La décima edición del Premiu al Meyor Cantar yá ta en marcha

Pablo R. Guardado

 La Conseyería d’Educación y Cultura ta acabante de convocar una edición nueva del Premiu al Meyor Cantar, la décima, recuperando asina esti gallardón la normalidá depués del parón del 2015. El plazu pa presentar temes fina’l día 30.

 El Premiu al Meyor Cantar tien como oxetivu visibilizar la música n’asturianu y gallego-asturiano, al empar que buscar fomentar la creación musical. El concursu premia al tema más destacáu que s’editara mientres l’añu anterior, esto ye 2016, canción qu’ha de ser orixinal, quedando asina escluyíes les pieces tradicionales yá esistentes, les versiones o les adaptaciones d’otros idiomes.

 Ente tolos cantares que vayan a concursu, un xuráu va escoyer a los finalistes, nun númberu non inferior a cinco, que van participar na gala onde va decidise’l ganador final tres les actuaciones en direuto de tolos candidatos. Ésti va llevar como recompensa “una escultura orixinal y esclusiva d’un o una artista de prestixu reconocíu”, amás d’un compromisu de promoción del tema en medios de comunicación y eventos qu’entame’l Gobiernu. Sicasí, el premiu nun recueye, como nel pasáu, la participación nel Liet International, el festival européu de la canción en llingües minorizaes.

 El plazu pa presentar pieces va zarrase’l 30 d’esti mes, mentes qu’entovía nun ta confirmada la fecha y el llugar onde va celebrase la gala final. Na edición del añu pasáu la ganadora foi Anabel Santiago, con ‘La lloca’.                                                                  Fonte: asturies.com

Adxuntu	Tamañu
Convocatoria del X Premiu al Meyor Cantar	984.09 KB

La Selmana de les Lletres va homenaxear esti añu a les muyeres

   La 38 Selmana de les Lletres Asturianes va celebrase esti añu ente los díes 2 y 9 de mayu se va centrar na lliteratura escrita por muyeres n’asturianu y gallegu asturianu, según informó esta fin de selmana’l Gobiernu del Principáu.

  “La selmana ye una de les cites culturales más importantes del añu n’Asturies, tantu pol so calter simbólicu como pola so contribución a la divulgación d’autores asturianos en distintos xéneros, como la narrativa, la poesía o’l teatru” sigún la Conseyería, qu’entamó a desenvolver esta selmana d’actividaes alrodiu de la celebración del Día de les Lletres Asturianes por parte de l’Academia de la Llingua asturiana nel primer vienres de cada mayu.

  Esti homenaxe institucional a les lletres asturianes va incluyir espectáculo  poéticu-musicales, llectures públiques, coloquios, certames escolares o representaciones teatrales. El gallego-asturianu va cuntar tamién con un actu especial: ‘Homenaxe ás nosas lletras’, que se va celebrar n’A Caridá (El Franco).

  Coles mesmes, nel marcu de la Selmana de les Lletres Asturianes, la Conseyería d’Educación y Cultura entama tamién el Día del Llibru Asturianu, que cada añu pretende averar la lliteratura asturiana a más públicu, gracies a la collaboración de más de sesenta llibreríes. E l5 de mayu los compradores de llibros n’asturianu o gallego-asturianu van tener un 10% de descuentu y van recibir como regalu un llibru con testos de muyeres escritores dende’l sieglu XVIII hasta l’actualidá.                                                     Fonte: asturnews.com

2017 pue trayer una medría de la Rede de Normalización

Presentación Xornaes Patrimoniu

  IX va defender delles enmiendes a los presupuestos p’abrir una oficina de normalización llingüística en Ribesella, al mesmu tiempu que’l tripartitu d’Uviéu fai anuncia de la puesta en marcha esti añu venideru de la Oficina de Normalización nel conceyu uvieín.

 Izquierda Xunida va reclamar una medría de les inversiones del Gobiernu autonómicu pal oriente asturianu, pa lo que yá emprestó delles enmiendes parciales a les cuentes que defende l’executivu rexonal. Y ente les midíes que s’esixen, reclámense recursos pa l’apertura d’una una oficina de normalización llingüística del asturianu, financiada, como asocede n’otros conceyos, fundamentalmente pola Conseyería d’Educación y Cultura.

 Esa enmienda, pa la que se preve una inversión de 14.000 euros, sofítase en que la llingua propio y tradicional d’Asturies ye parte sustancial del patrimoniu cultural de Ribesella. La propuesta formulóse teniendo en cuenta les demandes que, en tal sentíu, realizó’l colectivu Pueblu.

 Sigún Izquierda Xundia, cola apertura d’esta oficina daríase cumplimientu a la voluntá de la mayoría de la población pa la normalización y recuperación llingüística del asturianu, que se reflexa nes encuestes sociollingüístiques realizaes nos años precedentes y concrétase na demanda o aspiración d’un futuru billingüe y equilibrao ente’l castellán y l’asturianu. Pa ello propón una dotación de 14.400 euros.

 Hai unos díes, el tripartitu del Ayuntamientu d’Uviéu, onde tamién ta IX, confirmó la puesta en marcha de la Oficina de Normalización Llingüística na capital uvieína pa 2017. El gobiernu del conceyu va ufiertar un puestu pa maestros o filólogos especialistes en llingua asturiana y va abrir la sede na plaza del Ayuntamientu.

 La persona responsable de la Oficina de Normalización d’Uviéu tendría de collaborar nel diseñu de programes y actividaes y campañes de promoción del asturianu, asina como tornar y correxis testos al asturianu y llevar la traducción de la páxina web y les redes sociales del Ayuntamientu al asturianu.                                               Fonte: asturnews.com

Carbajal repite como ganadora del Premiu Xuan María Acebal de poesía dos años depués

Na semeya Ángeles Carbajal

• . Luis Navazo lleva’l VIII Premiu Alfonso Iglesias
• . Vanessa Gutiérrez gana’l XXII Premiu Máximo Fuertes Acevedo d’ensayu

 El poemariu ‘Un vasu d’agua’, de Ángeles Carbajal, resultó merecedor por unanimidá del XXII Premiu Xuan María Acebal de poesía qu’entrega la Conseyería d’Educación y Cultura. La escritora d’Argüeyes yá llevó esti gallardón nel 2014 con ‘L’aire ente la rama’.

 Ocho trabayos se presentaron a esta edición de los Premios Lliterarios na estaya de poesía, que cuenta con una recompensa de 3.000 euros. D’ellos, el xuráu presidíu por Fernando Padilla, direutor xeneral de Planificación Llingüística y Normalización, y integráu polos escritores Lourdes Álvarez, Antón García –ganador del añu pasáu con ‘Ferralla’–, Héctor Pérez Iglesias, Xuan Santori y Solinca Turbón, decidióse por ‘Un vasu d’agua’, “una reflexón empática, na que’l tonu unitariu, intensu y coherente de la voz poética, a lo llargu de la obra, emociona al llector”, esplicaron nel acta. La ganadora, una vegada abierta la plica, resultó ser Carbajal, que presentó’l poemariu baxo’l nomatu ‘La ponte’.

 Nacida n’Argüeyes nel 1959, ye llicenciada n’Hestoria del Arte pola Universidá d’Uviéu y collaboradora de les revistes ‘Clarín’, ‘Lliteratura’, ‘Reloj de Arena’ o ‘Anáfora’, ente más otres. Hai dos años yá llevara’l Xuan María Acebal con ‘L’aire ente la rama’, consideráu pola Tertulia Malory el meyor llibru n’asturianu editáu nel añu 2015.  Ente les sos creaciones destaquen tamién los poemarios en castellanu ‘La caligrafía de la distancia’ (1993) y ‘La sombra de otros días’ (2002), amás de la obra ‘En campu abiertu’, col qu’algamó nel 2012 el Premiu Teodoro Cuesta» de Poesía.                                                         Fonte: asturies.com

La convocatoria d’ayudes a la edición pieslla la puerta a nuevos autores y editoriales

  Esti miércoles espublízase nel BOPA la resolución de 10 de septiembre del 2015 pola que la Conseyería d’educación y Cultura aprueba la convocatoria de subvenciones en réxime de concurrencia competitiva pa la promoción del llibru n’asturianu y en gallego- asturianu, con novedades y un montu total de 90ooo euros, un 10,41% más que nel 2014,

  Les bases dexen bien a les clares que namái les editoriales qu’espublizaren nos caberos 5 años más de 3 proyectos editoriales tienen dalguna posibilidá d’algamar ayudes. Y nel casu de los autores, sólo los que tengán 5 o más llibros, van cuntar con dalguna posibilidá d’algamar ayudes. Esto quier dicir que nestos momentos, la Conseyería fai apueste pol caltener la producción de los autores más veteranos y pernomaos qu’apostar pol contenía y calidá de les nueves aportaciones lliteraries, puesto que tolos proyectos d’obres originales n’asturianu, van tener el máximu de puntuación, seyan del xéneru que seyan y tengan la calidá lliteraria que tengan.

  La convocatoria autoriza un gastu destináu a esta convocatoria, por importe de 90.000 euros,con cargu a l’aplicación presupuestaria 14.04.422r.472.018, de los Presupuestos xenerales del Principáu d’asturies pal exerciciu 2015, lo que ta un 10% perembaxo de los 100.000 que se presupuestaron en 2013.

  Esta convocatoria pública de subvenciones va desenvolvese teniendo como oxetu la concesión de subvenciones, en réxime de concurrencia competitiva, pa la promoción del llibru n’asturianu y en gallego-asturianu pente medies d’ayudes económiques a empreses editoriales pa la edición de llibros orixinales o traducíos d’otres llingües (con una tirada de 500 exemplares; y con una estensión que nun seya inferior a 50 páxines, nun siendo en llibros infantiles y xuveniles) y que pol so interés y calidá ayuden a la normalización social de la llingua y al arriquecimientu de la nuestra cultura, faciendo posible la constitución d’un fondu bibliográficu en llingua asturiana o gallego-asturianu. Nes obres traducíes, l’ayuda va ser tamién pa los gastos derivaos de la traducción.

  Ensin perxuiciu de la posible presentación de dellos proyectos por cada solicitante, en nengún casu l’importe de l’ayuda concedida a cada persona, entidá o empresa beneficiaria va poder superar la cantidá máxima de 25.000 €. Nesi casu, y cola mira de nun pasar d’esa cantidá, van entendese desestimaos automáticamente los proyectos presentaos por una mesma entidá solicitante que sacaren peor puntuación en comparanza colos sos proyectos meyor puntuaos.

Pero lo más significativo de la convocatoria ye que paecen afitase les torgues a l’apaición de nuevos autores y nueves editoriales ente los que puen algamar ayudes. De mano, la llende económica ye como dicíemos enrriba de 25 mil euros por editorial solicitante, lo que dexa la posibilidá de repartir namái qu’ente cuatro editoriales tol presupuestu.

Y d’otru lláu, les bases dexen bien a les clares que namái les editoriales qu’espublizaren nos caberos 5 años más de 3 proyectos editoriales tienen dalguna posibilidá d’algamar ayudes. Y nel casu de los autores, sólo los que tengán 5 o más llibros, van cuntar con dalguna posibilidá d’algamar ayudes.

  Concretamente va puntuase la trayectoria de la empresa editorial, o de profesionales d’ella que s’encarguen del proyectu, n’actividaes d’edición de llibros hasta un máximu de 10 puntos, señalándose:

▪  Trayectoria mui consolidada, cola xestión y edición de más de diez proyectos editoriales nos cinco años anteriores a la convocatoria: 10 puntos.

▪  Trayectoria bien consolidada, cola xestión y edición d’ente seis a diez proyectos editoriales nos cinco años anteriores a la convocatoria: 7 puntos.

▪  Trayectoria abondo consolidada, cola xestión y edición d’ente trés a cinco proyectos editoriales nos cinco años anteriores a la convocatoria: 5 puntos.

▪  Trayectoria non consolidada: 1 puntu.

Y no que cinca a la trayectoria del autor o de la autora y/o traductor o traductora n’ámbitu de la lliteratura n’asturianu o gallego-asturiano hasta un máximu de 15 puntos, indicándose:

▪  Autor/a o traductor/a con más de cinco llibros espublizaos y que fore ganador/a de dalgún de los premios lliterarios n’asturianu o gallego-asturianu que convoca’l Gobiernu del Principáu d’asturies: 15 puntos.

▪  Autor/a o traductor/a con más de cinco llibros espublizaos y que fore ganador/a de dalgún de los pre- mios lliterarios n’asturianu o en gallego-asturianu que convoquen entidaes locales o entidaes ensin ánimu d’arrequecimientu radicaes nel Principáu d’asturies: 10 puntos.

▪  Autor/a o traductor/a con cinco o más llibros espublizaos: 8 puntos.

▪  Autor/a o traductor/a con menos de cinco llibros espublizaos: 5 puntos.

▪  Autor/a o traductor/a ensin llibros espublizaos, pero con contribuciones en revistes lliteraries: 3 puntos.

▪  Autor/a o traductor/a ensin obra conocida: 1 puntu.                          Fonte: asturnews.com