Los númberos 3 y 4 n’asturianu d’Astérix yá tán nes llibreríes

por Pablo R. Guardado

La empresa Asturarco, del Grupo Arbesú, garra’l relevu na apuesta aniciada por Distribuciones Terrier pola llingua asturiana. Yá tien distribuyíos nes llibreríes del país ‘Astérix y los godos’ y ‘Astérix gladiador’, númberos 3 y 4 de la serie, de manera respeutiva, y negocia con dos editores llevar l’asturianu a personaxes nuevos.

La xubilación de Javier Melón, alministrador de Distribuciones Terrier, nun va provocar la paralización del procesu aniciáu hai trés años pol que los númberos nuevos de les histories d’Astérix baxo la edición de Bruño Salvat –empresa poseedora de los derechos de los cómics– salieren nel nuesu idioma al mesmu tiempu que nel restu del mundu y que los vieyos se foran asoleyando poco a poco. Nazario Arbesú, xerente d’Asturarco, decidió garrar el testigu de la importante y esitosa apuesta fecha por Terrier tres falar con Melón pa que los cientos de siguidores d’Astérix y d’Obélix nel país puedan siguir disfrutando na so llingua materna de les aventures de los galos.

“Vemos munchu potencial al asturianu y por eso dicidimos garrar la distribución”, afirma Arbesú, qu’avanza que la so idea nun ye quedar namái n’Astérix: “Tamos falando con dos editores pa sacar personaxes nuevos”. La tirada de 2.000 exemplares pa caún de los dos cómics amuesen la confianza d’Asturarco nel proyeutu.

Rodríguez López sigue cola traducción

Los númberos nuevos que yá se pueden mercar nes llibreríes del país son ‘Astérix y los godos’ (1963) y ‘Astérix gladiador’ (1964), esto ye, los númberos 3 y 4, de manera respeutiva, de la serie creada por René Goscinny y Albert Urdezo. María Xosé Rodríguez López, tres el bon llabor fechu nos cuatro númberos asoleyaos hasta la fecha –hai ún anterior, ‘Astérix en Britania’, editáu por Alborá Llibros nel 1992, con traducción de Xosé Antón González Riaño–, ye la responsable tamién de la torna del francés al asturianu.

“Son dos histories mui divertíes nes que participen los mesmos personaxes que nos dos primeros cómics, yá qu’hasta’l númberu 8 nun empiecen a apaecer otros destacaos nuevos”, esplica la tamién responsable de la Oficina de Normalización Llingüística de Xixón. Na primera, el druida Panorámix ye secuestráu polos godos, polo qu’Astérix y Obélix partirán na so busca, mentes que la segunda cuenta’l viaxe a Roma de los dos galos pa rescatar al bardu Asurancetúrix.

Fonte: Asturies.com

La XDLA reclama doblaxes d’Asterix a la RTPA na apaición de la nueva aventura

 La XDLA atalanta que’l doblaxe “valdría pa visibilizar los alcuerdos parllamentarios sobre l’asturianu y el cumplimientu de los mesmos polos xestores del mediu públicu”

  Nuna nota de prensa asoleyada esti xueves, la Xunta pola Defensa de la Llingua Asturiana (XDLA) fai alcordanza de qu’hai dos años publicarase Astérix na tierra los pictos, “un álbum que vendió en poques selmanes 2.500 exemplares y que se convirtió nun fenómenu lliterariu dientro de les lletres asturianes”. Y nesi tiempu, la Xunta pola Defensa de la Llingua Asturiana “solicitó a la daquella Dirección Xeneral de Política Llingüística y a RTPA que collaboraren pa facer el doblaxe al nuestru idioma de les películes protagonizaes pol héroe galu, un llabor que diba responder al compromisu de llevar l’asturianu al mayor públicu posible, sobre too a lo más mozo. Güei, dos años más tarde y depués de que la nuestra petición nun la atendiera nenguna de les dos instancies, volvemos solicitar lo mesmo a la Direición Xeneral de Planificación Llingüística y Normalización y a la RTPA”.

  La organización recuerda que les televisiones autonómiques agrupaes na organización FORTA, ente les que ta la TPA, “tienen los drechos d’emisión de les películes d’animación que protagonizó l’héroe galu a lo llargo d’estos años, qu’amás repítenles davezu en feches señalaes, como’l branu y navidá, por mor del so éxitu. Mesmamente, les últimes películes d’Astérix llegaron a estrenase nos cines en vascu y catalán, mentes qu’en Galicia una campaña fecha a comuña ente TVG y la Secretaría Xeral de Política Lingüística permitió la edición en DVD de delles películes infantiles doblaes, ente les que taben dalgunes protagonizaes por esti personaxe tan conocíu del cómic francés”.

  Esta solicitú coincide cola espublización d’otros dos álbumes n’asturianu d’Astérix nesti xueves d’ochobre, la nueva aventura “El papiru de César” y la torna de la segunda aventura del galo, “La faceta d’Oru”, lo que pala organización civil asturianista “da bona cuenta del so respaldu social- y podría interpretase como’l primer pasu pa visibilizar el cumplimientu del alcuerdu d’investidura ente PSOE y IX, que diz que RTPA tien qu’aumentar los sos conteníos en llingua asturiana, y del mesmu plan de dignificación del asturianu, aprobáu apocayá col consensu d’una parte importante del arcu parllamentariu y que, con unos términos menos esplícitos, vien a dicir lo meso”. Na opinión de la xunta “desdexar una iniciativa asina namás pue entendese como dexar en papel moyao lo pactao, amás de ser una muestra más de los prexuicios del equipu de dirección actual de RTPA y de lo necesario del cambiu: el compromisu mínimu de cumplir cola llexislación tien que ser un motivu sine qua non pa dirixir RTPA, non como hasta ágora”.

  Hai que tener en cuenta que la cadena, como emisora pública que ye, “tien la obligación d’atender a les minoríes, protexer a los neños, educar a l’audiencia y promocionar el nuestru idioma, funciones que se cumplen cola emisión d’un productu asina. Sicasí, como ya se señaló nel Informe sobre la necesidá d’una programación infantil en TPA, la nuestra televisión ye la única cadena europea d’una comunidá billingüe que nun emite programación pa los más pequeños na llingua propia, polo qu’actualmente nun ta cumpliendo colos sos mandaos llegales. Too esto a pesar del éxitu y les espectatives que xeneraron esperiencies como’l doblaxe al asturianu de la serie infantil Los Bolechas, que nun tuvo continuidá desque s’emitieron los 26 capítulos de la primer temporada”.                                                                                                                               Fonte: asturnews.com