asturias, el asturiano y el gallego-asturiano”, polo que l’usu de dambes llingües ye tresversal nes xornaes. D’igual forma busca poner “en valor da cultura del país y da súa evolución nel siglo XXI, llonxe d’esteriotipos y de clichés impostos por ningún dogma oficial”.

  Un magosto y una gran verbena popular van abir el IX Outono en Bual n’Helenias, llocal de Frieira, de magar les 22.30 hores del vienres 9 d’avientu. Los Adrianos, grupu de Castriyón mui conocíu nel occidente, va encargase d’amenizar esta primer xornada.

  El sábadu l’actividá va principiar al meudía na bolera de Llaviada col II Aberto Villa de Bual de Biyarda que va enfrentar a la seleición d’Asturies cola de Galicia, competición que se pue desendolcar gracies al sofitu de l’Asociación de Deportes Tradicionales del Conceyo de Bual, qu’axeita tol campu y organiza los xugadores. Yá de tarde, a les 16 hores ne Casa da Cultura, Ramsés Ilesias va poner un taller de baille tradicional de la zona del Eo-Navia, nel que pa participar ye necesario tener nociones d’esti tipu de dances.

Novedá nel certame

  A les 18 hores, nel mesmu llugar, va llegar una de les novedaes del certame. Trátase de la proyeición d’un documental, en concreto ‘Escombro. Una historia a cielo abierto’, de Xaime Santos, a lo que va siguir un alderique cola presencia del autor. La cita ye “un documental satírico sobre as minas na parroquia de Tormaleo (Ibias) y sobre cómo as promesas de trabayo y de progreso das minas nun foron máis qu’un espeyismo de corrupción y de especulación”, esplica la organización.

  Como yá ye vezu nel Outono Cultural, va celebrase “un comedor popular nel que se van poder degustar productos del país y da terra ben cociaos”. El so aniciu ta previstu pa les 20.45 nel Instituto Carlos Bousoño y la organización ufre un menú omnívoru y otru vexetarianu. Pa poder disfrutar d’esta iniciativa tan prestosa ye necesario mercar los vales previamente, con un preciu simbólicu.

  Darréu, a les 23.30 hores, va celebrase’l yá tradicional conciertu nel Helenias, que nesta ocasión va contar coles actuaciones de la banda llocal Caldo y Os Rabizos, pa depués siguir col grupu gallegu Fanfarria Taquikardia, compuestu por doce persones, que debuta n’Asturies tres llevar la so música per tola Península Ibérica. Los tamién gallegos Güintervan, cola so música balcánica, van ser los últimos en xubir al escenariu enantes de dar el pasu pinchadiscos Nochnepitche Esbilla.

  La xente que quiera acudir a estes actividaes dende fuera de Bual van disponer d’una zona d’acampada llibre y cubierta tanto’l vienres como’l sábadu pa evitar tener que garrar el coche de nueche.

Homenaxe a Otilia González y Luis da Veiga

  L’actu que va poner el ramu al Outono Cultural va ser un homenaxe a la muyer y al home exemplar del conceyu, previstu pal domingu a les 12.30 hores na praza da Igleisia. El reconocimientu va ser pa Otilia González, vecina de Froseira, anque natural d’Eilao, y Luis da Veiga, vecín de Brañadesella nacíu en Baxada.

  Otra manera, tres la esperiencia del añu pasáu, la organización va rifar una cesta de productos del país con comida y artesanía de les empreses Embutidos Pico de Fiel, Queixeiría d’Abredo, Queisos Ca Sanchu, Cosmética Terraveya, Cerveza Caleya, Güerta El Nocéu y Artesanía Verdenaz, asina como discos y llibros en gallego-asturiano, güevos de Pitasana, botelles de La Boalesa y artículos de Casa Severón de Navia, ente otros. Les papeletes yá tán a la venta en Bual y el sortéu va facese’l domingu 11.    Fonte: asturies.com

Los númberos 3 y 4 n’asturianu d’Astérix yá tán nes llibreríes

por Pablo R. Guardado

La empresa Asturarco, del Grupo Arbesú, garra’l relevu na apuesta aniciada por Distribuciones Terrier pola llingua asturiana. Yá tien distribuyíos nes llibreríes del país ‘Astérix y los godos’ y ‘Astérix gladiador’, númberos 3 y 4 de la serie, de manera respeutiva, y negocia con dos editores llevar l’asturianu a personaxes nuevos.

La xubilación de Javier Melón, alministrador de Distribuciones Terrier, nun va provocar la paralización del procesu aniciáu hai trés años pol que los númberos nuevos de les histories d’Astérix baxo la edición de Bruño Salvat –empresa poseedora de los derechos de los cómics– salieren nel nuesu idioma al mesmu tiempu que nel restu del mundu y que los vieyos se foran asoleyando poco a poco. Nazario Arbesú, xerente d’Asturarco, decidió garrar el testigu de la importante y esitosa apuesta fecha por Terrier tres falar con Melón pa que los cientos de siguidores d’Astérix y d’Obélix nel país puedan siguir disfrutando na so llingua materna de les aventures de los galos.

“Vemos munchu potencial al asturianu y por eso dicidimos garrar la distribución”, afirma Arbesú, qu’avanza que la so idea nun ye quedar namái n’Astérix: “Tamos falando con dos editores pa sacar personaxes nuevos”. La tirada de 2.000 exemplares pa caún de los dos cómics amuesen la confianza d’Asturarco nel proyeutu.

Rodríguez López sigue cola traducción

Los númberos nuevos que yá se pueden mercar nes llibreríes del país son ‘Astérix y los godos’ (1963) y ‘Astérix gladiador’ (1964), esto ye, los númberos 3 y 4, de manera respeutiva, de la serie creada por René Goscinny y Albert Urdezo. María Xosé Rodríguez López, tres el bon llabor fechu nos cuatro númberos asoleyaos hasta la fecha –hai ún anterior, ‘Astérix en Britania’, editáu por Alborá Llibros nel 1992, con traducción de Xosé Antón González Riaño–, ye la responsable tamién de la torna del francés al asturianu.

“Son dos histories mui divertíes nes que participen los mesmos personaxes que nos dos primeros cómics, yá qu’hasta’l númberu 8 nun empiecen a apaecer otros destacaos nuevos”, esplica la tamién responsable de la Oficina de Normalización Llingüística de Xixón. Na primera, el druida Panorámix ye secuestráu polos godos, polo qu’Astérix y Obélix partirán na so busca, mentes que la segunda cuenta’l viaxe a Roma de los dos galos pa rescatar al bardu Asurancetúrix.

Fonte: Asturies.com

Xosé Alba Alonso faló del mediuambiente y del costu d’usar los recursos naturales na conferencia mensual d’Ástura

Foi'l martes a les 20:00h. nel Atenéu Obreru de Xixón.

Col títulu “De la contaminación d’Avilés al desanicu les abeyes: El costu de los recursos naturales”, profesor Xosé Alba Alonso esplicó por qué usar el mediuambiente nun ye gratis, dientro de les conferencies mensuales qu’entama l’asociación Ástura en collaboración col Atenéu Obreru de Xixón.

Nesta conferencia razonóse cómo ye perimportante da-yos un valor a los recursos qu’usamos del común, nesti casu de la naturaleza, y saber usalos con tientu. Pa ello, diéronse exemplos nidios del usu que-y damos a los recursos naturales, mesmo en positivo qu’en negativo, col envís de contribuyir a la conservación de les condiciones que mos faen posible’l bienestar qu’algamamos. 

Xosé Alba Alonso ye Profesor Titular d’Economía Aplicada del Departamentu de E. A. de la Universidá d’Uviéu.

Fonte: YeXixón.com

La XDLA entama un cursu básicu d'asturianu p'adultos n'Uviéu

Comienza'l día 22 nel llocal del Conceyu Abiertu, con matrícula abierta hasta'l llunes.

La Xunta pola Defensa de la Llingua Asturiana (XDLA) entama tolos años esti cursu col oxetivu de formar a adultos nel bon usu del idioma, tanto a nivel escritu como oral. Les clases van celebrase los martes y los xueves, de 19 a 21 hores, nel baxu asitiáu nel númberu 12 de la cai La Gascona, con Héctor García Gil como maestru y un total de 40 hores llectives.

El preciu de la matrícula, que pue formalizase hasta'l llunes, ye de 30 euros, cantidá qu'inclúi tol material pal desendolcu de les clases, que van comenzar al día siguiente. La xente interesao ha de ponese en contautu cola organización cívica al traviés del númberu de teléfonu 985.22.95.53 o del corréu electrónicu uvieu@exunta.org.

La XDLA trátase d'una entidá acreitada pola Conseyería d’Educación y Cultura pa la formación permanente del profesoráu.

Fonte: Asturies.com

Lurdes Álvarez, Piquero y la Fundación Belenos, merecedores de los Premios Timón 2017

• 
  

por Pablo R. Guardado

La escritora Lurdes Álvarez ye la ganadora del XI Premiu Timón p’autores en llingua asturiana y eonaviego de l’Asociación Cultural L’Arribada, mentes que la Fundación Belenós resultó merecedora del V Premiu Timón de Cultura Asturiana. Otra manera, el xuráu decidió conceder el VIII Premiu Timón p’autores asturianos en llingua castellana al poeta y traductor José Luis Piquero.

José Rogelio Álvarez Hevia, Esther García López, Humberto Gonzali, David M. Rivas, Pilar Sánchez Vicente y Xuan Xosé Sánchez Vicente, con María Teresa González Cobo como secretaria, decidieron los Premios Timón 2017 mientres una cena lliteraria celebrada en Xixón na nueche del vienres. Nesta ocasión aspiraben a los gallardones lliterarios que premien toda un trayeutoria creativa aquellos escritores nacíos nel añu 1967 o anteriores, pa lo que’l xuráu tuvo en cuenta “l'apueste pola creación d'unes obres lliteraries de gran calidá qu'espeyen una voz singular y que son a constituyise como referentes mui significativos de la poesía asturiana” de los dos premiaos.

Asina los ganadores foron los mierenses Álvarez y Piquero. Los dos recibieran una distinción consistente nuna obra del escultor y ceramista xixonés Jesús Castañón mientres la decimosegunda edición de L’Arribada.

Esta mesma recompensa tamién va dir pa la Fundación Belenos, que lleva’l gallardón más mozu de los trés, el Timón de Cultura Asturiana. Con esti fallu, el xuráu quier reconocer “un trabayu de munchos años desarrolláu per aciu de conferencies y homenaxes, del Seminariu d'Estudios Asturianos y, mui n'especial, de la revista ‘Asturies. Memoria encesa d'un País’ que vienen publicando dende 1996”. Precisamente, esta fin del selmana esti coleutivu celebra en La Puela’l XVII Seminariu d’Estudios Asturianos baxo’l nome de ‘Asturies: la viesca habitada’.

Palmarés

Álvarez, Piquero y la Fundación Belenos súmense poro al palmarés d’unos gallardones que, añu tres añu, ganen en sonadía y prestixu. Los ganadores n’ediciones anteriores foron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014), Esther Prieto (2015) y Esther García López (2016) nel casu del Timón p’autores en llingua asturiana y eonaviego; y Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) Francisco García Pérez (2015) y Pilar Sánchez Vicente (2016), nel d’ autores asturianos en llingua castellana.

Nel casu del de Cultura Asturiana, n’años anteriores recibiéronlo l’Asociación Cultural Ensame Sidreru (2013), la Xunta pola Defensa de la Asturiana (2014), l’Asociación pola Recuperación de Sidros y Comedies ‘El Cencerru’ (2015) y Ramón d’Andrés (2016).

Fonte: Asturies.com

Presentóse la guía didáutica del facsímil 'Sol en los pomares'

• Esta espublización pa escolinos complementa la reedición de la obra de Matías Conde.

Esti vienres, a les 12.15 hores nel salón d'actos del Centru de Cultura Antiguu Institutu, tuvo llugar l'actu de presentación de la guía didáutica 'Sol en los pomares' sobre esta obra asoleyada nel 1948 en México agora reeditada n'edición facsímil pola Academia de la Llingua Asturiana cola collaboración del Conceyu de Xixón. L'autor d'esta ferramienta ye Pablo Rodríguez Medina.

La Oficina de la Normalización Llingüistica de Xixón ta detrás d'esta guía dirixida a escolinos y escolines de Secundaría na que van poder afondar na figura del escritor xixonés y nel contestu históricu que-y tocó vivir, tocando'l tema de la emigración.

Nel actu taben presentes, Pablo Rodríguez Medina l'autor, la Conceyala d'Educación y Cultura Ana Monserrat López Moro, la Responsable de la Oficina de Normalización Llingüística, Mª Xosé Rodríguez López y alumnos y alumnes del Colexu San Lorenzo.

Fonte: YeXixón.com

Vanessa Gutiérrez gana’l XXII Premiu Máximo Fuertes Acevedo d’ensayu

El trabayu ‘El paisaxe nuestru’, de Vanessa Gutiérrez, resultó merecedor del XXII Premiu Máximo Fuertes Acevedo d’ensayu qu’entrega la Conseyería d’Educación y Cultura dientro de los sos Premios Lliterarios 2016. Ésti ye’l segundu gallardón que se falla, tres l’Alfonso Iglesias de cómic, de los cinco convocaos.

El xuráu aconceyáu ayeri decidióse por mayoría pol ensayu de la escritora y anguaño presentadora del espaciu ‘Ente toos’ que s’emite na RPA los sábados ente les 16 y 17 hores, al reconocer “el pulsu lliterariu del testu y la modernidá d'una estructura na que se fai dialogar a testos escritos y orales de distintes dómines alredor d'un mesmu paisaxe”, según destaca'l fallu. Fernando Padilla, direutor xeneral de Planificación Llingüística y Normalización, presidió’l mesmu, que tuvo formáu polos escritores y investigadores Luis Casteleiro, José Ángel Gayol –ganador l’añu pasáu con ‘Vértigu. L’atracción del abismu na sociedá contemporánea’–, Marta López Fernández, Elena de Lorenzo y Xosé Miguel Suárez Fernández ‘Tapia’.  

Gutiérrez presentó ‘El paisaxe nuestru’ baxo’l nomatu de Recusa Paigona y lleva una recompensa de 3.000 euros pol gallardón. Nacida n’Urbiés nel 1980, foi redactora del selmanariu ‘Les Noticies’ y presentadora de programes de televisión como ‘Pieces’, amás de collaborar davezu como articulista en ‘El Comercio’.

Autora con Beatriz Redondo Viado del ensayu ‘El país del silenciu’ (2007), la escritora destaca como poeta colos poemarios ‘Onde seca l’agua’ (2003) y ‘La danza de la yedra’ (2004), col que llogró'l Premiu Teodoro Cuesta. Como narradora espublizó ‘Les palabres que te mando’ (2006) y ‘La cama’ (2008). Ye importante destacar que parte de la so obra ta traducida al catalán, al gallegu, al inglés, al checu, al francés y al húngaru, y recoyida en diverses antoloxíes y revistes.

Fonte: Asturies.com

Inaugúrase una esposición d'homenaxe a Vicente García Oliva

Va tar abierta al públicu hasta'l día 30 nel Centru de Cultura Antiguu Institutu.

Esta esposición de nome 'Vicente García Oliva, un paisanu con munchu cuentu "ye un percorríu pela vida y obra del escritor xixonés. L'amuesa ta fecha por escolinos de los colexos Asturias, Evaristo Valle, Jacinto Benavente, Manuel García Blanco, Ríu Piles, Santa Olaya y el San Lorenzo.

García Oliva, académicu de númberu de l'Academia de la Llingua Asturiana, ye un escritor de gran trayeutoria y destacáu autor de lliteratura fantástica destinada a xente mozo. Foi ganador del VIII Premiu María Xosefa Canellada, correspondiente al añu 2015, de lliteratura infantil y xuvenil con ‘Fontenebrosa III: el final’, siendo la segunda vegada que consigue ún de los Premios Lliterarios, tres consiguir el Máximo Fuertes Acevedo nel 2010.

Nel so palmarés tamién destaca un Premiu Timón p’autores n’asturianu y gallego-asturiano, el correspondiente al 2011, qu’entrega l’Asociación Cultural L’Arribada como reconocimientu a toda una carrera lliteraria.

La bruxa Pumarina y el dragón Maragatu

Les persones que visiten la esposición van conocer y esfrutar con personaxes y obres lliteraries que yá son historia na lliteratura infantil. La bruxa Pumarina y el dragón Maragatu van dar la bienvenida al particular reinu los silentes, nuna amuesa que vien mui a cuentu.

 Fonte: YeXixón.com

Les Xornaes d’Estudiu piesllen esti xueves na Facultá de Filosofía y Lletres

Esti miércoles 9 nel salón d’actos del edificiu alministrativu de la Facultá de Filosofía y Lletres de la Universidá d’Uviéu celebrose la segunda sesión de les XXXV Xornaes Internacionales d’Estudiu entamaes pola Academia de la Llingua Asturiana que van finar güei pela tarde, cola lliteratura de nueso como referente.

Les sesiones de la tarde entamaron a les 16  hores cola ponencia del profesor de la Universidá de Montreal (Canadá) Javier Rubieratitulada «“Benimar”, periodista y escritor entre 1920 y 1937». Darréu la sesión continuó cola llectura de les comunicaciones del Académicu Vicente García Oliva, siguida de Llucía Menéndez Menéndez, Miguel Rodríguez Monteavaro y Marta López Fernández.

La xornada pesllose coles ponencies «Perspectiva d’un sistema lliterariu asturianu» del profesor Antón García (Universidá d’Uviéu) y «La literatura mirandesa: de Flores Mirandesas a L’Eiternidade de las Yerbas» d’Alberto Gómez Bautista de la Fundação Calouste Gulbenkian (Lisboa).

L’Academia de la Llingua Asturiana pieslla estes XXXV Xornaes Internacionales d’Estudiu esti xueves nel mesmu salón d’actos del edificiu alministrativu  de la Facultá de Filosofía y Lletres .

Les últimes sesiones entamen a les 16 hores cola ponencia de la profesora de la Universidá Jaume I de Castelló Rosa Agost titulada «Literatura traducida, garante de la diversidad lingüística y cultural: un viaje de ida y vuelta». Darréu seguirán les comunicaciones de Xosé Ramón Igesias Cueva, Carlos Alba «Cellero», Pablo Rodríguez Medina y María del Carmen Alfonso García. Les Xornaes pesllaránse coles conferencies «Propuesta pa un Corpus de Teatru y Artes Escéniques Asturianes; bases y perspeutives» d’Antón Caamaño y «La mística de la tierra na poética asturiana contemporánea» de la escritora y académica Berta Piñán.

Fonte: Asturnews

L'Arribada va fallar los Premios Timón nel marcu d'una cena lliteraria

Yá se conoz a los trés finalistes nes trés categoríes de los gallardones del 2017.

Los aspirantes al XI Premiu Timón p’autores en llingua asturiana y eonaviego, al que concurren aquellos escritores nacíos nel añu 1967 o anteriores, son Lurdes Álvarez, Cristina Muñiz Martín y Ignaciu Llope, mentes que'l VIII Premiu Timón p’autores asturianos en llingua castellana va tar ente José Luis Piquero, Paco Abril y Luis Arias Argüelles-Meres. El gallardón más mozu, el V Premiu Timón de Cultura Asturiana, tien como nominaos definitivos a los coleutivos Iniciativa pol Asturianu, Fundación Belenos y 'Reciella. Families pol asturianu'.

La cena lliteraria, de calter priváu, va celebrase en Xixón el vienres cola participación de persones venceyaes a la cultura y lliteratura del país que van facer de xuráu. D'ella saldrán los ganadores definitivos de los Premios Timón correspondientes al añu 2017 qu'entrega l'Asociación Cultural L'Arribada.

Fonte: Asturies.com