"En diez años el nivel de castellanización de los neños ye allucinante", indicó Esther Fonseca

Los mayestros d'asturianu Esther Fonseca  y  Xose María García 'Llábana'

  Esther Fonseca y Xose María García 'Llábana' falaron ayeri nel Centru Municipal Integráu d'El Llano de les sos esperiencies dando clase d'asturianu dientro del ciclu 'Alcuentros con...'.

  Esta charra, entamada pola Oficina de Normalización Llingüística de Xixón y moderada pola so responsable, María Xosé López, contó cola presencia de dos xeneraciones de mayestos que representaben estos más de 30 años d'escolarización n'asturianu. Fonseca faló d'últimos años y García, profesor yá xubiláu, recordó los primeros años nes escueles del nuesu idioma.ciclu 'Alcuentros con...'.

  'Nun se si llegaremos a tiempu a parar el procesu de sustitución llingüística del asturianu pol castellanu, pero espero que sí', indicó Fonseca. Amás recordó que la presencia de la llingua asturiana nes aules nun ye facil; pasaron más de 30 años d'escolarización n'asturianu y entá sigue habiendo torgues y prexuicios en centros que dificulten l'espoxigue d'esta asignatura. Otru de los problemes que continúa ensín solucionase ye que sigue ensín esistir la especialidá d'asturianu y el profesoráu nun tien estabilidá nel centru, lo que ye otra torga más pal proyectu educativu n'asturianu.

  Pela so parte, García, que foi un de los mayestros pioneros n'entamar col asturianu nes aules nel añu 1984, recordó que llegaron a esi añu con poca formación y un material didáuticu mínimu. Estes torgues pudieron superales con cooperación entre los mayestros y militancia pa poder meyorar cursu a cursu la presencia del asturianu na educación en tolos niveles. Una militancia qu'entá sigue güei, como apuntó Fonseca, yá que amás de docentes tienen que ser militantes porque munches vegaes atópense cola necesidá de quitar prexuicios y defender al nuesu idioma y la so escolarización frente al rechazu y desinformaciones que difunden dalgunos miembros de la comunidá escolar.

L'Evaristo Valle, el primeru

  En Xixón, foi'l colexu Evaristo Valle l'escoyíu nel 1984 pa qu'entamase el plan pilotu de clases d'asturianu. Y foi daqué especial, como contó García, yá que si nos demás centros del plan pilotu yeren ellos los que lo solicitaron, nesti casu foi dende la conseyería la que propunxo esti centru, siendo la comunidá escolar non mui favoratible. Como consecuencia d'ello, el porcentaxe d'alumnos d'asturianu nesti centru yera del 33 por cientu, cuando nel restu yera del 70 o 80 por cientu. Col pasu de los años y gracies al enfotu de los profesores llograron que, al final de la esperiencia pilotu, les cifres llegasen al 81 por cientu. Inclusive, llegó a haber clases d'asturiau p'adultos nel centru.

  Como datu significativu, na evaluación final d'esti plan pilotu fecha dende la Conseyería d'Educación, pudieron comprobar que los neños que daben asturianu teníen un nivel asemeyáu al restu nes otres materies, pero qu'esta asignatura influyía positivamente na valoración d'otros aspectos indicativos de la identidá sociocultural d'un pueblu, asina como que taben más esmolecios pola cultura, el mediu ambiente y los temes sociales del país.

  García tamién quixo dexar claro que la falta de voluntá política y d'oficialidá fáenos llevar munchos años de retrasu na normalización del asturianu comparao con otres comunidaes autónomes. Pasaos más de 30 años, pese a los avances na escolarización y tratamientu nes aules del idioma, sigue habiendo munches 'asignatures pendientes'.         Fonte: yexixon.com

Una campaña va promocionar la lliteratura n'asturianu nos comercios de Xixón

Trátense d’obres escrites por muyeres.

La conceyala d’Educación y Cultura, Ana Montserrat López Moro, y Camen Moreno, representante de la Unión de Comerciantes del Principado de Asturias, encargáronse d’informar el martes nel Centru de Cultura Antiguu Institutu del alcuerdu sobre la campaña de nome ‘Nel comerciu asturianu yes bienveníu/bienvenida y la lliteratura tamién’, actu nel que tamién estuvo presente María Xosé Rodríguez López, responsable de la Oficina de Normalización Llingüística. La primer de les aiciones previstes ye la esposición nos escaparates de 40 comercios de la ciudá d’una amuesa d’obres n’asturianu escrites por muyeres, coincidiendo cola celebración de la XXXVIII Selmana de les Lletres Asturianes baxo’l lema ‘Lletres, femenín plural’.

D’igual forma, van decorase los escaparates con una bolsa de compra cola frase ‘Llámalo pol nome, ye lo normal’. Esta campaña, que dio aniciu y va allargase hasta’l día 10, mentes que’l vienres los veceros y veceres que merquen dalgo nestos comercios van recibir de baldre un llibru en llingua asturiana, asina como una guía de llectura con testos d’escritores xixoneses.

Fonte: Asturies.com

Representación de 'Runa: un mundiu redondu'

Nun tris n'escena 

 El martes 2 de mayu a les 18:30h. nel salón d'actos del Antiguu Institutu.

 La Oficina de Normalización Llingüística de Xixón organiza pa esti martes 2 una representación del a obra 'Runa: un mundiu redondu' producida por Nun Tris, onde una actriz presenta cuentos y narraciones de los cinco continentes nun viaxe al rodiu del mundiu, entamando caun d’ellos falando un migayín de les sos costumes y tradiciones. Nel viaxe acompáñala un narrador-músicu qu’interpreta fragmentos de música de cada sitiu, faciendo por amosar que la xente que vive nesti mundiu tien la so propia singularidá y la so forma diferente d’entendelu y la so propia forma d’espresase, aporfiando al tiempu na igualdá y el respetu a toles persones y cultures.

 La obra va ponela n'escena Arantxa Fernández y Toño Caamaño, siendo idea y dramaturxa d'Inma Rodríguez.

 Esta obra ta encamentada pa neños y neñes a partir de 8 años.       Fonte: infoasturies.com

XIV Alcuentros de la mocedá cola llingua

El 25 d'abril, nel Muséu del Pueblu d'Asturies, va volver a celebrase esta xornada entamada pola Oficina de Normalización Llingüística de Xixón y dirixía al alumnáu que recibe clas d'asturianu nos IES de Xixón.

Nesta XIV xornada hai programaos una serie de talleres y xeres como creación gráfica, doblaxe, baille, rock, narración oral, rap, fotografía, cocina y audiovisuales. L'oxetivu ye que averar a los participantes al asturianu fuera del aula.

Cada grupu va realizar un taller (el que-yos correspuenda por sortéu), van participar en xuegos tradicionales asturianos y van concursar nun karaoke col cantar que yá se-yos apurrió nos entamos del cursu escolar.

Esti añu participen 11 IES y un colexu, colo que'l númberu de mozos y moces que van alcontrase nesta xornada ye bultable. 

Fonte: YeXixón.com

La Oficina de Normalización Llingüística edita un folletu cola toponimia oficial de Xixón

Siguen cola so campaña 'Llámalo pol nome, ye lo normal' pa favorecer l'usu de los topónimos oficiales.

Dende la Oficina quieren recordar que cola aprobación de la toponimia oficial de Xixón diose un pasu alantre na normalización social del usu de la llingua asturiana nel conceyu y que ye importante que se conozan y respeten los nomes oficiales que son los que tradicionalmente s'usaron siempre nes parroquies, pueblos y llugares. Amás, estos nomes son d'usu obligáu per parte de les intituciones (Ayuntamientu, Principáu, etc.) en cualisquier comunicación fecha en castellanu o n'asturianu.

La Oficina de Normalización Llingüística del Conceyu de Xixón quier con esta campaña animar a tolos vecinos y vecines de Xixón a "emplegar los nuestros nomes, los que la xente siempre dixo".

Una de les aiciones d'esta campaña, 'Llámalo pol nome, ye lo normal'', ye la edición d'un folletu informativu con un mapa y la toponimia oficial del conceyu de Xixón. Esti folletu puedes descargalu dende equí.

Fonte: YeXixón.com

Convocada una beca de formación pa la Oficina de Normalización Llingüística de Xixón

El plazu pa presentar solicitúes fina'l miércoles día 15 de febreru.

Convocada una beca de formación especializada pa la torna al asturianu y el desenvolvimientu d'actividaes y campañes de normalización llingüística pa la Oficina de Normalización Llingüística de la Fundación Municipal de Cultura, Educación y Universidá Popular.

La formación que va llograr la persona becada va venir determinada poles actividaes específiques que se realicen, por aciu l'alquisición d'esperiencia y conocencia nes siguientes árees:
• Collaboración nel diseñu, planificación, siguimientu y execución de programes, actividaes
y campañes de promoción y normalización del asturianu.
• Torna y corrección de documentos al asturianu.
• Collaboración na actualización de conteníu y caltenimientu de la páxina web y aplicaciones de redes sociales de la Oficina

La beca de formación va tener una duración de 12 meses y un horariu de 30 hores selmanales. La dotación económica total de la beca va ser de 7.980 euros.

La titulación académica mínima que s’esixe pa poder concurrir ye de Títulu de Grau de Maestru/a con Mención en Llingua Asturiana o Títulu de Grau en Filoloxía con Minor d´Asturianu.

El plazu pa presentar solicitúes acaba'l miércoles día 15 de febreru. Más información y modelos de presentación nesti enllaz coles bases de la convocatoria

Fonte: YeXixon.com

L'asturianu tien el so espaciu en Mercaplana

Un añu más l'asturianu va tar presente en Mercaplana. La toponimia tradicional –y oficial– protagoniza'l conteníu d'esta edición.

Los neños y neñes que s'averen al XLIV Salón de Navidá pa la Infancia y la Mocedá van poder conocer los nomes de los llugares d'ónde son, viven, xueguen o estudien gracies al espaciu de la Oficina de Normalización Llingüistica de Xixón. Esto ye que'l sitiu qu'ocupa'l serviciu en Mercaplana ta dedicáu a la toponimia tradicional, la oficial en Xixón y la d'otros conceyos del país.

Asina, una esposición d'imáxenes de llugares sirve pa facer un percorríu y conocer los distintos sitios de Xixón y los sos nomes. D'igual forma, hai un mapa xigante del conceyu onde colocar los distintos llugares y parroquies.

Otros xuegos propuestos son la posibilidá de crear la to propia chapa col to topónimu favoritu y xugar con cubos pa construyir figures. Mercaplana va tar abiertu nel Recintu Ferial Luis Adaro hasta'l 4 de xineru n'horariu de 16 a 20.30 hores, sacante'l sábadu, que va tar pesllao pola festivida de Nuechevieya. La entrada tien un costu de 3,90 euros, siendo de baldre pa los menores de 3 años.

Fonte: YeXixón.com

Presentóse la guía didáutica del facsímil 'Sol en los pomares'

• Esta espublización pa escolinos complementa la reedición de la obra de Matías Conde.

Esti vienres, a les 12.15 hores nel salón d'actos del Centru de Cultura Antiguu Institutu, tuvo llugar l'actu de presentación de la guía didáutica 'Sol en los pomares' sobre esta obra asoleyada nel 1948 en México agora reeditada n'edición facsímil pola Academia de la Llingua Asturiana cola collaboración del Conceyu de Xixón. L'autor d'esta ferramienta ye Pablo Rodríguez Medina.

La Oficina de la Normalización Llingüistica de Xixón ta detrás d'esta guía dirixida a escolinos y escolines de Secundaría na que van poder afondar na figura del escritor xixonés y nel contestu históricu que-y tocó vivir, tocando'l tema de la emigración.

Nel actu taben presentes, Pablo Rodríguez Medina l'autor, la Conceyala d'Educación y Cultura Ana Monserrat López Moro, la Responsable de la Oficina de Normalización Llingüística, Mª Xosé Rodríguez López y alumnos y alumnes del Colexu San Lorenzo.

Fonte: YeXixón.com

El Colexu Públicu Montevil lleva'l X Ruempi la Mollera

   La gala del X Premiu Ruempi la Mollera, actividá entamada pola Oficina de Normalización Llingüística de Xixón, tuvo llugar esti martes nel Centru de Cultura Antiguu Institutu. Nella diose a conocer el ganador d'esti añu, que resultó ser el Colexu Públicu Montevil.

 L'actu, animáu por Higiénico Papel, contó cola presencia de la conceyala d'Educación y Cultura, Ana Montserrat López Moro, amás de los escolinos y escolines de quintu y sestu de Primaria de les siete escueles participantes na edición 2015-2016: los colexos públicos Alfonso Camín, Cabueñes, Clarín, Honesto Batalón, Jacinto Benavente, Montevil y Xovellanos. A lo llargo del cursu tuvieron que trabayar trés entrugues y afondar na so respuesta al traviés de dibuxos, semeyes, información, maquetes, figures, trabayos na rede o trabayos en comuña.

   La primer d'elles yera 'Dende'l mes de setiembre hai un parque en Xixón que fai alcordanza d'esti mineru de Ciañu, home de lletres, solidariu y buena xente', en referencia a Mánfer de la Llera, pa depués plantegar que 'El desapaecíu diariu xixonés 'El Noroeste' dio anuncia n'avientu de 1910 de la muerte d'esti empresariu –que da nome a una cai de Xixón– y que foi la primer víctima de l'aviación española', siendo esti home Mariano Pola. La tercera y cabera, mentes, yera 'Esta escritora y pensadora, que da nome a una escuela feminista, acolumbraba tolos díes la mar dende la so casa, enriba d'un cantil de La Providencia', con Rosario Acuña como respuesta correuta.

   Los neños y neñes del Colexu Públicu Montevil enteraríense na gala, con muncha allegría, que resultaron ganadores del X Ruempi la Mollera. El Cabueñes finó en segundu llugar y el Jacinto Benavente, en terceru.                                                                   Fonte: asturies.com

Asturies.com, que tuvo presente na gala, ufre una galería de semeyes del eventu.

Xixón enllena les aules de superheroínes

L'actividá “El cómic n’asturianu”, organizada pola Oficina de Normalización Llingüística de Xixón na que van participar al rodiu de 260 neños y neñes de 9 colexos entamó recién enllenando les aules de superheroínes.

“El cómic n’asturianu” ye uná actividá nueva qu’entama nesti cursu escolar 2015-2016 dientro del Programa d’Espardimientu y Normalización de La Llingua Asturianana qu’organicen dende la Oficina. El dibuxante Ruma Barbero va falar a los los escolinos y escolines de cómics asoleyaos n’asturianu, de dibuxantes renomaos y pa rematar fadrá desplicaciones sobre como ye’l procesu de facer un cómic.

Fonte: asturnews

"Menudu Traxín” averará’l baille y el traxe tradicional asturianu a lo más pequeño de la casa esti xueves

L'actividá entamada por Vezos y Reciella celebrase nel colexu Xovellanos de Xixón el día 2 Redacción Esti xueves 2 d'abril, Xixón acoyerá “Menudu Traxín”, una actividá qu'averará’l baille y el traxe tradicional asturianu a lo más pequeño de la casa, entamada por Vezos Astures y Reciella. L'actividá ye gratuita y va facese nel patiu del Colexu Xovellanos de Xixón. Esti día del traxe y el baille tradicional pa neños y neñes ye una iniciativa con vocación de continuidá añal. La so primer edición va celebrase esti xueves 2 d'abril nel patiu del Colexu Xovellanos de Xixón (entrada pela cai Begoña) dende les 10.30 hasta les 14.00 hores. Toles neñes y neños - y les sos families- tán convidaos a venir; col traxe o ensin él, sepan o nun sepan baillar y falen o nun falen asturianu. Va haber talleres, xuegos, y actividaes pa deprender a baillar y pa conocer el traxe del país, too ello col oxetivu de pasar una xornada prestosa na que la reciella que tea familiarizao col baille y el traxe atope un entornu afayadizu pa rellacionase con xente de la so edá, y pa que lo que nun lo tea pueda averase y aficionase de forma lúdica a la nuestra tradición. Y amás col asturianu como llingua vehicular de les actividaes. Tolos neños y neñes tienen que dir acompañaes d'una persona adulta. La entrada ye llibre y toles actividaes son gratuites y cuenten cola collaboración del Colexu Públicu Xovellanos y la Oficina de Normalización Llingüística de Xixón. PROGRAMA 10.30 h. ENTAMU: xuegos tradicionales, photocall, talleres de colorear 12.00 h. TALLER DE BAILLE: Páxara Pinta, Capuchinos, Cachetíus y Danza del Pumba. 13.00 h. PASACAIS Fonte: Asturnews