El IX Outono en Bual yá tien feches

Cartelu  IX Outono en Bual

  Bual va fixar el focu de la cultura n’Asturies los díes 9, 10 y 11 d’avientu. Son les feches nes que se va celebrar la novena edición del Outono en Bual, actividá que va llevar conciertos, conferencies, talleres, gastronomía y documentales a esta villa del occidente del país.

  L'Asociación Xuvenil Mezá entama esti “mini-festival autoxestionáu” dende’l 2008 cola fin “motivar y dar un pouco de vida al occidente asturiano y, sobre todo, espertar as mentes d’aquellos que pasan el día delantre da televisión y da cultura institucional”. Un oxetivu que vien cumpliendo añu tres añu, como amuesa’l crecimientu d’esti certame de baldre dafechu que tamién quier ser “un acto de reivindicación das dúas llinguas propias d’Asturias, el asturiano y el gallego-asturiano”, polo que l’usu de dambes llingües ye tresversal nes xornaes. D’igual forma busca poner “en valor da cultura del país y da súa evolución nel siglo XXI, llonxe d’esteriotipos y de clichés impostos por ningún dogma oficial”.

  Un magosto y una gran verbena popular van abir el IX Outono en Bual n’Helenias, llocal de Frieira, de magar les 22.30 hores del vienres 9 d’avientu. Los Adrianos, grupu de Castriyón mui conocíu nel occidente, va encargase d’amenizar esta primer xornada.

  El sábadu l’actividá va principiar al meudía na bolera de Llaviada col II Aberto Villa de Bual de Biyarda que va enfrentar a la seleición d’Asturies cola de Galicia, competición que se pue desendolcar gracies al sofitu de l’Asociación de Deportes Tradicionales del Conceyo de Bual, qu’axeita tol campu y organiza los xugadores. Yá de tarde, a les 16 hores ne Casa da Cultura, Ramsés Ilesias va poner un taller de baille tradicional de la zona del Eo-Navia, nel que pa participar ye necesario tener nociones d’esti tipu de dances.

Novedá nel certame

  A les 18 hores, nel mesmu llugar, va llegar una de les novedaes del certame. Trátase de la proyeición d’un documental, en concreto ‘Escombro. Una historia a cielo abierto’, de Xaime Santos, a lo que va siguir un alderique cola presencia del autor. La cita ye “un documental satírico sobre as minas na parroquia de Tormaleo (Ibias) y sobre cómo as promesas de trabayo y de progreso das minas nun foron máis qu’un espeyismo de corrupción y de especulación”, esplica la organización.

  Como yá ye vezu nel Outono Cultural, va celebrase “un comedor popular nel que se van poder degustar productos del país y da terra ben cociaos”. El so aniciu ta previstu pa les 20.45 nel Instituto Carlos Bousoño y la organización ufre un menú omnívoru y otru vexetarianu. Pa poder disfrutar d’esta iniciativa tan prestosa ye necesario mercar los vales previamente, con un preciu simbólicu.

  Darréu, a les 23.30 hores, va celebrase’l yá tradicional conciertu nel Helenias, que nesta ocasión va contar coles actuaciones de la banda llocal Caldo y Os Rabizos, pa depués siguir col grupu gallegu Fanfarria Taquikardia, compuestu por doce persones, que debuta n’Asturies tres llevar la so música per tola Península Ibérica. Los tamién gallegos Güintervan, cola so música balcánica, van ser los últimos en xubir al escenariu enantes de dar el pasu pinchadiscos Nochnepitche Esbilla.

  La xente que quiera acudir a estes actividaes dende fuera de Bual van disponer d’una zona d’acampada llibre y cubierta tanto’l vienres como’l sábadu pa evitar tener que garrar el coche de nueche.

Homenaxe a Otilia González y Luis da Veiga

  L’actu que va poner el ramu al Outono Cultural va ser un homenaxe a la muyer y al home exemplar del conceyu, previstu pal domingu a les 12.30 hores na praza da Igleisia. El reconocimientu va ser pa Otilia González, vecina de Froseira, anque natural d’Eilao, y Luis da Veiga, vecín de Brañadesella nacíu en Baxada.

  Otra manera, tres la esperiencia del añu pasáu, la organización va rifar una cesta de productos del país con comida y artesanía de les empreses Embutidos Pico de Fiel, Queixeiría d’Abredo, Queisos Ca Sanchu, Cosmética Terraveya, Cerveza Caleya, Güerta El Nocéu y Artesanía Verdenaz, asina como discos y llibros en gallego-asturiano, güevos de Pitasana, botelles de La Boalesa y artículos de Casa Severón de Navia, ente otros. Les papeletes yá tán a la venta en Bual y el sortéu va facese’l domingu 11.    Fonte: asturies.com

Les xornaes culturales 'Outono en Bual' de l'Asociación Xuvenil Mezá continúen medrando

Cartelu del VII Outono en Bual

   L’Asociación Xuvenil Mezá entama la sétima edición de les sos xornaes culturales con un programa percompletu. Esposiciones, talleres, conciertos, conferencies y gastronomía protagonicen un 'Outono en Bual' en medría que va desendolcase'l vienres y el sábadu nesta población del occidente.

   La inauguración d’esti “mini-festival autoxestionao de música, gastronomía, arte y lliteratura”, como indica la organización, va celebrase mañana a les 19 hores na Casa Cultura con una presentación de tolos actos previstos y de les dos esposiciones que van tar a disposición del públicu estos díes: ‘Paisaxes postindustriales: úa mirada al patrimonio esqueicido’, d’Andrés Rodríguez Monteavaro, y ‘Torbón de llume / Огненный дождь’, de Sveta Poutilina. Darréu, va actuar el grupu de folk gallegu Carricobanda, que debuta n’Asturies y que tien anguaño ente los sos componentes a Roi Sampedro, que fora músicu de Mezá.

   L’actividá del sábadu va principiar al meudía con un taller de cestes tradicionales de bringa a cargu de Verónica Álvarez, de Lláscara Xeoturismu y Desarrollu Rural, na que “vei enseñar al público cómo se fain as tradicionales paxas de toda a vida con texido vexetal”. Yá de tarde, a les 16 hores, Ramsés Ilesias va protagonizar un taller de baille tradicional de la zona Eo-Navia, eventu nel que pa participar ye necesario contar con delles nociones de baille. El turnu de les conferencies ta previstu pa les 17 hores, cuando Llorián García va falar de “Gaitas ouguidas, gaitas escuitadas. Celtismo, disciplina corporal y redefinición da escuita nel fenómeno das bandas de gaitas asturianas”, una charra dirixida a músicos tradicionales y al públicu que quiera conocer la filosofía d’una banda de gaites.

   A les 21 hores ta programada una cena nel institutu de Bual na que se van poder prebar productos del país y del llugar, cola opción d’escoyer ente un menú omnívoru o vexetariuanu. Los vales pa esta comida popular van tar a la venta mientres toles xornaes a un preciu de 10 euros. Pa zarrar l’actividá, va celebrase un conciertu nel Helenias da Frieira nel que van tomar parte Os Pampirolos, el grupu de gaitas de Grandas que repite nel Outono en Bua; Tuenda, el tríu formáu por Pepín de Muñalén, Xosé Antón Fernández ‘Ambás’ y Elías García; el grupu gallegu Chotokoeu, que vien de dar una xira per Europa; y Misiva, banda de punk-rock que ta anguaño llevando la so propuesta musical n’asturianu y castellanu a dellos puntos del Estáu.

Cola intención de dar vida al occidente del país
     Esti completu programa del VII Outono en Bual ayuda a afitar la idea cola que nacieron estes xornaes culturales nel 2008 col nome de 'Outono Cultural'. “El fin d’este proyecto é motivar y dar un pouco de vida al occidente asturiano y, sobre todo, espertar as mentes d'aquellos que pasan el día delantre da televisión y da cultura institucional. Tamén, este evento quer ser un acto de reivindicación das dúas llinguas tradicionales d'Asturias, el asturiano y el gallego-asturiano, y por esta razón faise tresversal el uso d’ellas nas xornadas, así como a posta en valor da cultura del país y da súa evolución nel siglo XXI, llonxe d’esteriotipos y de clichés impostos por ningún dogma oficial”, apunten dende l’Asociación Xuvenil Mezá.

   Toles actividaes son de baldre y la organización pon a disposición de los asistentes un aparcamientu pa caravanes y furgonetes, y una zona d’acampada atechada y con duches pa la nueche del sábadu. Otra manera, la organización entama la rifa d’una cesta con productos del país que va sortiase’l domingu. Ésta cuenta con productos de les empreses Embutidos Pico de Fiel, Queixeiría d’Abredo, Queisos Ca Sanchu, Cosmética Terraveya, Cerveza Caleya, Sidra L’Allume, Artesanía Verdenaz, discos y llibros en gallego-asturiano, una fotografía d’Andrés Rodríguez Monteavaro y güevos de Pitasana, ente otros productos.                   Fonte: asturies.com

L’Asociación Xuvenil Mezá entama per sestu añu un festival de música, arte y lliteratura en Bual

    L’Outono en Bual, denominación nueva que reciben les xornaes ‘Outono Cultural’, va celebrase esti vienres y sábadu. L’Asociación Xuvenil Mezá tien programaes delles actividaes nes que la música, l’arte y la lliteratura van ser protagonistes.

    Esti coleutivu mozu pretende con esta iniciativa nacida nel añu 2008 “motivar y dar un pouco de vida al occidente asturiano”, apostando por ufrir actividaes de baldre pese a nun recibir sofitu económicu nengún de Política Llingüística. “A cultura asequible pral público é a base da filosofía del Asociación Xuvenil Mezá, que xa ta conseguindo afianzarse y ferse un furaco dentro das entidades organizadoras d’eventos de relevancia cultural en Asturias”, apunten.

    L’actividá va principiar mañana, a les 19.30 hores, cola presentación de les xornaes na Casa Cultura de Bual, actu nel que ta prevista la presencia del alcalde, Antonio Barrietos, y dellos miembros de la organización. Darréu, a les 20 hores, el grupo de gaites Os Pampirolos de Grandas va tocar pelos chigres de la villa nuna folixa nomada ‘Pasa-pasabares 2013’. Va zarrar esti primer día del VI Outono en Bual, a partir de les 22.30 hores, un magosto nel Recinto Ferial de Bual de Riba que va tar amenizáu por Os Pampirolos.

    El sábadu va abrise col actu de presentación, previstu pal meudía, del llibru de Miguel Rodríguez Monteavaro ‘Todos os tristes de mayo’, que va tar conducíu por Esther Prieto, de Trabe. Yá de tarde, a les 17 hores, va celebrase la mesa redonda ‘Espacios colectivos en Asturias: La Madreña, La Casa Azul, Cambalache y La Semiente. Propostas y futuro’, cola presencia de Delfín Valdés, activista y músico de L’Entregu (La Semiente); d'Eva Martínez, colaboradora del Local Cambalache d’Uviéu; de Faustino Loi, de La Casa Azul de Navia; y de Jara Coscuruella, una de les responsables del CSOA La Madreña d’Uviéu. Tres la charra, a les 19.30 hores, Mapi Quintana y Elías García, dúu qu’amiesta jazz con tradición asturiana que ta trabayando nel so primer discu, va ufrir un conciertu íntimu.

Actuaciones a partir de les 00.30 hores     Pa zarrar el VI Outono en Bual, l’Asociación Xuvenil Mezá entama un 'cenador' con precios populares –con menú vexetarianu y pa neños y neñes–, a partir de les 22 hores, y un conciertu nel Recinto Ferial de Bual de Riba, coles actuaciones previstes de La Tarrancha –que repiten depués del ésitu del añu pasáu– y los madrilanos Skainhead na so primer visita al occidente del país. Esti grupu, formáu nel 2007, tien la mesma filosofía que la banda de mecigayu-ska, al apostar pola espublización de los sos dos trabayos baxo una llicencia llibre.              Fonte:  Asturies.com

Bual acueye la quinta edición del Outono Cultural

Bual acueye la quinta edición del Outono Cultural

    Esti sábadu, 8 d’avientu, l’Asociación Xuvenil Mezá, va celebrar en Bual la cuarta edición del Outono Cultural, mini-festival de música, arte y lliteratura que tien como fin “motivar y dar un poco de vida al occidente asturianu”. Na inauguraicón van participar Andrés Rodríguez Monteavaro, miembru organizador de l'Asociación Xuvenil Mezá; José Antonio Barrientos, alcalde de Bual y Xosé Antón Fernández «Ambás», personaxe bien relevante nel ámbitu de la cultura tradicional asturiana. Dempués d’esti actu protocolariu van entamar los actos cola ponencia de Llorián García Flórez titulada «Gaiteiras y pandereteiros. Xénero, tresxénero y poder na música tradicional asturiana», que tien que ver col so trabayu de tesis dientro de Musicoloxía de la Universidá d’Uviéu.

    Pela tarde van concertrase la mayor parte de los actos. A les seis va celebrase la charra titulada «A morte del mundu rural n'Asturias» de Gerardo Fernández, activista y teóricu de la zona rural asturiana. Dempuéss de la conferencia vien la música: prmeiro va tocar l’acurdionista ñacíu na Ronda (Bual) Alejandro Martínez Llabres, reputáu artista dientro del panorama de la música del Conservatoriu n'Asturies y ganador del primer premiu nel 53u Certame Nacional d'Acurdión na categoría Senior Clásica celebráu n'Ourense en xunetu de 2010.

    El segundu de los conciertos va ser el del tríu de jazz asturianu formáu por Mapi Quintana, Michael Llee Wolfe y Jacobo de Miguel. Esti grupu renovador de la música n'asturianu ta na so xira de presentación del discu “Xota pa tres”, trabayu que recibió esti añu una gran aceptación per parte de la crítica y del públicu en xeneral.

    Dempués, pela nueche, na Discoteca Benymar, tocará’l grupu de «mecigaya-ska» La Tarrancha , qu’aportará a Bual pa presentar el so discu nuevu “Mecigayuska”. Al remate del alcuentru va cuntase con una escoyeta de música reggae, ska y otres sorpreses cola participación del pinchadiscos Rafa R. Valdés, más conocíu pol alcuñu d’El Corrector, nome del programa de radio que dirixe en Radio Kras.

    Tolos actos van facese na Casa Cultura de Bual, sacantes los nocherniegos, que van facese na Discoteca Benymar.

    Na financiación del actu collaboren el Conceyu de Bual (con parte d’aportación económica propia y con una ayuda del Gobiernu d’Asturies), la Caxa Rural, l'Asociación d’Hosteleiros de Bual y dalgún de los chigres y establecimentos de la zona.

    Programa completu del V Outono Cultural:
12:00. Entamu de les xornaes con Xosé Antón Fernández «Ambás» y representación del Conceyu
12:30. Llorián García Flórez: «Gaiteiras y pandereteiros. Xénero y tresxénero na música tradicional asturiana»
18:00. Gerardo Fernández: «A morte del mundo rural n'Asturias»
19:30. Alcuerdo: Alejandro Martínez Llabres
20:15. Alcuerdo: Mapi Quintana, Jacobo de Miguel y Michael Llee Wolfe.
00:30. Alcuerdo: La Tarrancha + pinchada de vinilos con El Corrector.

Fonte:  Asturnews.